Ia vai outou e taiva ore ai?

“No ˈu teie fenua: . . . Ia tano noa oia; ia tano aore ra ia hape oia, no ˈu teie fenua.”—Stephen Decatur, ofitie ihitai Marite, 1779-1820.

AITA e feaaraa, o te taiva ore i to ratou fenua te hopoia faufaa roa ˈˈe no te taata e rave rahi. E taui rii paha te tahi atu i ta Stephen Decatur parau, ‘Na ˈu teie haapaoraa, ia tano noa oia; ia tano aore ra ia hape oia, na ˈu teie haapaoraa.’

Ma te manaˈo tano, e pinepine te fenua aore ra te haapaoraa o te titau mai i to tatou taiva ore i te faataahia e to tatou vahi fanauraa, tera râ, eita te faaotiraa ia vai tatou e taiva ore ai e rave-noa-hia mai tera, mea faufaa roa hoi te reira. E titauhia te itoito no te faahohonu i to tatou taiva ore, teie râ, e tupu atoa te fifi.

Te hoê tamataraa i te taiva ore

Te parau ra te hoê vahine i paari i Zambie e: “Mea au roa na ˈu te haapaoraa mai to ˈu apîraa mai â. Te pureraa i te mau mahana atoa i roto i te piha haamoriraa a te utuafare, te haapaoraa i te mau oroa faaroo, e te haere-tamau-raa i te  fare pure, o te tahi ïa tuhaa teie o ta ˈu haapiiraa. Mea piri roa ta ˈu haapaoraa e ta ˈu haamoriraa i to ˈu taˈere, to ˈu tuhaa oire, e to ˈu utuafare.”

Teie râ, i te piti ahuraa o to ˈna matahiti, ua haapii oia i te Bibilia e te mau Ite no Iehova e i muri rii noa ˈˈe, ua faaoti oia e taui i ta ˈna haapaoraa. Ua taiva anei oia?

Ua paari o Zlatko i Bosnie, e no te hoê taime, tei roto atoa oia i te aroraa o tei vavahi i to ˈna fenua tumu. Ua haapii atoa oia i te Bibilia e te mau Ite no Iehova. I teie nei, te patoi ra oia i te faaohipa i te mauhaa tamaˈi no te pupuhi i te taata. Te taiva ra anei oia?

Ua taaihia ta outou pahonoraa i teie nau uiraa i to outou manaˈo. Te na ô ra te vahine i faahitihia aˈenei e: “I roto i to ˈu tuhaa oire, mea haama ia taui te hoê i ta ˈna haapaoraa; e au te reira i te hoê ohipa taivaraa, te hoê haavare i to ˈna utuafare e to ˈna tuhaa oire.” Oia atoa no te mau hoa faehau tahito o Zlatko, e haavare te taata e patoi i te aro i pihai ia ratou. No taua vahine ra râ e no Zlatko, na te huru taiva ore teitei aˈe—te taiva ore i te Atua—e turai ra i ta raua mau ohipa. Te mea faufaa ˈtu â, eaha to te Atua manaˈo i te feia e hinaaro e taiva ore ia ˈna?

E faaiteraa te taiva ore mau i te here

Teie ta te arii Davida i parau i te Atua ra o Iehova: “I te feia e [taiva ore] ra, e [taiva ore] atoa oe.” (Samuela 2, 22:26; MN) Te horoa ra te taˈo Hebera i hurihia ei “taiva ore” i ǒ nei i te manaˈo o te aau maitai o te apiti atu ma te here i te hoê mea e tae roa i te taime e raea ˈi te tapao o taua mea ra. Mai te huru o te hoê metua vahine e to ˈna aiû, mea here na Iehova te feia e taiva ore ia ˈna. I ta ˈna mau tavini taiva ore i Iseraela i tahito ra, teie ta Iehova i parau: “E moe anei te aiû i te metua vahine mau iho; e aitâ ˈtura e ite i te aroha i te tamaiti no to ˈna iho opu? e, e moe â ïa ia ˈna; eita râ oe e moe ia ˈu.” (Isaia 49:15) Te haapapu ra Iehova i te feia e hinaaro e tuu i te taiva ore ia ˈNa i nia ˈˈe i te mau mea atoa e e haapao oia ia ratou ma te here.

Ua niuhia te taiva ore ia Iehova i nia i te aroha. E turai te reira i te hoê taata ia hinaaro i ta Iehova e hinaaro e ia riri i te mau mea iino ta Iehova e riri. (Salamo 97:10) I te mea o te aroha te huru maitai rahi o Iehova, e tauturu ïa te taiva ore i te Atua i te tapea i te hoê taata eiaha e rave ino ia vetahi ê. (Ioane 1, 4:8) Mai te peu e e taui te hoê taata i ta ˈna mau tiaturiraa faaroo no to ˈna taiva ore i te Atua, e ere ïa te auraa e aita o ˈna e here faahou ra i to ˈna utuafare.

E puai maitai te taiva ore i te Atua

Te faataa ra te vahine i faahitihia aˈenei i to ˈna tupuraa: “Na roto i ta ˈu haapiiraa bibilia, ua itea mai ia ˈu e o Iehova te Atua mau, e ua faatupu vau i te taairaa piri e o ˈna. E ere o Iehova mai te mau atua ta ˈu i haamori na; mea vai faito roa oia i te pae o te aroha, te parau-tia, te paari, e te puai. I te mea e te titau ra Iehova e ia haamori ia ˈna anaˈe ra, ua tia ia ˈu ia faarue i te tahi atu mau atua.

“Ua parau noa mai to ˈu nau metua e aita roa ˈtu raua e mauruuru ra ia ˈu e ua inoino roa raua. Mea fifi roa te reira no ˈu, no te mea e mea faufaa na ˈu ta raua parau faatia. A haere riirii ai râ vau i mua i roto i te ite i te parau mau bibilia, ua taa-maitai-hia ˈtura eaha ta ˈu e maiti. Eita ta ˈu e nehenehe e faarue ia Iehova.

“I to ˈu maitiraa i te taiva ore ia Iehova eiaha i te mau tutuu faaroo, e ere ïa te auraa e te taiva ra vau i to ˈu utuafare. Te tutava ra vau i te faaite ia ratou na roto i te parau e te ohipa e te taa ra ia ˈu to ratou manaˈo. Ia taiva râ vau ia Iehova, te tapea ra ïa vau i to ˈu utuafare eiaha e ite ia ˈna, e e riro te reira ei ohipa taivaraa mau.”

E ere atoa te hoê taata i te taata haavare ia titau te taiva ore i te Atua ia ˈna eiaha e amui i roto i te poritita e eiaha e rave i te mauhaa tamaˈi no te pupuhi ia  vetahi ê. Teie te faataaraa a Zlatko i ta ˈna i rave: “Noa ˈtu e ua arataihia vau ei Kerisetiano iˈoa noa, ua faaipoipo vau i te hoê vahine ê roa. I te tupuraa te tamaˈi, ua titau mai na pae e piti i to ˈu taiva ore. Ua faahepohia vau ia maiti i te pae ta ˈu e paruru. Ua apiti au i roto i te tamaˈi e toru matahiti e te afa i te maoro. Ua horo ê atura mâua ta ˈu vahine i Croatie, i reira to mâua farereiraa i te mau Ite no Iehova.

“Na roto i ta mâua haapiiraa bibilia, ua taa ia mâua e o Iehova te ihotaata matamua roa e tia ia mâua ia taiva ore e te hinaaro ra o ˈna ia aroha mâua i to mâua taata-tupu noa ˈtu eaha ta ˈna haapaoraa aore ra to ˈna nunaa. I teie nei, ua hoê mâua ta ˈu vahine i roto i ta mâua haamoriraa ia Iehova, e ua haapii au e eita ta ˈu e nehenehe e taiva ore ia Iehova e e aro i to ˈu taata-tupu.”

Te taiva ore i haapiihia i te ite mau

I te mea e o Iehova to tatou Atua Poiete, mea tano ia na nia ˈˈe te taiva ore ia ˈna i te tahi atu mau mea atoa e titau mai i to tatou taiva ore. (Apokalupo 4:11) Teie râ, ia ore te taiva ore i te Atua ia riro ei puai maamaa e te ino, mea titauhia ia haapiihia te reira ia au i te ite mau. Te aˈo maira te Bibilia e: ‘Ia faaapîhia outou i roto i te puai e turai ra i to outou huru feruriraa, e ia ahu i te huru taata apî o tei poietehia ia au i te hinaaro o te Atua i roto i te taiva ore mau.’ (Ephesia 4:23, 24, MN) Aita te taata tuiroo, o tei papai i teie mau parau faauruahia, i taiâ ia faahohonu i te taiva ore tei haapiihia ia ˈna. Ua aratai ta ˈna faahohonuraa ia ˈna i te hoê tauiraa maitai.

Oia, ua tamatahia te taiva ore o Saulo, mai e rave rahi i to tatou nei tau. Ua arataihia o Saulo i roto i te tutuu etaeta a to ˈna utuafare, e ua riro mai oia ei taata taiva ore roa i ta ˈna haapaoraa tumu. Ua turai atoa te taiva ore i ta ˈna mau tapao faaroo ia ˈna ia rave i te mau ohipa haavî uˈana i nia i te feia aita i farii i to ˈna manaˈo. Mea matauhia o Saulo no te tomo i roto i te fare o te mau Kerisetiano e no te arato ia ratou i rapae no te faautua e no te haapohe atoa ia ratou.—Ohipa 22:3-5; Philipi 3:4-6.

Teie râ, i te noaaraa mai iho â ia Saulo te ite mau i te Bibilia, ua rave oia i te hoê ohipa aita roa ˈtu to ˈna mau apiti e rave rahi i manaˈo noa ˈˈe. Ua taui oia i ta ˈna haapaoraa. Ua maiti o Saulo, tei matauhia i muri aˈe mai te aposetolo Paulo, i te taiva ore i te Atua eiaha râ i te tutuu. Ua turai te taiva ore i te Atua niuhia i nia i te ite mau ia Saulo ia faaoromai, ia aroha, e ia faaitoito, tei taa ê roa hoi i to ˈna huru ino e te maamaa i mutaa iho.

No te aha e taiva ore ai?

Mea papu e e hopoi mai te vaiihoraa e ia haapiihia to tatou taiva ore i te mau ture aveia a te Atua, i te maitai. Ei hiˈoraa, te faahiti ra te hoê parau faataa 1999 a te pu maimiraa utuafare no Auteralia, e i rotopu i te mau manaˈo tumu no te faaipoiporaa maoro e te oaoa, te vai ra “te tiaturiraa e te haapao maitai . . . [e] te hoê manaˈo pae varua.” Ua itea mai i taua noâ maimiraa ra e e tauturu “te faaipoiporaa maoro e te oaoa” i  te mau tane e te mau vahine ia riro ei mea oaoa aˈe, te oraora maitai aˈe, e te ora maoro aˈe e e horoa te faaipoiporaa aueue ore i te ravea ia fanaˈo te mau tamarii i te hoê oraraa oaoa.

I roto i teie nei ao papu ore, e au te taiva ore i te hoê taura i taamuhia i nia i te hoê taata e faaitoito ra i te au e i nia i te hoê pahi. Mai te peu e aita e taiva ore to te ‘taata au,’ e taueuehia ïa oia e te are e te mataˈi. Mai te peu râ e ua hape to ˈna taiva ore, mai te huru ra e ua taamuhia to ˈna taura i nia i te hoê pahi e tomo ra. Mai ia Saulo, e nehenehe oia e turaihia ia rave i te hoê haerea ino. Teie râ, ua riro te taiva ore ia Iehova, tei niuhia i nia i te ite mau, ei taura o te horoa mai i te aueue ore e o te aratai i te ora.—Ephesia 4:13-15.

Te fafau ra Iehova i teie parau i te feia e taiva ore ia ˈna e: “E mea au hoi na Iehova te parau-tia, e ore hoi oia e faarue i tana feia [taiva ore] ra. E vai â ratou e a muri noa ˈtu.” (Salamo 37:28; MN) E fatata te feia taiva ore atoa ia Iehova i te parahi i nia i te hoê fenua paradaiso, i reira ratou e tiamâ ˈi i te oto e te mauiui e e fanaˈo ai i te taairaa mure ore aita e amahamaharaa poritita e te faaroo i roto.—Apokalupo 7:9, 14; 21:3, 4.

I teie nei â mahana, ua itea mai i te mau mirioni taata na te ao nei te oaoa mau no ǒ mai i to ratou taiva ore ia Iehova. No te aha e ore ai e ani i te mau Ite no Iehova ia tauturu ia outou ia hiˈopoa i to outou manaˈo no nia i te taiva ore ia au i te maramarama o te parau mau bibilia? Te na ô maira te Bibilia e: “E imi maite ia outou iho i to outou faaroo; e hiˈopoa maite ia outou iho.”—Korinetia 2, 13:5.

Eiaha e taiâ ia faahohonu i to tatou faaroo e no te aha tatou e taiva ore ai, e hoona rahi hoi to te mau haamaitairaa i to te mau tutavaraa, ia haafatata ˈtu â tatou i te Atua ra o Iehova. Te faaite ra te vahine i faahitihia aˈenei i te manaˈo o te taata e rave rahi ia parau oia e: “Ua haapii au e e tauturu mai te taiva ore ia Iehova e i ta ˈna mau ture aveia, ia vai faito noa i roto i to tatou mau taairaa e to tatou utuafare e ia riro mai ei melo maitai aˈe o te tuhaa oire. Mai te peu e e taiva ore tatou ia Iehova, e riro noa ïa oia ei mea taiva ore ia tatou, noa ˈtu eaha te fifi o te mau tamataraa.”

[Hohoˈa i te api 6]

Ua turai te ite mau ia Saulo ia taui i te tumu o to ˈna taiva ore

[Hohoˈa i te api 7]

No te aha e ore ai e hiˈopoa i to outou taiva ore ia au i te maramarama o te parau mau bibilia?

[Faaiteraa i te fatu o te hohoˈa i te api 4]

Churchill, i nia pae aui: U.S. National Archives photo; Joseph Göbbels, pae atau roa: Library of Congress