‘E haamataro hua oe’

CITIUS, altius, fortius—vitiviti aˈe, teitei aˈe, puai aˈe! Teie te mau manaˈo maitai roa ta te mau maona no Heleni e no Roma i tahito ra i hinaaro. Tau senekele i te maoro, i Olympie, i Delphes, i Némée, e i te Ariariraa i Korinetia, ua tupu te mau tataˈuraa tuaro rarahi ma te “haamaitairaa” a te mau atua e tau tausani taata tei haere atu e mataitai. Te fanaˈoraa taa ê e tataˈu i roto i teie mau hautiraa, o te faahopearaa ïa o te haa-puai-raa e rave rahi matahiti i te maoro. E hopoi mai te upootiaraa i te hanahana na te feia i upootia e na to ratou oire tumu.

E ere i te mea maere i roto i tera tupuraa o te taˈere, ia faaau te feia papai i te mau Papai Heleni Kerisetiano i te hororaa pae varua a te mau Kerisetiano i te tahi mau haa tuaro. No te horoa mai i te tahi mau haapiiraa puai, ua faaohipa na aposetolo Petero e Paulo ma te aravihi i te tahi mau faahohoˈaraa i niuhia i nia i te mau hautiraa. I to tatou tau, te tamau noa ra taua noâ hororaa Kerisetiano puai ra. Ua tia i te mau Kerisetiano no te senekele matamua ia faaruru i te faanahoraa ati Iuda o te mau mea; i teie mahana, e tia ia tatou ia “tô” i te hoê faanahoraa na te ao nei e fatata i te haamouhia. (Timoteo 2, 2:5; 3:1-5) E manaˈo paha te tahi pae e mea tuutuu ore ta ratou iho “hororaa no te faaroo” e mea rohirohi. (Timoteo 1, 6:12; The New English Bible) E horoa mai te hoê hiˈopoaraa i te tahi mau faaauraa tuaro i roto i te Bibilia i te tahi mau haapiiraa faufaa.

Te hoê taata faaineine maitai roa

I nia i te hoê faito rahi, tei te taata faaineine e manuïa ˈi te hoê maona. Teie ta te buka Archaeologia Graeca e parau ra no nia i te mau hautiraa no tahito ra: “E tia i te feia tataˈu ia horeo e ua faaineine ratou ia ratou hoê ahuru avaˈe taatoa i te maoro.” E hinaaro atoa te mau Kerisetiano i te hoê faaineineraa etaeta. Ua aˈo Paulo ia Timoteo, te hoê matahiapo Kerisetiano, e: ‘E haamataro hua oe i te paieti.’ (Timoteo 1, 4:7) Na vai e haamataro aore ra e faaineine i te hoê “maona” Kerisetiano? Aita ˈtu ïa maori râ na te Atua ra o Iehova iho! Ua papai te aposetolo Petero e: ‘Na te Atua no ˈna te mau maitai atoa e haamaitai roa ia outou, e faaetaeta, e e haapapu ia outou.’—Petero 1, 5:10.

No ǒ mai te parau ra ‘e haamaitai roa ia outou’ i te hoê ihoparau Heleni teie te auraa, ia au i te Theological Lexicon of the New Testament, “e rave e ia au te hoê mea [aore ra te hoê taata] i to ˈna fa, e faaineine e e faatano atu i to ˈna faaohiparaa.” Te parau atoa ra te Greek-English Lexicon a Liddell e a Scott e e nehenehe e faataa i teie ihoparau mai teie “e faaineine, e haamataro, aore ra e faanahonaho maite.” E nafea Iehova ‘e faaineine ai, e haamataro ai, aore ra e faanahonaho maite ai’ ia tatou no te hororaa Kerisetiano fifi roa? Ia taa ia tatou te faaauraa, e hiˈo mai tatou i te tahi o te mau ravea i faaohipahia e te feia faaineine.

Teie ta te buka The Olympic Games in Ancient Greece e parau ra: “Ua faaohipa te feia haapao i te faaineineraa i te feia apî e piti ravea tumu, te matamua o te faaitoitoraa ïa i te piahi ia rave i te tutavaraa pae tino rahi roa ˈˈe ia noaa mai te mau faahopearaa maitai roa ˈˈe, e te piti o te haamaitairaa ïa i ta ˈna raveraa e to ˈna huru.”

Oia atoa, te faaitoito e te haapuai maira Iehova ia aravihi-roa-hia tatou e ia haamaitai i to tatou ite i roto i ta ˈna taviniraa. Te horoa maira to tatou Atua i te puai na roto i te Bibilia, ta ˈna faanahonahoraa i te fenua nei, e te mau hoa Kerisetiano feruriraa paari. I te tahi taime, e faaineine oia ia tatou na roto i te aˈo. (Hebera 12:6) I te tahi atu taime, e faatia paha oia e ia tupu te tahi mau tamataraa e mau fifi rau ia nehenehe tatou e faahotu i te faaoromai. (Iakobo  1:2-4) E te horoa maira oia i te puai e hinaarohia. Te parau ra te peropheta Isaia e: ‘O te feia e tiaturi ia Iehova, e noaa ïa te etaeta apî; e pee ratou i nia mai tei nia i te pererau o te aeto ra; e horo ratou, e e ore e rohirohi; e haere â hoi ratou, e e ore e matapourihia.’—Isaia 40:31.

Te mea faufaa, te horoa rahi maira te Atua i to ˈna varua moˈa, o te faaitoito ia tatou ia tamau i te tavini ia ˈna ma te fariihia. (Luka 11:13) Mea rahi te hiˈoraa o te mau tavini a te Atua o tei faaruru i te mau tamataraa roa e te puai i to ratou faaroo. E mau tane e e mau vahine noa ratou mai ia tatou. Ua noaa râ ia ratou i te faaoromai maoti to ratou tiaturi taatoa i te Atua. Oia mau, ‘no ǒ mai i te Atua ra te puai i hau aˈe i tei matauhia, eiaha ia tatou.’—Korinetia 2, 4:7, MN.

Te hoê taata faaineine aumauiui

Hoê o te mau ohipa a te hoê taata faaineine no tahito ra, e “hiˈo [ïa] teihea huru e ehia faaetaetaraa tino e hinaarohia no te maona taitahi e no te hoê haa tuaro taa maitai,” o ta te hoê aivanaa ïa e parau ra. Ia faaineine te Atua ia tatou, e hiˈo o ˈna i to tatou taitahi huru tupuraa, ite, hamaniraa, e mau taotiaraa. Mea huru pinepine a faaineine ai Iehova ia tatou, e taparuparu tatou ia ˈna, mai ia Ioba: “E haamanaˈo na i tena na, e mai te araea ra to oe hamani ia ˈu.” (Ioba 10:9) Eaha te pahonoraa a to tatou faaineine aumauiui? Teie ta Davida i papai no nia ia Iehova: ‘Ua ite oia i to tatou huru; te manaˈo ra oia e e repo tatou nei.’—Salamo 103:14.

E maˈi rahi paha to outou o te taotia ra i ta outou e nehenehe e rave i roto i te taviniraa, aore ra te aro ra paha outou i te mau manaˈo faatoaruaru no nia ia outou iho. Te tutava ra paha outou i te haapae i te hoê peu ino, aore ra te manaˈo ra paha outou e eita e maraa ia outou ia faaruru i te faaheporaa a te mau hoa i to outou tuhaa fenua, i te vahi raveraa ohipa, aore ra i te fare haapiiraa. Noa ˈtu eaha to outou huru tupuraa, eiaha roa ˈtu e haamoe e te taa maitai aˈe ra ia Iehova to outou mau fifi i te tahi atu taata—ia outou atoa! Ei faaineine haapao maitai, e vata noa oia i te tauturu ia outou mai  te peu e e haafatata ˈtu outou ia ˈna.—Iakobo 4:8.

“E nehenehe” ta te feia faaineine no tahito ra “e faataa i te rohirohi aore ra te paruparu e ere no te faaetaetaraa tino, no te tahi atu râ tumu, mai te fifi i te pae feruriraa, te rumaruma, te hepohepo e te vai ra ˈtu â. . . . No te mea e mana rahi roa to te [feia faaineine], e hiˈopoa atoa ratou i te oraraa o te mau maona e e faaô atu ratou ia manaˈo ratou e mea titauhia.”

E rohirohi aore ra e paruparu anei outou i te tahi taime no te mau faaheporaa e te mau faahemaraa tuutuu ore a teie nei ao? Ei faaineine ia outou, te haapao maite ra Iehova ia outou. (Petero 1, 5:7) E ite oioi oia i roto ia outou i te tahi tapao o te paruparu aore ra o te rohirohi pae varua. Noa ˈtu e e faatura Iehova i to tatou tiamâraa e maiti, no to tatou maitai mure ore, te horoa rahi maira oia i te tauturu e te aˈo ia hinaarohia. (Isaia 30:21) E nafea? Na roto ïa i te Bibilia e te mau papai bibilia, te mau matahiapo pae varua i roto i te amuiraa, e to tatou huitaeae î i te here.

‘E haapao i tei au i te mau mea atoa’

Parau mau, eita noa e hinaarohia te hoê taata faaineine maitai no te manuïa. Tei te maona noa e to ˈna haapaoraa i te faaineineraa etaeta. Mea etaeta te huru tamaaraa, i te mea e e titauhia te haapaeraa e te tamaaraa etaeta i roto i te faaineineraa. Ua parau o Horace, te hoê rohipehe no te senekele matamua H.T.T., e e “haapae” te feia tataˈu “i te vahine e te uaina” ia “raea te fa hinaaro-ru-hia.” E ia au i te aivanaa bibilia ra o F. Cook, e tia i te feia e apiti i te mau hautiraa ia “haapao maitai [e ia] faaiti i te maa . . . hoê ahuru avaˈe i te maoro.”

Ua faaohipa Paulo i teie faaauraa i to ˈna papairaa i te mau Kerisetiano i Korinetia, te hoê oire matau-roa-hia no te mau Hautiraa i te Ariariraa i pihai mai: “Te taata atoa e titau i te re ra, e haapao ïa i tei au i te mau mea atoa nei.” (Korinetia 1, 9:25) E ape te mau Kerisetiano mau i te mau huru oraraa nounou taoˈa, te morare ore, e te viivii o te ao. (Ephesia 5:3-5; Ioane 1, 2:15-17) E tia atoa ia ratou ia iriti ê i te mau huru paieti ore e opanihia e te Bibilia e ia mono na roto i te mau huru maitatai e au i to te Mesia.—Kolosa 3:9, 10, 12.

E nafea ïa? A tahi, a tapao na i ta Paulo pahonoraa na roto i te hoê faahohoˈaraa puai: ‘Te moto nei au i tau tino ia vi; o te riro noa ˈtu hoi au o tei aˈo ia vetahi ê ra, ei taata ite-ore-hia mai.’—Korinetia 1, 9:27.

Auê ïa manaˈo puai ta Paulo e horoa ra i ǒ nei e! Aita oia e faaitoito maira ia haamauiui tatou i to tatou tino. Te faˈi ra râ oia e e aroraa to roto ia ˈna iho. I te tahi taime, ua rave oia i te mau mea aita oia i hinaaro e rave e aita oia i rave i te mau mea ta ˈna i hinaaro e rave. Ua aro râ oia ia ore roa ˈtu to ˈna mau paruparu e faatere ia ˈna. Ua ‘moto oia i to ˈna tino’ na roto i te haavî-puai-raa i te mau hinaaro e te mau huru o te tino.—Roma 7:21-25.

E tia i te taatoaraa o te mau Kerisetiano ia na reira atoa. Ua faahiti Paulo i te mau tauiraa i ravehia e te tahi pae i Korinetia o tei riro na ei faaturi, ei haamori idolo, ei mahu, ei eiâ, e te vai ra ˈtu â. Na te aha i tauturu ia ratou ia taui? Na te mana ïa o te Parau a te Atua e te varua moˈa apitihia e ta ratou faaotiraa papu e pee i te reira. “Ua horoihia râ outou,” o ta Paulo ïa i parau, “ua faataahia râ outou, ua tiahia râ outou i te iˈoa o te Fatu ra o Iesu, e te [v]arua o to tatou Atua.” (Korinetia 1, 6:9-11; MN) Tera atoa ta Petero i papai i te feia o tei vaiiho i tera mau peu iino. Ei Kerisetiano, ua rave ratou paatoa i  te mau tauiraa mau.—Petero 1, 4:3, 4.

Te mau tutavaraa faatano-maitai-hia

Ua faahohoˈa Paulo i ta ˈna faaotiraa papu e to ˈna tiatonu-roa-raa i te tapiraa i te mau tapao pae varua, ma te parau e: “Te moto nei au eiaha mai te mea e, e moto i te mataˈi.” (Korinetia 1, 9:26) E nafea te hoê taata tataˈu e moto ai? Te pahono ra te buka The Life of the Greeks and Romans e: “Eita noa e titauhia te puai uˈana, oia atoa râ te hiˈo-maite-raa ia itea mai te mau vahi paruparu o te enemi. Mea faufaa atoa te tahi moto aravihi i haapiihia i te mau fare haapiiraa taputôraa, e te vitiviti ia noaa te hoê enemi.”

O to tatou tino tia ore te hoê o to tatou mau enemi. Ua ite anei tatou eaha to tatou “mau vahi paruparu”? Ua ineine anei tatou i te hiˈo ia tatou mai ta vetahi ê hiˈoraa ia tatou—mai ta Satani iho â râ hiˈoraa ia tatou? Mea titauhia ia hiˈopoa tatou ia tatou iho ma te haavare ore e ia hinaaro e taui. Mea ohie roa ia haavare ia tatou iho. (Iakobo 1:22) E mea ohie roa ia imi i te otoheraa no te hoê haerea paari ore! (Samuela 1, 15:13-15, 20, 21) Mai te huru ra ïa e ‘te moto ra tatou i te mataˈi.’

I teie anotau hopea, eiaha te feia e hinaaro ra e faaoaoa ia Iehova e e fanaˈo i te ora ia haamarirau i te maiti i rotopu i te maitai e te ino, i rotopu i te amuiraa a te Atua e te ao piˈo. Eiaha ratou ia aueue, ia riro ei ‘taata aau piti, e te papu ore i to ratou atoa ra mau haerea.’ (Iakobo 1:8) Eiaha ratou ia haamâuˈa i ta ratou mau tutavaraa no te mau tapiraa faufaa ore. Ia pee te hoê taata i teie haerea afaro e te papu maitai, e oaoa ïa oia e e ‘ite te taata atoa i te tupuraa o to ˈna ite.’—Timoteo 1, 4:15.

Oia, te tamau noa ra te hororaa Kerisetiano. Ma te here, te horoa maira Iehova—to tatou Faaineine Rahi roa ˈˈe—i te haapiiraa e te tauturu e hinaarohia ia faaoromai tatou e ia noaa te re hopea. (Isaia 48:17) Mai te mau maona no tahito ra, mea hinaarohia ia aˈo tatou ia tatou iho, ia haavî ia tatou iho, e ia faaoti papu e tamau i ta tatou aroraa no te faaroo. E haamaitai-rahi-hia ta tatou mau tutavaraa faatano-maitai-hia.—Hebera 11:6.

[Tumu parau tarenihia i te api 31]

‘A faatahinu ia ˈna i te monoˈi’

Na te taata faatahinu e rave i te hoê tuhaa o te faaineineraa tuaro i Heleni i tahito ra. Ta ˈna ohipa, e faatahinu ïa i te tino o te mau tane, o te haere e faaineine ia ratou, i te monoˈi. Ua “tapao [te feia faaineine] e mau faahopearaa maitatai tei noaa mai i te miri-maitai-raahia te mau uaua iˈo hou te faaineineraa, e ua tauturu atoa te hoê miriraa maitai e te mǎrû i te tereraa o te tamǎrûraa e o te faafaaearaa ia oti te faaineineraa roa a te hoê maona,” ia au i The Olympic Games in Ancient Greece.

E nehenehe te parairaa i te monoˈi mau i nia i te tino e tamǎrû e e rapaau, e nehenehe atoa te faaohiparaa i te Parau a te Atua i nia i te hoê “maona” Kerisetiano i rohirohi e faatitiaifaro, e tamahanahana, e e faaora ia ˈna. No reira, i raro aˈe i te aratairaa a Iehova, te aˈohia ra te mau matahiapo o te amuiraa ia pure no taua taata ra, ei auraa parau, ia “faatahinu ia ˈna i te monoˈi i te iˈoa o te Fatu” ra o Iehova, e taahiraa faufaa teie no te rapaau i te pae varua.—Iakobo 5:13-15; Salamo 141:5.

[Hohoˈa i te api 31]

I muri aˈe i te hoê haapaeraa, e horeo te mau maona e ua faaineine ratou ia ratou hoê ahuru avaˈe i te maoro

[Faaiteraa i te tumu]

Musée du Louvre, Paris

[Faaiteraa i te fatu o te hohoˈa i te api 29]

Copyright British Museum