To ratou oaoa i te haapiiraa i te taio!

I TE tahi mau vahi o te mau motu Solomona, tae roa ˈtu i te 80 % o tei riro mai i teie nei ei Ite no Iehova tei fifi na i te ite ore i te taio. Aita noa te reira i taotia i ta ratou tatararaa parau i roto i te mau putuputuraa tahebedoma a te amuiraa, ua riro atoa râ ei mea fifi atu â no ratou ia haapii i te pue parau mau o te Basileia ia vetahi ê. E nehenehe mau anei i te mau taata paari tei ore i tapea aˈenei i te hoê penitara ia haapii i te taio?

Ua faaohipahia te buka rairai ra A tutava i te haapii i te taio e i te papai, neneihia e te mau Ite no Iehova, i roto i te mau haapiiraa i te taio i roto fatata i te mau amuiraa atoa a te mau Ite no Iehova na te mau motu Solomona. E maa hiˈoraa noa te mau aamu i muri nei mea nafea to te mau hanere taata tautururaahia ia haamaitai i to ratou ite maoti teie porotarama. Te mea faufaa ˈtu â, no to ratou haapiiraa i te taio i nehenehe ai ratou e poro maitai aˈe no nia i to ratou faaroo.—Petero 1, 3:15.

Ua itea mai i te hoê mitionare tei tonohia i te hoê amuiraa ua hau atu i te hoê hanere feia poro i te Basileia e, i te hoê haapiiraa bibilia tahebedoma i reira e faaohipahia ˈi Te Pare Tiairaa, aita i rahi e vea ta ratou e mea iti roa ˈtu â te horoa i te tatararaa. Eaha te tumu? Te ite ore i te taio. I to te amuiraa faaararaa e e haamauhia te hoê haapiiraa i te taio e te papai, ua pûpû te mitionare ma te aau tae e riro ei orometua haapii. I te omuaraa, tau piahi noa tei tae mai, aita râ i maoro, ua hau atu i te 40 taata no te mau faito matahiti atoa tei haamata i te haere mai.

Eaha te faahopearaa? Te faatia ra te mitionare e: “Aita i maoro i muri aˈe i te haamataraa te haapiiraa i te taio, ua haere au i te matete i te hora ono i te poipoi e hoo mai i te maa no te fare mitionare. I reira, ua ite au i te mau piahi, tae noa ˈtu te mea apî roa, e hoo ra i te pape haari e te maa tupu. No te aha? No te mea te hinaaro ra ratou ia navai ta ratou moni no te hoo mai i te penitara e te buka papairaa no te haapiiraa i te taio! Oia atoa, ua turai te haereraa i taua haapiiraa ra ia noaa mai i te taata ta ˈna iho vea Te  Pare Tiairaa.” Te na ô râ oia e: “I teie nei, i roto i te Haapiiraa o Te Pare Tiairaa a te amuiraa, e pahono te feia apî e te feia paari atoa, e mea oraora maitai ta matou mau tauaparauraa.” Ua oaoa taa ê teie mitionare i to na piahi e maha o teie haapiiraa aniraa e nehenehe anei ta ratou e apiti atoa i roto i te ohipa pororaa i te taata no te mea, mai ta ratou i parau, “aita matou e mǎtaˈu faahou ra.”

Mea rahi roa ˈtu â te mau faahopearaa maitatai i nia i te mau piahi o te haapiiraa i te taio i te ite-noa-raa i te taio e te papai. Ei hiˈoraa, e rave rahi matahiti i te maoro to te vahine faaroo ore a te hoê Ite riroraa ei haapeapearaa no te amuiraa. I taora na oia i te ofai i nia i te taata ia aa-rii-noa-hia oia e e aro atoa oia i te tahi atu mau vahine e te hoê tâpû raau. Ia haere oia i te tahi taime i te putuputuraa Kerisetiano e ta ˈna tane, no to ˈna pohehae iti rahi i ta ˈna tane i faaoti roa ˈi oia e oomo i te titia mata mahana ia ore ta ˈna vahine ia pari atu i te hiˈo i te tahi atu vahine.

I muri rii noa ˈˈe râ a haamata ˈi te haapiiraa i te taio, ua ani teie vahine ma te mǎrû e: “E nehenehe anei ta ˈu e haere atoa mai?” Ua pahonohia ˈtu e e. Mai reira mai, aita oia i mairi aˈenei i te hoê haapiiraa e te hoê putuputuraa a te amuiraa. Ua haa puai oia i nia i ta ˈna mau haapiiraa i te taio e ua haere i mua ma te maere rahi, no reira oia i oaoa roa ˈi. Teie ta ˈna i titau i muri aˈe: “E nehenehe anei ta ˈu e fanaˈo i te hoê haapiiraa bibilia?” Ua haamata ta ˈna tane i te haapii ia ˈna ma te oaoa, e te tamau ra oia i te haere i mua i te aravihi i te taio e te papai e i to ˈna ite i te Bibilia.

No te hoê taata e 50 matahiti tei ore i tapea aˈenei i te hoê penitara, e nehenehe te tapea-noa-raa i te hoê e te hamaniraa i te mau leta o te piapa e riro ei fifi e au i te mouˈa i te rahi. Ua oru to te tahi pae rima i te taumi-noa-raa i te penitara i nia i te papie i te mau taime matamua o te haapiiraa. I muri aˈe i te mau hebedoma tutavaraa i te tapea maitai i te penitara, ua parau te tahi mau piahi ma te ataata e: “E nehenehe ta ˈu e faatere mǎrû noa i to ˈu rima i nia i te papie!” E oaoa atoa te mau mitionare ia hiˈo atu i te haereraa i mua o te mau piahi. Ua parau te hoê orometua haapii e: “Mea oaoa roa ia haapii i te taata, e e pinepine te mau piahi i te faaite i to ratou mauruuru mau no teie faanahoraa a Iehova na roto i te popouraa i te rima ia hope te hoê haapiiraa.”

Te oaoa nei teie mau Ite o te ite i te taio e te papai i teie nei e te mau mitionare atoa. No te aha? No te mea e nehenehe ta ratou e faaohipa i to ratou ite i te taio e te papai no te faahanahana ia Iehova.

[Hohoˈa i te mau api 8, 9]

Mea au na te feia apî e te feia paari atoa te haapiiraa i te taio e te papai