E hinaaro tatou paatoa i te haapopouraa

E MAHANA au maitai no te tamahine iti. Noa ˈtu e ua aˈohia oia i te tahi atu mau taime, i taua mahana taa ê ra, e haerea maitai roa to ˈna. I taua po ra râ, i muri aˈe i to te tamahine iti tuuraahia i nia te roˈi, ua faaroo to ˈna mama ia ˈna i te taˈiraa. I te uiraahia no te aha oia e oto ai, ua pahono oia ma te roimata e: “E ere anei au i te tamahine maitai i teie mahana?”

Ua mauiui roa te mama i taua uiraa ra. E haapeepee noa na o ˈna i te aˈo i ta ˈna tamahine. I taua mahana ra, noa ˈtu e ua tapao oia i te tutavaraa rahi ta ta ˈna tamahine iti i rave no te pee i te haerea maitai, aita te mama i haapopou ia ˈna.

E ere o te mau tamahine iti anaˈe o te hinaaro i te haapopouraa e te tamǎrûraa. O tatou paatoa—mai ta tatou e hinaaro i te aˈoraa e te faatitiaifaroraa.

Eaha to tatou huru ia haapopouhia tatou ma te haavare ore? Eita anei tatou e oaoa e e itoitohia? E manaˈo paha tatou e e taata tera e hiˈo maira, e taata tera e haapao maira. E haapapu te reira ia tatou e ua hoona ta tatou tutavaraa, e e faaitoito te reira ia tatou ia haa puai â no te tau no a muri aˈe. E ere i te mea maere ia faatae pinepine te haapopouraa haavare ore ia tatou i te taata o te rave i te taime no te faahiti i te tahi mau parau faaitoito.—Maseli 15:23.

Ua taa ia Iesu Mesia te faufaaraa e haapopou. I roto i te parabole o te mau taleni, e haapopou te fatu (faahohoˈahia ia Iesu iho) ma te mahanahana i na tavini haavare ore taitahi e piti ma te parau e: “Ua tia roa, e teie nei tavini maitai e te haavare ore.” Auê ïa parau mahanahana e! Noa ˈtu e mea taa ê roa to raua mau aravihi e ta raua mau haaraa, hoê â ta raua haapopouraa.—Mataio 25:19-23.

No reira, e haamanaˈo tatou i te mama o tera tamahine iti. Eiaha tatou e tiai ia taˈi vetahi no te haapopou ia ratou. E imi maori râ tatou i te mau taime maitatai no te haapopou. Oia mau, e tumu maitai ta tatou e haapopou ai ma te haavare ore i te mau taime maitatai atoa.