“Aita vau i ite maitai i te Atua”

“I TE matahiti i mairi aˈenei, ua farerei te mau Ite no Iehova ia ˈu e ua tufa i te parau apî faahiahia no nia i te Basileia o te Atua. E Katolika vau e 8 matahiti i te maoro, teie râ aita vau i ite maitai i te Atua. I teie noa matahiti, mea rahi ta ˈu i haapii mai,” ta te hoê taata e faaea ra i Kerala, i Inidia ïa i papai. “Te oaoa roa nei au i te iteraa e te neneihia ra Te Pare Tiairaa na roto 139 [i teie nei 146] reo,” o ta ˈna ïa i papai faahou. “E mea maere e ua ite te mau taata no te mau pǔpǔ reo atoa i te poroi no nia i te Atua.”

Noa ˈtu e te parau ra e rave rahi philosopho e eita e tia ia ite i te Atua, ua faataa maitai te aposetolo Paulo e e tia te reira. Ma te parau atu i te hoê pǔpǔ taata no Ateno, te haamori ra hoi te tahi o ratou i nia i te hoê fata pûpûhia na “te Atua itea ore,” ua na ô o Paulo e: “O ta outou hoi e haamori noa nei ma te ite ore ia ˈna, oia ta ˈu e parau atu ia outou nei. O te Atua i hamani i teie nei ao, e te mau mea atoa i roto ra . . . tei horoa mai i te ora, e te aho, e te mau mea atoa, i te mau mea atoa nei; e na ˈna i hamani i te taata i te mau fenua atoa nei i te toto o te taata hoê ra, ei parahi i te mau fenua atoa nei.”—Ohipa 17:23-26.

Ua faaitoito o Paulo i te feia e faaroo ra ia ˈna ia imi ia ite i te Atua Poiete, no te mea ‘aita oia i atea ê atu ia tatou atoa nei.’ (Ohipa 17:27) E oaoa te mau Ite no Iehova i te tauturu ia outou ia ite i te Atua mau e to ˈna mau huru maitatai faahiahia.