“Ia faarahi hua ˈtu i te haapao”

“E au ia tatou ia faarahi hua ˈtu i te haapao i te mau parau ta tatou i faaroo aˈenei, [a painu atu tatou].”—HEBERA 2:1; MN.

1. A faahohoˈa na e nafea te nevaneva ia faatupu i te ati.

 I TE Hau Amui noa, fatata e 37 000 taata te pohe i te matahiti hoê i roto i te mau ati purumu. Te parau nei te tahi feia îite e e rave rahi o teie mau ati tei nehenehe i apehia ahiri te feia faahoro i haapao maitai atu â i te purumu. E nevaneva te tahi feia faahoro no te mau tapao e te mau iri faatianianiraa aore ra no to ratou faaohiparaa i ta ratou niuniu paraparau afaifai. Te vai atoa ra o te tamaa a faahoro ai i te pereoo. I roto i teie atoa nei mau huru tupuraa, e nehenehe te nevaneva e faatupu i te ati.

2, 3. Eaha te aˈoraa a Paulo i te mau Kerisetiano Hebera, e no te aha ta ˈna aˈoraa i tano ai?

² Fatata e 2 000 matahiti hou te pereoo uira a hamanihia ˈi, ua faaite maitai te aposetolo Paulo i te hoê huru nevaneva tei riro ei mea ino roa no te tahi mau Kerisetiano Hebera. Ua haapapu Paulo e ua faateiteihia Iesu Mesia tei faatiahia mai, i nia ˈˈe i te mau melahi atoa, inaha hoi te parahi ra oia i te rima atau o te Atua. Parau atu ai te aposetolo e: “E teie nei, e au ia tatou ia faarahi hua ˈtu i te haapao i te mau parau ta tatou i faaroo aˈenei, [a painu atu tatou].”—Hebera 2:1; MN.

³ No te aha i titauhia ˈi i te mau Kerisetiano Hebera ia ‘faarahi hua ˈtu i te haapao i te mau parau ta ratou i faaroo’ no nia ia Iesu? No te mea a 30 matahiti atura to Iesu faarueraa i te fenua nei. I te mea e aita to ratou Fatu i pihai iho ia ratou, ua haamata te tahi mau Kerisetiano Hebera i te painu ê atu i te faaroo mau. Te nevaneva ra ratou i te haapaoraa ati Iuda, ta ratou huru haamoriraa tahito.

Te titauhia ra ia haapao maitai atu â ratou

4. Eaha paha hoi te tahi mau Kerisetiano Hebera i hinaaro ai e hoˈi faahou i te haapaoraa ati Iuda?

⁴ Eaha hoi te hoê Kerisetiano e hinaaro ai e hoˈi faahou i te haapaoraa ati Iuda? Inaha, i roto i te huru haamoriraa a te Ture, te vai ra te mau mea itea maitai. I ite na te taata i te mau tahuˈa e i hauˈa na i te mau tusia taauahi. I roto râ i te tahi mau tuhaa, mea ê roa te Kerisetianoraa. E Tahuˈa Rahi ta te mau Kerisetiano, o Iesu Mesia, aita râ oia e ite-faahou-hia ra i te fenua nei a toru ahuru atura matahiti. (Hebera 4:14) E hiero ta ratou, tei te raˈi iho râ to ˈna vahi moˈa. (Hebera 9:24) Eiaha mai te peritome pae tino a te Ture, ta te Kerisetiano, o ‘te peritome aau ïa maoti te varua.’ (Roma 2:29) No te mau Kerisetiano Hebera râ, ua haamata paha te Kerisetianoraa i te riro ei mea huru fafa ore.

5. Mea nafea to Paulo faaiteraa e e hau aˈe te huru haamoriraa ta Iesu i haamau i ta te Ture?

 ⁵ Te titauhia ra i te mau Kerisetiano Hebera ia ite i te hoê mea faufaa roa no nia i te huru haamoriraa i haamauhia e te Mesia. Ua niuhia te reira i nia i te faaroo eaha râ i nia i te ite mata, e hau aˈe râ i te Ture i tuuhia mai na roto i te peropheta ra o Mose. “I moˈa ˈtura te taata, e mâ ˈtura te tino i te toto puaatoro, e to te puaaniho, e te rehu puaatoro ufa apî i pîpîhia i nia i te feia i viivii ra,” o ta Paulo ïa i papai, “a tae ai hoi i te toto o te Mesia ra, o tei pûpû ia ˈna iho ma te ino ore i te Atua, i te turu o te varua pohe ore ra, e rahi atu ïa te mâ o to outou aau i te ohipa pohe, ia haamori outou i te Atua ora ra?” (Hebera 9:13, 14) Oia, e rave rahi tuhaa e hau ê roa ˈi te faaoreraa hara e noaa maoti te faaroo i te tusia taraehara a Iesu Mesia i ta te mau tusia i pûpûhia i raro aˈe i te Ture.—Hebera 7:26-28.

6, 7. (a) Eaha te tupuraa e riro ai ei mea ru ia “faarahi hua ˈtu” te mau Kerisetiano Hebera ‘i te haapao i te mau parau ta ratou i faaroo aˈenei’? (b) I to Paulo papairaa i ta ˈna rata i te mau Hebera, ehia matahiti e toe ra no Ierusalema? (A hiˈo i te nota i raro i te api.)

⁶ Te vai ra te tahi atu â tumu i titauhia ˈi i te mau Kerisetiano Hebera ia haapao maitai roa i te mau mea ta ratou i faaroo no nia ia Iesu. Ua tohu oia e e haamouhia Ierusalema. Ua na ô oia e: “Te fatata maira hoi te tau e haaatihia ˈi oe e to mau enemi i te aua, a haapuni ai ia oe e ati noa ˈˈe, a tapea ˈi ia oe i roto. E e huri hoi ia oe i raro roa i te repo, e to tamarii atoa i roto ia oe na; e e ore roa te hoê ofai i roto ia oe na e vaiihohia i nia iho i te tahi; o oe aore i haamanaˈo i to oe iteraahia mai.”—Luka 19:43, 44.

⁷ Afea te reira e tupu ai? Aita Iesu i faaite i te mahana e te hora. Ua horoa râ oia i teie faaueraa: “Ia hiˈo ra outou ia Ierusalema i te haaatiraahia e te nuu, ua fatata ïa to ˈna pau ia ite mai outou. Te feia i parahi i Iudea ra, a maue i nia i te mouˈa i reira, e to roto i te oire ra, a haere i rapae, e eiaha to te mau vahi atoa ra e tomo i roto i te oire.” (Luka 21:20, 21) I te roaraa o na 30 matahiti i muri aˈe i to Iesu faahitiraa i taua mau parau ra, aita te tahi mau Kerisetiano no Ierusalema e haapao faahou ra i te tau ru e ua nevaneva ratou. Te hiˈo ra ratou i te vahi ê eiaha râ i te purumu, ei auraa parau. Ia ore ratou e faatitiaifaro i to ratou feruriraa, e papu te ati i te tae mai. Tera anei to ratou manaˈo aore ra eita, ua fatata roa mai te haamouraa o Ierusalema! a Auaa râ, ua riro te aˈoraa a Paulo ei faaararaa i te  mau Kerisetiano no Ierusalema e taoto ra i te pae varua.

Te ‘faarahi-hua-raa i te haapao’ i teie tau

8. No te aha e tia ˈi ia tatou ia “faarahi hua ˈtu i te haapao” i te pue parau mau o te Parau a te Atua?

⁸ Mai te mau Kerisetiano no te senekele matamua, e tia ia tatou ia “faarahi hua ˈtu i te haapao” i te pue parau mau o te Parau a te Atua. No te aha? No te mea e faaû atoa ˈtu tatou i te hoê haamouraa e fatata roa maira, eiaha noa i te hoê nunaa, i te faanahoraa taatoa râ o te mau mea. (Apokalupo 11:18; 16:14, 16) Parau mau, aita tatou i ite i te mahana e te hora tia e rave ai Iehova i taua ohipa ra. (Mataio 24:36) Teie râ, te ite mata ra tatou i te tupuraa o te mau parau tohu bibilia o te faaite maitai ra e te ora nei tatou i te “anotau hopea.” (Timoteo 2, 3:1-5) No reira, e tia ia tatou ia ara i te mau mea atoa o te faanevaneva ia tatou. E tia ia tatou ia haapao maitai i te Parau a te Atua e ia haamanaˈo maite noa i teie nei tau ru. E na reira noa tatou ‘e ora ˈi i teie nei mau mea iino e fatata mai nei.’—Luka 21:36.

9, 10. (a) E nafea tatou ia haapao maitai i te mau tumu parau pae varua? (b) E nafea te parau a te Atua e riro ai ei ‘lamepa i to tatou nei avae’ e ei ‘tiarama no to tatou eˈa’?

⁹ I teie nei tau faufaa roa, e nafea tatou ia faaite e te ‘faarahi hua ˈtu nei tatou i te haapao’ i te mau mea pae varua? Te hoê ravea, o te haere-tamau-raa ïa i te mau putuputuraa e te mau tairururaa Kerisetiano. E tia atoa ia tatou ia riro ei feia haapii i te Bibilia itoito ia nehenehe tatou ia haafatata ˈtu i to ˈna Tumu, o Iehova. (Iakobo 4:8) Ia farii tatou i te ite ia Iehova maoti ta tatou iho haapiiraa e te mau putuputuraa, e riro tatou mai te papai salamo tei parau atu i te Atua e: “E lamepa ta oe parau i to ˈu nei avae, e tiarama no to ˈu nei mau eˈa.”—Salamo 119:105.

¹⁰ E riro te Bibilia ei ‘tiarama no to tatou nei mau eˈa’ ia faaite mai oia i te mau opuaraa a te Atua no a muri aˈe. Ua riro atoa ei ‘lamepa i to tatou nei avae.’ Oia hoi, e tauturu mai te reira ia taa e nafea râ ia faaû atu tatou i te mau fifi ahoaho o te oraraa. No reira e mea faufaa roa ˈi ia “faarahi hua ˈtu i te haapao” ia putuputu tatou no te haapiiraa e te mau hoa faaroo e ia taio tatou iho i te Parau a te Atua. E tauturu mai te haamaramaramaraa ta tatou e farii ia rave i te mau faaotiraa paari e te maitatai e mauruuru ai Iehova e o te faaoaoa i to ˈna mafatu. (Maseli 27:11; Isaia 48:17) E nafea tatou ia haamaoro atu â i te haapao maitai i te putuputuraa e i roto i ta tatou iho haapiiraa e ia faufaa-maite-hia ˈtu ai tatou i te mau faanahoraa pae varua a te Atua?

Te haamaitairaa i to tatou puai haamauraa i te feruriraa i te putuputuraa

11. No te aha e ere ai i te mea ohie ia haapao maitai i te putuputuraa Kerisetiano i te tahi taime?

¹¹ I te tahi taime, e ere i te mea ohie ia haapao maitai i te putuputuraa Kerisetiano. E nevaneva ohie te feruriraa, peneiaˈe i te taˈi a te hoê tamarii aore ra i te hoê taata i tae maoro mai o te imi ra i te parahiraa. I muri aˈe i te hoê mahana ohiparaa roa, e rohirohi iho â tatou. E ere paha te taata e paraparau maira na nia mai i te tahua i te orero oraora roa, e hou tatou a ite atu ai, te nevaneva haere ra to tatou feruriraa—peneiaˈe atoa e te taoto ra! No te huru faufaa o te haamaramaramaraa e vauvauhia ra, e tia ia tatou ia tutava i te haamaitai i to tatou puai haamauraa i te feruriraa i te putuputuraa a te amuiraa. E nafea râ ïa tatou?

12. Eaha te mea e ohie aˈe ai na tatou ia haapao maitai i te putuputuraa?

¹² E pinepine, mea ohie aˈe ia haapao maitai i te putuputuraa ua faaineine maitai anaˈe tatou ia tatou iho. No reira, no te aha ïa e ore ai e rave i te taime no te hiˈo aˈena i te tumu parau e hiˈopoahia? E titauhia tau minuti noa i te mahana hoê no te taio e te feruriruri i te hoê tuhaa o te mau pene i faataahia no te taioraa Bibilia tahebedoma. Maoti te tahi maa faanahoraa, e itea atoa mai ia tatou te taime no te faaineine i te Haapiiraa buka a te amuiraa e te Haapiiraa o Te Pare Tiairaa. Noa ˈtu eaha te tapura i maitihia, te mea papu, oia hoi: E tauturu mai te faaineineraa ia haapao maitai i te tumu parau e tauaparauhia ra i te putuputuraa a te amuiraa.

13. Eaha te nehenehe e tauturu mai ia haamau noa i te feruriraa i nia i te tumu parau e tauaparauhia ra i te putuputuraa?

 ¹³ Hau atu i te faaineine-maitai-raa, ua itea mai i te tahi pae e e haapao maitai aˈe ratou i te putuputuraa ia parahi ratou i mua i te Piha a te Basileia. Te hiˈo-noa-raa i te orero, te apeeraa i te taioraa irava i roto i te Bibilia, e te tapaopaoraa, o te tahi atu ïa mau ravea e ore ai e nevaneva. O te aau ineine râ te mea faufaa roa ˈtu â i te tahi noa ˈˈe ravea haamauraa i te feruriraa. E tia ia taa ia tatou te tumu e putuputu ai tatou. E na reira tatou e to tatou mau hoa faaroo na mua roa no te haamori ia Iehova. (Salamo 26:12; Luka 2:36, 37) Ua riro te putuputuraa ei ravea faufaa e faatamaahia ˈi tatou i te pae varua. (Mataio 24:45-47) Hau atu â, maoti te reira e nehenehe ai tatou e ‘faaaraara ˈtu te tahi i te tahi ia rahi te aroha e te ohipa maitatai.’—Hebera 10:24, 25.

14. Eaha mau te mea e manuïa ˈi te hoê putuputuraa?

¹⁴ E haava rii paha te vetahi i te huru maitai o te hoê putuputuraa ia au i te aravihi i te haapii o te feia e tuhaa ta ratou. Mai te peu e mea aravihi roa te feia orero, e parauhia ïa e e putuputuraa au mau. Mai te peu râ e e au ra e e ere te haapiiraa i te mea nanonano roa, mea ê roa paha ïa to tatou manaˈo. E parau mau e e tia i te feia e tuhaa ta ratou ia faahope i te faaohipa i te aravihi i te haapii ma te fa iho â râ e haaputapû i te aau o te taata. (Timoteo 1, 4:16) Eiaha râ tatou o te faaroo ra ia faaino ma te tano ore. Noa ˈtu e mea faufaa te aravihi i te haapii o te feia e tuhaa ta ratou, e ere tera anaˈe te mea e manuïa ˈi te hoê putuputuraa. Aita anei outou e farii ra e e tia ia tatou ia haapeapea na mua, eiaha mai te aha te maitai ia vauvau te orero i ta ˈna parau, mai te aha râ te maitai ia faaroo tatou? Ia haere tatou i te mau putuputuraa e ia haapao maitai i te parau e vauvauhia ra, te haamori ra tatou i te Atua ia au i to ˈna hinaaro. O te reira te mea e manuïa ˈi te putuputuraa.  Mai te peu e te anaanatae ra tatou e farii i te ite i te Atua, e faufaahia tatou i te putuputuraa, aita e hiˈoraa i te aravihi o te feia orero. (Maseli 2:1-5) No reira, e faaoti maite anaˈe ïa e “faarahi hua ˈtu i te haapao maitai” i ta tatou putuputuraa.

Te faufaa-maite-raa i ta tatou iho haapiiraa

15. E nafea tatou e faufaahia ˈi i te haapiiraa e te feruriruriraa?

¹⁵ E faufaa-rahi-hia tatou ia ‘faarahi hua ˈtu tatou i te haapao maitai’ ia haapii tatou ia tatou iho e ia feruriruri tatou. Ua riro te taioraa e te feruri-maitai-raa i nia i te Bibilia e te mau papai Kerisetiano ei ravea faufaa mau e haamau maitai ai tatou i te pue parau mau o te Parau a te Atua i roto i to tatou aau. E ohipa puai atu ai te reira i nia i te huru e feruri e e haa ˈi tatou. Oia mau, e tauturu mai te reira ia oaoa mau tatou i te rave i te hinaaro o Iehova. (Salamo 1:2; 40:8) No reira, e tia ia tatou ia haamaitai i to tatou puai haamauraa i te feruriraa e ia faufaahia tatou i te haapiiraa. Mea ohie roa hoi ia nevaneva ˈtu! E nehenehe te tahi mau tâpûpûraa rii—te taˈi o te niuniu paraparau aore ra te hoê maniania—e faanevaneva mai ia tatou. Aore ra eita paha e maoro ia haamau tatou i te feruriraa. E parahi paha tatou ma te manaˈo maitai e tamaa i te pae varua, eita râ e maoro, era mau to tatou feruriraa e nevaneva haere atura. E nafea tatou ia “faarahi hua ˈtu i te haapao maitai” i roto i ta tatou iho haapiiraa i te Parau a te Atua?

16. (a) No te aha e mea faufaa ˈi ia faataa tatou i te taime no ta tatou iho haapiiraa? (b) Mea nafea to outou faataaraa i te taime no te haapii i te Parau a te Atua?

¹⁶ Mea maitai ia faataa i te hoê tapura e ia maiti i te hoê vahi e au mau no te haapiiraa. Mea iti roa te taime e vai ai te rahiraa o tatou o tatou anaˈe. E au ra paha ia tatou e te pee noa ˈtura tatou i te mau ohipa ru o te mau mahana atoa mai te hoê amaa raau i roto i te hoê anavai puai. Oia mau, e tia ia tatou ia upootia i nia i te opape, ei auraa parau, e ia imi i te tahi vahi hau. Eita e tia ia tiai noa i te hoê taime maitai no te haapii. Mea titauhia râ ia haavî tatou i te huru tupuraa na roto i te raveraa i te taime no te haapiiraa. (Ephesia 5:15, 16) E faaherehere te tahi pae i te hoê taime poto i te poipoi aita anaˈe i rahi te faanevanevaraa. Te manaˈo nei te tahi atu e mea maitai aˈe te ahiahi. Atira noa ˈtu, eiaha tatou ia tâuˈa ore i te hinaaro faufaa roa e farii i te ite mau i te Atua e i ta ˈna Tamaiti. (Ioane 17:3) E faataa anaˈe ïa i te taime no ta tatou iho haapiiraa e e pee maite anaˈe atu.

17. Eaha te feruriruriraa, e e nafea tatou e faufaahia ˈi i te reira?

¹⁷ E faufaa faito ore to te feruriruriraa, oia hoi te feruri e te feruri-faahou-raa i te mea ta tatou i haapii mai. E tauturu mai te reira ia tuu i te mau manaˈo o te Atua mai roto mai i te parau neneihia e i roto atu i to tatou aau. E tauturu mai ia ite e nafea ia faaohipa i te aˈoraa bibilia e ia riro tatou ei ‘feia rave i te parau, eiaha ei feia faaroo noa.’ (Iakobo 1:22-25) Hau atu â, e tauturu mai ia haafatata ˈtu â ia Iehova, no te mea e na reira tatou ia feruri i to ˈna mau huru maitatai e e nafea te reira i haamahitihitihia ˈi i roto i te tumu parau ta tatou e haapii ra.

18. Eaha te mau huru tupuraa e titauhia e maitai ai te feruriruriraa?

¹⁸ Ia faufaa-maite-hia tatou i te haapiiraa e te feruriruriraa, e tia ia tatou eiaha roa ˈtu ia nevaneva. No te farii i te haamaramaramaraa apî ia feruriruri tatou, e tia ia tatou ia tuu i te mau faanevanevaraa o te oraraa i teie tau i te hiti. E titauhia te taime e te moemoe, auê râ ïa te haumârû i te amuraa i te maa varua e te inuraa i te pape o te parau mau e vai ra i roto i te Parau a te Atua!

19. (a) I te pae o ta tatou iho haapiiraa, eaha tei tauturu i te tahi pae ia faaroa ˈtu â i to ratou haapao maitai? (b) Eaha to tatou huru feruriraa i mua i te haapiiraa e tia ˈi, e e nafea tatou e maitaihia ˈi i teie ohipa faufaa?

 ¹⁹ Eaha ïa mai te peu e eita e maoro ia haamau tatou i to tatou feruriraa e ia haamata tatou i te nevaneva haere i muri aˈe i te hoê taime haapiiraa poto? Ua itea mai i vetahi pae e ua maitai mai to ratou puai haamauraa i te feruriraa a haapii ai ratou na roto i te haapotoraa i te mau taime haapiiraa i te omuaraa e te faaroa-mǎrû-raa ˈtu. E tia ia riro ei fa na tatou te raveraa i te taime no te haapiiraa eiaha râ ia na nia nia noa. E tia ia tatou ia faahotu i te anaanatae rahi i te tumu parau e faahohonuhia ra. E e nehenehe ta tatou e imi atu â i roto i te puea tumu parau rahi i horoahia mai e te pǔpǔ o te tavini haapao maitai e te paari. Mea faufaa roa te imiraa i roto i “te mau mea hohonu atoa a te Atua ra.” (Korinetia 1, 2:10) Ia na reira tatou, e rahi atu to tatou ite i te Atua e to tatou puai haroaroaraa. (Hebera 5:14) Mai te peu e mea itoito tatou ei piahi o te Parau a te Atua, e ‘au maite’ atoa tatou “ia haapii atu ia vetahi ê.”—Timoteo 2, 2:2.

20. E nafea tatou ia faatupu e ia tapea i te taairaa piri roa e te Atua ra o Iehova?

²⁰ E tauturu rahi mai te haereraa i te putuputuraa Kerisetiano e te haapiiraa ia tatou iho ia faatupu e ia tapea i te taairaa piri roa e Iehova. E au ra e tera te huru o te papai salamo tei parau atu i te Atua e: “Te rahi roa nei to ˈu hinaaro i ta oe ra ture! o to ˈu ïa manaˈoraa i te mau mahana atoa nei.” (Salamo 119:97) No reira, e haere tamau anaˈe ïa i te mau putuputuraa e te mau tairururaa. E ia faaherehere tatou i te taime no te haapiiraa bibilia e te feruriruriraa. E haamaitai-rahi-hia tatou no to tatou ‘faarahi-hua-raa ˈtu i te haapao maitai’ i te Parau a te Atua.

[Nota i raro i te api]

Te haamanaˈo ra anei outou?

• No te aha te tahi mau Kerisetiano Hebera i painu ê atu ai i te faaroo mau?

• E nafea tatou e haapao maitai noa ˈi i te putuputuraa Kerisetiano?

• Eaha te tauturu mai ia faufaahia tatou i ta tatou iho haapiiraa bibilia e te feruriruriraa?

[Uiraa haapiiraa]

[Hohoˈa i te api 11]

I titauhia na i te mau Kerisetiano Hebera ia ara i te haamouraa o Ierusalema e fatata roa maira

[Hohoˈa i te api 13]

E nehenehe te mau metua e tauturu i ta ratou mau tamarii ia faufaahia ratou i te mau putuputuraa Kerisetiano