E huru Kerisetiano faufaa roa te mǎrû
E huru Kerisetiano faufaa roa te mǎrû
‘A ahu i te mǎrû.’—KOLOSA 3:12, MN.
1. Na te aha e faariro i te mǎrû ei huru faahiahia roa?
IA HAUMǍRÛ te mahana, mea au ïa. Ia mǎrû te hoê taata, mea au ïa ia tapiri atu ia ˈna. Teie râ, “e fatifati te ivi i te arero mǎrû,” ta te arii paari ra o Solomona ïa i parau. (Maseli 25:15) E huru faahiahia roa te mǎrû o te apiti i te huru au e te puai.
2, 3. Eaha te taairaa i rotopu i te mǎrû e te varua moˈa, e eaha ta tatou e hiˈopoa i roto i teie tumu parau?
2 Ua faahiti atoa te aposetolo Paulo i te mǎrû i roto i ta ˈna faataaraa i ‘ta te varua e faatupu,’ i roto i te Galatia 5:22, 23. Ua huri-pinepine-hia te taˈo Heleni tei iritihia ei “mǎrû” i roto i te irava 23 o te Traduction du monde nouveau, ei “mamahu” i roto i te tahi atu mau Bibilia. E mea fifi iho â ia itea mai te hoê taˈo e tuati maitai i teie taˈo Heleni i roto i te rahiraa o te tahi atu â mau reo, no te mea te faataa ra te taˈo Heleni eiaha i te mamahu i rapaeau, i te mǎrû râ e te aau maitai o roto mai; eiaha te haerea o te hoê taata, te huru râ o to ˈna feruriraa e to ˈna aau.
3 Ia taa ˈtu â ia tatou te auraa e te faufaaraa o te mǎrû, e hiˈopoa mai tatou e maha hiˈoraa bibilia. (Roma 15:4) E haapii mai ïa tatou eaha teie huru maitai, e nafea te reira e noaa mai ai e e nafea atoa e faaite atu ai i roto i te taatoaraa o ta tatou mau haaraa.
‘Mea taoˈa rahi i mua i te aro o te Atua’
4. Mea nafea to tatou iteraa e mea faufaa te mǎrû na Iehova?
4 I te mea e e faatupu atoa te varua o te Atua i te mǎrû, e mea tano ïa ia taai-roa-hia te reira i te huru faahiahia roa o te Atua. Ua papai te aposetolo Petero e ‘mea taoˈa rahi te aau mǎrû e te mamahu i te aro o te Atua.’ (Petero 1, 3:4) Oia mau, e ateriputi te mǎrû no Iehova; e mea faufaa roa te reira na ˈna. E tumu papu maitai teie e faahotu ai te mau tavini atoa a te Atua i te mǎrû. E nafea râ te Atua mana hope, te Mana faatere teitei roa ˈˈe o te ao taatoa, e faaite ai i te mǎrû?
5. No to Iehova mǎrû, eaha ta tatou e tiaturi nei?
5 I to na taata matamua ra o Adamu raua o Eva faaroo-ore-raa i te faaueraa taa maitai a te Atua eiaha e amu i to te raau e ite ai i te maitai e te ino, ua opua iho â raua i te na reira. (Genese 2:16, 17) Ua hopoi mai taua faaroo-ore-raa opuahia ra i te hara, te pohe, e te atea-ê-raa raua e to raua huaai i te Atua. (Roma 5:12) Noa ˈtu e ua tano roa Iehova i te horoa mai i taua utua ra, aita oia i manaˈo e eita roa ˈtu te fetii taata e taui e e au ia fanaˈo i te taraehara. (Salamo 130:3) No to ˈna râ aau maitai e to ˈna hinaaro eiaha e faahepo—nau faaiteraa i te mǎrû—ua rave Iehova i te mau faanahoraa e nehenehe ai te huitaata hara e haafatata ˈtu ia ˈna e e fanaˈo i ta ˈna farii maitai. Oia, maoti te ô o te tusia taraehara o ta ˈna Tamaiti ra o Iesu Mesia, te rave ra Iehova e ia nehenehe tatou e haafatata ˈtu i to ˈna terono teitei ma te mǎtaˈu ore aore ra te mehameha ore.—Roma 6:23; Hebera 4:14-16; Ioane 1, 4:9, 10, 18.
6. Mea nafea te iteraahia te mǎrû i roto i ta te Atua haaraa i nia ia Kaina?
6 Na mua roa ˈˈe Iesu a haere mai ai i te fenua nei, ua itehia to Iehova mǎrû i to Kaina e to Abela, na tamaiti a Adamu, pûpûraa i te tusia na te Atua. Ma te haroaroa i to raua huru aau, ua patoi Iehova i ta Kaina ô, ua ‘ite mai’ râ oia ia Abela e ta ˈna ô. Aita o Kaina i mauruuru i te manaˈo hamani maitai o te Atua no nia ia Abela taiva ore e ta ˈna tusia. “Riri roa aˈera Kaina, e tuatua ˈtura tana mata,” ta te Bibilia ïa e faatia ra. Eaha to Iehova huru? Ua huru ê anei oia i te huru ino o Kaina? Aita. Ma te mǎrû, ua ui oia ia Kaina no te aha oia i riri roa ˈi. Ua faataa atoa Iehova i ta Kaina e nehenehe e rave e ‘itehia mai ai’ oia. (Genese 4:3-7) Oia mau, o Iehova te hiˈoraa hau ê o te mǎrû.—Exodo 34:6.
Mea au e mea mahanahana te mǎrû
7, 8. (a) E nafea tatou e taa ˈi i to Iehova mǎrû? (b) Eaha ta te Mataio 11:27-29 e faaite ra no nia ia Iehova e ia Iesu?
7 Hoê o te mau ravea maitai roa ˈˈe e taa ˈi ia tatou te mau huru maitatai faito ore o Iehova, o te haapiiraa ïa i te oraraa o Iesu Mesia e ta ˈna taviniraa. (Ioane 1:18; 14:6-9) I Galilea, i te roaraa o te piti o te matahiti o ta ˈna ohipa pororaa, ua faatupu o Iesu e rave rahi semeio i Korazina, i Betesaida, i Kaperenaumi, e na pihai iho. Mea teoteo râ e mea tâuˈa ore te rahiraa o te taata, e aita ratou i tiaturi atu. Eaha to Iesu huru? Noa ˈtu e ua haamanaˈo papu oia ia ratou i te mau faahopearaa o to ratou faaroo ore, ua aroha oia i te mau ʽam ha·ʼaʹrets, te feia riirii noa i rotopu ia ratou, no to ratou huru tupuraa ino i te pae varua.—Mataio 9:35, 36; 11:20-24.
8 Ua faaite ta Iesu mau ohipa i muri aˈe e ua ‘ite maitai oia i te Metua’ e ua pee oia ia ˈna. Teie te titauraa mahanahana a Iesu i te feia riirii: “E haere mai outou ia ˈu nei, e te feia atoa i haˈa rahi, e tei teiaha i te hopoia, e na ˈu outou e [tamahanahana]. A rave mai i tau zugo i nia ia outou, e ia haapiihia outou e au, te mǎrû nei hoi au e te haehaa o te aau: e e noaa hoi te [tamahanahanaraa] i to outou [nephe].” Auê tera mau parau i te tamǎrû e te tamahanahana i te feia e teimaha ra! Ia tatou atoa i teie mahana. Mai te peu e e ahu mau â tatou i te mǎrû, tei roto ïa tatou i te feia “ta te Tamaiti i hinaaro i te faaite atu” i to ˈna Metua.—Mataio 11:27-29; MN.
9. Eaha te huru maitai tei taaihia i te mǎrû, e e nafea Iesu e riro ai ei hiˈoraa maitai i roto i teie tuhaa?
9 Ua taai-roa-hia te mǎrû i te haehaa, oia hoi “te haehaa o te aau.” Area te teoteo, e aratai atu ïa i te faateiteiraa ia ˈna iho e e pinepine, e nehenehe oia e haa ma te etaeta e te aroha ore i nia ia vetahi ê. (Maseli 16:18, 19) Ua faaite Iesu i te haehaa i te roaraa o ta ˈna taviniraa i te fenua nei. A hahaere atoa ˈi oia na Ierusalema e ono mahana hou to ˈna poheraa e a haapopouhia ˈi oia ei Arii o te mau ati Iuda, mea taa ê roa Iesu i te feia faatere o te ao. Ua faatupu oia i te parau tohu no nia i te Mesia a Zekaria: “Inaha te haere mai na to arii ia oe na ma te haehaa, e ma te parahi i nia i te asini, e te pinia, te fanauˈa o te asini.” (Mataio 21:5; Zekaria 9:9) Ua ite orama te peropheta haapao maitai ra o Daniela ia Iehova i te horoaraa i te mana faatere i ta ˈna Tamaiti. Te faataa ra râ te hoê parau tohu na mua ˈtu ia Iesu mai ‘te taata haehaa roa.’ Oia mau, ua taai-roa-hia te mǎrû i te haehaa.—Daniela 4:17; 7:13, 14.
10. No te aha te mǎrû Kerisetiano e ere ai i te paruparu?
10 E tauturu mai te mǎrû faahiahia i faaitehia e Iehova e e Iesu ia haafatata ˈtu ia raua. (Iakobo 4:8) Parau mau, e ere te mǎrû i te hoê huru paruparu. E ere roa ˈtu! Te faaite ra te Atua mana hope ra o Iehova i te puai rahi e te mana rahi. E mea riri roa na ˈna te parau-tia ore. (Isaia 30:27; 40:26) Ua faaoti papu atoa o Iesu eiaha e taiva, i mua atoa i te aroraa a te Diabolo ra o Satani. Aita oia i faatia i te mau peu tapihooraa tia ore a te mau aratai haapaoraa o to ˈna ra tau. (Mataio 4:1-11; 21:12, 13; Ioane 2:13-17) Ua faaite râ oia i te mǎrû i mua i te mau hapa a ta ˈna mau pǐpǐ, e ua faaoromai oia i to ratou mau paruparu. (Mataio 20:20-28) Ua faataa te hoê aivanaa Bibilia ma te tano i te mǎrû mai teie: “I muri mai i te mǎrû, te vai ra te puai o te auri.” Ia faaite ïa tatou i teie huru e au i to te Mesia—te mǎrû.
Tei mamahu rahi o to ˈna ra tau
11, 12. Ia au i ta ˈna haapiiraa, na te aha i faariro i to Mose mǎrû ei mea faahiahia roa?
11 O Mose te toru o te hiˈoraa ta tatou e hiˈopoa. Te faataa ra te Bibilia ia ˈna ei taata ‘mamahu rahi i to te taata atoa o te ao atoa nei.’ (Numera 12:3) Ua papaihia teie faataaraa ma te faauruahia e te Atua. No to ˈna mamahu rahi i farii ai oia i ta Iehova aratairaa.
12 Mea taa ê ta Mose haapiiraa. Ua haapao Iehova e ia ora mai teie tamaiti a te tahi nau metua Hebera haapao maitai, i te hoê tau o te haavare e te taparahi taata. Na to ˈna metua vahine i haapao ia Mose i to ˈna mau matahiti matamua, e i haapii maite ia ˈna i te parau o te Atua mau ra o Iehova. I muri aˈe, ua afai-ê-hia o Mose no te ora i roto i te hoê huru tupuraa taa ê roa. ‘Ua haapiihia Mose i te mau parau paari a to Aiphiti,’ tera ta te Kerisetiano matamua ra o Setephano tei haapohehia no to ˈna faaroo, i parau. “E mana ˈtura [Mose] i te parau e te ravea.” (Ohipa 7:22) Ua itehia to ˈna faaroo i to ˈna iteraa i te mau ohipa tia ore e rave rahi ta te mau fatu tîtî a Pharao e rave ra i nia i to ˈna mau taeae. No to ˈna taparahi-pohe-raa i te hoê Aiphiti o te tairi ra i te tahi ati Hebera, ua faarue o Mose ia Aiphiti e ua parahi i te fenua ra o Midiana.—Exodo 1:15, 16; 2:1-15; Hebera 11:24, 25.
13. Eaha te faahopearaa o to Mose faaearaa i Midiana e 40 matahiti i nia ia ˈna?
13 I te 40raa o to ˈna matahiti, ua imi oia i te ora i roto i te medebara. I Midiana, ua farerei oia i na tamahine e hitu a Reuela e ua tauturu ia ratou ia huti mai i te pape na te nǎnǎ rahi a to ratou metua tane. I to ratou hoˈiraa i te fare, ua faataa na vahine apî ma te oaoa ia Reuela e ua faaora “te hoê taata no Aiphiti” ia ratou i te tahi mau tiai mamoe tei haapeapea ia ratou. Ma te titau-manihini-raa a Reuela, ua faaea o Mose i ǒ te utuafare. Aita oia i inoino no te mau ati ta ˈna i faaruru; aita atoa te reira i tapea ia ˈna eiaha e haapii i te faatano i to ˈna oraraa i to ˈna huru tupuraa apî. Aita roa ˈtu to ˈna hinaaro e rave i to Iehova hinaaro i iti mai. I te roaraa e 40 matahiti roroa a tiai ai oia i te mau mamoe a Reuela, a faaipoipo ai oia ia Zipora, e a rave ai i ta ˈna na tamaiti, ua faahotu e ua haamaitai o Mose i te huru maitai o tei faataa ê ia ˈna. Oia, ua haapii o Mose i te mǎrû na roto i te ati.—Exodo 2:16-22; Ohipa 7:29, 30.
14. A faataa na i te hoê ohipa i tupu o tei faaite i to Mose mǎrû a aratai ai oia ia Iseraela.
14 I muri aˈe i to Iehova faatoroaraa ia ˈna ei aratai i te nunaa Iseraela, ua ite-faahou-hia to Mose mǎrû. Ua faaite te hoê taata apî ia Mose e te tohu ra o Eledada raua o Medada ei peropheta i roto i te puhapa—noa ˈtu e aita raua i te sekene i to Iehova niniiraa i to ˈna varua i nia i na matahiapo e 70 o te tauturu ia Mose. Ua parau Iosua e: “E tau tavana, e Mose, e faaore atu oe i te reira.” Ua pahono atu Mose ma te mǎrû e: “Te feii ra oe ia ˈu? o to ˈu ïa hinaaro ei peropheta atoa to Iehova ra taata e ati noa ˈˈe, e ia tuu oia i to ˈna varua i nia iho ia ratou.” (Numera 11:26-29) Ua tauturu te mǎrû i te tamǎrû i tera umeumeraa.
15. Noa ˈtu to Mose huru tia ore, no te aha e pee ai i to ˈna hiˈoraa?
15 I te hoê taime, e au ra e ua ere o Mose i te mǎrû. I Meriba, i pihai ia Kadesa, aita oia i faahanahana ia Iehova, o Tei rave i te semeio. (Numera 20:1, 9-13) Noa ˈtu to Mose huru tia ore, ua turu to ˈna faaroo aueue ore ia ˈna i te roaraa o to ˈna oraraa, e mea au na tatou to ˈna mǎrû rahi i teie atoa mahana.—Hebera 11:23-28.
Te mârô e te mǎrû
16, 17. Eaha te faaararaa ta tatou e huti mai na roto i te aamu o Nabala e o Abigaila?
16 Te vai ra te hoê hiˈoraa faaararaa i te tau o Davida, i muri rii noa ˈˈe i te poheraa o Samuela, te peropheta a te Atua. O te hiˈoraa ïa o Nabala e ta ˈna vahine ra o Abigaila. Mea taa ê roa raua e piti! E ‘vahine ite maitai o Abigaila i te parau,’ area ta ˈna tane, ‘e taata mârô ïa e te rave i te parau iino.’ Ua patoi Nabala ma te peu etene i te horoa i te pane e te pape na te mau taata o Davida, o tei tauturu i te paruru i ta ˈna mau nǎnǎ rarahi i te eiâ. Ma te riri tia, ua tatua Davida e te tahi o to ˈna mau taata i ta ratou mau ˈoˈe e reva ˈtura e aro ia Nabala.—Samuela 1, 25:2-13.
17 I to Abigaila faarooraa i te ohipa i tupu, ua faaineine vave oia i te pane, te uaina, te iˈo, e te pane monamona vine e te suke e haere atura e farerei ia Davida. “Ei nia ia ˈu, e tau fatu, teie nei hara,” ta ˈna ïa i taparuparu atu. “E parau noa ˈtu na râ to tavini vahine ia oe na, ia ite mai oe, e faaroo iti noa mai na hoi oe i te parau a to tavini vahine nei.” Ua mǎrû aˈera to Davida mafatu i te taparuparuraa mǎrû a Abigaila. I muri aˈe i to ˈna faarooraa i ta Abigaila tatararaa, ua parau Davida e: “Ia haamaitaihia te Atua o Iseraela ra o Iehova, o tei tono mai ia oe i teie nei mahana i farerei mai ai oe ia ˈu: e ia ora na hoi oe i ta oe parau maitai, e ia ora hoi oe o tei tapea mai ia ˈu i teie nei mahana, ia ore ia manii te toto ia ˈu.” (Samuela 1, 25:18, 24, 32, 33) I te pae hopea, ua pohe o Nabala no to ˈna mârô. Ua ite aˈera o Abigaila i te oaoa e riro ei vahine na Davida maoti to ˈna mau huru maitatai. Ua riro to ˈna mǎrû ei hiˈoraa no te feia atoa e tavini ra ia Iehova i teie mahana.—Samuela 1, 25:36-42.
A tapi i te mǎrû
18, 19. (a) Eaha te mau tauiraa e itehia a ahu ai tatou i te mǎrû? (b) Eaha te tauturu ia tatou ia hiˈopoa maite ia tatou iho?
18 E huru faufaa roa ïa te mǎrû. E ere noa i te peu mǎrû; e huru au maitai o te tamahanahana ia vetahi ê. Na mua ˈˈe, ua matau paha tatou i te paraparau e te haa ma te etaeta. I to tatou râ haapiiraa i te parau mau bibilia, ua taui tatou e ua riro mai ei mea maitai aˈe. Ua faahiti Paulo i teie tauiraa i to ˈna faaitoitoraa i te mau hoa Kerisetiano e: “E [ahu i te] aroha noa, e te hamani maitai, e te haehaa, e te mǎrû, e te faaoromai rahi.” (Kolosa 3:12; MN) Te faaau ra te Bibilia i teie tauiraa i te tauiraa o te tahi mau animara taehae—te luko, te nemera, te liona, te daba, e te asepi—ei animara rata e te hau—te arenio, te pinia mamoe, te fanauˈa puaatoro, e te puaatoro. (Isaia 11:6-9; 65:25) E maere te taata ia taui roa ino to tatou huru. E parau râ tatou e maoti te ohiparaa a te varua o te Atua i tupu ai te reira, no te mea to roto atoa te mǎrû i ta ˈna hotu faahiahia mau.
19 Te auraa anei e ua taui e ua pûpû anaˈe tatou ia tatou na Iehova, aita ïa e faufaa faahou ia tutava i te faahotu i te mǎrû? E ere roa ˈtu. Ei hiˈoraa, e mea faufaa roa ia atuatu noa i te ahu apî ia vai mâ e ia au maitai te reira. E tauturu mai te hiˈopoa-maite-raa i te Parau a te Atua e te feruriruriraa i te mau hiˈoraa i roto, i te tapea i te hoê manaˈo apî e te afaro no nia ia tatou. Eaha ta te Parau faauruahia a te Atua, e au i te hoê hiˈo, e faaite ra no nia ia tatou?—Iakobo 1:23-25.
20. E nafea tatou e manuïa ˈi i te faaite i te mǎrû?
20 Mea taa ê iho â te huru o te taata. Mea ohie aˈe na te tahi mau tavini a te Atua ia faaite i te mǎrû i te tahi atu. Teie râ, e mea faufaa roa ia faahotu te mau Kerisetiano atoa i ta te varua o te Atua e faatupu, tae noa ˈtu i te mǎrû. Ua aˈo Paulo ia Timoteo ma te here e: ‘E tapi i te parau-tia, i te paieti, i te faaroo, i te hinaaro, i te faaoromai, e te mǎrû.’ (Timoteo 1, 6:11) Te faataa ra te taˈo “tapi” i te faufaaraa ia tutava. Te huri ra te hoê Bibilia i teie aˈoraa “e haapao.” (V.C.J.S.) Mai te peu e e tutava outou i te feruriruri i te mau hiˈoraa maitatai i roto i te Parau a te Atua, e puta maitai ïa te reira i roto i to outou feruriraa mai te mea ra e ua tuuhia ˈtu i roto ia outou. E tarai e e aratai te reira ia outou.—Iakobo 1:21.
21. (a) No te aha tatou e tapi ai i te mǎrû? (b) Eaha te tauaparauhia i roto i ta tatou tumu parau i muri nei?
21 Na to tatou huru i nia ia vetahi ê e faataa i nia i teihea faito e faaite ai tatou i te mǎrû. “O vai te taata paari e te ite i roto ia outou na?” ta te pǐpǐ Iakobo ïa e ui ra. “Na te haapao maitai oia i te faaite mai i ta ˈna ohipa, ma te mǎrû o te paari mau ra.” (Iakobo 3:13) E nafea tatou e faaite ai i teie huru Kerisetiano i te fare, i roto i te taviniraa Kerisetiano, e i roto i te amuiraa? E horoa mai te tumu parau i muri nei i te tahi mau aˈoraa faufaa.
Haamanaˈoraa
• Eaha ta outou i haapii no nia i te mǎrû na roto i te hiˈoraa o
• Iehova?
• Iesu?
• Mose?
• Abigaila?
• No te aha e mea faufaa roa ˈi ia tapi i te mǎrû?
[Uiraa haapiiraa]
[Hohoˈa i te api 22]
No te aha Iehova i ite mai ai i te ô a Abela?
[Hohoˈa i te api 23]
Ua faaite Iesu e ua taai-roa-hia te mǎrû i te haehaa
[Hohoˈa i te api 24]
Ua vaiiho mai Mose i te hoê hiˈoraa maitai o te mǎrû