Mau uiraa a te feia taio

E riro anei ei tahoêraa faaroo ia hoo mai i te hoê fare a te tahi pǔpǔ faaroo ê atu e ia taui ei Piha a te Basileia?

E ape iho â te mau Ite no Iehova i tera mau ohipa hooraa e te tahi atu mau haapaoraa. Noa ˈtu râ, e ere tera hooraa i te hoê ohipa tahoêraa faaroo. E nehenehe noa te reira e faarirohia ei ohipa hooraa tei oti. Aita te amuiraa a te mau Ite no Iehova no taua vahi ra e rave amui ra i te ohipa e te tahi atu pǔpǔ faaroo no te patu i te hoê vahi haamoriraa e faaohipahia e na pae e piti atoa ra.

Eaha te riro ei ohipa tahoêraa faaroo ia au ia Iehova? E hiˈo anaˈe i te faaueraa a te aposetolo Paulo: “Eiaha outou ia amui-au-ore-hia i te feia faaroo ore ra: eaha to te parau-tia auraa i te parau-tia ore? e eaha to te maramarama auraa i te pouri? E eaha to te Mesia auraa ia Behala? e eaha to te taata faaroo ra faufaa i te taata faaroo ore? E eaha to te hiero o te Atua ra atiraa ˈtu i te idolo? . . . E teie nei, te na ô maira Iehova, E haere mai outou i rapae au mai roto mai ia ratou ra, ia taa ê outou, e eiaha e rave noa ˈtu i te mea viivii ra; e na ˈu e farii atu ia outou.” (Korinetia 2, 6:14-17) Eaha ta Paulo e hinaaro ra e parau na roto i te taˈo ra “auraa”?

Te auraa ta Paulo e faahiti maitai ra, oia hoi te haamoriraa e te mau ohipa pae varua e te feia haamori idolo e te feia faaroo ore. Ua faaara oia i to Korinetia no nia i te ‘amuraa i te amuraa a te mau demoni.’ (Korinetia 1, 10:20, 21) No reira, te hoê ohipa tahoêraa faaroo, te apitiraa ˈtu ïa i roto i te haamoriraa aore ra te faatupuraa i te auraa pae varua e te tahi mau faanahonahoraa faaroo ê atu. (Exodo 20:5; 23:13; 34:12) Ua hoo-anaˈe-hia te hoê fare o tei faaohipahia e te hoê faanahonahoraa faaroo, te tumu, ia noaa mai ïa te hoê fare e hinaarohia ei Piha a te Basileia. Hou a faaohipahia ˈi ei Piha a te Basileia, e faaorehia te mau mea atoa a te haamoriraa hape. Ua oti anaˈe i te faaafarohia, e pûpûhia te reira na Iehova no te tumu hoê e haamori ia ˈna. Aita to te haamoriraa mau e apitiraa aore ra e auraa e te mea hape.

No te tauaparauraa i te mau tuhaa rii o taua hooraa ra, e tia ia faaiti mai i te farereiraa i te tahi atu pae e ia taotiahia ei ohipa hooraa noa. Ia haamanaˈo te mau melo o te amuiraa Kerisetiano i ta Paulo faaararaa eiaha ia “amui-au-ore-hia i te feia faaroo ore ra” e tia ˈi. Noa ˈtu e eita tatou e manaˈo e mea hau ê tatou i te feia e faaroo ê ta ratou, e ape tatou i te faahoaraa ˈtu ia ratou aore ra i te apitiraa ˈtu i roto i ta ratou haamoriraa. a

Eaha ïa ia tarahu te hoê amuiraa i te hoê fare o te hoê faanahonahoraa faaroo te fatu? E titau iho â te tarahuraa i te farereiraa tamau e tia hoi ia apehia. Noa ˈtu e e tarahuhia tera fare no te hoê noa taime ohiparaa, ia hiˈopoa ïa te tino matahiapo i te mau uiraa i muri nei e tia ˈi: Te vai ra anei te tahi mau idolo e mau hohoˈa faaroo i roto aore ra i rapaeau i te fare? E nafea te taata i roto i te oire ia hiˈo i ta tatou faaohiparaa i te fare? E turori anei te hoê i roto i te amuiraa ia faaohipa tatou i teie fare? (Mataio 18:6; Korinetia 1, 8:7-13) E hiˈopoa te mau matahiapo i teie mau tuhaa a faaoti atu ai ma te au maite. Ia haapao-atoa-hia to ratou manaˈo haava e to te taatoaraa o te amuiraa no te faaoti e hoo mai e e faariro anei i taua fare ra ei Piha a te Basileia.

[Nota i raro i te api]

[Hohoˈa i te api 27]

Ua hoohia mai teie fare, i riro na hoi ei sunago, e ua faaapîhia ei Piha a te Basileia