Te tiaturiraa i te hoê Atua aita paha tatou i ite

I HEREMANI, e piti taata i nia i te toru e tiaturi nei i te Atua. Teie râ, i te aniraahia i na taata e hau atu i te tausani ia faataa i te Atua ta ratou e tiaturi ra, ua horoa fatata te taata atoa i te hoê pahonoraa taa ê. “Ua rau te manaˈo iho o te mau taata no Heremani no nia i te Atua mai te mau taata iho,” ta te vea FOCUS ïa e parau ra. Noa ˈtu e e mea maitai ia tiaturi i te Atua, e ere anei i te mea peapea ia tiaturi ia ˈna ma te ore e ite i to ˈna huru?

E itehia teie papu ore no nia i te huru aore ra te ihotaata o te Atua i rapaeau atu i te mau otia o Heremani; te vai ra i te tahi atu mau vahi i Europa. Ua faataa te hoê titorotororaa i ravehia i Auteteria, i Beretane, e i te mau Pays-Bas i te manaˈo i parare e te Atua, o “te hoê ïa puai teitei aˈe aore ra te hoê parau huna eita e nehenehe e faataahia.” I rotopu iho â râ i te feia apî, e te mau taata atoa e tiaturi nei ia ˈna, e parau aro o ˈna.

Ua matau anei outou i te Atua?

Te vai ra te taa-ê-raa rahi i roto i te iteraa i te hoê taata e te matauraa ia ˈna. Te iteraa i te hoê taata—te hoê arii eita e nehenehe e tapiri atu, te hoê maona aravihi roa, aore ra te hoê taata hauti teata tuiroo—o te farii-noa-raa ïa e te vai ra o ˈna. E auraa rahi atu â râ to te matauraa i te hoê taata. E titau te reira ia haamatau i te huru, te haerea, te mau huru aau o tera taata, ta ˈna e au e ta ˈna e ore e au, e ta ˈna mau opuaraa no a muri aˈe. E ravea te matauraa i te hoê taata e faatupu ai i te taairaa piri e o ˈna.

E mau hanere tausani taata o tei faaoti e eita e navai te hoê manaˈo papu ore no nia i te Atua aore ra te ite-noa-raa e te vai ra o ˈna. Ua haamatau ratou i te Atua. Ua hoona anei te reira? Ua faaoti te hoê taata o Paul te iˈoa, e faaea ra i Heremani apatoerau e tei tiaturi noa na i te Atua mai tera, i te haamatau aˈe ia ˈNa. Te faataa ra o Paul e: “E titauhia te taime e te tutavaraa no te ite maite i te Atua, teie râ mea hoona mau â te haamaitairaa. E maitai roa ˈˈe te oraraa i te mau mahana atoa no te taairaa piri e te Atua Poiete.”

E hoona anei te taime e te tutavaraa i titauhia no te ite maite i te Atua? A taio na i te tumu parau i muri iho.

[Parau iti faaôhia i te api 3]

Te vai ra te taa-ê-raa rahi i roto i te iteraa i te hoê taata e te matauraa ia ˈna