Te mau poro evanelia mitionare taa ê

NOA ˈTU e ua faauehia te mau Kerisetiano atoa ia riro ei poro evanelia, ua faaohipahia te taˈo i roto i te hoê auraa taa ê i roto i te Ephesia 4:8, 11, 12 (MN), i reira to Paulo faataaraa i “te mau ô taata” ta te Mesia i horoa na te amuiraa ia ˈna i reva i nia e: “E ua haapao oia i te tahi pae ei aposetolo; e te tahi pae ei peropheta, e te tahi pae ei [poro] evanelia; e te tahi pae ei tiai e ei orometua [haapii]. . . ia tupu i te maitai te tino o te Mesia ra.” Te ohipa taa maitai a teie mau poro evanelia, o te ohipa mitionare ïa. E pinepine na teie mau taata e iriti i te mau tuhaa fenua apî aita te parau apî maitai i porohia aˈenei. Tei mua te mau poro evanelia i te mau tiai e te mau orometua haapii i roto i te tapura o te Ephesia 4:11, no te mea i muri aˈe i te pororaahia te parau apî maitai e te faariroraahia te taata ei pǐpǐ, e rave noâ te mau tiai e te mau orometua haapii i te ohipa paturaa.

O Philipa te tahi tei faahiti-taa-ê-hia ei poro evanelia. Ua ohipa mai oia ei pionie i muri aˈe i te Penetekose i te oire o Samaria ma te manuïa rahi. Ua arataihia Philipa e te hoê melahi ia poro i te parau apî maitai no nia i te Mesia i te eunuka Etiopia, ta ˈna i bapetizo. I muri aˈe, ua afai te varua ia Philipa i Azoto e i te mau oire atoa e tae atu ai i Kaisarea. (Ohipa 8:5, 12, 14, 26-40) Ua poro hua o Paulo i te evanelia. (Korinetia 2, 10:13-16) E poro evanelia aore ra e mitionare o Timoteo, e ua onoono maite Paulo i nia i te pororaa evanelia na roto i te horoaraa i ta ˈna aˈoraa hopea ia Timoteo: “E faaitoito râ oe i te mau mea atoa na, e faaoromai â i te ino, e rave i te ohipa a te [poro] evanelia, e rave faahope roa i to toroa na.” Ei tiaau i Ephesia, e ohipa tiai nǎnǎ e te haapii atoa ta Timoteo, o tei poro i te parau apî maitai e te tahi atu mau Kerisetiano.—Timoteo 2, 4:5; MN; Timoteo 1, 1:3.

Te pororaa evanelia i te “tau hopea”

E ravehia te pororaa evanelia rahi roa ˈˈe i te “tau hopea” e tia ˈi, ia au i te parau haapapuraa a Iesu i roto i te Mataio 24:14: “E parau-haere-hia te evanelia o te basileia nei e ati noa ˈˈe teie nei ao, . . . o te hopea ihora ïa i reira ra.” I teie mahana, e mau mitionare ta te mau nunaa i te mau pae faaravairaa faufaa, te poritita, e te rapaauraa e te vai ra ˈtu â. Area te mau Kerisetiano râ, ua faauehia ratou ia poro i te Basileia o te Atua e ia faariro i te taata ei pǐpǐ na Iesu Mesia. (Timoteo 2, 4:2; Korinetia 1, 9:16; Petero 1, 1:12, 25; 4:17) Te poro ra te melahi e maue ra na ropu i te raˈi ma te parau apî maitai mure ore e: “A mǎtaˈu i te Atua, e faahanahana ˈtu ia ˈna; ua tae hoi i te hora faautuaraa na ˈna ra: e haamori outou ia ˈna, i tei hamani i te raˈi, e te fenua, e te tai, e te mau pape pihaa ra.” (Apokalupo 14:6, 7) Tera te parau apî maitai ta te mau poro evanelia Kerisetiano, aore ra mitionare, e afai atu. Mai ta te Bibilia e faataa ra i te tahi mau taata mai te poro evanelia ra o Philipa, ei mitionare, aore ra poro evanelia, i roto i te hoê auraa taa ê, te rave ra te tahi mau Kerisetiano i teie mahana i te ohipa mitionare i roto i te hoê auraa taa ê, ma te haere atoa i te tahi atu mau fenua no te poro atu. (Ohipa 21:8) Noa ˈtu râ, ua faauehia e ua titauhia i te mau Kerisetiano atoa ia riro ei poro evanelia i te vahi atoa tei reira ratou, ma te poro i te parau apî maitai i te taata huru rau atoa.—Roma 10:9, 10.