Mau vahi haamoriraa mea hinaarohia anei?

‘Tau tausani feia perenina no te mau vahi rau o te tuhaa fenua tei oomo i te ahu peni rau, te rave faahou ra te tahi mau pǔpǔ Indiens i te ori no te tau hou to Paniora haruraa i te tahi mau vahi o Marite Apatoa ia au i te tairi o te pahu, e ua î te aua e te mau aroâ e haaati ra i te fare pure i te feia haere pure e faaitoito roa ra ma te mauiui i te haere i te vahi moˈa na roto i te nahoa taata.’

TERA ïa te faataaraa a te vea El Economista i te hoê nahoa iti rahi i te avaˈe Titema 2001. I taua taime ra, fatata e toru mirioni taata tei mataitai i te fare pure rahi i te oire o Mexico no te faaite i to ratou faaroo i te Paretenia no Guadalupe. Mea rahi atoa te taata e mataitai i te tahi atu mau fare faaroo, mai te fare pure rahi Saint-Pierre i Roma.

E parahiraa taa ê to te mau fare faaroo i roto i te aau o te taata e rave rahi o te hinaaro e haamori i te Atua. “No ˈu, ua riro te fare pure ei vahi i reira vau e haafatata ˈtu ai i te Atua,” o ta Maria no Beresilia ïa e parau ra. “E vahi moˈa teie. Ua manaˈo vau e e tamâ te haereraa i te pureraa i te nephe e e hara ia ore e haere i te pureraa e e faˈi i ta ˈu mau hara i te mau Tapati atoa.” Te faatia ra o Consuelo no Mehiko e: “E faatupu te fare pure i te hoê huru hohonu o te aau i roto ia ˈu; ua haafaufaa rahi au i te reira. I reira, ua manaˈo vau e tei nia vau i te raˈi.”

A haafaufaa rahi ai te tahi pae i te mau fare pure, te feaa ra te tahi atu i te faufaaraa o te reira ei vahi haamoriraa. Teie ta Peter Sibert, te hoê perepitero Katolika i Beretane, e parau ra no nia i te varavararaa te taata i te haereraa i te pureraa: “E maiti [te taata] i te mau tuhaa o te haapaoraa ta ratou e au. E Katolika te feia paari e rave rahi e te pee ra i to ratou faaroo—aita râ e faaheporaa i rotopu i te feia apî aˈe.” Ua faataa te vea Lonedona Daily Telegraph no te 20 no Novema 1998 e: “Mai te matahiti 1979 mai, fatata 1 500  fare pure tei tapirihia i Beretane ia faaauhia i na fare pure e 495 e vai ra e na 150 tei patu-faahou-hia.”

I te matahiti 1997, ua tapao te vea Süddeutsche Zeitung no Munich, i Heremani, e: “Ua faarirohia te mau fare pure ei vahi pataraa hohoˈa teata e ei nohoraa: Aita te feia faaroo e haere nei i te pureraa, te faaohipahia nei te mau vahi haamoriraa no te tahi atu mau ohipa. . . . I Heremani, te tupu nei te peu i rave-ê-na-hia i te mau Pays-Bas aore ra i Beretane.” Ua tapao â te vea ra e: “E nehenehe e itea mai fatata e 30 aore ra e 40 fare pure e hoohia ra i Heremani i roto tau matahiti i mahemo.”

Mea faufaa mau â anei te mau fare faaroo no te haamori i te Atua? E hohoˈa anei to te mau fare pure rahi e to te mau fare pure unauna i roto i te mau Papai? Teihea huru fare tei taaihia i te haamoriraa i te Atua ora mau? Eaha ta te reira e haapii mai no nia i te hinaaroraa i te mau vahi haamoriraa e no nia i te ohipa e tia ia ravehia i reira?