“Ia rahi to outou hotu”

“Ia rahi to outou hotu; e riro ïa outou ei pǐpǐ na ˈu i reira.”—IOANE 15:8.

1. (a) Eaha te titauraa no te riro ei pǐpǐ ta Iesu i faahiti i ta ˈna mau aposetolo? (b) Eaha te uiraa ta tatou e ui?

 I TE po hou to ˈna poheraa, ua faataa maitai Iesu i te taime no te faaitoito i ta ˈna mau aposetolo ma te paraparau roa ˈtu ia ratou. Ua mairi ê na paha te tuiraa po, ua tamau râ Iesu i te paraparau no to ˈna aroha i to ˈna mau hoa rahi. I muri aˈe, i roto i ta ˈna aparauraa, ua haamanaˈo oia ia ratou i te tahi atu â titauraa no te riro ei pǐpǐ na ˈna, mea faufaa roa hoi ia haapao atu.  Ua parau oia e: “O te mea ïa e maitai ai tau Metua, ia rahi to outou hotu; e riro ïa outou ei pǐpǐ na ˈu i reira.” (Ioane 15:8) Te haapao ra anei tatou i teie mahana i teie titauraa no te riro ei pǐpǐ? Eaha te auraa ‘ia rahi te hotu’? E hiˈopoa ïa tatou i te aparauraa i taua po ra.

2. Eaha te faahohoˈaraa o te hotu ta Iesu e faatia i te po hou to ˈna poheraa?

² E tuhaa te aˈoraa e faahotu no te faahohoˈaraa ta Iesu i faatia i ta ˈna mau aposetolo. Ua parau oia e: “O vau te vine mau, e o tau Metua te faaapu. E te mau amaa hotu ore atoa i roto ia ˈu nei ra, na ˈna ïa e tâpû ê atu; e te mau amaa hotu atoa ra, na ˈna ïa e tope ia maitai, ia rahi atu â te hotu. Ua mâ ra outou i tena na, i te parau ta ˈu i haapii atu ia outou na. A ati mai ia ˈu, e na ˈu e ati atu ia outou: mai te amaa eita e hotu noa oia anaˈe ra, ia ore ia ati mai i te vine ra; e ore atoa outou ia ore ia ati mai ia ˈu ra. O vau te vine, o outou te amaa. . . . O te mea ïa e maitai ai tau Metua, ia rahi to outou hotu; e riro ïa outou ei pǐpǐ na ˈu i reira. Mai te Metua i here mai ia ˈu nei ra, ua here atoa ˈtu hoi au ia outou: ia vai herehia ˈtu â outou e au. I haapao outou i ta ˈu ra parau, e vai herehia ˈtu â outou e au.”—Ioane 15:1-10.

3. Eaha te titauhia i te mau pǐpǐ a Iesu ia rave no te faahotu?

³ I roto i teie faahohoˈaraa, o Iehova te Faaapu, o Iesu te vine, e o te mau aposetolo ta Iesu e paraparau ra te mau amaa. A tutava noa ˈi te mau aposetolo i te “ati atu” ia Iesu, e faahotu ïa ratou. Ua faataa ˈtura Iesu e nafea te mau aposetolo e manuïa ˈi i te tapea maite i teie atiraa faufaa roa: “I haapao outou i ta ˈu ra parau, e vai herehia ˈtu â outou e au.” I muri aˈe, ua papai te aposetolo Ioane i te hoê â mau parau i te mau hoa Kerisetiano e: “Tei haapao i ta [te Mesia] ra parau, te ati râ ïa oia ia ˈna.” * (Ioane 1, 2:24; 3:24) Maoti ïa te haapaoraa i ta te Mesia parau e ati noa ˈi ta ˈna mau pǐpǐ ia ˈna, e maoti taua atiraa ra e faahotu ai ratou. Eaha te hotu e mea faufaa roa ia faatupu tatou?

Ravea e haere ai i mua

4. Eaha ta tatou e haapii mai na roto i te ‘tâpû-ê-raa’ Iehova i te mau amaa hotu ore atoa?

⁴ I roto i te faahohoˈaraa o te vine, e “tâpû ê” Iehova i te amaa hotu ore. Eaha ïa te auraa? Oia ïa aita noa te mau pǐpǐ atoa e titauhia ra ia faahotu, e maraa atoa râ ia ratou paatoa i te na reira, noa ˈtu eaha to ratou tupuraa aore ra taotiaraa. Oia mau, te ‘tâpû-ê-raa,’ aore ra faaereraa, i te hoê pǐpǐ a te Mesia no te oreraa e rave i te tahi mea tei hau atu i tei maraa ia ˈna, eita roa ˈtu ïa e tuati i te mau eˈa î i te here o Iehova.—Salamo 103:14; Kolosa 3:23; Ioane 1, 5:3.

5. (a) E nafea ta Iesu faahohoˈaraa e faaite ai e e nehenehe tatou e faahotu rahi? (b) Eaha na hotu e piti ta tatou e hiˈopoa?

⁵ Te faaite atoa ra ta Iesu faahohoˈaraa o te vine e i roto i te mau otia o to tatou tupuraa, mea titauhia ia imi tatou i te ravea e haere ai ta tatou mau ohipa i mua ei pǐpǐ. A tapao na i ta Iesu e parau ra: “Te mau amaa hotu ore atoa i roto ia ˈu nei ra, na ˈna ïa e tâpû ê atu; e te mau amaa hotu atoa ra, na ˈna ïa e tope ia maitai, ia rahi atu â te hotu.” (Ioane 15:2) I te pae hopea o te faahohoˈaraa, ua aˈo Iesu i ta ˈna mau pǐpǐ ia ‘rahi te hotu.’ (Irava 8) Eaha te auraa? Ei pǐpǐ, eiaha roa ˈtu tatou e parahi noa ma te mauruuru. (Apokalupo 3:14, 15, 19) E imi râ tatou i te mau ravea e faahotu rahi ai. E tutava tatou i te faahotu rahi atu â i te aha? Oia ïa i (1) ‘ta te varua e faatupu’ e (2) ta te Basileia e faatupu.—Galatia 5:22, 23; Mataio 24:14.

Ta te mau huru maitatai Kerisetiano e faatupu

6. Mea nafea to Iesu Mesia haamahitihitiraa i te faufaaraa o te huru matamua ta te varua e faatupu?

⁶ O te hinaaro aore ra aroha te huru matamua ‘ta te varua e faatupu.’ E faahotu te varua moˈa o te Atua i te aroha i roto i te mau Kerisetiano, no te mea te faaroo ra ratou i te faaueraa ta Iesu i horoa hou rii to ˈna faahitiraa i te faahohoˈaraa o te vine e hotu mai. Ua parau oia i ta ˈna mau aposetolo e: “E tuu atu vau i te parau  apî na outou, E aroha outou ia outou iho.” (Ioane 13:34) Inaha, i te roaraa o ta ˈna aparauraa i taua po hopea ra o to ˈna oraraa i te fenua nei, ua haamanaˈo noa Iesu i te mau aposetolo i te faufaaraa ia faaite i te huru maitai o te aroha.—Ioane 14:15, 21, 23, 24; 15:12, 13, 17.

7. Mea nafea to te aposetolo Petero faaiteraa e ua taaihia te faahoturaa i te faaiteraa i te mau huru maitatai e au i to te Mesia?

⁷ To reira atoa Petero i taua po ra e ua taa ia ˈna e mea faufaa roa ia itehia te aroha e au i to te Mesia e te tahi atu â mau huru maitatai tapiri i rotopu i te mau pǐpǐ mau a te Mesia. Tau matahiti i muri aˈe, ua faaitoito Petero i te mau Kerisetiano ia faahotu i te mau huru maitatai mai te hitahita ore, te aroha taeae, e te aroha. Ua parau atoa oia e e tapea te na reiraraa ia tatou eiaha e ‘toaruaru e e hotu ore.’ (Petero 2, 1:5-8) Noa ˈtu eaha to tatou tupuraa, e tia ia tatou ia faaite i ta te varua e faatupu. Ia tutava ïa tatou i te faaite atu â i te aroha, te aau maitai, te mǎrû, e te tahi atu mau huru maitatai e au i to te Mesia, “aore hoi te ture,” aore ra otia, “i te reira.” (Galatia 5:23) Oia mau, ia ‘rahi atu â ta tatou hotu.’

Te faahoturaa i ta te Basileia

8. (a) Eaha te taairaa i rotopu i ta te varua e faatupu e ta te Basileia e faatupu? (b) Eaha te uiraa e au ia hiˈopoa tatou?

⁸ E rahi atu â te nehenehe o te hoê tumu raau i to ˈna mau maa hotu monamona ua rau te û. Teie râ, mea faufaa aˈe tera mau maa hotu i te nehenehe. Mea faufaa roa atoa te mau maa hotu no te faarahi i te raau maoti te mau huero. Oia atoa, eita noa te hotu a te varua e faanehenehe i to tatou huru Kerisetiano. E turai atoa râ te mau huru maitatai mai te aroha e te faaroo ia tatou ia haaparare i te poroi o te Basileia e au i te huero, e vai ra i roto i te Parau a te Atua. A tapao na e nafea te aposetolo Paulo e haamahitihiti ai i teie taairaa faufaa roa. Te na ô ra oia e: “Ua faaroo [hoê hotu a te varua] atoa matou i parau ai matou nei.” (Korinetia 2, 4:13) Ia au atoa i ta Paulo tatararaa, mea na reira tatou e ‘pûpû ai i te tusia ra i te haamaitai i te Atua, oia hoi ta te vaha nei’—te piti o te hotu e mea faufaa roa ia faaite tatou. (Hebera 13:15) E taime maitai anei to roto i to tatou oraraa e ‘rahi ai te hotu,’ ei feia poro i te Basileia o te Atua?

9. O te faariroraa anei i te taata ei pǐpǐ te faahoturaa? A faataa.

⁹ No te pahono ma te tano, mea titauhia na mua ia taa eaha ta te Basileia e faatupu. E tano anei ia parau e o te faariroraa i te taata ei pǐpǐ te faahoturaa? (Mataio 28:19) Ta tatou e faahotu, o te feia anei ta tatou e tauturu ia riro mai ei feia bapetizohia e haamori ra ia Iehova? Eita. Ahani te reira iho â, mea toaruaru roa ïa te huru tupuraa no tera mau Ite here atoa e faaite haere ra ma te haapao maitai i te poroi o te Basileia i roto i te mau tuhaa fenua farii ore ehia matahiti i te maoro. Oia, ahiri te faahohoˈa ra te faahoturaa i ta te Basileia i te mau pǐpǐ apî anaˈe, e au ïa tera mau Ite hahaa i te mau amaa hotu ore o ta Iesu faahohoˈaraa! E ere iho â te reira. Eaha ïa te hotu matamua a te Basileia o ta tatou taviniraa?

 E faahotu na roto i te ueueraa i te huero o te Basileia

10. E nafea ta Iesu faahohoˈaraa o te taata ueue e o na repo taa ê e faaite ai eaha ta te Basileia e faatupu e e ore e faatupu?

¹⁰ Te horoa maira ta Iesu faahohoˈaraa o te taata ueue e na repo taa ê i te pahonoraa—e pahonoraa faaitoito no te feia e poro ra i roto i te mau tuhaa fenua hotu ore. Ua parau Iesu e o te poroi o te Basileia i roto i te Parau a te Atua te huero e o te aau taipe o te taata te repo. E ‘mairi te tahi huero i te vahi repo maitai, e tupu, e e hotu.’ (Luka 8:8) Eaha te hotu mai? Ia ohihia te hoê sitona e ia rahi mai, e hotu mai ïa te hoê huero apî, eiaha râ te mau sitona rii. Oia atoa, e faahotu te hoê Kerisetiano i te huero apî o te Basileia, eiaha râ i te mau pǐpǐ apî.

11. E nafea ia faataa i ta te Basileia e faatupu?

¹¹ No reira, te hotu i roto i teie hiˈoraa, e ere ïa te mau pǐpǐ apî e e ere atoa te mau huru maitatai Kerisetiano. I te mea e o te parau o te Basileia te huero i ueuehia, o te faarahiraa ïa o taua huero ra te hotu. Te faahoturaa i roto i teie tupuraa, o te faaite-haere-raa ïa i te Basileia. (Mataio 24:14) E maraa anei ia tatou i te faahotu i ta te Basileia—ia poro i te parau apî maitai o te Basileia—noa ˈtu eaha to tatou tupuraa? Oia mau! I roto i tera noâ faahohoˈaraa, te faataa ra Iesu no te aha.

E horoa anaˈe i te mea maitai roa ˈˈe ia faahanahanahia te Atua

12. E maraa anei i te mau Kerisetiano atoa i te faahotu i ta te Basileia? A faataa.

¹² “Area tei mairi i te vahi repo maitai ra,” ta  Iesu ïa i parau, “e hotu maira ta ˈna taihoê hanere, taiono ahuru, e taitoru ahuru i te huero hoê ra.” (Mataio 13:23) E ere hoê â hoturaa to te huero i ueuehia i roto i te hoê faaapu, tei te huru tupuraa ïa. Oia atoa, e ere hoê â tuhaa ta tatou e nehenehe e rave i roto i te pororaa i te parau apî maitai, tei to tatou ïa huru tupuraa, e ua faaite Iesu e ua ite oia i te reira. Mea vata aˈe paha te tahi pae; mea oraora maitai aˈe e mea itoito aˈe te tahi atu. No reira, mea rahi aˈe aore ra mea iti aˈe paha tei maraa ia tatou i ta te tahi atu, teie râ, e mauruuru Iehova a horoa noa ˈi tatou i te mea maitai roa ˈˈe. (Galatia 6:4) Noa ˈtu e e taotia te matahiti rahi aore ra te tino paruparu i ta tatou pororaa, mea papu e te hiˈo ra to tatou Metua aumihi ra o Iehova ia tatou mai te hoê o te ‘faarahi i te hotu.’ No te aha? No te mea “ua hope roa” tatou i te horoa i ta tatou mau mea—ta tatou taviniraa ma te nephe atoa. *—Mareko 12:43, 44; Luka 10:27.

13. (a) Eaha te tumu faufaa roa e “haere” ai e faahotu i ta te Basileia? (b) Eaha te tauturu mai ia faahotu noa i roto i te mau tuhaa fenua farii ore? (A hiˈo i te tumu parau tarenihia i te api 29.)

¹³ Atira noa ˈtu te tia ia tatou ia faahotu i ta te Basileia, e turaihia tatou ‘ia haere e ia hotu i te huero’ ia haamanaˈo noa tatou no te aha tatou e rave ai i te reira. (Ioane 15:16) Ua faahiti Iesu i te tumu faufaa roa: “O te mea ïa e maitai ai tau Metua, ia rahi to outou hotu.” (Ioane 15:8) Oia, e faaraa ta tatou ohipa pororaa i to Iehova iˈoa i mua i te taata atoa. (Salamo 109:30) Te faahiti ra o Honor, te hoê Ite haapao maitai e 75 matahiti, e: “I roto atoa i te mau tuhaa fenua farii ore, e fanaˈoraa taa ê e tia ˈtu no Tei Teitei.” I to Claudio, te hoê Ite itoito rahi mai te matahiti 1974 mai â, uiraahia no te aha oia e poro noa ˈi noa ˈtu e mea iti te farii ra i roto i ta ˈna tuhaa fenua, ua faahiti oia i te Ioane 4:34, i reira tatou e taio ai i ta Iesu mau parau: “Teie ta ˈu maa, o te haapao i to ˈna hinaaro o to tei tono mai ia ˈu nei, e te faaoti i ta ˈna ohipa.” Ua parau â Claudio e: “Mai ia Iesu, eita noa vau e hinaaro e haamata, e faaoti atoa râ i ta ˈu ohipa ei taata poro i te Basileia.” (Ioane 17:4) Tera atoa te manaˈo o te mau Ite no Iehova i te ao atoa nei.—A hiˈo i te tumu parau tarenihia “E nafea ia ‘faahotu i te huero ma te faaoromai,’” i te api 29.

E poro e e haapii i te taata

14. (a) Eaha na fa toopiti a te ohipa a Ioane Bapetizo e a Iesu? (b) E nafea outou ia faataa i te ohipa Kerisetiano i teie mahana?

¹⁴ O Ioane Bapetizo te taata poro matamua i te Basileia tei faahitihia i roto i te mau Evanelia. (Mataio 3:1, 2; Luka 3:18) “E faaite” ta ˈna fa matamua, e ua na reira oia ma te faaroo rahi e ma te tiaturi e e “faaroo te taata atoa ia ˈna.” (Ioane 1:6, 7) Oia mau, ua riro mai vetahi ta Ioane i poro ei pǐpǐ na te Mesia. (Ioane 1:35-37) No reira, e taata poro o Ioane e te faariro i te taata ei pǐpǐ. E taata poro atoa o Iesu e e orometua haapii. (Mataio 4:23; 11:1) E ere ïa i te mea maere ia faaue Iesu i ta ˈna mau pǐpǐ eiaha noa ia poro i te poroi o te Basileia, ia tauturu atoa râ i te taata ia farii i te reira no te riro ei pǐpǐ na ˈna. (Mataio 28:19, 20) Ta tatou ohipa i teie mahana, o te pororaa ïa e te haapiiraa atoa i te taata.

15. Eaha te tuearaa i rotopu i te huru o te taata i mua i te pororaa i ravehia i te senekele matamua T.T. e i to teie mahana?

¹⁵ I rotopu i te feia i faaroo i ta Paulo pororaa e haapiiraa i te senekele matamua T.T., ‘ua faaroo te tahi pae i te mau parau i parauhia ra, e aore te tahi pae i faaroo.’ (Ohipa 28:24) I teie mahana, mai tera atoa. Te mea peapea, e mairi te rahiraa o te huero o te Basileia i nia i te repo farii ore. Noa  ˈtu râ, e mairi noa te tahi mau huero i nia i te repo maitai, e aˈahia, e e ohihia, mai ta Iesu i faaite atea. Inaha, i te ao atoa nei, o te hoê faito au noa e 5 000 tiahapa taata te riro ei pǐpǐ mau na te Mesia i te mau hebedoma atoa o te matahiti! E “faaroo” teie mau pǐpǐ apî ‘i te mau parau i parauhia,’ noa ˈtu e aita te rahiraa o te tahi atu mau taata e na reira ra. Eaha tei tauturu atu ia farii to ratou aau i te poroi o te Basileia? E pinepine, ua taui ratou no te mea ua anaanatae roa ˈtu te mau Ite ia ratou, ma te pîpî i te huero apî i ueuehia, ei auraa parau. (Korinetia 1, 3:6) A hiˈo noa na i teie na hiˈoraa e piti.

E taui te taata ia anaanatae roa ˈtu tatou ia ratou

16, 17. No te aha e mea faufaa roa ˈi ia anaanatae roa ˈtu i te feia ta tatou e farerei i roto i ta tatou taviniraa?

¹⁶ Ua farerei o Karolien, te hoê Ite apî no Beletita, i te hoê vahine paari tei ore i anaanatae i te poroi o te Basileia. I te mea e ua vehîhia te rima o te vahine, ua pûpû atu Karolien e to ˈna apiti i te tauturu, ua patoi râ te vahine. E piti mahana i muri aˈe, ua hoˈi tauâ nau Ite ra i te fare o te vahine e ui atura eaha to ˈna huru. “Ua taui oia,” ta Karolien ïa i parau. “Ua maere oia e te anaanatae mau ra mâua ia ˈna ei taata. Ua titau oia ia mâua ia tomo i roto i to ˈna fare, e ua haamata te hoê haapiiraa bibilia.”

¹⁷ E anaanatae roa atoa o Sandi, te hoê Ite i te Hau Amui, i te feia ta ˈna e poro. E hiˈo oia i te mau parau faaite fanauraa i roto i te vea e e haere oia e farerei i te mau metua apî e Ta ˈu Buka Aamu Bibilia. * I te mea e e faaea noâ te mama i te fare e e oaoa roa oia i te faaite i ta ˈna aiû i te mau ratere, e tupu pinepine ïa te aparauraa. “E paraparau vau e te mau metua no nia i te faufaaraa o te taairaa e te aiû apî na roto i te taioraa,” ta Sandi ïa e faataa ra. “I muri aˈe, e faahiti au i te mau fifi ia aupuru i te hoê tamarii i roto i teie nei ao.” Aita i maoro aˈenei, i muri aˈe i te hoê farereiraa, ua tavini te hoê mama e e ono tamarii ia Iehova. E nehenehe te haaraa e te anaanatae-roa-raa ˈtu e hopoi mai i te hoê â mau faahopearaa oaoa i roto i ta tatou taviniraa.

18. (a) No te aha e maraa ˈi ia tatou paatoa i te haapao i te titauraa ‘ia rahi te hotu’? (b) E faaoti papu outou i te haapao i teihea na titauraa e toru no te riro ei pǐpǐ, tei faahitihia i roto i te Evanelia a Ioane?

¹⁸ Mea faaitoito mau â ia ite e e maraa ia tatou i te haapao i te titauraa ‘ia rahi te hotu’! E maraa ia tatou paatoa i te faarahi i te hotu, noa ˈtu e mea apî aore ra mea paari tatou, mea oraora maitai aore ra mea maˈimaˈi, noa ˈtu e te poro ra i roto i te mau tuhaa fenua farii aore ra farii ore. E nafea? Na roto ïa i te faaiteraa ˈtu â i te hotu a te varua e te haaparare-maitai-roa ˈˈe-raa i te poroi o te Basileia o te Atua. I te hoê â taime, e tutava tatou i te ‘mau maite i ta Iesu parau’ e i te ‘aroha ia tatou iho.’ Oia, e haapapu tatou e ‘e pǐpǐ mau tatou na te Mesia,’ na roto i te haapaoraa i teie na titauraa faufaa e toru no te riro ei pǐpǐ, tei faahitihia i roto i te Evanelia a Ioane.—Ioane 8:31; 13:35.

[Nota i raro i te api]

Mau uiraa ei haamanaˈoraa

• Teihea huru hotu te titauhia ia faatupu rahi atu â tatou?

• No te aha e maraa ˈi ia tatou te fa ‘ia rahi te hotu’?

• Ua hiˈopoa tatou i teihea na titauraa faufaa e toru no te riro ei pǐpǐ, tei faahitihia i roto i te Evanelia a Ioane?

[Uiraa haapiiraa]

[Tumu parau tarenihia/Hohoˈa i te api 29]

E NAFEA IA ‘FAAHOTU I TE HUERO MA TE FAAOROMAI’

EAHA te tauturu ia outou ia tamau i te poro ma te taiva ore i te poroi o te Basileia i te mau tuhaa fenua farii ore? Teie te tahi mau pahonoraa faufaa i teie uiraa.

“E faaitoito te iteraa e e turu roa Iesu ia tatou ia tapea i te manaˈo maitai e ia tamau maite, noa ˈtu eaha te huru o te taata i roto i te tuhaa fenua.”—Harry, 72 matahiti; bapetizohia i te matahiti 1946.

“E faaitoito noa te Korinetia 2, 2:17 ia ˈu. Te parauhia ra e te rave ra tatou i te taviniraa e ‘te Mesia, i mua i te aro o te Atua.’ I roto i te taviniraa, e oaoa vau i te amuimui e to ˈu mau hoa rahi.”—Claudio, 43 matahiti; bapetizohia i te matahiti 1974.

“Ei parau mau, mea fifi roa te ohipa pororaa no ˈu. Ua ite râ vau i te tanoraa o te Salamo 18:29: ‘No tau Atua i tae na ˈi ia ˈu te pare.’”—Gerard, 79 matahiti; bapetizohia i te matahiti 1955.

“Ia taio vau hoê noa irava i roto i te taviniraa, e oaoa vau e ua hiˈopoahia te aau o te taata e te Bibilia.”—Eleanor, 26 matahiti; bapetizohia i te matahiti 1989.

“E tamata noa vau e rave rau omuaraa parau. Mea rahi roa hoi e eita e pau ia faaohipa ˈtu i te mau matahiti e toe ra o to ˈu oraraa.”—Paul, 79 matahiti; bapetizohia i te matahiti 1940.

“Eita vau e inoino ia ore te taata e farii. E tamata vau i te hoê raveraa auhoa, ma te aparau e te taata e ma te faaroo i to ratou manaˈo.”—Daniel, 75 matahiti; bapetizohia i te matahiti 1946.

“Ua farerei au i te tahi mau melo i bapetizohia aˈenei o tei parau mai e maoti atoa ta ˈu ohipa pororaa i riro ai ratou ei Ite. Aita vau i ite e i muri aˈe, ua haapii te tahi atu taata i te Bibilia e o ratou e ua tauturu atu ia haere i mua. Te oaoa nei au i te ite e e ohipa pǔpǔ ta tatou taviniraa.”—Joan, 66 matahiti; bapetizohia i te matahiti 1954.

Eaha te tauturu ia outou ia ‘faahotu i te huero [ma te faaoromai]’?—Luka 8:15; MN.

[Hohoˈa i te api 28]

Na roto i te faaiteraa i te hotu a te varua e te pororaa i te poroi o te Basileia, e rahi ta tatou hotu

[Hohoˈa i te api 31]

Eaha ta Iesu i hinaaro e parau i ta ˈna mau aposetolo: “Ia rahi to outou hotu”?