Mau uiraa a te feia taio

No te aha te Isaia 30:21 (MN) e parau ai e e faaroohia te parau a Iehova “i muri mai ia outou,” area te irava na mua ˈtu, te tuu ra ïa ia Iehova i mua ma te parau e, ‘E ite to outou mata i ta outou [Orometua Rahi roa ˈˈe]’?

Te na ô ra te Isaia 30:20, 21 (MN) e: ‘E ore ta outou [Orometua Rahi roa ˈˈe] e hopoi-ê-faahou-hia, e ite râ to outou mata i ta outou [Orometua Rahi roa ˈˈe]. E na to outou tariˈa e faaroo i te hoê reo i muri mai ia outou, i te na ôraa e, Teie te eˈa: e na reira i te haere, ia haapehao ê i te pae atau e te pae aui.’

Ia hiˈohia te irava i roto i to ˈna auraa mau, te ite ra te taata taio ia Iehova, te Orometua Rahi roa ˈˈe, i mua ia ˈna, te faaroo ra râ oia i to ˈNa reo i muri mai. E mau parau taipe râ teie, e e auraa taipe ïa to te reira.

Te huru paraparau ta te irava 20 e faaite maira, no nia ïa i te hoê taata tei ineine i te tavini i to ˈna fatu, tei ineine noa i te auraro i te mau faaueraa a te fatu. Mai te hoê tavini o te hiˈo maite i te rima o to ˈna fatu no te haroaroa eaha to ˈna hinaaro, te tiatonu maite ra te nunaa o Iehova i teie mahana i te mau faaueraa bibilia ta Iehova e horoa riirii ra na roto i ta ˈna faanahonahoraa i te fenua nei. (Salamo 123:1, 2) Oia, te haa nei ratou ia au i ta ˈna aratairaa, ma te haapao noa i te mau mea atoa ta Iehova e faaite ra na roto i “te tavini haapao maitai e te paari.”—Mataio 24:45-47.

Eaha ïa te nehenehe e parau no nia i te parau ra e te faaroo ra ta ˈna mau tavini i muri mai? E mea tano ia parau e o te reo o te Atua no tahito ra te reo i muri mai, o te paraparau ra na roto i ta ˈna Parau papaihia tei faataa-maitai-hia na roto i ta ˈna “tiaau haavare ore.” (Luka 12:42) Te faaroo ra te mau tavini a te Atua no teie tau i to ˈna reo na roto i te haapii-maite-raa i te Bibilia e te faaohiparaa i to ˈna mau faaueraa tumu i roto i to ratou oraraa maoti te mau papai i faaineinehia e “te tavini haapao maitai e te paari,” “te tiaau haavare ore.” Na roto i te tiaturiraa e te ite-maite-raa i te aratairaa tano maitai ta te Orometua Rahi roa ˈˈe e horoa ra e na roto i te haapiiraa i te Parau a te Atua, tei papaihia tau senekele aˈenei, te ite taipe ra ta ˈna mau tavini ia ˈna i mua ia ratou e te faaroo ra i to ˈna reo i muri mai.—Roma 15:4.