E nafea te ite i te feruri e tiai ai ia outou?

E TAOˈA umere-rahi-hia te mau aru teitei roa, no te mau ihitai râ, mea atâta ïa. E nehenehe ratou e faaû i te pohe no taua mau vavea ra.

Na reira atoa, e nehenehe te mau tavini a te Atua e faaû atu i te mau faaheporaa e rahi noa ˈtura e te haamǎtaˈu i te haapoˈi ia ratou. Ua ite paha outou e e faateimaha te pueraa are o te mau tamataraa e te mau faahemaraa i te mau Kerisetiano. E hinaaro mau â outou ia ore roa ˈtu te reira no ta outou faaoti-maite-raa e ape i te iriraa pae varua. (Timoteo 1, 1:19) Ua riro te ite i te feruri ei tuhaa faufaa roa o to outou paruru. Eaha te reira, e e nafea te reira e noaa mai ai?

No roto mai te taˈo Hebera i hurihia ei “ite i te feruri,” mezim·mahʹ, i te hoê taˈo tumu “e faanaho aore ra e opua” te auraa. (Maseli 1:4, MN) No reira te tahi mau Bibilia e huri ai i te mezim·mahʹ ei “haapao maitai” aore ra ei “ite atea.” Ua faataa te mau aivanaa Bibilia ra o Jamieson, Fausset e o Brown i te mezim·mahʹ mai te “ara-maitai-raa e noaa ˈi i te ape i te ino e te ite i te maitai.” E titau te reira ia haapao maitai i te mau faahopearaa o ta tatou mau ohipa no a muri aˈe e oia atoa no teie nei iho. Mai te peu e ua ite tatou i te feruri, e haapao maitai tatou i ta tatou mau maitiraa hou a haa ˈi, ia titauhia iho â râ ia rave tatou i te mau faaotiraa faufaa.

Ia rave te hoê taata o te ite i te feruri i te mau faaotiraa no a muri aˈe aore ra no nia i te tahi mau huru tupuraa to ˈna i teie nei, e hiˈo maitai na mua oia i te mau vahi atâta aore ra te mau marei. Ua taa maitai anaˈe te mau mea atâta e nehenehe e tupu mai, e imi oia e nafea oia ia ape atu, a haamanaˈo atoa ˈi i te mana o te mau mea e haaati ra ia ˈna e o to ˈna mau hoa. E nehenehe ïa ta ˈna e faataa i te haerea o te horoa mai i te faahopearaa maitai, e peneiaˈe atoa te mau haamaitairaa a te Atua. E hiˈopoa anaˈe i te tahi mau hiˈoraa taa maitai no nia i te huru raveraa.

E ape anaˈe i te marei o te taatiraa morare ore

Ia turai te mataˈi i te mau aru puai i nia i te reimua o te hoê poti, e faataahia te reira mai te miti na mua mai. E nehenehe te poti e tahuri ia ore te mau ihitai ia faatere atu no te faaû i te mau are e na mua maira.

Te farerei ra tatou i te hoê â huru tupuraa i te mea e te ora nei tatou i roto i te hoê ao maamaahia i te taatiraa pae tino. I te mau mahana atoa, te faaû ra tatou i te mau aru o te mau manaˈo e te mau hohoˈa pae tino. Eita e tia ia tatou ia tâuˈa ore i te faahopearaa o te reira i nia i to tatou mau hinaaro au noa i te pae taatiraa. E tia ia tatou ia faaohipa i te ite i te feruri e ia faaruru maite i te faahemaraa, eiaha râ ia topa noa ˈtu i roto i te mau huru tupuraa atâta.

Ei hiˈoraa, e pinepine te mau tane Kerisetiano i te rave i te ohipa e te feia aita e faatura rahi ra i te mau vahine, a faariro ai ia ratou ei tapao noa no to ratou hinaaro e taati. E faaô mai paha te  mau hoa ohipa i te tahi mau parau hauti faufau e te tahi mau manaˈo rii no nia i te taatiraa i roto i ta ratou mau aparauraa. E nehenehe teie huru tupuraa e oomo mai i te pae hopea i te mau manaˈo morare ore i roto i te feruriraa o te hoê Kerisetiano.

Mea titau-atoa-hia paha ia rave te hoê vahine Kerisetiano i te ohipa, e no reira, e farerei atoa oia i te mau fifi. E rave paha oia i te ohipa e te mau tane e te mau vahine o te ore e farii i ta ˈna mau ture aveia. Te faahinaaro ra paha hoê o to ˈna mau hoa ohipa tane ia ˈna. I te omuaraa, e haa paha oia i nia ia ˈna ma te haapao maitai, ma te faatura atoa ia ˈna no ta ˈna mau tiaturiraa faaroo. E nehenehe to ˈna haapao maitai tuutuu ore e to ˈna vai-piri-noa-raa mai e turai ia ˈna ia hinaaro e faahoa ˈtu â.

Ei Kerisetiano, e nafea te ite i te feruri e tauturu mai ai i roto i taua mau huru tupuraa ra? A tahi, e faaara mai te reira no nia i te mau mea atâta i te pae varua, e a piti, e turai te reira ia opua tatou i te haerea e tano. (Maseli 3:21-23) I roto i te mau huru tupuraa mai teie, e tia ia faataa papu maitai i te mau hoa ohipa e mea ê ta outou mau ture aveia no ta tatou mau tiaturiraa bibilia. (Korinetia 1, 6:18) E nehenehe ta tatou mau parau e to tatou haerea e haapapu i ta tatou i faaite. Hau atu â, mea titauhia paha ia taotia i te mau amuimuiraa e te tahi mau hoa ohipa.

Aita râ te mau faahemaraa morare ore i taotiahia i te vahi raveraa ohipa noa. E tupu atoa mai ia vaiiho te mau hoa faaipoipo ia haaparuparu te mau fifi i to raua tahoêraa. Ua tapao te hoê tiaau ratere e: “Eita te hoê faaipoiporaa e hope noa mai tera. E atea mǎrû noa ˈtu na hoa faaipoipo te tahi i te tahi, a varavara ˈi i te paraparau te tahi i te tahi aore ra i te apiti te tahi i te tahi. E tapi paha raua i te mau taoˈa materia no te huna i te moemoe o to raua faaipoiporaa. E no te mea e varavara raua i te haapopou te tahi i te tahi, e nehenehe e tupu mai to raua anaanatae i te tahi atu tane aore ra vahine.”

Ua na ô â teie tavini î i te paari e: “E tia i na hoa faaipoipo ia parahi pinepine i raro e ia paraparau aita anei te tahi mea e haapeapea ra i to raua taairaa. E tia ia raua ia faanaho e nafea raua ia haapii, ia pure, e ia poro amui. E faufaa-rahi-hia raua ia paraparau te tahi i te tahi ‘i roto i te fare, na te eˈatia, e ia taoto raua, e ia tia mai raua i nia,’ mai te mau metua e te mau tamarii.”—Deuteronomi 6:7-9.

E faaruru anaˈe i te haerea Kerisetiano ore

Taa ê atu i te tautururaa mai ia faaû i te mau faahemaraa morare ma te manuïa, e nehenehe atoa te ite i te feruri e tauturu mai ia faaruru i te mau fifi e te mau hoa Kerisetiano. Ia turai te mataˈi i te mau aru i nia i te reimuri o te poti, e tupu mai tei parauhia te miti na muri atu. E nehenehe te mau aru e haamaraa i te reimuri e e turai i te reira. E tuu te reira i te aoao o te poti i te pae vavea, mea atâta hoi te reira.

E nehenehe atoa tatou e roohia i te ati na te hoê pae manaˈo-ore-hia mai. E tavini tatou ia Iehova “ma te aau hoê” e to tatou mau taeae e tuahine Kerisetiano e rave rahi. (Zephania 3:9) Ia haa hoê ma te huru Kerisetiano ore, e riro paha mai te hoê muturaa o te tiaturi e ei peapea rahi no tatou. E nafea te ite i te feruri e tapea ˈi ia ore tatou ia aueue e ia mauiui rahi roa?

A haamanaˈo e ‘aita e taata e ore e hara.’ (Mau arii 1, 8:46) Eiaha ïa tatou ia maere e, i te tahi taime, e haapeapea mai aore ra e haamaheaitu te hoê taeae ia tatou. Ma te ite i te reira, e nehenehe tatou e faaineine e e feruriruri e nafea tatou ia tae i taua taime ra. Ua nafea te aposetolo Paulo i to te tahi mau taeae Kerisetiano to ˈna, paraparauraa no nia ia ˈna ma te haamauiui e te vahavaha? Aita oia i aueue i te pae varua, ua faaoti râ oia e mea faufaa aˈe ia noaa mai te farii maitai a Iehova i ta te taata. (Korinetia 2, 10:10-18) E tauturu taua huru feruriraa ra eiaha tatou ia haa oioi roa ia haapeapeahia tatou.

E au rii te reira mai te huru ra e ua tano to tatou manimani avae. Ia tupu te reira, eita to tatou feruriraa e afaro maitai hoê aore ra e piti minuti. Ua mǎrû anaˈe râ te mauiui, i reira tatou e feruri e e haa ˈi ma te au noa. Oia atoa, eiaha tatou ia haa oioi noa i mua i te hoê parau aore ra i te hoê ohipa. E faaea rii anaˈe râ e e haapao maitai anaˈe i te mau faahopearaa o te tahoo feruri-ore-hia.

 Te faataa ra o Malcolm, mitionare e rave rahi matahiti i teie nei, eaha ta ˈna e rave ia haamaheaituhia oia. “Te mea matamua ta ˈu e rave, o te hiˈo-faahou-raa ïa i te hoê tapura uiraa: Te riri ra anei au i to ˈu taeae no te mea te faaûû ra to mâua huru taata? Mea faufaa mau anei te mea ta ˈna i parau? Te faarahi ra anei te mau faahopearaa o te malaria i nia i to ˈu mau uaua uira, i to ˈu mau huru aau? E taui anei to ˈu manaˈo i roto tau hora?” E pinepine, mai ta Malcolm i ite mai, e ere te peapea i te mau faufaa e e nehenehe e haamoe atu. a

Te na ô râ o Malcolm e: “I te tahi taime, noa ˈtu ta ˈu mau tutavaraa atoa i te faatitiaifaro i te fifi, e vai noa te riri o te tahi atu taeae. E tamata vau eiaha te reira ia haapeapea mai. Ua rave anaˈe au i te mau mea atoa i tia ia ˈu, e taui to ˈu manaˈo i taua mea ra. I roto i to ˈu feruriraa, e tuu vau i taua mea ra i te hiti mai te hoê tumu parau ru ore, eiaha râ mai te hoê mea e tia ia ˈu ia haapao atu. Eita vau e vaiiho ia faatopa te reira ia ˈu i te pae varua aore ra ia tuino i to ˈu taairaa e Iehova e e to ˈu mau taeae.”

Mai ia Malcolm, eiaha tatou ia vaiiho i te haerea ino o te hoê taata ia haapeapea rahi roa ia tatou. I roto i te mau amuiraa atoa, te vai ra te mau taeae e te mau tuahine haapao maitai e te au mau. Mea oaoa roa ia haere na nia i te eˈa Kerisetiano “i pihai iho” ia ratou. (Philipi 1:27, MN) Ia haamanaˈo tatou i te tamahanahanaraa î i te here o to tatou Metua i te raˈi, e tauturu atoa te reira ia tano noa to tatou feruriraa i te mau mea.—Salamo 23:1-3; Maseli 5:1, 2; 8:12.

Eiaha tatou ia hinaaro i te mau mea a teie nei ao

E nehenehe te ite i te feruri e tauturu mai i te faaruru i te tahi atu faaheporaa huru huna. Ia  turai te mataˈi i te mau aru i nia i te pae aoao o te pahi, e parauhia e miti aoao. Ia au noa te reva, e nehenehe taua miti ra e faatipuu mǎrû noa i te pahi i to ˈna eˈa mau. I roto râ i te hoê vero, e nehenehe te hoê miti aoao e faatahuri i te poti.

Oia atoa, ia hema tatou i te faaheporaa e fanaˈo i te mau mea atoa ta teie nei ao ino e pûpû, e nehenehe to ˈna huru oraraa nounou taoˈa e faatipuu ia tatou i te pae varua. (Timoteo 2, 4:10) Eita anaˈe e haavîhia, e nehenehe te hinaaro i teie nei ao e turai ia tatou i te pae hopea ia faarue roa ino i to tatou eˈa Kerisetiano. (Ioane 1, 2:15) E nafea te ite i te feruri e tauturu mai ai?

A tahi, e tauturu te reira ia faito maitai tatou eaha te mau mea atâta ta tatou e farerei atu. E faaohipa te ao i te mau ravea hoohooraa paari atoa e vai ra no te faahema mai. E faatianiani tamau noa te reira i te hoê huru oraraa e parauhia ra e e tia i te taata atoa ia tapi—te huru oraraa faaahaaha o te feia taoˈa rahi, te hinuhinu, e tei “manuïa.” (Ioane 1, 2:16) E tǎpǔhia mai te umere e te farii maitai a te taata atoa, a to tatou iho â râ mau hoa e feia tapiri. E tauturu mai te ite i te feruri ia patoi i teie faatianianiraa, ma te haamanaˈo mai i te faufaaraa o te “parahiraa nounou taoˈa ore,” i te mea e ua tǎpǔ Iehova e ‘e ore roa oia e faarue ia tatou.’—Hebera 13:5.

A piti, e tapea te ite i te feruri eiaha tatou ia pee i te feia tei “ohipa ê aˈenei i te parau mau.” (Timoteo 2, 2:18) Mea fifi roa hoi ia patoi i te feia ta tatou i au e i tiaturi. (Korinetia 1, 15:12, 32-34) Noa ˈtu e e ohipa rii noa te feia e ere i te Kerisetiano faahou i nia ia tatou, e nehenehe te reira e faataupupu i to tatou haereraa i mua i te pae varua e i te pae hopea, e faaû tatou i te ati. E nehenehe tatou e riro mai te hoê pahi o te tipuu rii noa i to ˈna eˈa mau. I muri aˈe i te hoê tere roa, e nehenehe te pahi ra e atea ê roa i to ˈna tapaeraa.—Hebera 3:12.

E tauturu te ite i te feruri ia faataa teihea tatou i te pae varua e te haere ra tatou ihea. Peneiaˈe te ite ra tatou e mea titauhia ia apiti maite atu â tatou i roto i te mau ohipa Kerisetiano. (Hebera 6:11, 12) A tapao na mea nafea to te hoê taurearea Ite faaohiparaa i te ite i te feruri no te tapi i te mau fa pae varua: “I nehenehe na ta ˈu e tapi i te toroa papai vea. Te anaanatae mau ra vau i te reira, ua haamanaˈo râ vau i te irava i roto i te Bibilia e na ô ra e ‘te mou nei hoi teie nei ao, . . . o tei haapao râ i to te Atua ra hinaaro, e tia ïa i te oraraa e a muri noa ˈtu.’ (Ioane 1, 2:17) Ua feruri au e e tia ia ˈu ia ora ia au i ta ˈu mau tiaturiraa. Ua faarue to ˈu na metua i te faaroo Kerisetiano, aita râ vau i hinaaro e pee i to raua hiˈoraa. No reira vau i faaoti ai e ora i te hoê oraraa faufaa e i rave ai i te taviniraa taime taatoa ei pionie tamau. I muri aˈe e maha matahiti mauruuru mau, ua ite au e ua rave au i te maitiraa maitai.”

E faaruru anaˈe i te mau vero pae varua ma te manuïa

No te aha e mea ru ai ia faaohipa tatou i te ite i te feruri i teie tau? E tia i te mau ihitai ia ara maitai i te mau tapao o te fifi, ia haamata iho â râ te vero i te tupu mai. Ia topa te anuvera e ia puai mai te mataˈi, e tamau ratou i te mau opani haere i raro e e faaineine no te taime ino roa ˈˈe. Na reira atoa, e tia ia tatou ia faaineine i te faaruru i te mau faaheporaa puai roa ino a tae noa ˈtu ai teie faanahoraa ino i to ˈna hopea. Te afâ noa ˈtura te niu morare o te huitaata e ‘te rahi noa ˈtura te ino o te mau taata iino.’ (Timoteo 2, 3:13) Mai te mau ihitai o te faaroo tamau i te mau haapurororaa no nia i te huru o te reva, e tia ia tatou ia haapao i te mau faaararaa parau tohu o te Parau faauruahia a te Atua.—Salamo 19:7-11.

Ia faaohipa tatou i te ite i te feruri, te faaohipa ra tatou i te ite o te aratai atu i te ora mure ore ra. (Ioane 17:3) E nehenehe tatou e ite atea i te mau fifi e e faaoti e nafea ia faaruru atu. E opua maite ïa tatou eiaha ia haafariu-ê-hia i te eˈa Kerisetiano, e e nehenehe tatou e haamau i “te maitai tumu no . . . a muri atu” na roto i te haamauraa e te tapiraa i te mau fa pae varua.—Timoteo 1, 6:19.

Ia atuatu tatou i te paari nanonano e te ite i te feruri, eita tatou “e mǎtaˈu i te haamǎtaˈu ia faauˈana mai.” (Maseli 3:21, 25, 26) Eita, e tamahanahanahia râ tatou e te parau fafau a te Atua: “Ia ô mai te paari i roto i to aau na, e ia riro te ite ei mea maitai ia oe ra; na te haapao maitai e tiai ia oe i reira.”—Maseli 2:10, 11.

[Nota i raro i te api]

[Hohoˈa i te api 23]

E haamaitai te aparauraa tamau i te faaipoiporaa