E auraa rahi to te Amuraa maa ahiahi a te Fatu no oe

MEA faufaa e e auraa mure ore anei to te Amuraa maa ahiahi a te Fatu no oe? No te ite i te pahonoraa, e faataa na mua tatou eaha te auraa o teie oroa taa ê no Iesu Mesia iho.

I te ahiahi o te 14 no Nisana i te matahiti 33 T.T., ua putuputu aˈera Iesu e ta ˈna na aposetolo 12 i roto i te hoê piha i nia i Ierusalema no te faatupu i te oroa matahiti o te Pasa. I muri aˈe i to ratou amuraa i te Pasa, faarue maira te taata haavare ra o Iuda i te piha no te hoo ia Iesu. (Ioane 13:21, 26-30) E te toea o na aposetolo 11, haamata ihora Iesu i “te amuraa maa a te Fatu.” (Korinetia 1, 11:20) E parau-atoa-hia te reira te Oroa haamanaˈoraa, i te mea e ua faaue Iesu i ta ˈna mau pǐpǐ e: “E na reira outou ei manaˈoraa ia ˈu.” Tera anaˈe te oroa ta te mau Kerisetiano i faauehia ia haamanaˈo.—Korinetia 1, 11:24.

I te mau vahi e rave rahi, e faatia te taata i te hoê taoˈa haamanaˈoraa aore ra e faataa i te hoê mahana taa ê no te haamanaˈo i te hoê taata faufaa aore ra te hoê ohipa faufaa. I roto i teie tupuraa, ua haamau Iesu i te hoê amuraa maa haamanaˈoraa—te hoê amuraa maa o te tauturu ia haamanaˈo, o te tauturu i ta ˈna mau pǐpǐ ia manaˈo noa i te mau tupuraa faufaa roa o taua mahana taa ê ra. No te mau ui no a muri aˈe, e haamanaˈo teie amuraa maa haamanaˈoraa i te feia mataitai i te auraa hohonu o te ohipa ta Iesu i rave i tera ra po, o na taoˈa taipe iho â râ ta ˈna i faaohipa. Eaha na taoˈa taipe ta Iesu i faaohipa, e eaha te auraa o te reira? E hiˈopoa anaˈe i te faatiaraa bibilia o te ohipa i tupu i tera ra po i te matahiti 33 T.T.

Te auraa o te mau taoˈa taipe

“Ua rave ihora oia i te pane, haamaitai atura i te Atua, vavahi ihora, tuu atura ia ratou ra, na ô atura, [Te faahohoˈa ra teie nei pane i tau tino] e horoahia na outou nei, e na reira outou ei manaˈoraa ia ˈu.”—Luka 22:19; MN.

I to Iesu raveraa i te pane e i to ˈna parauraa ˈtu e, “te faahohoˈa ra teie nei pane i tau tino,” te faaite ra oia e ua riro te pane hopue ore ei hohoˈa, aore ra taipe, o to ˈna iho tino iˈo hara ore, ta ˈna i horoa “ei ora no to te ao.” (Ioane 6:51)  Noa ˈtu e te parau ra te tahi mau huriraa Bibilia e “o [Heleni, es·tinʹ] tau tino teie,” te faataa ra te Greek-English Lexicon of the New Testament a Thayer e e pinepine teie te auraa o teie ihoparau “e faaite, e tapao faaite, e faataa i te auraa.” Te horoa ra te reira i te manaˈo o te faahohoˈaraa, aore ra faataiperaa.—Mataio 26:26.

Oia atoa no te auˈa uaina. Ua parau Iesu e: “[Te faahohoˈa ra teie nei auˈa i te faufaa apî] i to ˈu nei toto, e haamaniihia no outou nei.”—Luka 22:20; MN.

I roto i te faatiaraa a Mataio, ua parau Iesu no nia i te auˈa e: “Te faahohoˈa ra teie nei auˈa i to ˈu] toto no te faufaa apî, i haamaniihia no te taata e rave rahi ia matara te hara.” (Mataio 26:28; MN) Te faaohipa ra Iesu i te uaina i roto i te auˈa ei faahohoˈaraa, aore ra taipe, o to ˈna iho toto. O to ˈna toto i haamaniihia te niu o “te tahi faufaa apî” no te mau pǐpǐ faatavaihia i te varua, o te faatere atu ei arii e ei tahuˈa e o ˈna i nia i te raˈi.—Ieremia 31:31-33; Ioane 14:2, 3; Korinetia 2, 5:5; Apokalupo 1:5, 6; 5:9, 10; 20:4, 6.

E haamanaˈoraa atoa te uaina i roto i te auˈa e e riro te toto o Iesu i haamaniihia ei niu e ‘matara ˈi te hara,’ e nehenehe atu ai te feia apiti e parauhia no te ora i nia i te raˈi ei feia aiˈa e te Mesia. Te taa ra ïa ia tatou e o te feia anaˈe tei ia ratou te parauraa no te raˈi mai—te hoê numera iti—te rave i te pane e te uaina i te Oroa haamanaˈoraa.—Luka 12:32; Ephesia 1:13, 14; Hebera 9:22; Petero 1, 1:3, 4.

Eaha ïa no tera mau pǐpǐ atoa a Iesu aita i roto i te faufaa apî? E “mamoe ê atu” ratou a te Fatu o te tiaturi ra, eiaha e faatere e te Mesia i nia i te raˈi, e fanaˈo râ i te ora mure ore i nia i te hoê fenua paradaiso. (Ioane 10:16; Luka 23:43; Apokalupo 21:3, 4) Ei “feia rahi roa” o te mau Kerisetiano haapao maitai o te ‘haamori ra i te Atua i te rui e te ao,’ te oaoa ra ratou ei taata mataitai aau mauruuru i te Amuraa maa ahiahi a te Fatu. Oia mau, te faaite ra ta ratou mau parau e ta ratou mau ohipa e: “Tei to tatou Atua te ora, tei parahi i nia iho i te terono ra, e tei te Arenio.”—Apokalupo 7:9, 10, 14, 15.

Ehia taime?

“E na reira outou ei manaˈoraa ia ˈu.”—Luka 22:19.

Ehia taime e faatupuhia ˈi te Oroa haamanaˈoraa no te manaˈo noa i te poheraa o te Mesia e tia ˈi? Aita Iesu i faataa maitai mai. Teie râ, i te mea e ua haamau oia i te Amuraa maa a te Fatu i te 14 no Nisana, i te ahiahi o te Pasa, ta te mau Iseraela e faatupu i te mau matahiti atoa, mea papu ïa e ua hinaaro Iesu e ia na reira atoa no te Oroa haamanaˈoraa. I te mea e ua faatupu te mau Iseraela i te oroa o to ratou faaoraraa mai i te faatîtîraa i Aiphiti i te mau matahiti atoa, e haamanaˈo atoa te mau Kerisetiano i to ratou faaoraraa mai i te hara e te pohe i te mau matahiti atoa.—Exodo 12:11, 17; Roma 5:20, 21.

Mea matauhia iho â te manaˈo e haamanaˈo i te hoê tupuraa faufaa i te mau matahiti atoa. A hiˈo na, ia faatupu te tahi na hoa faaipoipo i to raua oroa faaipoiporaa aore ra ia haamanaˈo te hoê nunaa i te hoê tupuraa faufaa i roto i to ˈna tuatapaparaa. E pinepine i te faatupuhia te haamanaˈoraa hoê noa taime i te matahiti i te mahana o taua tupuraa ra. Mea anaanatae ia tapao e e rave rahi senekele i muri aˈe i te Mesia, ua parauhia e rave rahi feia faahua Kerisetiano te mau Quartodécimans, te auraa ra “Ahuru ma  maharaa,” no te mea ua haamanaˈo ratou i te poheraa o Iesu hoê noa taime i te matahiti, i te 14 no Nisana.

Oroa au noa e te faufaa roa râ

Ua faataa te aposetolo Paulo e maoti te faatupuraa i te Amuraa maa ahiahi a te Fatu e ‘faaite â ˈi’ te mau pǐpǐ a Iesu “i te pohe o te Fatu.” (Korinetia 1, 11:26) No reira, te huti ra teie haamanaˈoraa i te ara-maite-raa i nia i te tuhaa faufaa roa ta Iesu i rave, maoti to ˈna pohe, i roto i te faatupuraa i te opuaraa a te Atua.

No to ˈna oreraa e taiva e tae noa ˈtu i to ˈna poheraa, ua faatia Iesu Mesia i te Atua ra o Iehova ei Atua Poiete paari e te î i te here e ei Arii parau-tia. Taa ê roa ˈtu i ta Satani mau parau e eiaha mai ia Adamu, ua haapapu Iesu e e nehenehe te hoê taata e tapea i to ˈna taiva ore i te Atua, tae noa ˈtu i roto i te mau faaheporaa uˈana.—Ioba 2:4, 5.

Te haamanaˈo atoa maira te Amuraa maa ahiahi a te Fatu ia faaite i te mauruuru no te aroha haapae o Iesu. Noa ˈtu te mau tamataraa ino mau, ua auraro noa Iesu ma te tia roa i to ˈna Metua. Ua nehenehe ïa oia e pûpû i to ˈna iho ora taata tia roa no te aufau i te hoo rahi o te hara a Adamu. Mai ta Iesu iho i faataa, ua haere mai oia e “horoa i to ˈna ora ei hoo no te taata e rave rahi.” (Mataio 20:28) No reira, e nehenehe te mau hara a te taata atoa o te faaroo ia Iesu e faaorehia e e fanaˈo ratou i te ora mure ore ia au i te opuaraa matamua a Iehova no te taata nei.—Roma 5:6, 8, 12, 18, 19; 6:23; Timoteo 1, 2:5, 6. *

Te haamahitihiti atoa ra teie mau mea atoa i te maitai rahi e te aroha faito ore o Iehova na roto i te faanahoraa i te faaora i te taata. Te na ô ra te Bibilia e: “Ua itea to te Atua aroha ia tatou nei, o te Atua i tono mai i ta ˈna Tamaiti fanau tahi i te ao nei, ia ora tatou ia ˈna. O te aroha mau teie, e ere râ e na tatou i aroha ˈtu i te Atua, oia râ tei aroha mai ia tatou nei, e ua tono mai i ta ˈna Tamaiti ei taraehara i ta tatou nei hara.”—Ioane 1, 4:9, 10.

Oia, e oroa faahiahia mau â te Oroa haamanaˈoraa! Mea huru au noa e te maraa ia haamanaˈohia i te ao atoa nei i roto i te mau tupuraa taa ê e rave rahi, e mea huru taipe râ ia riro noa ei haamanaˈoraa hohonu i te hoê tau roa.

 To ˈna auraa no oe

E haapaeraa rahi te pohe tusia o to tatou Fatu ra o Iesu Mesia no ˈna e no to ˈna Metua ra o Iehova atoa. Ei taata tia roa, aita Iesu i faaû i te pohe i tutuuhia mai mai ia tatou paatoa. (Roma 5:12; Hebera 7:26) E tiaraa to ˈna e ora e a muri noa ˈtu. Eita to ˈna ora e nehenehe e ravehia, e haruhia atoa, eita anaˈe oia e faatia i te reira. Ua na ô oia e: “Aore roa e taata e riro ai ia haru [i to ˈu ora], na ˈu iho râ e horoa noa ˈtu.”—Ioane 10:18.

Ua pûpû râ Iesu ma te aau tae i to ˈna ora taata tia roa ei tusia ia “na te pohe oia i te faaere atu ia ˈna no ˈna te pohe nei, oia hoi te diabolo ra; e ia faaora hoi oia i te feia i tîtî i te mǎtaˈu i te pohe e hope roa ˈˈe to ratou oraraa nei.” (Hebera 2:14, 15) Te ite-faahou-hia ra te aroha haapae o te Mesia i roto i te huru pohe ta ˈna iho i farii. Ua ite maitai oia e nafea oia e mauiui ai e e pohe ai.—Mataio 17:22; 20:17-19.

Te haamanaˈo atoa maira te Oroa haamanaˈoraa i te faaiteraa rahi roa ˈˈe i te here aita i ravehia aˈenei e to tatou Metua i te raˈi ra o Iehova. Mea peapea mau â no ˈna, o tei ‘î i te aroha e te hamani maitai rahi,’ ia faaroo e ia ite i “te oto rahi e te roimata” o Iesu i te ô i Getesemane, i te ruturaa ino mau, i te patîtîraa aroha ore i nia i te raau, e i te pohe-riirii-raa mauiui ino mau. (Iakobo 5:11, nota i raro i te api; Hebera 5:7; Ioane 3:16; Ioane 1, 4:7, 8) E faatupu mai te feruriraa i te reira i teie nei atoa, e rave rahi senekele i muri aˈe, i te oto o te aau i nia i te taata e rave rahi.

A tamata na i te feruri e ua aufau te Atua ra o Iehova e o Iesu Mesia i te hoê hoo rahi mai teie no tatou te taata hara nei! (Roma 3:23) I te mau mahana atoa, te faaruru ra tatou i te tupuraa mau mauiui o to tatou huru taata hara e to tatou huru tia ore. Teie râ, maoti te faaroo i te tusia taraehara o Iesu, e nehenehe tatou e tiaoro i te Atua ia faaore mai i ta tatou hara. (Ioane 1, 2:1, 2) Maoti te reira e nehenehe ai tatou e paraparau ma te huna ore i te Atua e e fanaˈo i te hoê manaˈo haava mâ. (Hebera 4:14-16; 9:13, 14) Hau atu â, e nehenehe tatou e fanaˈo i te tiaturiraa e ora i nia i te hoê fenua paradaiso a tau a hiti noa ˈtu. (Ioane 17:3; Apokalupo 21:3, 4) E mau faahopearaa atoa tera e te tahi atu mau haamaitairaa e rave rahi o te ohipa haapae hau ê a Iesu.

Te faaiteraa i te mauruuru no te Amuraa maa ahiahi a te Fatu

Aita e feaaraa, e faaiteraa faahiahia te Amuraa maa ahiahi a te Fatu i “te aroha faito ore o te Atua.” E te faanahoraa te Atua ra o Iehova i te tusia taraehara—auaa to Iesu aroha haapae—e “ô horoa noa eita e tia ia parau” mau ïa na ˈna. (Korinetia 2, 9:14, 15, MN) Aita anei teie mau faaiteraa i te maitai o te Atua na roto ia Iesu Mesia e faatupu ra i roto ia oe i te mauruuru hohonu tamau?

Te tiaturi ra matou e na reira mau â te reira. No reira, te titau manihini maitai atu nei matou ia oe ia putuputu e te mau Ite no Iehova i te Oroa haamanaˈoraa i te poheraa o Iesu. I teie matahiti, e tupu te reira i te Mahana toru 16 no Eperera, i muri aˈe i te toparaa mahana. E oaoa te mau Ite no Iehova o to oe vahi i te faaite atu i te hora tia e te vahi tia no teie oroa faufaa roa.

[Nota i raro i te api]

[Tumu parau tarenihia/Hohoˈa i te api 6]

“O TAU TINO TEIE” AORE RA “TE FAAHOHOˈA RA TEIE NEI PANE I TAU TINO” TEIHEA?

Ia Iesu i parau e, “O vau te uputa” e, “O vau te vine mau,” aita hoê aˈe taata i manaˈo e e uputa mau aore ra e uaina mau oia. (Ioane 10:7; 15:1) Oia atoa, ia faahiti Te Bibilia Moˈa ra i ta Iesu i parau: “Teie nei auˈa, o te faufaa apî ïa,” eiaha tatou e faaoti e o te auˈa mau iho te faufaa apî. Na reira atoa, ia ˈna i parau e “o” to ˈna tino te pane, mea papu maitai e te faahohoˈa ra, aore ra faataipe ra, te pane i to ˈna tino. No reira, te na ô ra te huriraa a Charles Williams e: “Te faahohoˈa ra teie nei pane i tau tino.”—Luka 22:19, 20.

[Hohoˈa i te api 5]

E nau taipe tano te pane hopue ore e te uaina no te tino hara ore o Iesu e no to ˈna toto i haamaniihia

[Hohoˈa i te api 7]

E haamanaˈoraa te Oroa haamanaˈoraa i te here rahi i faaitehia e te Atua ra o Iehova e o Iesu Mesia