“E faaore te tahi i ta te tahi hapa”

TE TIATURI ra anei outou e ua faaore te Atua i ta outou mau hapa? I te mau Hau Amui no Marite, e au ra e te tiaturi nei te rahiraa o te taata paari. Te faataa ra te taote Loren Toussaint, te taata matamua i rave i te hoê hiˈopoaraa i te pu maimiraa totiare a te fare haapiiraa tuatoru no Michigan, e i roto i na Marite 1 423 o tei uiuihia, fatata e 80 i nia i te hanere o te mau taata paari e hau atu i te 45 matahiti tei parau e ua faaore te Atua i ta ratou mau hapa.

Te mea anaanatae râ, e 57 noa i nia i te hanere o tei uiuihia tei parau e ua faaore ratou i te hapa a te tahi atu. Te haamanaˈo maira teie mau numera ia tatou i te mau parau a Iesu i roto i te Aˈoraa i nia i te mouˈa: “Ia faaore hoi outou i ta vetahi ê ra hapa, e faaore atoa mai to outou Metua i te ao ra i ta outou. Ia ore râ outou ia faaore i ta vetahi ê ra hapa, e ore atoa to outou Metua e faaore mai i ta outou hapa.” (Mataio 6:14, 15) Oia mau, e faaore te Atua i ta tatou mau hapa mai te peu noa e ua ineine tatou i te faaore i ta te tahi atu.

Ua haamanaˈo te aposetolo Paulo i te mau Kerisetiano no Kolosa i teie faaueraa tumu. Ua faaitoito o ˈna ia ratou e: “E faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi; mai te Mesia atoa i faaore i ta outou na, e na reira atoa outou.” (Kolosa 3:13) Parau mau, e ere noa i te mea ohie ia na reira. Ei hiˈoraa, ia faahapahia outou ma te mau parau vavi aore ra au ore, e mea fifi ia faaore atu.

Mea rahi râ te maitai ia faaore i te hapa. No nia i ta ˈna maimiraa, teie ta te tahuˈa totiare David Williams i parau: “Ua itehia mai ia matou te hoê taairaa piri roa i rotopu i te faaoreraa i te hapa a te tahi atu e i te ea i te pae feruriraa i roto i te mau Marite faito matahiti au noa e te paari aˈe.” E tuea te reira i te mau parau a te arii paari o Solomona, o tei papai fatata a 3 000 matahiti aˈenei e: “Tei te maˈi ore to te aau, o to te tino ïa ora.” (Maseli 14:30) I te mea e e faaitoito te hoê huru feruriraa e faaore i te hapa i te mau taairaa maitatai e te Atua e to tatou taata-tupu, e tumu papu ïa e ineine ai tatou i te faaore i te hapa a te tahi atu ma te aau atoa.—Mataio 18:35.