Te faatia ra te feia poro i te Basileia

Te fetia i horoahia i te hoê Piha a te Basileia

UA FAATAA te Faatereraa hau o te heipuni no Filelane i te matahiti 2000 ei “Matahiti no te faaneheneheraa aua.” Ua parau te hoê o te feia faanaho e “te fa o te tumu parau matahiti o te faaneheneheraa aua, e haamanaˈo ïa ia tatou paatoa i te mana o te mau vahi matie e haaati ra i nia i to tatou oraraa i te mau mahana atoa e to tatou vai-maitai-raa.”

I te 12 no Tenuare 2001, ua tae te hoê rata a te taatiraa o te mau tapihaa no te faaneheneheraa aua no Filelane i te amaa a te mau Ite no Iehova i Filelane. Te faataa ra te rata e ua horoahia hoê o te mau fetia no te tumu parau matahiti o te faaneheneheraa aua i te Piha a te Basileia a te mau Ite no Iehova no Tikkurila no te huru hamaniraa faahiahia o te mau vahi e haaati ra e no te nehenehe o te aua. Ua parau faahou te rata e “e mea au mau te hohoˈa o te tâpû fenua taatoa i te tau veavea e te tau toetoe, te unauna, e te haviti roa.”

Ua horoahia te fetia i te mau Ite no Iehova i te hotera no Rosendahl i Tampere, i Filelane, i te hoê oroa tei apitihia mai e 400 feia toroa e feia tapihoo. Ua nenei atoa te taatiraa o te mau tapihaa no te faaneheneheraa aua no Filelane i te hoê parau faaite i roto i te vea, o te na ô ra e: “I te mau vahi e rave rau no Filelane, fatata e mea nehenehe noa te mau Piha a te Basileia a te mau Ite no Iehova. E huti te heipuni e haapaohia ra i te ara-maite-raa o te mau taata haere noa. Ua riro te Piha a te Basileia no Tikkurila ei hoê hiˈoraa o te hoê ô nehenehe i roto i to ˈna taatoaraa. Te faaite amui ra te piha e te mau tâpû fenua aano i te hau e te vai faito noa.”

I Filelane, te vai ra e 233 Piha a te Basileia, e rave rahi ua haaatihia e te mau ô nehenehe. Teie râ, te mea nehenehe mau â o teie mau vahi, oia ïa e mau pu teie o te haamoriraa mau e te haapiiraa i te Bibilia. No na Ite no Iehova e hau atu i te 6 mirioni na te ao nei, ua riro te hoê Piha a te Basileia—nahonaho aore ra au noa—ei vahi au-maitai-hia. No reira ratou e oaoa ˈi i te aupuru maitai e te haapao ma te here i te reira. E matara noa te mau uputa o te mau Piha a te Basileia i te taata atoa i to outou tuhaa fenua!