Aamu

Ua riro te hoê tuhaa taviniraa mitionare ei fenua no mâua

FAATIAHIA E DICK WALDRON

E avatea Tapati tera i te avaˈe Tetepa 1953. No tae noa maira matou i Afirika Apatoa e Tooa o te râ (Namibie i teie nei). E iti mai i te hoê hebedoma to matou taeraa mai e te fatata ra matou i te faatere i te putuputuraa no te taatoaraa i te oire pu o Windhoek. Na te aha i turai ia matou ia haere mai mai Auteralia e i teie fenua no Afirika? Ua haere mai mâua ta ˈu vahine e na vahine apî e toru ei mitionare o te parau apî maitai o te Basileia o te Atua.—Mataio 24:14.

UA HAAMATA to ˈu oraraa i te hoê vahi atea o te fenua, i Auteralia, i te matahiti taa ê ra 1914. Ua taea to ˈu hoê ahuru e tiahapa matahiti i te tupuraa te toparaa rahi i te pae ihiihi, e ua tia ia ˈu ia rave i ta ˈu tuhaa no te faatamaa i te utuafare. Aita e ohipa, ua imi râ vau i te hoê ravea no te aˈuaˈu i te rapiti oviri, mea rahi hoi i Auteralia. No reira, hoê o ta ˈu tautururaa matamua i te maa a te utuafare, o te afai-tamau-raa mai ïa i te iˈo rapiti.

I te taime i tupu ai te Piti o te Tamaˈi rahi i te matahiti 1939, ua noaa ia ˈu te hoê ohipa i nia i te mau pereoo uta taata i te oire o Melbourne. Fatata e 700 tane e ohipa tahora ra i nia i te mau pereoo, e i te mau tuhaa atoa, e farerei au i te hoê taata faahoro ê. E pinepine au i te ui ia ratou e, “Eaha ta oe haapaoraa?” e te titau ia faataa mai ratou i ta ratou mau tiaturiraa. Te taata hoê roa tei horoa mai i te mau pahonoraa e mauruuru ai au, o te hoê ïa Ite no Iehova. Ua faataa mai oia i te poroi niuhia i nia i te Bibilia o te hoê fenua paradaiso i reira te taata e mǎtaˈu  i te Atua e ora ˈi e a muri noa ˈtu.—Salamo 37:29.

I taua taime ra, ua farerei atoa to ˈu mama i te mau Ite no Iehova. E pinepine, ia faaoti ta ˈu tuhaa hopea, te tiai maira ta ˈu maa e te hoê vea Consolation (parauhia i teie nei Réveillez-vous!). Mea au roa te mea ta ˈu e taio ra. Ia maoro aˈe, ua faaoti au e tera te haapaoraa mau, e ua haamata vau i te ohipa e te amuiraa e ua bapetizohia i te avaˈe Me 1940.

I Melbourne, te vai ra te hoê fare no te mau pionie e 25 tavini taime taatoa Ite no Iehova te faaea ra i roto. Ua haere atu vau e faaea ia ratou ra. I tera e tera mahana, e faaroo noa vau i ta ratou mau faatiaraa reˈareˈa no roto i te ohipa pororaa e, tupu atura te hinaaro i roto i to ˈu mafatu e riro mai ia ratou. I te pae hopea, ua faaî au i te parau aniraa no te taviniraa pionie. Ua fariihia vau e ua titauhia e tavini i te amaa a te mau Ite no Iehova i Auteralia. Ua riro mai ïa vau ei melo o te utuafare o te Betela.

Mauraa i te tapearaa e opaniraa

Hoê o ta ˈu mau hopoia i te Betela, o te faaohiparaa ïa i te hoê fare êêraa raau. I reira, e tâpû matou i te raau no te hamani i te arahu no te mori pereoo uira. E faaohipahia te reira no te mau pereoo a te amaa no te mea aita i rahi te mori pereoo e hoohia ra no te tamaˈi. Hoê ahuru ma piti o matou tei rave ra i te ohipa i te fare êêraa raau, e o te nehenehe anaˈe e tihepuhia ei faehau. E ere te reira i te mea maoro hou matou a faautuahia ˈi e ono avaˈe fare tapearaa no to matou patoiraa i te tau faehau niuhia i nia i te Bibilia. (Isaia 2:4) Ua hopoihia matou i te hoê fare faaapu e tapearaa no te tahi ohipa faahepohia. Eaha ta ratou i horoa mai na matou e rave? Te mea maere, i tia na ia matou ia tâpû i te raau, te ohipa mau ta matou i haamatau i te rave i te Betela!

To matou tâpû-maitai-raa i te raau, ua horoa mai te tavana o te fare tapearaa i te hoê Bibilia na matou e ta matou mau papai bibilia, noa ˈtu te mau faaueraa etaeta eiaha roa ˈtu e horoa mai i taua mau mea ra. Tei taua taime ra to ˈu haapiiraa i te hoê ohipa faufaa i roto i te taairaa e te taata. A ohipa ˈi au i te Betela, aita vau e afaro maitai ra e te hoê taeae. Mea ê roa to mâua huru taata. E paˈi, o vai i to outou manaˈoraa tei tuuhia i roto i te hoê â piha tapearaa e o vau? E, o taua iho taeae ra. I teie nei, e taime iho â ïa to mâua no te haamatau te tahi i te tahi, e ei faahopearaa, ua faatupu mâua i te hoê auhoaraa piri e te maoro.

Ia maoro aˈe, ua opanihia te ohipa a te mau Ite no Iehova i Auteralia. Ua haruhia te mau faufaa atoa, e ua veve roa te mau taeae o te Betela. I te hoê taime, ua haere mai te hoê ia ˈu ra e, na ô mai nei e: “Dick, te hinaaro nei au e haere e poro rii i te oire, aita râ to ˈu e tiaa e au, e tiaa ohipa noa.” Ua oaoa vau i te tauturu atu e, reva ˈtura oia i te oire e to ˈu tiaa.

I muri aˈe, faaroo atura matou e ua tapeahia oia no to ˈna pororaa. Aita ta ˈu i nehenehe eiaha e hapono atu i te hoê parau iti: “Te haapeapea nei au no oe. Te oaoa nei râ vau e e ere o vau to roto i to ˈu tiaa.” Aita râ i maoro, ua tapea-atoa-hia vau no te piti o te taime no to ˈu tiaraa amui ore. I muri aˈe i to ˈu tuuraahia, ua tonohia vau e haapao i te fare faaapu o te horoa i te maa na te utuafare o te Betela. I taua taime ra, ua upootia matou i te hoê haavaraa, e ua faaorehia te opaniraa i te mau ohipa a te mau Ite no Iehova.

Faaipoiporaa i te hoê poro evanelia itoito

I te fare faaapu, ua haamata vau i te feruri maitai i te faaipoiporaa e ua anaanatae au i te hoê tuahine pionie apî o Coralie Clogan. O te metua vahine tupuna o Coralie te matamua i roto i to ˈna fetii tei anaanatae i te poroi o te Bibilia. I nia i to ˈna roi hou to ˈna poheraa, ua na ô atu oia i te mama o Coralie, o Vera e: “A aratai i ta oe mau tamarii e ia here e ia tavini ratou i te Atua, e ia tae i te hoê mahana, e farerei â tatou i nia i te fenua paradaiso.” I muri aˈe, i te haereraa mai te hoê pionie i te fare o Vera ma te buka iti ra Des millions de personnes actuellement vivantes ne mourront jamais, i reira te taaraa ia ˈna taua mau parau ra. Ua haapapu te buka iti ra ia Vera e o te opuaraa a te Atua no te huitaata ia fanaˈo ratou i te oraraa i nia i te hoê  fenua paradaiso. (Apokalupo 21:4) Ua bapetizohia oia i te omuaraa o te mau matahiti 1930, e mai ta to ˈna metua vahine i faaitoito ia ˈna, ua tauturu oia i ta ˈna na tamahine e toru—o Lucy, o Jean, e o Coralie—ia faatupu i te here i te Atua. Area te papa o Coralie ra, ua patoi hua ïa i te anaanatae o to ˈna utuafare no te haapaoraa, mai ta Iesu i faaara e e nehenehe e tupu i roto i te mau utuafare.—Mataio 10:34-36.

E feia faataˈi upaupa o Clogan ma; e faataˈi te tamarii taitahi i ta ˈna iho upaupa. Ta Coralie, o te fira ïa, e i te matahiti 1939, i te 15raa o to ˈna matahiti, ua noaa ta ˈna parau tuite no te upaupa. No te tupuraa te Piti o te Tamaˈi rahi, ua feruri maitai o Coralie i to ˈna a muri aˈe. Ua tae mai te taime e tia ˈi ia ˈna ia faaoti e nafea oia e to ˈna oraraa. I te hoê pae, te vai ra te ravea e rave i te hoê toroa i te pae o te upaupa. Ua titau-aˈena-hia hoi oia i roto i te pǔpǔ faataˈi upaupa no Melbourne. I te tahi aˈe pae, te vai ra te ravea e horoa i to ˈna taime no te ohipa iti rahi e poro i te poroi o te Basileia. I muri aˈe i te feruri-maitai-raa, ua bapetizohia o Coralie e to ˈna na tuahine i te matahiti 1940 e ua faaineine i te rave i te ohipa pororaa evanelia ma te taime taatoa.

No faaoti noa ˈtura o Coralie e rave i te taviniraa taime taatoa i tapiri mai ai te hoê taeae e hopoia rahi ta ˈna i te amaa no Auteralia, o Lloyd Barry tei tavini i muri aˈe ei melo o te Tino aratai a te mau Ite no Iehova. No vauvau noa ˈtura oia i te hoê oreroraa parau i Melbourne e ua na ô oia ia Coralie e: “Te hoˈi nei au i te Betela. Eaha oe e ore ai e hoˈi mai na nia i te pereoo auahi e o vau e e apiti i te utuafare o te Betela?” Ua farii oia ma te aau tae.

E tuhaa faufaa roa ta Coralie e ta te tahi atu mau tuahine no te utuafare o te Betela i te horoaraa i te mau papai bibilia na te mau taeae i Auteralia i te tau opaniraa a tupu ai te tamaˈi. Na ratou mau i rave i te rahiraa o te neneiraa, ma te tiaauhia e Taeae Malcom Vale. Ua neneihia e ua taaihia te mau buka ra Te ao apî (Beretane) e Enfants, e aita hoê numera o Te Pare Tiairaa tei mairi i na matahiti opaniraa e piti ra.

I titauhia na ia taui te vahi neneiraa 15 taime no te ape i te mutoi. I te hoê taime, te neneihia ra te mau papai bibilia i te tahua i raro i te fenua o te hoê fare e mea ê te neneihia i reira ei hunaraa. I nehenehe na ta te tuahine i te vahi fariiraa taata e taumi i te hoê pitopito o te faataˈi i te ôe i te tahua i raro i te fenua ia tupu noa mai te haamǎtaˈuraa, e ia nehenehe te mau tuahine e huna i te mau papai hou te hoê e haamata ˈi i te hiˈopoaraa.

I te tupuraa te hoê hiˈopoaraa mai tera, ua riaria roa te tahi mau tuahine i to ratou iteraa e te vai noa ra te hoê Pare Tiairaa i nia i te hoê iri airaa maa ma te ite-maitai-hia. Ua tomo mai te mutoi, tuu tia ˈtura i ta ˈna pute i nia i Te Pare Tiairaa, e haamata ˈtura i te maimi. No te mea aita e mea i itehia mai e ana, ua ohi oia i ta ˈna pute e, haere atura i rapae!

I muri aˈe i te faaoreraahia te opaniraa e te faahoˈiraahia te amaa i te mau taeae, e rave rahi tei titauhia e haere i roto i te taviniraa ei pionie taa ê. I reira to Coralie pûpûraa e haere i Glen Innes. Ua haere atu vau ia ˈna ra i to mâua faaipoiporaahia i te 1 no Tenuare 1948. I te taime i faarue ai mâua i taua tuhaa fenua ra, ua haamauhia te hoê amuiraa ruperupe i reira.

Ta mâua tuhaa taviniraa i muri mai, o Rockhampton ïa, aita râ e fare i noaa ia mâua i reira. No reira mâua i faatia ˈi i te hoê fare ie i nia i te hoê tâpû fenua mahora o te hoê taata anaanatae. Ua riro taua fare ie ra ei fare no mâua no na avaˈe e iva i muri mai. Mea faaea maoro atu â mâua i reira, i te taeraa mai râ te tau ûa, ua tumutuhia  te fare ie e te hoê vero no te pae rua ma, e ua hopoi-ê-hia e te ûa puai. *

To mâua haereraa i te hoê tuhaa taviniraa i te fenua ê

A faaea ˈi mâua i Rockhampton, ua tae mai ta mâua titauraa e haere i te 19raa o te piha no Gileada, te Haapiiraa Bibilia no te faaineine i te mau mitionare a te Watchtower. Mea na reira to mâua tonoraahia i te fenua i matauhia i taua tau ra ei Afirika Apatoa e Tooa o te râ i muri aˈe i to mâua faatuiteraahia.

Aita i maoro, ua faaite te pǔpǔ ekalesiatiko o te Amuiraa faaroo Kerisetiano mai te aha to ratou huru i nia i ta matou ohipa mitionare. I te mau Tapati atoa, e ono hebedoma i te maoro, ua faaara ratou i ta ratou mau amuiraa e ara ia matou mai nia mai i te pupiti. Ua faaue ratou i te taata eiaha e iriti i te opani ia matou e eiaha e vaiiho ia taio atu matou i te Bibilia, no te mea e huehue ratou i te reira. I te hoê vahi, ua vaiiho mâua tau papai, ua na muri mai râ te perepitero ia mâua i tera e tera fare e ua ohi atu. I te hoê mahana, a tauaparau ai mâua i roto i te piha ohipa a te perepitero, ite aˈera mâua e te pue noa ra ta mâua mau buka.

Aita i maoro tera hou a haamata atoa ˈi te feia toroa no taua vahi ra i te haapeapea no ta matou ohipa. Aita e feaaraa e mea turaihia e te pǔpǔ ekalesiatiko, te manaˈo ra ratou e e taairaa to mâua e te mau Communistes. No reira i ravehia ˈi te mau tapao o to mâua manimani rima, e i uiuihia ˈi te tahi mau taata ta mâua i farerei. Noa ˈtu taua patoiraa ra, ua maraa tamau noa te rahiraa taata i haere mai i ta matou mau putuputuraa.

Mai te omuaraa o to mâua faaearaa mai, ua faatupu mâua i te hinaaro puai e haaparare i te poroi o te Bibilia i roto i te feia tumu no Ovambo, Herero, e no Nama. E ere râ i te mea ohie. I taua tau ra, to raro aˈe o Afirika Apatoa e Tooa o te râ i te faatereraa a te apartheid no Afirika Apatoa. Ei papaa, eita mâua e faatiahia e poro i te mau tuhaa a te ereere aita anaˈe e parau faatia a te hau. I tera taime i tera taime, e ani mâua, e patoi noa râ te feia faatere i te horoa mai i te parau faatia.

I muri aˈe e piti matahiti i roto i ta mâua tuhaa taviniraa i te fenua ê, e ohipa manaˈo-ore-hia tei tupu no mâua. Ua hapû o Coralie. I te avaˈe Atopa 1955, ua fanauhia to mâua tamahine o Charlotte. Noa ˈtu e aita ta mâua i nehenehe faahou e tamau noa ei mitionare, ua noaa ia ˈu te hoê ohipa afa mahana e ua tamau vau maa taime iti ei pionie.

Te hoê pahonoraa i ta mâua mau pure

I te matahiti 1960, ua farerei mâua i te tahi atu â tautooraa. Ua tae mai ta Coralie rata e na ô ra e mea maˈi roa to ˈna metua vahine e ia ore o Coralie e hoˈi i te fare, eita paha oia e ite faahou  i to ˈna mama. Faanaho atura ïa mâua e faarue i Afirika Apatoa e Tooa o te râ e e hoˈi i Auteralia. E inaha, tupu atura te hoê mea—i te hebedoma iho i opua ˈi mâua e reva, ua tae mai ta ˈu parau faatia a te feia toroa no taua vahi ra e haere i te oire o te ereere, o Katutura. E nafea mâua i teie nei? E faahoˈi i te parau faatia i muri aˈe i te tutavaraa e hitu matahiti e ia noaa mai? Mea ohie i te feruri e e rave te tahi atu i te ohipa ta mâua i haamata. Teie râ, e ere anei teie i te haamaitairaa a Iehova, te hoê pahonoraa i ta mâua mau pure?

Ua rave oioi au i ta ˈu faaotiraa. E faaea mai au eiaha ta mâua tutavaraa e ani i te nohoraa taraire ia mâuˈa ia reva paatoa matou i Auteralia. Ia poipoi aˈe, ua faaore au i ta ˈu titeti pahi e faareva ˈtura ia Coralie raua o Charlotte i Auteralia no te tahi tau faafaaearaa roa.

I te revaraa raua, ua haamata vau i te poro i to te oire feia ereere. Mea rahi roa te anaanatae. I te hoˈiraa mai o Coralie raua o Charlotte, te haere maira te tahi mau taata no te oire o te ereere i ta matou mau putuputuraa.

I taua tau ra, e pereoo tahito to ˈu e i tii na vau i te feia anaanatae no ta matou mau putuputuraa. E maha aore ra e pae tere ta ˈu i rave na no te putuputuraa taitahi, e hitu, e vau, aore ra e iva taata i te haereraa. Ia haere mai te taata hopea i rapae, e ui o Coralie ma hoata e: “Ehia ˈtu â ta oe i tuu i raro aˈe i te parahiraa?”

No te manuïa ˈtu â i roto i te ohipa pororaa, ua hinaaro mâua i te mau papai na roto i te reo o te feia tumu. Ua fanaˈo ïa vau i te ravea taa ê e rave e ia hurihia te api parau ra Te oraraa i roto i te hoê ao apî na roto i na reo e maha o taua vahi ra: te Herero, te Nama, te Ndonga, e te Kwanyama. Te feia huri, e mau taata ïa ua noaa te ite e te haapii ra i te Bibilia e o mâua, mea titauhia râ ia parahi au i pihai ia ratou no te haapapu e ua huri-maitai-hia te mau pereota atoa. Mea navai ore te taˈo i roto i te reo Nama. Ei hiˈoraa, te tamata ra vau i te huri i te manaˈo ra: “I te omuaraa, e taata tia roa o Adamu.” Ua raˈuraˈu te taata huri i to ˈna upoo e, na ô maira e aita e mau faahou ra ia ˈna te taˈo Nama no “tia roa.” “Ua oti roa,” o ta ˈna ïa i parau i te pae hopea. “I te omuaraa, ua riro Adamu mai te hoê pêti para.”

To mâua oaoa i te fenua i reira to mâua tonoraahia

E 49 matahiti tei mairi mai to mâua taeraa mai i teie fenua, parauhia i teie nei o Namibie. Aita e titau-faahou-hia ra te parau faatia no te haere i roto i te mau oire o te ereere. Te faaterehia ra o Namibie e te hoê faatereraa apî niuhia i nia i te hoê pǎpǎ ture faatia paetahi ore i te nunaa. I teie nei, i Windhoek, e maha amuiraa rarahi o te faaohipa ra i te mau Piha a te Basileia au mau.

Ua manaˈo pinepine mâua i te mau parau ta mâua i faaroo i Gileada: “A faariro i ta outou tuhaa taviniraa i te fenua ê ei fenua no outou.” Ia au i to Iehova raveraa i te mau mea, ua papu ia mâua e o to ˈna hinaaro tera ia riro teie fenua ê ei fenua no mâua. Ua here mâua i te mau taeae ma te huru rau e te faahiahia o to ratou taˈere. Ua ata mâua e o ratou i to ratou mau oaoaraa e ua taˈi e o ratou i to ratou mau haapeapearaa. Ua riro te tahi o te feia apî ta mâua i faaô noa i roto i to mâua pereoo e i faahoro i te mau putuputuraa ei pou i roto i ta ratou mau amuiraa. I to mâua taeraa mai i teie fenua rahi i te matahiti 1953, aita i taea 10 feia poro i te parau apî maitai. Mai taua haamataraa haihai ra, ua maraa te rahiraa feia poro i nia hau atu i te 1 200. Ia au i ta ˈna parau fafau, ua faatupu Iehova i ta mâua e ta vetahi ê i ‘tanu e i faarahi.’—Korinetia 1, 3:6.

Ia hiˈo mâua i muri i te mau matahiti taviniraa e rave rahi, na mua i Auteralia e i teie nei i Namibie, e mauruuru roa mâua Coralie. Te tiaturi nei e te pure nei mâua e ia tamau Iehova i te faaitoito mai ia mâua e rave i to ˈna hinaaro i teie nei e a muri noa ˈtu.

[Nota i raro i te api]

[Hohoˈa i te mau api 26, 27]

Te haere ra i ta mâua tuhaa taviniraa i Rockhampton, i Auteralia

[Hohoˈa i te api 27]

I nia i te uahu no te fano atu i te Haapiiraa o Gileada

[Hohoˈa i te api 28]

Mea oaoa roa na mâua e poro i Namibie