Mau uiraa a te feia taio

• O Lucifero anei te hoê iˈoa ta te Bibilia e faaohipa nei no Satani?

E itehia te iˈoa Lucifero hoê taime i roto i te mau Papai e i roto noa i te tahi mau huriraa o te Bibilia. Ei hiˈoraa, te huri nei Te Bibilia Moà V.C.J.S. i te Isaia 14:12 mai teie: “E aha oe i mairi ai no nia mai i te rai, e Lucifero e! o oe tei anaana i te aahiata?”

Te auraa o te taˈo Hebera i hurihia ei “Lucifero,” oia ïa “tei anaana.” Te faaohipa nei te Septante i te taˈo Heleni, te auraa “tei afai mai i te aahiata.” No reira te tahi mau huriraa e huri ai i te taˈo tumu Hebera ei “fetia poipoi.” Te faaohipa nei râ te Vulgate Latino a Jérôme i te iˈoa “Lucifero” (tiarama), e te faataa nei te reira no te aha teie taˈo e itehia ˈi i roto e rave rau huriraa o te Bibilia.

O vai teie Lucifero? E itehia te taˈo “tei anaana,” aore ra “Lucifero,” i roto i te parau tohu a Isaia i to ˈna faaueraa i te mau Iseraela e faahiti i te hoê “parabole i te arii o Babulonia.” No reira, e tuhaa tera no te hoê parau matamua i te opu hui arii Babulonia. Ua horoahia teie faataaraa “tei anaana” i te hoê taata eiaha i te hoê mea ora varua, e ite-faahou-hia te reira i roto i te parau ra: “E hopoi-roa-hia râ oe i raro roa i te tanuraa ra.” Te tanuraa, o te menema matauhia ïa o te huitaata nei—e ere te hoê vahi i reira te Diabolo ra o Satani e faaea ˈi. Hau atu â, te ui nei te feia e ite ra ia Lucifero i te toparaa i roto i teie huru tupuraa e: “O te taata teie i rurutaina ˈi te fenua nei?” Papu maitai, e au “Lucifero” i te hoê taata, eiaha i te hoê mea ora varua.—Isaia 14:4, 15, 16.

No te aha i horoahia ˈi teie faataaraa taa ê i te opu hui arii Babulonia? E tia ia tatou ia ite e ua parauhia te arii no Babulonia tei anaana i muri noa ˈˈe i to ˈna toparaa ma te hoê huru faaooo. (Isaia 14:3) Na te teoteo i turai i te mau arii no Babulonia ia faateitei ia ratou i nia ˈˈe i tei haaati ia ratou. No te rahi o te teoteo o te opu hui arii i faahohoˈahia ˈi oia i te faaahaaha: “E haere au i nia roa i te raˈi ra; e faateitei au i tau terono i nia ˈˈe i te mau fetia o te Atua ra; e parahi hoi au i nia i te mouˈa amuiraa ra, i te pae i apatoa ra . . . Ia faito vau i Tei Teitei ra.”—Isaia 14:13, 14.

“Te mau fetia o te Atua,” o te mau opu fetii hui arii ïa no Davida. (Numera 24:17) Mai ia Davida mai, ua faatere taua mau “fetia” ra na nia mai i te mouˈa no Ziona. I muri aˈe i to Solomona paturaa i te hiero i Ierusalema, ua topahia te iˈoa Ziona i nia i te oire taatoa. I raro aˈe i te faufaa a te Ture, ua faauehia te mau tane no Iseraela ia haere i Ziona e toru taime i te matahiti. No reira oia i riro ai ei “mouˈa amuiraa.” Na roto i te faaotiraa e faatîtî i te mau arii no Iudea e i muri iho e tiavaru ia ratou i tera mouˈa, te faaite ra o Nebukanesa i to ˈna hinaaro e tuu ia ˈna i nia ˈˈe i taua mau “fetia” ra. Noa ˈtu e maoti Iehova i pau ai te mau arii no Iudea, ma te teoteo ua tuu oia ia ˈna iho i nia i te tiaraa o Iehova. I muri aˈe ïa i te toparaa te opu hui arii Babulonia to ˈna faataaraahia ma te faaooo mai “tei anaana” ra.

Te faaite mau â ra te teoteo o te mau faatere no Babulonia i te huru o “te atua o teie nei ao ra”—te Diabolo ra o Satani. (Korinetia 2, 4:4) Te nounou atoa ra o ˈna i te puai e te hinaaro ra e na nia ˈˈe i te Atua ra o Iehova. E ere râ o Lucifero i te hoê iˈoa ta te mau Papai i horoa no Satani.

 • No te aha te Paraleipomeno 1, 2:13-15 e parau ai e o Davida te hitu o te tamaiti a Iese, area te Samuela 1, 16:10, 11, te faataa ra ïa e o oia te vau?

I muri aˈe i to te arii Saula no Iseraela i tahito faarueraa i te haamoriraa mau, ua tono te Atua ra o Iehova i te peropheta Samuela e faatahinu hoê o te mau tamaiti a Iese ei arii. Te faataa ra te faatiaraa bibilia no nia i teie tupuraa matauhia i papaihia e Samuela iho i te senekele 11 H.T.T, e o Davida te vau o te tamaiti a Iese. (Samuela 1, 16:10-13) Tera râ, te parau ra te aamu i papaihia e Ezera te tahuˈa fatata e 600 matahiti i muri aˈe e: “Fanau aˈera ta Iese, o Eliaba, e matahiapo ïa, e o Abinadaba te toopiti, e o Sima te tootoru, e o Netaneela te toomaha, e o Radai te toopae, e o Ozema te tooono, e o Davida te toohitu.” (Paraleipomeno 1, 2:13-15) Eaha tei tupu i nia i te hoê o te mau taeae o Davida, e no te aha o Ezera i tatara ˈi i to ˈna iˈoa?

Te parau ra te mau Papai e e ‘toovau a Iese tamarii tamaroa.’ (Samuela 1, 17:12) E au ra e aita hoê o ta ˈna mau tamaiti i ora maoro no te faaipoipo e no te fanau i te tamarii. No te mea aita e huaai, aita ïa to ˈna e tiaraa mana i roto i te tufaa opu fetii e aita atoa i roto i te mau parau ihotatau o te opu o Iese.

I teie nei, e feruri na tatou i te tau o Ezera. E hiˈo tatou i te huru tupuraa i to ˈna papairaa i te mau Paraleipomeno. Ua hope te hopoi-tîtî-raa i Babulonia fatata e 77 matahiti na mua ˈtu, e ua parahi faahou te mau ati Iuda i to ratou fenua. Ua faatia te arii no Peresia ia Ezera e faatoroa i te mau haava e i te mau orometua haapii i te Ture a te Atua e e faanehenehe i te fare o Iehova. Ua titauhia te mau tapura ihotatau tano roa no te haapapu i te tufaa opu fetii e no te faataa e o te feia noa i faatiahia tei tavini i roto i te autahuˈaraa. No reira, ua faaineine o Ezera i te hoê faatiaraa taatoa o te aamu o te nunaa, tae noa ˈtu te hoê parau maramarama e te papu o te opu o Iuda e o Davida. Aita e faufaa to te iˈoa o te tamaiti a Iese o tei pohe ma te tamarii ore. No reira, ua tatara o Ezera i to ˈna iˈoa.