‘Ia mǎrû roa ino i te taata atoa’
‘Ia mǎrû roa ino i te taata atoa’
‘E faaite atu ia ratou ia mǎrû [roa ino] e te mamahu i te taata atoa.’—TITO 3:1, 2; MN.
1. No te aha e ere ai i te mea ohie noa ia faaite i te mǎrû?
“EI PEE mai outou ia ˈu,” ta te aposetolo Paulo ïa i papai, “mai ia ˈu atoa e pee i te Mesia nei.” (Korinetia 1, 11:1) Te tutava ra te mau tavini atoa a te Atua i teie mahana i te pee i teie aˈoraa. Parau mau, e ere i te mea ohie, no te mea ua tutuu mai to tatou na metua matamua i te mau hinaaro e te mau huru miimii aita e tuati ra i te hiˈoraa o te Mesia. (Roma 3:23; 7:21-25) No te faaite râ i te mǎrû, e manuïa tatou paatoa mai te peu e e tutava tatou. Eita râ e navai ia turui i nia noa i ta tatou iho faaotiraa. Eaha ˈtu â te hinaarohia?
2. E nafea tatou e ‘mǎrû roa ino ai i te taata atoa’?
2 E faatupu atoa te varua moˈa i te mǎrû o te Atua. Ia pee noa ˈtu â tatou i te aratairaa a te puai ohipa o te Atua, e ite-noa-hia ˈtu â ta ˈna hotu. I reira noa ïa e noaa ˈi ia tatou ia “mǎrû [roa ino]” i te taata atoa. (Tito 3:2; MN) E hiˈopoa mai tatou e nafea tatou e pee ai i te hiˈoraa o Iesu e e tauturu ai i te feia e apiti mai ia tatou ia ‘noaa te tamahanahanaraa.’—Mataio 11:29, MN; Galatia 5:22, 23.
I roto i te utuafare
3. Eaha te huru tupuraa utuafare e faaite ra i te varua o teie nei ao?
3 O te utuafare te hoê tuhaa e mea faufaa roa ˈi te mǎrû. Ia au i te hoê faanahonahoraa (Organisation mondiale de la santé), o te haavîraa uˈana i te fare te mea atâta aˈe no te ea o te mau vahine, eiaha te mau ati purumu e te malaria atoa. I Lonedona, i Beretane, ei hiˈoraa, e 25 % o te mau ohipa haavîraa uˈana atoa i tapaohia, tei te fare ïa. E farerei pinepine te mau mutoi i te taata o te hohora mai i to ratou mau huru aau ma “te tutuô e te tuhi.” Te mea ino roa ˈtu â, ua vaiiho te tahi feia faaipoipo e ia haafifi “te mamahu ore” i to ratou taairaa. E faaiteraa peapea anaˈe teie mau mea i ‘te [v]arua o teie nei ao’ e aita e parahiraa to te reira i roto i te mau utuafare Kerisetiano.—Ephesia 4:31; Korinetia 1, 2:12; MN.
4. Eaha te faahopearaa o te mǎrû i nia i te utuafare?
4 No te tinai i te mau hinaaro o teie nei ao, e hinaaro tatou i te varua o te Atua. “Tei ia ˈna te [v]arua o te Fatu ra, tei reira te tiamâ.” (Korinetia 2, 3:17; MN) E haapuai te here, te aau maitai, te hitahita ore, e te faaoromai i te auhoêraa o te mau tane e te mau vahine faaipoipo tia ore. (Ephesia 5:33) E faaoaoa ˈtu â te mǎrû i te huru tupuraa i te fare e mea taa ê roa te reira i te tatamaˈi e te peapea e faaino ra e rave rahi utuafare. E mea faufaa te parau a te hoê taata, na ta ˈna râ huru paraparau e faaite i to ˈna mau huru aau o roto mai. Ia faaitehia te mau tapitapi e te mau haapeapearaa ma te mǎrû, e mǎrû mai ïa te mau umeumeraa. Ua papai te arii paari ra o Solomona e: “O te parau mǎrû ra tei faaore i te riri; area te parau faaooo ra, o te riri ïa te tupu.”—Maseli 15:1.
5. E nafea te mǎrû e tauturu ai i roto i te hoê utuafare amahamaha i te pae faaroo?
5 E mea faufaa iho â râ te mǎrû i roto i te hoê utuafare amahamaha i te pae faaroo. Ma te apitihia i te mau ohipa maitatai, e tauturu te mǎrû i te feia mârô ia fariu ia Iehova. Teie ta Petero i aˈo i te mau vahine faaipoipo Kerisetiano: “E auraro maite i ta outou mau tane ra; e aore te tahi pae i faaroo i te parau ra, ia noaa mai ratou i te haapao maitai o ta ratou mau vahine, eiaha ˈtu â te parau; i te hiˈoraa mai ratou i ta outou haapaoraa viivii ore i apiti-atoa-hia i te mǎtaˈu. E to outou unauna, eiaha o te unauna rapae au anaˈe ra, i te rouru firi ra, e te tatuaraa i te auro ra, e te ahuraa i te ahu ra; o te taata moe râ o te aau ra te faaunauna, i te mea tahuti ore ra, o te aau mǎrû e te mamahu, o te mea taoˈa rahi ïa i mua i te aro o te Atua.”—Petero 1, 3:1-4.
6. E nafea te faaiteraa i te mǎrû e haapuai ai i te taairaa i rotopu i te mau metua e te mau tamarii?
6 E nehenehe te umeumeraa e tupu i rotopu i te mau metua e te mau tamarii, mai te peu iho â râ e aita e here ia Iehova. I roto râ i te mau utuafare Kerisetiano atoa, e mea faufaa roa ia faaite i te mǎrû. Ua aˈo Paulo i te mau metua tane: “Eiaha e faaooo atu i ta outou tamarii ia riri, e haapii râ ia ratou e ia paari ma te aˈo a te Fatu ra.” (Ephesia 6:4) Ia vai te mǎrû i roto i te hoê utuafare, e puaihia te taairaa piri i rotopu i te mau metua e te mau tamarii. Te haamanaˈo ra o Dean, hoê o na tamarii e pae, no nia i to ˈna metua tane e: “E mea mǎrû o Papa. Aita roa ˈtu vau e haamanaˈo ra i to mâua tatamaˈiraa—i to ˈu atoa taurearearaa. E mea mǎrû roa oia, ia peapea atoa oia. I te tahi taime, ua faaue mai oia e faaea noa i roto i to ˈu piha aore ra ua faaore i te tahi mau fanaˈoraa taa ê, aita râ mâua i tatamaˈi aˈenei. E ere noa oia i te metua tane no matou. E hoa atoa oia no matou, e aita matou i hinaaro e ia inoino oia.” Oia mau, e tauturu te mǎrû i te haapuai i te taairaa i rotopu i te mau metua e te mau tamarii.
I roto i ta tatou taviniraa
7, 8. No te aha e mea faufaa roa ˈi ia faaite i te mǎrû i roto i te taviniraa?
7 O te taviniraa te tahi atu tuhaa e mea faufaa ˈi te mǎrû. A faaite ai tatou i te parau apî maitai o te Basileia ia vetahi ê, e farerei tatou i te taata ua rau to ratou huru. E faaroo te tahi ma te oaoa i ta tatou poroi o te tiaturiraa. Eita te tahi atu e farii no te mau tumu rau. I ǒ nei ïa te huru maitai o te mǎrû e riro ai ei tauturu rahi no te rave i ta tatou ohipa faauehia, oia hoi te riroraa ei ite e tae noa ˈtu i te hopea o te fenua.—Ohipa 1:8; Timoteo 2, 4:5.
8 Ua papai te aposetolo Petero e: ‘E faateitei outou i te Fatu ra i te Mesia i roto i to outou aau: e ia vai ineine â outou ia parau atu i te taata atoa ia ui mai ia outou i te tiaturi i roto ia outou na, ma te mǎrû e te auraro maite atu.’ (Petero 1, 3:15) No te mea te haafaufaa papu ra tatou i te Mesia ei Hiˈoraa no tatou, e faaite maite ïa tatou i te mǎrû e te faatura atoa ia poro tatou i te feia e iria mai. E faatupu pinepine teie haerea i te mau faahopearaa faahiahia roa.
9, 10. A faatia i te hoê aamu no te faaite i te faufaaraa o te mǎrû i roto i te taviniraa.
9 I to ta ˈna vahine iritiraa i te opani, ua faaea noa o Keith i roto i te fare. I to ˈna iteraa e e Ite no Iehova te ratere, ua pari te vahine a Keith ma te riri i te mau Ite i te aroha ore i te mau tamarii. Ua faaea hau noa te taeae. Ma te mǎrû, ua pahono oia e: “Te peapea nei au no to oe manaˈo. E tia anei ia ˈu ia faaite atu i ta te mau Ite no Iehova e tiaturi ra?” Ua faaroo o Keith i te aparauraa e ua haere atu i te opani e faareva i te taeae.
10 I muri aˈe, ua tatarahapa aˈera nau apiti i te iriaraa i nia i te ratere. Ua putapû raua i to ˈna mǎrû. Ua maere raua i te hoˈiraa ˈtu te taeae hoê hebedoma i muri mai, e ua vaiiho o Keith e ta ˈna vahine ia ˈna ia faataa i te niu bibilia o ta ˈna tiaturiraa. “I te roaraa o na matahiti e piti i muri mai, ua faaroo rahi mâua i te tahi atu mau Ite,” ta raua ïa i parau i muri aˈe. Ua farii raua i te haapii i te Bibilia, e i te pae hopea, ua bapetizohia raua e piti atoa ei taipe o ta raua pûpûraa na Iehova. Auê ïa haamauruururaa mau na taua Ite ra tei farerei na mua ia Keith e ta ˈna vahine! Ua farerei te Ite i nau apiti tau matahiti i muri mai e ua ite atura e e taeae e e tuahine pae varua raua no ˈna. E upootia te mǎrû.
11. E nafea te mǎrû e faaineine ai i te hoê taata ia farii i te parau mau Kerisetiano?
11 No ta Harold i farerei ei faehau, ua tupu mai te inoino e te feaaraa i te vai-mau-raa o te Atua. Ua rahi atu â to Harold fifi i te paruparu-roa-raa to ˈna tino no te hoê ati purumu i faatupuhia e te hoê taata faahoro tei taero. I to te mau Ite no Iehova haereraa ˈtu i ǒ na, ua faaue oia ia ratou eiaha e haere faahou atu. I te hoê râ mahana, ua tamata te hoê Ite o Bill te iˈoa i te farerei i te hoê taata tei anaanatae, e faaea ra e piti noa opani i te atea i to Harold. Ma te hape, ua patoto oia i ǒ Harold. I to Harold, ma te turutootoo, iritiraa i te opani, ua tatarahapa oioi atu o Bill, ma te faataa e te hinaaro ra oia i te patoto i pihai mai. Eaha te huru o Harold? Aita o Bill i ite e ua mataitai o Harold i te parau apî i roto i te afata teata no nia i te mau Ite e patu amui ra i te hoê Piha a te Basileia apî maa taime poto roa. No to ˈna maere e mea rahi roa te taata e ohipa ra ma te tahoê, ua taui to ˈna manaˈo no nia i te mau Ite. No to ˈna putapû i te tatarahapa-maitai-raa ˈtu o Bill e to ˈna huru auhoa e te mǎrû, ua faaoti atura o Harold i te farii i te mau farereiraa a te mau Ite. Ua haapii oia i te Bibilia, ua haere i mua, e ua riro mai ei tavini bapetizohia a Iehova.
I roto i te amuiraa
12. Teihea mau huru o teie nei ao e mea tia ia patoi te mau melo o te amuiraa Kerisetiano?
12 O te amuiraa Kerisetiano te toru o te tuhaa e mea faufaa roa ˈi te mǎrû. Te tupu pinepine nei te amahamaha i roto i te ao no teie tau. E mea matauhia te mârôraa, te tatamaˈiraa, e te peapea i rotopu i te feia e hiˈo ra i te oraraa ma te manaˈo pae tino. I te tahi taime, e ô riirii tera mau huru o teie nei ao i roto i te amuiraa Kerisetiano e tupu atu ai te mârôraa parau. Te peapea nei te mau taeae e hopoia ta ratou ia faaafaro ratou i teie mau huru tupuraa. Na te here râ ia Iehova e to ratou mau taeae e turai ra ia ratou ia tutava i te faahoˈi mai i te feia i hape.—Galatia 5:25, 26.
13, 14. Eaha te faahopearaa ia “haapii mǎrû maite i te feia i mârô maira”?
13 I te senekele matamua, ua û o Paulo e to ˈna hoa ra o Timoteo i te fifi no ǒ mai i te tahi mau taata i roto i te amuiraa. Ua faaara o Paulo ia Timoteo ia haapao maitai i te mau taeae e au i te mau farii no “te ino.” “E ore hoi te tavini o te Fatu nei e tia ia mârô,” ta Paulo ïa i haaferuri, “ia mǎrû râ oia i te taata atoa nei, e te au hoi ia haapii ia vetahi ê, e te faaoromai maite i te ino, ma te haapii mǎrû maite i te feia i mârô maira.” Ia tapea maite tatou i te mǎrû i mua atoa i te aa, e turai-pinepine-hia te feia mârô ia feruri faahou i ta ratou mau faahaparaa. E tia ïa ia Iehova, mai ta Paulo e papai â, ia ‘horoa i te tatarahapa ia ratou ia farii i te [ite mau i te] parau mau.’ (Timoteo 2, 2:20, 21, 24, 25; MN) A tapao na e te taai ra Paulo i te faaoromai i te mǎrû.
14 Ua faaohipa Paulo i ta ˈna e poro ra. I to ˈna faaûraa i “te mau aposetolo rarahi” i roto i te amuiraa no Korinetia, ua faaitoito oia i te mau taeae e: “E teie nei, o vau iho teie o Paulo e aˈo atu ia outou i te mǎrû e te aroha o te Mesia, te huru haehaa to ˈu i rapae au aˈe i roto ia outou na, te itoito nei râ vau ia outou ia ˈu i taa ê nei.” (Korinetia 2, 10:1; 11:5) Ua pee mau â Paulo i te Mesia. A tapao na e ua faaitoito oia i teie mau taeae ma “te mǎrû” o te Mesia. Aita ïa oia i faahepo, i haavî. Aita e feaaraa e ua au te feia aau farii i roto i te amuiraa i ta ˈna faaitoitoraa. Ua tamǎrû oia i te mau umeumeraa e ua tauturu i te haamau i te hau e te auhoêraa i roto i te amuiraa. E ere anei teie te haerea ta tatou paatoa e tutava i te pee? E mea faufaa iho â râ ia pee te mau matahiapo i te mau ohiparaa a te Mesia e a Paulo.
15. No te aha e mea faufaa ˈi te mǎrû ia horoa tatou i te aˈoraa?
15 Aita roa ˈtu te hopoia e tauturu ia vetahi ê i taotiahia i te mau taime e fifihia ˈi te hau e te auhoêraa o te amuiraa. Na mua roa ˈˈe e tupu ai te umeumeraa, e hinaaro te mau taeae i te aratairaa î i te here. “E te mau taeae, noa ˈtu e e hape te hoê taata hou oia e ite ai, o outou tei ia outou ra te mau huru maitatai e titauhia i te pae varua, a tamata i te faatitiaifaro i teie taata,” ta Paulo ïa i faaitoito. E nafea râ? “Na roto i te aau mǎrû, ma te ara atoa ia outou iho, ia ore oe ia hema atoa.” (Galatia 6:1, MN) E ere i te mea ohie noa ia tapea mai i “te aau mǎrû,” no te mea iho â râ te ohipa nei te mau hinaaro hara i nia i te mau Kerisetiano atoa, tae noa ˈtu te mau tane i nominohia. Na te mǎrû râ e tauturu i te hoê taata i hape ia rave i te mau faatitiaifaroraa e maraa.
16, 17. Eaha te tauturu i te tinai i te hinaaro ore i te faaohipa i te aˈoraa?
16 I roto i te reo Heleni tumu, te faataa atoa ra te taˈo i hurihia ei “faatitiaifaro” i te nanai-faahou-raa aore ra te faahoˈiraa i te mau ivi fati, e raveraa mauiui teie. E faataa maitai te taote tamahanahana, o te faahoˈi i te hoê ivi fati, i te mau maitai o te reira. E mea tamǎrû to ˈna hau. E tauturu te faahiti-oioi-raa ˈtu i te tahi mau parau i te tamǎrû i te tupuraa au ore roa ino. Oia atoa, mea mauiui paha te hoê faatitiaifaroraa pae varua. E tauturu râ te mǎrû i te faariro atu ei mea au atu â, e afaro atu ai te taairaa e e ineine atu ai te taata i hape i te taui i to ˈna haerea. Ia patoi-atoa-hia te aˈoraa, e tinai te mǎrû o te taata e horoa ra i te tauturu i te hinaaro ore i te pee i te aˈoraa bibilia maitai.—Maseli 25:15.
17 Ia tauturu tatou ia vetahi ê ia faatitiaifaro, te vai noa râ te fifi e e hiˈohia te aˈoraa ei faahaparaa. Teie ta te hoê taata papai e parau ra: “Ia aˈo tatou ia vetahi ê, mea puai te hinaaro i te faahepo roa e no reira, mea faufaa roa te mǎrû.” E tauturu te faahoturaa i te mǎrû no ǒ mai i te haehaa ra i te Kerisetiano e aˈo ra ia ape i teie fifi.
“I te taata atoa”
18, 19. (a) No te aha e mea fifi ai na te mau Kerisetiano ia faaite i te mǎrû i roto i te haaraa e te feia faatere o te ao? (b) Eaha te tauturu i te mau Kerisetiano ia faaite i te mǎrû i nia i te feia mana toroa, e eaha paha te faahopearaa?
18 Hoê tuhaa e mea fifi na te taata e rave rahi ia faaite i te mǎrû, o te haaraa ïa e te feia faatere o te ao. E parau mau e te faaite ra te huru o te tahi feia faatere i te etaeta e te ereraa i te aumauiui. (Koheleta 4:1; 8:9) E tauturu mai râ to tatou here ia Iehova ia farii i to ˈna mana faatere hau ê e ia auraro ma te taotiahia e ma te au i te mau faatereraa. (Roma 13:1, 4; Timoteo 1, 2:1, 2) Ia imi atoa te feia tiaraa teitei i te taotia i ta tatou haamoriraa ia Iehova i mua i te taata, e imi tatou ma te oaoa i te mau ravea e vai ra no te pûpû i ta tatou tusia arueraa.—Hebera 13:15.
19 Eita roa ˈtu tatou e mârôrô. E tutava tatou i te tapea i te manaˈo maruhi ma te ore roa ˈtu e ofati i te mau faaueraa tumu parau-tia. Mea na reira to to tatou mau taeae manuïaraa i te tamau i ta ratou taviniraa i roto e 234 fenua e ati aˈe te ao nei. E pee tatou i te aˈoraa a Paulo e “e auraro maite i te hui arii e te feia mana, e faaroo i te feia haava ra, e faatia i te mau ohipa maitatai atoa ra. Eiaha roa e parau ino i te taata atoa ra, eiaha ei mârôrô, ia mǎrû [roa ino] râ, e te mamahu i te taata atoa ra.”—Tito 3:1, 2; MN.
20. Eaha te mau haamaitairaa e tiai maira i te feia e faaite i te mǎrû?
20 Mea rahi te haamaitairaa e tiai maira i te feia atoa e faaite i te mǎrû. “E ao to tei mǎrû,” ta Iesu ïa i parau, “e riro hoi ia ratou te fenua.” (Mataio 5:5) No te mau taeae faatavaihia i te varua o te Mesia, e horoa mai te tapea-maite-raa i te mǎrû i te oaoa e te fanaˈoraa taa ê e faatere i nia i te tuhaa fenua o te Basileia. E no te “feia rahi roa” o te “mamoe ê atu,” e tamau ratou i te faaite i te mǎrû e i te tiai ru i te ora i roto i te Paradaiso i nia i te fenua nei. (Apokalupo 7:9; Ioane 10:16; Salamo 37:11) Auê ïa tiaturiraa faahiahia roa e! No reira, eiaha roa ˈtu tatou e haamoe i te haamanaˈoraa ta Paulo i horoa i te mau Kerisetiano i Ephesia: “E teie nei, te aˈo atu nei au, te taata i tapeahia i te Fatu nei, ia outou, ia au to outou haerea i te parauraa i parauhia mai ai outou na, ma te aau haehaa, e te mǎrû [roa ino].”—Ephesia 4:1, 2; MN.
Haamanaˈoraa
• Eaha te mau maitai e noaa mai i te faaiteraa i te mǎrû
• i roto i te utuafare?
• i roto i te taviniraa?
• i roto i te amuiraa?
• Eaha te mau haamaitairaa e fafauhia ra i te feia mǎrû?
[Uiraa haapiiraa]
[Hohoˈa i te api 27]
E mea faufaa iho â te mǎrû i roto i te hoê utuafare amahamaha i te pae faaroo
[Hohoˈa i te api 27]
E haapuai te mǎrû i te taairaa utuafare
[Hohoˈa i te api 29]
A parau atu ma te mǎrû e te auraro maite
[Hohoˈa i te api 30]
E nehenehe te mǎrû o te hoê taata aˈo e tauturu i te hoê melo tei hape