Te hoê ao ma te mau manaˈo hape no nia i te taiva ore

I TE hoê po Mahana pae mahanahana i Tel Aviv, i Iseraela, ua tapiri atu te hoê taata apî i te hoê pǔpǔ taurearea e tiai ra i rapaeau mai i te hoê fare arearearaa. Tau taime i muri iho, ua paaina te tahi mea i rotopu i te nahoa.

Ua haapohe te tahi atu taata ia ˈna iho i te paura ma te haapohe atoa 19 taurearea ê atu. “E mau vaehaa o te tino tei te mau vahi atoa, mea apî anaˈe hoi ratou, e mea apî roa—o te ohipa riaria roa ˈˈe ïa ta ˈu i ite aˈenei,” o ta te hoê taote ïa i parau i te feia papai vea i muri aˈe.

“O te mau huru maitatai ta te taata e popou, mai te taiva ore . . . , te nehenehe e faariro i te tamaˈi ei mea papu atu â i te tupu e i te mea fifi atu â i te ore,” o ta Thurstan Brewin ïa i papai i roto i te buka The Lancet. Oia, mai te mau Tamaˈi faaroo a te Amuiraa faaroo Kerisetiano e tae roa i te mau haapoheraa faanahohia a te Heremani Nazi, ua tafetafeta te tuatapaparaa o te taata i te toto o te feia i haapohehia no te taiva ore.

Te rahi noa ra te feia ati i te taiva

Papu roa, e faaino te taiva ore maamaa, e faaamahamaha atoa râ te ereraa i te taiva ore i te taata. Te taiva ore ia au i te Webster’s New Encyclopedic Dictionary, o te ‘haapao-maitai-raa ïa i te hoê taata aore ra te hoê tumu’ e o “te haapao-maitai-roa-raa i mua i te faahemaraa e faarue aore ra e haavare.” Te parau ra te rahiraa o te taata e te popou ra ratou i teie huru taiva ore, teie râ, te ere rahi nei te taata i te taiva ore i roto i te hoê tuhaa faufaa roa ˈˈe—te utuafare. Ua maraa oioi te faito faataaraa no te haapao-noa-raa i to ˈna iho hinaaro, no te hepohepo e te ahoaho o te oraraa i te mau mahana atoa, e no te mau faahopearaa o te taiva i roto i te faaipoiporaa tei parare. E mai te feia i pohe i te paainaraa paura i Tel Aviv, e pinepine, o te feia apî te feia ati hapa ore.

“E pinepine te haapiiraa i te hoê tamarii i te fifi-roa-hia no te amahamaharaa utuafare e tupu i muri aˈe i te hoê faataaraa, te hoê faataa-ê-raa, e te mea ra e hoê anaˈe metua,” ia au ïa i te hoê parau faataa. E au ra e o te mau tamaroa iho â râ i roto i te mau utuafare e o te mama anaˈe te metua, te faaû i te fifi i te pae haapiiraa, i te haapoheraa ia ˈna iho, e te ohipa ino a te feia apî. I te mau matahiti atoa, hoê mirioni tamarii i te mau Hau Amui no Marite o te faaruru ra i te faataaraa o to ratou nau metua, e i te tahi matahiti taa maitai, o te afaraa o te mau tamarii atoa i fanauhia e te mau metua faaipoipo i taua fenua ra o te faaruru i te faataaraa ia naea to ratou 18 matahiti. Ia au i te tahi mau numera, mea ahoaho roa atoa te tupuraa no te feia apî e rave rahi i te tahi atu mau fenua o te ao.

 E ture aveia teitei roa ino anei te taiva ore?

Ia au i te manuïa-ore-raa o te taiva ore tumu i teie tau, e tano atu â te parau a te arii Davida e: “Ia ora, e Iehova e, ua ore aˈenei hoi te feia paieti; e te feia parau mau ra, ua ore aˈenei i ǒ te taata nei.” (Salamo 12:1) No te aha i parare ai teie ereraa i te taiva ore? Teie te tatararaa a Roger Rosenblatt, o tei papai i roto i te vea Times: “Noa ˈtu e e ture aveia teitei roa te taiva ore, ua rahi roa te mǎtaˈu, te manaˈo feaa, te imiraa i to ˈna iho maitai, e te nounou toroa i roto i to tatou huru no te manaˈo e e haapao tatou, te taata paruparu, i te reira.” Te parau roa ra te Bibilia no nia i te tau ta tatou e ora nei e: ‘E riro te taata nei ei miimii, te [taiva], e te aroha ore.’—Timoteo 2, 3:1-5; MN.

Ia hiˈo tatou i te mana puai o te taiva ore—aore ra o te ereraa i te reira—i nia i te feruriraa o te hoê taata e ta ˈna mau ohipa, mea maitai ia ui tatou e, ‘O vai te au maitai i to tatou taiva ore?’ A hiˈo na eaha ta te tumu parau i muri nei e faaite mai no nia i teie uiraa.

[Faaiteraa i te fatu o te hohoˈa i te api 3]

Hohoˈa i nia: © AFP/CORBIS