Mau uiraa a te feia taio

Eaha te aratairaa ta te mau Papai e horoa ra no nia i te faaineineraa i te tamarii mai te peu e e Ite no Iehova hoê o na metua e piti?

Te horoa ra e piti faaueraa tumu bibilia faufaa i te aratairaa no nia i te faaineineraa i te tamarii na te hoê metua Ite e ere te hoa faaipoipo i te Ite. Te hoê oia ïa: “O te Atua [ei upoo faatere] ta matou e faaroo e tia ˈi eiaha te taata.” (Ohipa 5:29; MN) Teie te tahi atu: “O te tane . . . to te vahine ra upoo, mai te Mesia atoa ra ei upoo ïa no te ekalesia.” (Ephesia 5:23) E au te piti o te irava eiaha noa i te mau vahine e Ite te tane, i te mau vahine atoa râ e ere to ratou hoa faaipoipo i te Ite. (Petero 1, 3:1) E nafea te hoê metua Ite ia haapao ma te faito noa i teie mau faaueraa tumu ia haapii oia i ta ˈna mau tamarii?

Mai te peu e e Ite no Iehova te tane, na ˈna te hopoia e horoa i te mau mea pae varua e materia na to ˈna utuafare. (Timoteo 1, 5:8) Noa ˈtu e e horoa rahi te metua vahine tiaturi ore i te taime no ta raua mau tamarii, e tia i te metua tane Ite ia haapii i ta ˈna mau tamarii ma te horoa i te faaineineraa pae varua i te fare e ma te afai ia ratou i te mau putuputuraa Kerisetiano, i reira ratou e faufaahia ˈi i te haapiiraa morare e te amuimuiraa maitai.

Eaha ïa mai te peu e e onoono ta ˈna vahine tiaturi ore e afai i ta raua mau tamarii i ta ˈna vahi haamoriraa aore ra e haapii i ta ˈna mau tiaturiraa ia ratou? E faatia paha te ture o te fenua ia na reira oia. Ia hema te mau tamarii i te mau ohipa haamoriraa i taua mau vahi ra, ua taai-rahi-hia i te huru o te haapiiraa pae varua a te metua tane. A paari noa ˈi te mau tamarii, e tia i te haapiiraa bibilia a to ratou metua tane ia tauturu ia ratou ia pee i te parau mau o te Parau a te Atua. E oaoa mau â te tane tiaturi mai te peu e e faaoti ta ˈna mau tamarii e tia ˈtu i te pae o te parau mau!

Mai te peu e e Ite no Iehova te metua vahine, e tia ia ˈna ia faatura i te faaueraa tumu o te tiaraa upoo a tapitapi ai oia i te maitairaa mure ore o ta ˈna mau tamarii. (Korinetia 1, 11:3) I roto e rave rahi tupuraa, eita ta ˈna tane tiaturi ore e patoi ia horoa ta ˈna vahine Ite i te haapiiraa pae morare e varua na ta raua mau tamarii, tae noa ˈtu teie huru haapiiraa i roto i te mau putuputuraa a te nunaa o Iehova. E nehenehe te metua vahine e tauturu i ta ˈna tane tiaturi ore ia ite i te mau maitai o te haapiiraa o te patu ta ta raua mau tamarii e fanaˈo no roto mai i te faanahonahoraa a Iehova. E nehenehe te vahine e haamahitihiti ma te faatano i te parau i te maitai o te haapiiraa i te mau faaueraa tumu morare bibilia i ta raua mau tamarii, a faaruru ai ratou i te hoê ao o te ino noa ˈtura i te pae morare.

Teie râ, e onoono paha te tane tiaturi ore e ia pee ta ˈna mau tamarii i ta ˈna haapaoraa, a afai ai ia ratou i ta ˈna vahi haamoriraa e a horoa ˈtu ai i te haapiiraa faaroo e tano i to ˈna faaroo. Aore ra e patoi paha te hoê tane i te mau haapaoraa atoa e e onoono eiaha ta ˈna mau tamarii e fanaˈo i te hoê haapiiraa faaroo. Ei upoo o te utuafare, o oia te rave na mua i te faaotiraa. a

No to ˈna faatura i te tiaraa upoo o ta ˈna tane, ei Kerisetiano pûpûhia, e haamanaˈo te vahine tiaturi i te haerea o te mau aposetolo Petero e Ioane,  o tei parau e: “E ore hoi matou e tia ia ore ia parau i ta matou i hiˈo aˈenei, e ta matou i faaroo aˈenei.” (Ohipa 4:19, 20) No nia i te maitairaa i te pae varua o te mau tamarii, e imi te hoê metua vahine Ite i te mau taime maitatai no te horoa ˈtu i te aratairaa morare. E hopoia ta ˈna i mua ia Iehova e haapii ia vetahi ê i te mea ta ˈna i ite e mea mau, e tae noa ˈtu i ta ˈna mau tamarii. (Maseli 1:8; Mataio 28:19, 20) E nafea te metua vahine Ite e faaruru ai i te fifi rahi?

E rave anaˈe ei hiˈoraa i te parau o te tiaturiraa i te Atua. Eita paha te vahine Ite e nehenehe e rave i te hoê haapiiraa bibilia faanahohia e ta ˈna mau tamarii no te mea te opani ra ta ˈna tane. E tia anei ia ˈna ia ape i te paraparau no nia ia Iehova i ta ˈna mau tamarii no te reira tumu? Eita. E faaite iho â ta ˈna mau parau e ta ˈna mau ohipa i to ˈna tiaturiraa i te Atua Poiete. Eita e ore e e mau uiraa ta ta ˈna mau tamarii no nia i te tumu parau. E tia ia ˈna ia faaohipa noa i to ˈna tiamâraa i te pae faaroo na roto i te faaiteraa i to ˈna tiaturiraa i te Atua Poiete, tae noa ˈtu i ta ˈna mau tamarii. Noa ˈtu e eita ta ˈna e nehenehe e faatere i te hoê haapiiraa bibilia e te mau tamarii aore ra e afai tamau ia ratou i te mau putuputuraa, e nehenehe oia e horoa ˈtu no ratou i te ite no nia i te Atua ra o Iehova.—Deuteronomi 6:7.

No nia i te taairaa i rotopu i te hoê Ite e to ˈna hoa tiaturi ore, ua papai te aposetolo Paulo e: “Ua moˈa hoi taua tane faaroo ore i te vahine ra, e ua moˈa te vahine faaroo ore i te tane; ahiri aita ra, ua noa ta outou tamarii, i teie nei râ, ua moˈa ïa.” (Korinetia 1, 7:14) Ia Iehova, mea moˈa te mau auraa feia faaipoipo no te mea mea moˈa te hoa faaroo e te mau tamarii i mua ia Iehova. E tia i te vahine Ite ia rave i te mau mea atoa e nehenehe no te tauturu i ta ˈna mau tamarii ia taa ia ratou te parau mau, a vaiiho atu ai i te faahopearaa i roto i te rima o Iehova.

A paari noa ˈi te mau tamarii, na ratou e rave i te faaotiraa i teihea pae ratou e tia ˈi ia au i te haamaramaramaraa ta ratou e fanaˈo ra no ǒ mai i to ratou mau metua. E faaoti paha ratou e ohipa ia au i te parau a Iesu: “O tei rahi to ˈna hinaaro i tana metua tane e tana metua vahine, iti ia ˈu, aita oia i au ia ˈu.” (Mataio 10:37) Te faaue-atoa-hia ra ratou: “E te mau tamarii ra, e faaroo i to outou mau metua i te Fatu ra.” (Ephesia 6:1) Ua faaoti e rave rahi taurearea e ‘faaroo i te Atua ei upoo faatere’ eiaha râ i te hoê metua e ere i te Ite, noa ˈtu te faaoromairaa i te haafifiraa a taua metua ra. E haamaitairaa mau â no te metua Ite ia ite e e opua te mau tamarii e tavini ia Iehova noa ˈtu te patoiraa!

[Nota i raro i te api]