Te haavare ore au, e navai anei râ?

MEA au mau anei te haavare ore i roto i to tatou oraraa i te mau mahana atoa? Te faataa ra te hoê titionare i te “haavare ore” mai te “tiamâraa i te huru aau piti aore ra haavarevare; te haerea tia; te afaro; te mea mau.” Papu maitai, e huru maitai tera no te haapaari i te mau taairaa maitatai e vetahi ê. Ua aˈo te aposetolo Paulo e: “E faaroo i to outou mau fatu i te tino nei i te mau mea atoa ra, eiaha ei faaroo mata, mai te faarearea taata ra, ma te aau haavare ore râ, i te mǎtaˈuraa i te Atua.” (Kolosa 3:22) O vai te ore e au i te hoê taata haavare ore ei rave ohipa na ˈna? I teie mahana, e manuïa aˈe te mau taata haavare ore ia noaa e ia tapea i ta ratou ohipa.

Teie râ, te mea e au-aˈe-hia ˈi te haavare ore, e ohipa oia i nia i to tatou taairaa e te Atua. Ua fanaˈo te mau ati Iseraela no tahito ra i te haamaitairaa a te Atua i to ratou haapao-maite-raa i te mau ture e te mau oroa. A aparau ai no nia i te mâraa o te amuiraa, ua faaitoito o Paulo i te mau Kerisetiano e: “E haapao tatou i taua oroa ra, eiaha ma te faahopue tahito ra, eiaha atoa ma te faahopue tairoiro e te ino, ma te maa faahopue-ore-hia râ, o te haavare ore e te parau mau.” (Korinetia 1, 5:8) E ere noa e e mea au te haavare ore e mea faufaa roa atoa râ ia farii mai te Atua i ta tatou haamoriraa. Tera râ, a tapao na eita e navai noa te haavare ore. Ia apitihia te reira i te parau mau e tia ˈi.

Ma te haavare ore ua tiaturi te mau taata hamani e te mau horopatete o te Titanic e eita te pahi rahi e tomo. I to ˈna râ tere matamua i te matahiti 1912, ua û atu te pahi i nia i te hoê puea pape toetoe paari e 1 517 taata o tei pohe. Ua tiaturi ma te haavare ore te tahi mau ati Iuda no te senekele matamua i ta ratou huru haamoriraa i te Atua, teie râ “e ere” to ratou itoito i te “itoito ite.” (Roma 10:2) Ia fariihia mai tatou e te Atua, e mea tia ia niuhia ta tatou mau tiaturiraa haavare ore i nia i te mau haamaramaramaraa papu. E oaoa te mau Ite no Iehova i ǒ outou i te tauturu ia outou ia hiˈopoa e nafea ia haamori i te Atua ma te haavare ore e te parau mau.