“Ua tano oe, mea faahiahia roa te oraraa!”

E HINAARO anei oe e ite i te auraa mau o te oraraa? Ua tauturu o Magdalena, hoê Ite no Iehova 18 matahiti e noho ra i Szczecin, i Poronia, i to ˈna hoa haapiiraa teitei o Katarzyna ia ite i te reira. Ua faaite roa o Katarzyna e e potii faaroo ore oia, i to Magdalena râ paraparauraa ia ˈna no nia i te Bibilia, ua faaite o ˈna i te anaanatae mau.

Noa ˈtu e mea au na Katarzyna i ta Magdalena e faaite ra ia ˈna no roto mai i te Bibilia, aita oia i farii roa i te reira. A paraparau ai oia ia Magdalena no nia i te mau hoa mau, ua parau o Katarzyna i te hoê mahana e: “Te vai ra ta oe Bibilia; ua ite oe eaha te mau faaueraa tumu e pee e ihea e imi ai i te mau hoa. I teie nei râ, eaha ïa no te feia o te ore e farii i tera mau faaueraa tumu?”

Ua riro te tere o Katarzyna i Lonedona, i Beretane, ei taime faufaa. Ua mataitai o ˈna i te amaa a te mau Ite no Iehova i reira, e ua putapû o ˈna i te aau maitai i faaitehia ˈtu ia ˈna ra. Ua au roa oia i te mau ohipa ohie mai te iritiraa i te opani no ˈna e te anaanatae-mau-raa i ta ˈna e parau ra.

I te haamataraa te matahiti haapiiraa apî i te avaˈe Tetepa 2001, ua faaoti o Katarzyna e farii i te hoê haapiiraa tamau i te Bibilia. Ua haafaufaa ˈtu â o ˈna i te mau faaueraa tumu o te Bibilia e ua haamata o ˈna i te faaohipa i te reira i roto i to ˈna oraraa o te mau mahana atoa. Aita i maoro aˈenei, ua parau o ˈna ia Magdalena e: “Mai te huru ra e te haamata ra vau i te hoê oraraa apî.” Ua faatae atoa ˈtu o ˈna i te hoê poroi poto na roto i te vini: “Mauruuru roa no ta tâua haapiiraa i teie mahana! Ua tano oe, mea faahiahia roa te oraraa! Mea oaoa ia ite o vai ta tatou e haamauruuru.”