“Ua ite anei outou no te aha vau e faahoˈi mai ai i ta outou moni?”

‘AUÊ, e hinaaro rahi to ˈu i te moni!’ o ta Nana, te hoê metua vahine taa noa o na tamaroa e toru e faaea ra i Kaspi i te Repupirita no Géorgie, ïa i manaˈo. I te hoê poipoi, ua tupu to ˈna hinaaro e ite i te tahi moni. Ua itehia mai ia ˈna e 300 laris i pihai iho i te fare mutoi. Aita e taata na reira. Mea huru rahi te moni. Oia mau, aita o Nana i ite aˈenei 100 laris i te roaraa e pae matahiti a riro ai te lari ei moni no taua fenua ra. Eita e roaa i te feia hoo taoˈa no reira teie tino moni i muri aˈe e rave rahi matahiti ohipa.

‘Eaha te faufaaraa o teie moni no ˈu mai te peu e e ere au i to ˈu faaroo, i to ˈu mǎtaˈu i te Atua, e i to ˈu ea pae varua?’ o ta Nana ïa i manaˈo. Ua faahotu o ˈna i tera mau huru maitatai Kerisetiano, ua faaruru atoa o ˈna i te hamani-ino-raa etaeta e te papairaa no ta ˈna tiaturiraa.

I to Nana haereraa ˈtu i te fare mutoi, ua ite atu o ˈna e pae mutoi o te paimi haere ra i te tahi ohipa. Ua taa aˈera ia ˈna e te paimi ra ratou i te moni, ua haafatata ˈtura o ˈna ia ratou e ua parau atu e: “Ua moe anei te tahi ohipa ta outou?”

“Te moni,” ta ratou ïa i pahono mai.

“Ehia?”

“E 300 laris!”

“Ua itehia mai ia ˈu ta outou moni,” ta Nana ïa i parau atu. I muri iho, ua ui o ˈna e: “Ua ite anei outou no te aha vau e faahoˈi mai ai i ta outou moni?” Aita ratou i ite.

“No te mea e Ite no Iehova vau,” ta ˈna ïa i parau faahou atu. “Ahiri eita, eita vau e faahoˈi mai i ta outou moni.”

Ua horoa te mutoi rahi, na ˈna te moni i moe, e 20 laris na Nana no te faaite i to ˈna mauruuru no to ˈna haerea tia.

Ua atutu oioi teie aamu na te mataeinaa no Kapsi. I te poipoi aˈe, teie ta te hoê vahine rave ohipa o tei haere i rapaeau i te fare mutoi, i parau ia Nana: “Te tapea noa ra [te mutoi rahi] i ta oe mau papai i roto i ta ˈna piha ohiparaa. I teie nei, e haafaufaa ˈtu â paha o ˈna i te reira.” Teie ta te hoê mutoi i parau atoa: “Ahiri e Ite no Iehova te mau taata atoa, na vai e rave i te ohipa ino?”