A faaetaeta i to outou rima

I ROTO i te Bibilia, ua faahitihia te rima e rave rahi taime. Te faaohipahia ra te mau huru paraparau no nia i te rima ma te mau ravea rau i roto i te reo Hebera. Ei hiˈoraa, te rima mâ, o te hapa ore ïa. (Samuela 2, 22:21; Salamo 24:3, 4) Te heheuraa i te rima, oia hoi te faaiteraa i te aau horoa noa i nia ia vetahi ê. (Deuteronomi 15:11; Salamo 145:16) E parauhia no te hoê taata o te faaû i te pohe e te tuu ra oia i to ˈna nephe i roto i to ˈna rima. (Samuela 1, 19:5) Ia tuu i to tatou rima i raro, te auraa ra, te toaruaru ra ïa tatou. (Paraleipomeno 2, 15:7) E ia faaetaetahia to tatou rima, te faaitoitohia ra e te haapuaihia ra ïa tatou no te rave i te ohipa.—Samuela 1, 23:16.

I to tatou tau, mea titau-ru-hia ia faaetaeta tatou i to tatou rima. Te ora nei tatou i “te mau taime ati rahi faaruru atâ.” (Timoteo 2, 3:1, MN) Ua toaruaru anaˈe tatou, mea puai te hinaaro taata e faarue, e tuu i to tatou rima i raro. Mea matauhia ia ite i te mau taurearea ia faarue i te haapiiraa, te mau tane i to ratou utuafare, e te mau metua vahine i ta ratou mau tamarii. Ei Kerisetiano, mea hinaarohia ia faaetaeta tatou i to tatou rima no te faaoromai i te mau tamataraa ta tatou e faaû i roto i ta tatou taviniraa i te Atua. (Mataio 24:13) Ia na reira tatou, e faaoaoa tatou i te mafatu o Iehova.—Maseli 27:11.

E nafea ia faaetaeta i te rima

I te tau o Ezera, mea hinaarohia ia faaetaeta te mau ati Iuda i to ratou rima no te faaoti roa i te patu-faahou-raa i to Iehova hiero i Ierusalema. E nafea to ratou rima i te faaetaetaraahia? Te na ô ra te faatiaraa e: “Ua haapao [ratou] i te oroa i te maa faahopue ore ra ma te oaoa, e rui hitu aˈera: na Iehova hoi ratou i faaoaoa mai, e ua faafariu mai i te aau o te arii o Asura ia ratou, ei faaetaeta mai i to ratou rima i te raveraa i te ohipa i te fare o te Atua, i te Atua o Iseraela.” (Ezera 6:22) Mea maramarama maitai, maoti to ˈna puai ohipa i turai ai Iehova i “te arii o Asura” ia faatia i te nunaa o te Atua ia hoˈi atu, e ua faaitoito i te nunaa ia faaoti i te ohipa ta ratou i haamata.

I muri aˈe, i te titauraahia ia tataî i te mau patu o Ierusalema, ua faaetaeta Nehemia i te rima o to ˈna mau hoa ati Iuda no te ohipa. Te taio nei tatou e: “Ua faaite atura vau i te hamani maitai o te Atua ia ˈu; e te parau a te arii i parau mai ia ˈu ra. Ua na ô maira ratou, E tia tatou e rave e patu; ua faaitoito ihora ratou te tahi e te tahi i taua ohipa maitai ra.” Ma te rima faaetaetahia, ua nehenehe Nehemia e to ˈna mau hoa ati Iuda e faatia faahou i te mau patu o Ierusalema i roto noa e 52 mahana!—Nehemia 2:18; 6:9, 15.

Oia atoa, e faaetaeta Iehova i to tatou rima no te poro i te parau apî maitai o te Basileia. (Mataio 24:14) E na reira oia na roto i te ‘faaauraa mai ia tatou i te mau ohipa maitatai ia rave tatou i to ˈna hinaaro.’ (Hebera 13:21) E horoa mai oia i te mau mauhaa maitatai roa ˈˈe. Te fanaˈo ra tatou i te Bibilia e te mau buka, te mau vea, te mau buka rairai, te mau api parau e te mau ripene haruharu e te mau ripene video niuhia i nia i te Bibilia ia faaohipa ˈtu tatou ia naeahia te feia o te  ao atoa nei. Oia mau, e mau papai ta tatou i roto e hau atu i te 380 reo. Hau atu â, maoti te mau putuputuraa a te amuiraa e te mau tairururaa, te horoa ra Iehova i te haapiiraa e te haamataroraa teotaratia e nafea ia faaohipa i teie mau mauhaa maitatai no te rave i ta tatou taviniraa.

Noa ˈtu e te faaetaeta ra Iehova i to tatou rima na roto i te mau ravea e rave rahi roa, te titau atoa ra oia ia haa tatou. A haamanaˈo na eaha ta te peropheta ra o Elisaia i parau atu i te arii ra o Ioasa, o tei haere ia Elisaia e ani i te tauturu no te aro i te feia haru o Arama. Ua parau Elisaia i te arii ia rave i te mau ohe e ia tairi i raro i te repo. Te na ô ra te faatiaraa o te Bibilia e: “Ua tairi ihora [oia] e a toru aˈera tairiraa, tirara. Riri aˈera taua taata o te Atua ra, e ua parau atura, Ahiri oe i tataipae e ia taiono i te tairiraa; ua pau roa ïa Arama i te tairihia e oe i reira, e teie nei; e toru o Arama pauraa ia oe.” (Mau arii 2, 13:18, 19) Na roto i te oreraa e haa ma te itoito rahi, ua taotia noa o Ioasa i te manuïaraa i roto i te aroraa i to Arama.

E au tauâ faaueraa tumu ra ia tatou mai te peu e e hinaaro tatou e faaoti i ta Iehova i horoa mai ia rave tatou. Maoti i te haapeapea no te mau haafifiraa i mua ia tatou aore ra no te fifi paha o te ohipa, ia haa tatou ma te itoito rahi e ma to tatou mafatu atoa e tia ˈi. Mea hinaarohia ia faaetaeta tatou i to tatou rima e ia tiaturi ia Iehova no te tauturu mai.—Isaia 35:3, 4.

E faaetaeta Iehova i to tatou rima

Eita Iehova e haamoe i te tauturu ia tatou e i te faaetaeta i to tatou rima no te rave i to ˈna hinaaro. Oia mau, eita te Atua e faatupu i te hoê semeio e e rave i te mau mea atoa no tatou. E titau oia e ia rave tatou i ta tatou tuhaa—te taioraa i te Bibilia i te mau mahana atoa, te faaineineraa e te haere-tamau-raa i te mau putuputuraa, te apiti-pinepine-raa i roto i te taviniraa e te pureraa ia ˈna ma te tuutuu ore. Mai te peu e e rave tatou i ta tatou tuhaa ma te itoito e te haapao maitai ia nehenehe tatou, e horoa mai Iehova i te puai ia rave tatou i ta ˈna e titau maira.—Philipi 4:13.

E rave anaˈe i te tupuraa o te hoê Kerisetiano ua pohe ta ˈna vahine e to ˈna metua vahine i roto i te hoê matahiti. Te mauiui noâ ra oia a faarue ai ta ˈna hunoa vahine i ta ˈna tamaiti e te huru oraraa Kerisetiano. “Ua haapii au e eita ta tatou e nehenehe e maiti i to tatou mau ati, te taime e tupu ai, e te pinepineraa atoa,” ta taua taeae ra ïa i parau. Ihea oia e ite ai i te puai no te tamau noa? “Ua riro te pure e te haapiiraa ia ˈna iho ei ahu poito o tei tapea i to ˈu upoo i nia ˈˈe i te pape. E ua tamahanahana rahi te turu a to ˈu mau taeae e mau tuahine pae varua ia ˈu. Hau atu â i te mau mea atoa, ua ite au i te faufaaraa ia faatupu i te hoê taairaa maitai e Iehova na mua ˈˈe e tupu mai ai te mau fifi.”

Noa ˈtu to outou ite i roto i te oraraa, ia faaoti maite outou e tiaturi roa ia Iehova e e faaohipa maitai i te mau faanahoraa atoa ta ˈna e rave no te faaetaeta i to outou rima. E nehenehe ïa outou e pûpû i te hoê taviniraa maitai roa ˈˈe ia Iehova e arue e e faahanahana ˈtu ai i to ˈna iˈoa faufaa mau.—Hebera 13:15.

[Hohoˈa i te api 31]

Na roto i te oreraa e haa ma te itoito rahi, ua taotia noa o Ioasa i te manuïaraa i roto i te aroraa i to Arama