E nafea to pue mahana e riro ai ei mea faufaa na Iehova?

“Ua moe o inanahi ra i te tahi vahi i rotopu i te hitiraa mahana e te toparaa mahana, na hora auro e piti, e ono ahuru minuti taiamani taitahi. Aita e utua maitai e horoahia, no te mea ua moe roa!”—Lydia Sigourney, vahine papai buka Marite (1791-1865).

E AU ra e mea iti te pue mahana o to tatou oraraa e te mairi oioi nei. Ua feruriruri te papai salamo ra o Davida i te huru poto o te oraraa e ua turaihia oia ia pure e: “E faaite mai oe, e Iehova, i to ˈu nei hopea, e te maoro o to ˈu nei pue mahana, ia ite au nei i to ˈu paruparu. Inaha! ua faarirohia e oe to ˈu nei pue mahana ei tiapana hoê! e to ˈu nei oraraa mai te faufaa ore ïa i mua ia oe ra!” To Davida tapitapi, o te oraraa ïa ma te hoê huru e mauruuru mai ai te Atua, na roto i ta ˈna parau e ta ˈna mau ohipa. Teie ta ˈna i parau no nia i to ˈna hinaaro hope i te Atua: “Tei ia oe anaˈe to ˈu tiaturiraa.” (Salamo 39:4, 5, 7) Ua faaroo mai Iehova. Ua faito mau â oia i ta Davida mau ohipa e ua haamaitai ia ˈna ia au i te reira.

Mea ohie ia rave i te ohipa i te mau minuti atoa o te mahana e ia topa i roto i te hoê oraraa ru noa e te ohipa roa. E nehenehe te ahoaho e tupu mai, mai te peu iho â râ e mea rahi roa te ohipa e rave e e tamata, e mea iti hoi te taime no te haapao i te reira. Mai to Davida atoa anei to tatou tapitapi—e ora i to tatou oraraa ma te hoê huru e farii maitai mai ai te Atua? Oia mau, te hiˈopoa ra e te haapao maite ra Iehova ia tatou taitahi. Ua farii o Ioba, te hoê taata i mǎtaˈu i te Atua, fatata a 3 600 matahiti aˈenei, e te ite ra Iehova i to ˈna mau eˈa e te hiˈopoa ra i ta ˈna mau ohipa atoa. Ua ui noa Ioba e: “Ia paheru mai oia, e na hea vau i te parauraa ˈtu?” (Ioba 31:4-6, 14) E nehenehe e faariro i to tatou pue mahana ei mea faufaa na te Atua, na roto i te haamauraa i te mau fa pae varua matamua roa, te auraroraa i ta ˈna mau faaueraa, e te faaohiparaa i to tatou taime ma te paari. E faahohonu roa na tatou i teie mau tumu parau.

E haapao na mua anaˈe i te mau mea pae varua

Ma te tano, te faaitoito maira te mau Papai faauruahia ia haamau tatou i te mau fa pae varua matamua roa ma te parau e: ‘Ia au atu outou i te mau mea i hau i te maitai ra.’ Eaha teie mau mea i hau i te maitai ra? Oia ïa “te ite e te haroaroa o te aau.” (Philipi 1:9, 10) No te ite i te opuaraa a Iehova, mea titauhia ia faaohipa tatou i to tatou taime ma te paari. Ia haapao na mua râ tatou i te mau mea pae varua, mea papu ïa e e ora tatou i te hoê oraraa oaoa e te mauruuru.

Te haamanaˈo maira te aposetolo Paulo e ‘ia itea noa ia tatou te mea au i te Fatu ra.’ Ia itea ia tatou, mea titauhia ia hiˈopoa ia tatou iho, to tatou mau manaˈo turai e mau hinaaro o te aau. Te na ô faahou ra te aposetolo e: ‘Ia ite noa tatou i to te Fatu ra hinaaro.’ (Ephesia 5:10, 17) Eaha ïa te mea au ia Iehova? Te pahono ra te hoê maseli bibilia e: “O te paari â te mea maitai;  e titau i te paari; e te mau mea atoa e noaa ia oe ra e titau â i te haapao maitai. E faateitei oe ia ˈna, e na ˈna e faateitei ia oe.” (Maseli 4:7, 8) E oaoa Iehova i te taata e titau e e faaohipa i to ˈNa paari. (Maseli 23:15) Eita te nehenehe o tera paari e ravehia aore ra e mou. Oia mau, e riro te reira ei tiai e e parururaa ia tatou i “te eˈa o te feia parau ino ra; i te mau taata e parau i te parau piˈo ra.”—Maseli 2:10-15.

E haerea paari mau â ïa ia patoi i te hinaaro e tâuˈa ore i te mau mea pae varua! Mea hinaarohia ia faahotu tatou i te mauruuru no ta Iehova mau parau e i te mǎtaˈu maitai ia ˈna. (Maseli 23:17, 18) Noa ˈtu e e noaa mai tera huru feruriraa i te mau taime atoa i roto i te oraraa, mea maitai aˈe ia haamau i teie hohoˈa maitai e ia aˈa te mau faaueraa tumu bibilia i nia i to tatou huru i to tatou apîraa ra. “E tena na, e haamanaˈo i tei Hamani ia oe i to apîraa ra,” o ta te arii paari ra o Solomona ïa i parau.—Koheleta 12:1.

Te ravea matau-roa ˈˈe-hia e faahotu ai i te mauruuru ia Iehova, o te pureraa ïa tatou iho ia ˈna i te mau mahana atoa. Ua taa ia Davida te faufaaraa e tiaturi ia Iehova, ua taparuparu hoi oia e: “E faaroo mai i ta ˈu e ani atu, e Iehova e, e faaroo mai i tau pure: eiaha oe e mamû noa mai, i to ˈu nei roimata.” (Salamo 39:12) E horuhoru anei to tatou aau i te tahi taime no to tatou taairaa piri e te Atua, a tahe ai to tatou roimata? Oia mau, e rahi noa ˈtu â tatou i te faaite i te mau parau hohonu roa o to tatou aau ia Iehova e i te feruriruri i ta ˈna Parau, e haafatata noa mai â oia ia tatou.—Iakobo 4:8.

E haapii anaˈe i te auraro

O Mose te tahi atu taata faaroo o tei farii e e hinaaro roa oia i te Atua. Mai ia Davida, ua ite o Mose e mea arepurepu te oraraa. No reira oia i taparuparu ai i te Atua e haapii ia ˈna ‘i te taio i to ˈna pue mahana ia riro to ˈna aau i te haapao maitai.’ (Salamo 90:10-12) E noaa noa mai te hoê aau haapao maitai maoti te haapiiraa e te faaohiparaa i ta Iehova mau ture e mau faaueraa tumu. Ua ite Mose i te reira e ua faaitoito i te faataa i taua parau mau faufaa roa ra i te nunaa Iseraela na roto i te faahitihitiraa ˈtu i ta te Atua mau ture e mau faatureraa hou to ratou parahiraa i te Fenua Tǎpǔhia. Ua titauhia e ia papai te taata ta Iehova i maiti ei arii no a muri aˈe o te faatere ia Iseraela, i te hoê hohoˈa o te Ture na ˈna iho e ia taio e hope noa ˈtu to ˈna pue mahana i te ao nei. No te aha? No te haapii i te mǎtaˈu i te Atua. E tamataraa teie i te auraro o te arii. E parururaa ia ˈna ia ore ia teitei to ˈna aau i to ˈna mau taeae e ia maoro to ˈna pue mahana i to ˈna ra basileia. (Deuteronomi 17:18-20) Ua parau-faahou-hia teie parau fafau i to Iehova na ôraa ia Solomona, te tamaiti a Davida, e: “Ia haapao oe i ta ˈu nei parau, e ta ˈu nei peu, e ta ˈu nei faaueraa ˈtu, mai to metua mai ia Davida, e haamaorohia ïa e au to oe ra aho.”—Mau arii 1, 3:10-14.

E ere te auraro i te ohipa hauti na te Atua. Ia haafaufaa ore tatou i te tahi mau tuhaa o ta Iehova mau titauraa e mau faaueraa, papu roa e e ite mai oia i tera haerea. (Maseli 15:3) Ia turai ïa te reira ia tatou ia haafaufaa i ta Iehova mau aratairaa atoa, noa ˈtu e e ere i te mea ohie. Te imi ra hoi Satani i te mau ravea atoa no te “faaore” i to tatou hinaaro e faaitoito i te auraro i ta te Atua mau ture e mau faaueraa.—Tesalonia 1, 2:18.

E mea faufaa iho â râ ia pee i te aˈoraa bibilia e putuputu no te haamoriraa e te auhoaraa. (Deuteronomi 31:12, 13; Hebera 10:24, 25) Mea maitai ïa ia ui tatou ia tatou iho e: ‘Ua faaoti papu noa anei au e rave i te mea hoona  mau?’ Ia ore tatou e tâuˈa i te amuimuiraa e te haapiiraa i te mau putuputuraa Kerisetiano no te tamata i te imi i te panoonoo ore i te pae faaravairaa faufaa, e paruparu ïa to tatou taairaa e o Iehova. Ua papai te aposetolo Paulo e: “Ei parahiraa nounou taoˈa ore to outou, ia mauruuru i ta outou i noaa ra; o te Atua iho hoi tei parau mai e, E ore roa vau e taiva ia oe, e ore roa vau e faarue ia oe, e ore, e ore roa ˈtu.” (Hebera 13:5) E faaite te auraroraa ma te aau tae i ta Iehova mau faaueraa, i te tiaturi taatoa e te haapao ra oia ia tatou.

Ua haapii Iesu i te auraro e ua maitaihia oia. E nehenehe atoa ïa tatou. (Hebera 5:8) E rahi noa ˈtu â tatou i te faahotu i te auraro, e ohie noa ˈtu â tatou i te auraro, tae noa ˈtu i te mau mea rii. Parau mau, no to tatou taiva ore, e faaruru paha tatou i te huru au ore e te ino atoa o vetahi ê. I te vahi raveraa ohipa iho â râ, i te fare haapiiraa, aore ra i roto i te hoê utuafare amahamaha i te pae faaroo. E tamahanahanahia râ tatou e tei parauhia i te mau Iseraela e ‘ia hinaaro ratou ia Iehova, ia faaroo i to ˈna reo, e ia ati atu ia ˈna; o to ratou ora ïa oia, e te maoro ïa o to ratou pue mahana.’ (Deuteronomi 30:20) Tera atoa te fafauhia ra ia tatou.

E faaohipa anaˈe i te taime ma te paari

E tauturu atoa te faaohiparaa i to tatou taime ma te paari, ia riro to tatou pue mahana ei mea faufaa na Iehova. Mea titauhia ia faaohipa i te taime, ahiri aita ra e pau te taime, area te moni, e nehenehe ïa e haaputuhia. Ua moina roa te mau hora atoa e mairi. I te mea e ua rahi aˈe te ohipa i tei nehenehe e rave, te faaohipa ra anei tatou i to tatou taime e raea ˈi ta tatou mau fa i roto i te oraraa? Hoê fa faufaa roa a te mau Kerisetiano atoa, o te rave-tamau-raa ïa i te ohipa pororaa i te Basileia e te faariroraa i te taata ei pǐpǐ.—Mataio 24:14; 28:19, 20.

 E faaohipa tatou i to tatou taime ma te paari i muri aˈe noa i to tatou ite-maitai-raa i to ˈna faufaa. Ua tano ïa te Ephesia 5:16 i te faaitoito mai ia “faaherehere maite i te taime,” oia hoi ia haapae i te mau mea e ere i te mea faufaa roa. Te auraa ra, e faaiti mai i te mau tapiraa o te haamâuˈa i te taime. E nehenehe tatou e rohirohi ia mataitai rahi roa i te afata teata aore ra ia faahee rahi roa i nia i te Internet, ia taio i te mau papai aita e apî, aore ra ia tapi hua i te mau faaanaanataeraa manaˈo. Hau atu â, ia haaputu hua tatou i te mau taoˈa materia, e pau ïa te taime e hinaarohia ia noaa mai te hoê aau haapao maitai.

E parau te feia o te faanaho maitai i to ratou taime e: “Eita e nehenehe e faaohipa maitai i to oe taime mai te peu e aita e tapao taa maitai.” Te horoa ra ratou e pae titauraa no te haamau i te mau fa: taa maitai, e nehenehe e faitohia, e raeahia, au noa, e te faanahohia.

Hoê fa e hoona, o te haamaitairaa ïa i ta tatou taioraa bibilia. Te taahiraa avae matamua, ia taa maitai ta tatou fa—e taio i te Bibilia taatoa. To muri iho, ia nehenehe ta tatou fa e faitohia. Ia na reira tatou, e nehenehe ta tatou e faito i ta tatou haereraa i mua. Ia faaitoito te mau fa ia tatou ia rohi e ia haere i mua. Ia raea-atoa-hia e ia au noa. Ia haapaohia te aravihi, te ite, e te taime vata o te taata taitahi. No te tahi pae, e hinaaro atu â ratou i te taime ia raea te tapao. Inaha, ia faanahohia ta tatou fa. E hinaaro atu â tatou e rave i te reira ia faataa tatou i te hoê taio mahana.

E tapao taa maitai ta te mau melo atoa o te utuafare rahi o te Betela, e haa ra i te pu rahi a te mau Ite no Iehova aore ra i te hoê o to ˈna mau amaa i te ao nei, oia hoi e taio i te Bibilia taatoa i te roaraa o ta ratou matahiti matamua i te Betela. Ua ite ratou e e turu te taioraa faufaa i te Bibilia, i ta ratou haereraa i mua i te pae varua e i te hoê taairaa piri roa e o Iehova, o te haapii ra ia ratou no to ratou maitai. (Isaia 48:17) E haamau atoa anei tatou i te fa e taio tamau i te Bibilia?

Mau maitai o te faariroraa i to tatou pue mahana ei mea faufaa

E mea rahi te maitai e noaa mai i te haapao-na-mua-raa i te mau mea pae varua. E horoa mai te reira i te manaˈo e ua raea te tapao e e tumu to te oraraa. Na roto i te paraparau-tamau-raa e o Iehova maoti te pure haavare ore, e haafatata ˈtu â tatou ia ˈna. E faaite atu ta tatou pure i to tatou tiaturi ia ˈna. E faaite te taioraa i te Bibilia e te mau papai bibilia no ǒ mai i “te tavini haapao maitai e te paari” i te mau mahana atoa, i to tatou hinaaro e faaroo i te Atua ia paraparau mai o ˈna. (Mataio 24:45-47) E noaa mai ïa te hoê aau haapao maitai e rave atu ai tatou i te mau faaotiraa e te mau maitiraa maitatai i roto i te oraraa.—Salamo 1:1-3.

Mea au na tatou e faaroo i ta Iehova mau faaueraa, e ere hoi i te mea teimaha. (Ioane 1, 5:3) A faariro ai tatou i te mahana taitahi ei mea faufaa na Iehova, e haapaari ïa tatou i to tatou taairaa e o ˈna. E riro atoa tatou ei turu mau i te pae varua no to tatou mau hoa Kerisetiano. E oaoa te Atua ra o Iehova i tera mau ohipa. (Maseli 27:11) E aita ˈtu e maitai rahi aˈe maori râ te fanaˈoraa i ta Iehova farii maitai i teie nei e a muri noa ˈtu!

[Hohoˈa i te api 21]

Mea haapao roa te mau Kerisetiano i te mau mea pae varua

[Hohoˈa i te api 22]

Te faaohipa ra anei outou i to outou taime ma te paari?

[Hohoˈa i te api 23]

E haapaari tatou i to tatou taairaa e o Iehova a faariro ai tatou i te mahana taitahi ei mea faufaa na ˈna