E nafea te mau peata mau e tauturu mai ai?

I ROTO i te mau Papai, e nehenehe te taˈo Heleni no te taˈo “peata” i roto i te tahi mau Bibilia, e hurihia ei “taata moˈa.” E au teie taˈo ia vai? “Ia faahitihia te feia tiaturi i roto i te huru otini,” ia au i te buka An Expository Dictionary of New Testament Words, “e au ïa tera taˈo ia ratou paatoa eiaha noa râ i te tahi mau taata moˈa taa ê, aore ra i te feia pohe i rave na i te mau ohipa moˈa faahiahia roa.”

No reira, ua faataa te aposetolo Paulo e o te taatoaraa o te mau Kerisetiano matamua te mau peata, aore ra te feia moˈa mau. Ei hiˈoraa, ua faatae oia i te hoê rata i papaihia i te senekele matamua T.T. “i te ekalesia o te Atua i Korinetia na, e te feia moˈa atoa i [te mataeinaa Roma o] Ahaia atoa ra.” (Korinetia 2, 1:1) I muri aˈe, ua papai Paulo i te hoê rata “i te feia atoa i herehia mai e te Atua i Roma na, i haapaohia ei feia moˈa.” (Roma 1:7) Papu maitai, aitâ teie feia moˈa i pohe, aita atoa ratou i faataa-ê-hia no to ratou maitai morare faahiahia ei mea teitei aˈe i te toea o te feia tiaturi. Ia au ïa i te aha i faataa-ê-hia ˈi ratou ei peata?

Ua haamoˈahia ratou e te Atua

Te faaite ra te Parau a te Atua e e ere na te taata aore ra na te hoê faanahonahoraa e haamoˈa i te hoê taata. Te na ô ra te mau Papai e: “O [te Atua] tei faaora ia tatou nei, e ua parau ia tatou i te parauraa moˈa ra, eiaha no ta tatou ohipa, no to ˈna iho râ hinaaro, e te aroha mau.” (Timoteo 2, 1:9) E haamoˈahia te hoê taata moˈa no te parauraa a Iehova, ia au i te aroha mau o te Atua e ia au i to ˈNa hinaaro.

To roto te feia moˈa o te amuiraa Kerisetiano i te hoê “faufaa apî.” Na te toto i manii o Iesu Mesia e haamana i teie faufaa e e haamoˈa i te feia e apiti atu. (Hebera 9:15; 10:29; 13:20, 24) No te mea ua tamâhia ratou i te aro o te Atua, e ‘autahuˈa moˈa ratou e te hopoi ra i te tusia varua e au i te Atua ia Iesu Mesia ra.’—Petero 1, 2:5, 9.

Te tiaororaa i te mau peata ei arai

No te mea te tiaturi ra ratou e e nehenehe ta te mau “peata” e horoa i te mana taa ê na te feia tiaturi, te haamori ra te mau mirioni taata ia ratou na roto i te faaohiparaa i te mau taoˈa moˈa aore ra te tiaororaa ia ratou ei arai. E haapiiraa bibilia anei teie? I roto i te Aˈoraa i nia i te mouˈa, ua haapii Iesu i ta ˈna mau pǐpǐ e nafea ia haafatata ˈtu i te Atua, ma te parau e: “E na  ô outou ia pure: E to matou Metua i te ao ra, ia raa to oe iˈoa.” (Mataio 6:9) E faataehia te pure ma te tano i te Atua ra o Iehova anaˈe ra.

No te haapapu e e arai te mau “peata,” e faahiti te tahi mau taata teologia i te Roma 15:30, i reira tatou e taio ai e: “E aˈo atura vau ia outou, e au mau taeae, i te Fatu ra ia Iesu Mesia, e te aroha o te [v]arua ra, e faaitoito tatou atoa i te pure i te Atua [no ˈu].” (MN) Te faaitoito ra anei Paulo i tera feia tiaturi ia pure ia ˈna aore ra ia tiaoro i to ˈna iˈoa no te haafatata ˈtu i te Atua? Aita. Te faaitoito ra iho â te Bibilia ia pure no te mau peata, aore ra te feia moˈa mau, aita râ te Atua e faaue maira ia pure i aore ra na roto i te feia moˈa.—Philipi 1:1, 3, 4.

Teie râ, ua faatoroa te Atua i te hoê Arai i ta tatou mau pure. “O vau te eˈa, e te parau mau, e te ora,” o ta Iesu Mesia ïa i parau. “Aore roa e taata e tae i te Metua ra, maori râ ei ia ˈu.” Ua parau atoa Iesu e: “E ta outou e ani ma to ˈu ra iˈoa, e tia ïa ia ˈu ia maitai te Metua i te Tamaiti. O ta outou i ani ma to ˈu ra iˈoa, na ˈu ïa e rave.” (Ioane 14:6, 13, 14) E nehenehe tatou e tiaturi e ua ineine Iehova i te faaroo i te pure e faataehia ma te iˈoa o Iesu. Teie ta te Bibilia e parau ra no nia ia Iesu: “E tia maitai roa ˈtu ia ˈna ia faaora i te feia e na reira ˈtu ia ˈna ra i te haere i te Atua ra, e tia hoi oia i te oraraa e a muri noa ˈtu ei tia ia ratou.”—Hebera 7:25.

Mai te peu e ua ineine Iesu i te haa ei arai ia tatou, no te aha ïa te feia haamori o te Amuiraa faaroo Kerisetiano e tiaoro pinepine ai i te mau “peata” na roto i te pure? I roto i ta ˈna buka L’âge de la foi, te faataa ra te taata tuatapapa ra o Will Durant nohea mai teie peu. A faaite ai oia e te mǎtaˈu ra te taata i te Atua Mana hope e mea ohie aˈe ia tapiri ia Iesu, teie ta Durant e parau ra: “Aita te taata i tamata i te paraparau roa ˈtu ia [Iesu] i muri aˈe i te ore-roa-raa e tâuˈa i ta ˈNa mau oaoaraa. E au ra e e haerea paari aˈe ia faatae i ta ˈna pure i te hoê peata i haapeatahia no te haere i nia i te raˈi, e ia taparuparu ia ˈna ia paraparau i te Mesia no ˈna.” Ua tano anei teie mau tapitapi?

Te haapii maira te Bibilia e na roto ia Iesu tatou “e parau noa ˈi, e te ô hoi ma te mǎtaˈu ore” i roto i te pure i te Atua. (Ephesia 3:11, 12) E ere te Atua Mana hope i te mea atea roa i te taata  no te faaroo i ta tatou mau pure. Ua pure te papai salamo ra o Davida ma te tiaturi e: “E tei faaroo i te pure ra, e tae atoa mai te taata atoa ia oe ra.” (Salamo 65:2) Eita Iehova e horoa mai i te puai na roto i te mau taoˈa moˈa a te mau “peata” i pohe, e ninii maori râ oia i to ˈna varua moˈa i nia i te feia e ani atu ma te faaroo. Ua haaferuri Iesu e: “Te ite na outou i te horoa i te mea maitai na ta outou tamarii, ino noa ˈi outou na, e rahi atu ïa to outou Metua i te ao ra i te horoa i te [varua moˈa] i te feia i ani atu ia ˈna ra.”—Luka 11:13; MN.

Te tuhaa a te feia moˈa

Ua pohe te feia moˈa ta Paulo i papai atu tau senekele aˈenei e, i muri aˈe, ua fanaˈo ratou i “te korona ora,” te hoê tia-faahou-raa no te haere i nia i te raˈi. (Apokalupo 2:10) Ua ite te feia haamori i te Atua ra o Iehova e e opani te Bibilia i te haamoriraa i teie mau peata mau e eita te reira e paruru ia ratou i te maˈi, te ati natura, te papu ore o te faanavairaa faufaa, te ruauraa, aore ra te pohe. E ui paha ïa outou e, ‘Te tapitapi mau â ra anei te feia moˈa o te Atua ia tatou? E tia anei ia manaˈo e e ohipa mai ratou no to tatou maitai?’

E parahiraa faufaa to te feia moˈa i roto i te hoê parau tohu i papaihia e Daniela. I te senekele ono H.T.T., ua ite oia i te hoê orama putapû mau, e tae roa mai te tupuraa o te reira i to tatou nei tau. Mai raro mai i te miti, ua haere mai e maha puaa riaria o te faataipe ra i te mau faatereraa taata, o te ore e noaa ia ratou ia haapao i te mau hinaaro mau o te huitaata. Ua tohu atura Daniela e: “O te feia moˈa râ no Tei Teitei ra te rave i taua basileia nei, e no ratou roa ˈtu te basileia, e a muri, e a muri noa ˈtu.”—Daniela 7:17, 18.

Ua haapapu Paulo e teie “tufaa,” na “te feia moˈa” ïa, te feia aiˈa apiti i te Mesia i nia i te raˈi. (Ephesia 1:18-21) Na te toto o Iesu i iriti i te eˈa e faatiahia ˈi na feia moˈa 144 000 o te fanaˈo i te hanahana i te raˈi. Ua parau te aposetolo Ioane e: “E ao to ˈna, e te moˈa, to te noaa ia ˈna te tia-faahou-raa matamua ra; e ore roa te piti o te pohe e tiaia noa mai i te reira: e riro râ ratou ei tahuˈa na te Atua e na te Mesia, e e hau to ratou ia ˈna ra e ia hoê tausani i te matahiti.” (Apokalupo 20:4, 6; 14:1, 3) I roto i te hoê orama, ua faaroo o Ioane i te hoê nuu o te mau mea ora i te raˈi e himene ra i mua ia Iesu tei faahanahanahia: “Ua hoo oe ia matou ei taata no te Atua, i to oe iho na toto, no roto i te mau opu atoa, e te mau reo atoa, e te mau nunaa atoa e te mau fenua atoa; e ua faariro oe ia matou ei hui arii, e ei tahuˈa na to matou Atua, e e riro ia matou te hau i teie nei ao.” (Apokalupo 5:9, 10) Mea tamǎrû mau â te reira! Ua maiti maitai te Atua ra o Iehova i teie mau tane e mau vahine. Hau atu â, ua tavini ratou ma te haapao maitai i nia i te fenua, ma te faaruru fatata i te mau fifi atoa ta te taata i farerei. (Korinetia 1, 10:13) E nehenehe ïa tatou e tiaturi e e riro teie feia moˈa, aore ra peata i faatiahia, ei arii aroha e te aumauiui, o te haapao i to tatou mau paruparu e mau taotiaraa.

Te mau haamaitairaa i raro aˈe i te faatereraa a te Basileia

E fatata te faatereraa a te Basileia i te ohipa no te faaore i te ino e te mauiui atoa i nia i te fenua. I reira, e haafatata ˈtu â te taata i te Atua mai tei ore i itehia aˈenei. Ua papai Ioane e: “Ua faaroo atura vau i te hoê reo rahi no te raˈi maira, i te na ôraa mai e, Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou.” E hopoi mai te reira i te mau haamaitairaa rahi roa na te huitaata, te na ô faahou ra hoi te parau tohu e: “E  na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4.

Auê ïa tau oaoa mau â! Te faataahia ra te mau faahopearaa o te faatereraa tia roa a te Mesia ra o Iesu e na feia moˈa 144 000 i roto i teie mau parau i papaihia i roto i te Mika 4:3, 4: “E na [Iehova] e haava i roto i te taata atoa e rave rahi, e na ˈna e parau i roto i te mau fenua puai i te atea ê ra; e tiapai ratou i ta ratou ˈoˈe ei auri arote, e ta ratou mau mahae ei tipi tope vine ïa: e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi. E parahi râ ratou o te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou: o te vaha hoi o Iehova sabaota ra, tei parau mai.”

O te feia moˈa teie e titau manihini maira ia fanaˈo i tera mau haamaitairaa. Te parau noa ra te mau peata mau, i faahohoˈahia e te hoê vahine faaipoipo, e: “E haere mai. E o tei faaroo ra, a parau atoa oia e, E haere mai. E o tei poihâ ra, a haere mai. E tei hinaaro ra, a rave noa mai oia i te pape ora.” (Apokalupo 22:17) Eaha to roto i “te pape ora”? Taa ê atu i te tahi mau mea, te ite mau ïa i te mau opuaraa a te Atua. Teie ta Iesu i parau i to ˈna pureraa i te Atua: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) E noaa mai teie ite na roto i te haapii-tamau-raa i te Bibilia. Auê ïa tatou i te oaoa e na roto i te Parau a te Atua e ite ai tatou o vai mau â te feia moˈa e nafea oia e faaohipa ˈi ia ratou no te maitai mure ore o te huitaata!

[Hohoˈa i te api 4]

Ua papai Paulo i te rata faauruahia na te mau peata mau

[Hohoˈa i te mau api 4, 5]

Ua riro te mau aposetolo haapao maitai a Iesu ei peata, aore ra feia moˈa mau

[Hohoˈa i te api 6]

E nehenehe tatou e pure ma te tiaturi i te Atua na roto ia Iesu Mesia

[Hohoˈa i te api 7]

E riro te mau peata, aore ra feia moˈa i faatiahia, ei faatere aumauiui i te fenua