Te Amuraa maa ahiahi hopea eaha te reira?

EAHA te ô mai i roto i te feruriraa ia faaroo outou i te parau “te amuraa maa ahiahi hopea”? E manaˈo te taata e rave rahi i te hohoˈa i nia i te papai mataitai-rahi-hia i Milan, i Italia, a te taata peni ra o Léonard de Vinci (1452-1519). Inaha, ua riro te Amuraa maa ahiahi hopea ei tumu parau matauhia e te mau rahua, te feia papai, e te feia faataˈi upaupa i te roaraa o te mau senekele.

Eaha râ te Amuraa maa ahiahi hopea, e eaha te auraa o te reira no te taata e ora nei i te senekele 21? E faaite te mau buka ite rahi e te mau titionare ia outou e te Amuraa maa ahiahi hopea, tei parau-atoa-hia te Amuraa maa ahiahi hopea a te Fatu, o te amuraa maa ïa ta Iesu Mesia i faatupu e ta ˈna mau aposetolo i te ahiahi hou to ˈna poheraa tusia. I te mea e o te amuraa maa hopea tera ta Iesu i faatupu e ta ˈna mau pǐpǐ haapao maitai, ua matau-noa-hia i te parau te Amuraa maa ahiahi hopea. E i te mea e na te Fatu ra o Iesu Mesia iho i haamau i te reira, e tano ïa te iˈoa ra te Amuraa maa ahiahi a te Fatu.

I te roaraa o te mau senekele, ua pûpû te taata e rave rahi i to ratou ora na tei hiˈohia e ratou ei mau tumu e au. Ua faufaahia te tahi mau taata i te tahi o teie mau poheraa no te hoê tau. Ia faaauhia râ i te poheraa o Iesu Mesia, e ere roa ˈtu taua mau poheraa haapae ra, noa ˈtu e mea faahiahia, i te mea faufaa. Hau atu â, eita hoê aˈe poheraa i roto i te tuatapaparaa arepurepu o te huitaata e ohipa i nia i te ao atoa nei. No te aha?

No te pahono i tera uiraa e no te tauturu ia outou ia ite eaha te auraa o te Amuraa maa ahiahi a te Fatu no outou, te titau manihini atu nei matou ia outou ia taio i te tumu parau i muri nei.