A tia noa mai e a hiˈo i te ora a Iehova!

“E haamau outou, e tia noa mai, e hiˈo i te ora na Iehova e horoa mai na outou.”—PARALEIPOMENO 2, 20:17.

1, 2. No te aha te aroraa fatata roa a “Goga i te fenua o Magoga” e mea ino aˈe ai i te haamǎtaˈuraa a te totoaraa nunaa rau?

 NO TE tahi pae, e aroraa te totoaraa i te huitaata, oia atoa i te ao iho. Te taa ra ia tatou e e ere tera haamǎtaˈuraa i te ohipa hauti. I te tahi aˈe pae, te vai ra te tahi atu aroraa rahi atu â, aita te huitaata e haapao roa ra aore ra aita roa ˈtu. Eaha ïa?

² O te aroraa ïa a “Goga i te fenua o Magoga,” ta te Bibilia e faahiti ra i roto i te Ezekiela pene 38. E parau faarahi anei e mea ino aˈe teie aroraa i te haamǎtaˈuraa a te totoaraa nunaa rau? E ere roa ˈtu, no te mea e hau atu ta Goga aroraa i te hoê aroraa i te mau faatereraa a te taata. E aroraa teie i te faatereraa i te raˈi a te Atua! E nehenehe roa ta te Atua Poiete e faaû i te aroraa uˈana ˈtu â a Goga, eiaha râ te taata o te ore e manuïa i te faaruru i te mau aroraa i to ratou ao.

Te hoê aroraa i te faatereraa a te Atua

3. Mai te matahiti 1914 mai â, ua titauhia te feia faatere o te ao ia aha, e ua nafea ratou?

³ Mai te haamauraahia te Basileia o te Atua i nia i te raˈi i te matahiti 1914 mai â, te aro ra te Arii e faatere nei a te Atua e te faanahoraa ino a Satani. I taua matahiti ra, ua faaarahia te feia faatere ia auraro i te Arii ta te Atua i maiti. Aita râ ratou i farii atu, mai tei tohuhia e: “Te tiatia ra te hui arii o te fenua nei i nia, e te amui atoa ra te hui raatira e mârô ia Iehova, e ta ˈna i faatahinu ra. Te na ô ra, Tatou e hahae i ta raua tapea e taa ê atu; e faarue ê atu tatou i to raua zugo ra.” (Salamo 2:1-3) E uˈana roa te mârôraa i te faatereraa a te Basileia i te roaraa o te aroraa a Goga no Magoga.

4, 5. E nafea te taata e aro ai i ta te Atua faatereraa itea ore i nia i te raˈi?

⁴ E ui paha tatou e nafea te taata e aro ai i te hoê faatereraa itea ore i nia i te raˈi. Te faaite ra te Bibilia e i roto i teie faatereraa, te vai ra na melo ‘hoê hanere maha ahuru ma maha tausani, i tauihia no roto i teie nei ao,’ e “te Arenio” te Mesia ra o Iesu. (Apokalupo 14:1, 3; Ioane 1:29) I te mea e tei nia te faatereraa apî i te raˈi, te faataahia ra te reira mai “te raˈi apî,” area to ˈna mau melo huiraatira i te fenua nei mai “te fenua apî.” (Isaia 65:17; Petero 2, 3:13) Ua hope ê na te oraraa haapao maitai i te fenua nei o te rahiraa o na hoa arii 144 000 o te Mesia. Ua haapapu ïa ratou e e au ia ratou ia amo i ta ratou mau hopoia apî i nia i te raˈi.

⁵ Tei te fenua noa nei râ te hoê toea iti o na 144 000. I roto i na 15 000 000 tiahapa i tae i te oroa Amuraa maa ahiahi a te Fatu i te matahiti 2002, e 8 760 anaˈe tei faaite i to ratou tiaturiraa e ua maitihia ratou no teie hopoia i nia i te raˈi. Te feia atoa o te tamata noa ˈtu i te aro i te toea o te feia e riro ei melo no te Basileia, o te Basileia o te Atua ïa ta ratou e aro mau â.—Apokalupo 12:17.

E faahope roa te Arii i ta ˈna upootiaraa

6. Eaha to Iehova e to te Mesia manaˈo ia patoihia te nunaa o te Atua?

⁶ Te tohuhia ra to Iehova huru ia patoihia te Basileia ta ˈna i haamau: “O tei parahi i nia i te mau raˈi ra te ata mai; e tâhitohitohia ratou e Iehova. Ei reira oia e parau mai ai ia ratou ma te riri, e ehuehu roa aˈera ratou ia ˈna i to ˈna riri rahi. Te na ô maira oia, Ua faatahinu vau i tau  arii i nia i tau mouˈa moˈa ra, ia Ziona.” (Salamo 2:4-6) Ua tae i te taime e ‘faahope roa ˈi’ te Mesia, i raro aˈe i ta Iehova aratairaa, “i ta ˈna upootiaraa.” (Apokalupo 6:2, MN) Eaha to Iehova manaˈo ia patoihia to ˈna nunaa i te tau o te upootiaraa hopea? O ˈna mau â ïa te patoihia ra e ta ˈna Arii faatere. ‘O te faatiaia ˈtu ia outou ra, ua faatiaia ïa i to ˈu orio mata nei,’ ta Iehova ïa e parau ra. (Zekaria 2:8) E ua parau maitai o Iesu e ta te taata e rave aore ra e ore e rave no to ˈna mau taeae faatavaihia, ua na reira ïa ratou no ˈna.—Mataio 25:40, 45.

7. No teihea mau tumu e û ai to te “feia rahi roa,” i faataahia i roto i te Apokalupo 7:9, i te riri rahi o Goga?

⁷ Parau mau, e û atoa te feia e turu i te toea faatavaihia ma te itoito i te riri rahi o Goga. Teie mau melo no a muri aˈe o “te fenua apî” a te Atua, e ‘feia rahi roa ïa no te mau fenua atoa, te mau opu atoa, te mau nunaa atoa, e te mau reo atoa.’ (Apokalupo 7:9) Te parauhia ra e ‘te tia noa ra ratou i mua i te terono, e i mua i te Arenio, ma te ahu teatea i te ahuraa.’ E tiaraa fariihia ïa to ratou i mua i te Atua e te Mesia ra o Iesu. “Ma te amaa tamara i to ratou rima,” te arue faaite ra ratou ia Iehova ei Arii tia o te ao taatoa, o te mana ra na roto i te arai o te faatereraa a te Arii ta ˈna i faaterono, oia hoi o Iesu Mesia, “te Arenio a te Atua.”—Ioane 1:29, 36.

8. No te aroraa a Goga e aha ˈi te Mesia, e eaha te faahopearaa?

⁸ No te aroraa a Goga e ohipa mai ai te Arii ta te Atua i faaterono e e haamata ˈi i te tamaˈi ra o Aramagedo. (Apokalupo 16:14, 16) E mou te feia i patoi i te farii i to Iehova mana arii. Area te feia i faaruru i te ati no to ratou taiva ore i te Basileia o te Atua, e ite ïa i te tamǎrûraa tamau. Teie hoi ta te aposetolo Paulo i papai: “Ei faaiteraa i te faahapa tia a te Atua, e ia parauhia outou e feia  au i te basileia o te Atua, no reira outou i pohe ai ra. E mea tia hoi i te Atua ia faautua i te feia i pohe ai outou na i te pohe; area ia outou i tei hamani-ino-hia ra, o te ora ïa ta ˈna e tuu mai no tatou atoa nei, ia fa mai te Fatu ra o Iesu mai te raˈi mai, ma tana mau melahi mana atoa ra, ma te auahi ura ra, i te tuuraa mai i te pohe i te feia aore i ite i te Atua, e tei ore i faaroo i te evanelia o to tatou Fatu o Iesu Mesia ra.”—Tesalonia 2, 1:5-8.

9, 10. (a) Mea nafea to Iehova faaupootiaraa ia Iuda i nia i te hoê enemi hahano? (b) Ia tamau te mau Kerisetiano i te aha i teie mahana, e tia ˈi?

⁹ I te roaraa o te ati rahi i mua nei, o te hope atu i Aramagedo, e aro te Mesia i te ino atoa. Eita râ ta ˈna mau pǐpǐ e aro, mai te feia o te basileia o na opu e piti o Iuda tau tausani matahiti aˈenei. Na Iehova te aroraa, e ua horoa mai i te upootiaraa. Te na ô ra te faatiaraa e: “Ua tuu aˈera Iehova i te taoto i te mau tamarii a Amona e ia Moabi, e to te mouˈa ra to Seira tei haapaohia ei rave ia Iuda, ei rave e pau ihora ratou. Ua rave atura te mau tamarii a Amona e Moabi, i to te mouˈa ra to Seira, e taparahi e ia pau roa ratou; e pau aˈera to te mouˈa ra to Seira, ua tahutu noa ˈtura i te taparahiraa ia ratou iho. E tae atura Iuda i te pare tiairaa i te medebara, ua hiˈo atura ratou i taua feia rahi ra, e inaha, te vai noa ra ratou i nia i te fenua, ua pohe roa; aita roa i ora.”—Paraleipomeno 2, 20:22-24.

¹⁰ E au roa iho â mai ta Iehova i tohu: “E ore outou e aro.” (Paraleipomeno 2, 20:17) Tera te hiˈoraa ta te mau Kerisetiano e pee ia ‘faahope roa o Iesu Mesia i ta ˈna upootiaraa.’ A tiai noa ˈi, e tamau ratou i te aro i te ino, eiaha ma te mauhaa tamaˈi pae tino, te pae varua râ. Mea na reira ‘e pohe ai ia ratou te ino i te maitai.’—Roma 6:13; 12:17-21; 13:12; Korinetia 2, 10:3-5.

Na vai e aratai i te aroraa a Goga?

11. (a) Eaha te mau faanahonahoraa ta Goga e faaohipa i roto i ta ˈna aroraa? (b) Eaha te titauhia no te vai ara noa i te pae varua?

¹¹ Ua faahohoˈahia o Goga no Magoga i te Diabolo ra o Satani tei faahaehaahia mai te matahiti 1914 mai â. Ei varua, eita ta ˈna e nehenehe e aro roa mai, e faaohipa râ oia i te mau faanahonahoraa taata no te rave i ta ˈna mau ohipa. Eaha tera mau faanahonahoraa taata? Aita te Bibilia e haamataratara roa ra, te horoa maira râ i te tahi mau tapao o te tauturu mai ia ite eaha te reira. A tupu ai te mau mea na te ao nei ia au i te mau parau tohu bibilia, e maramarama riirii noa ˈtu â tatou. E ape te nunaa o Iehova i te mau manaˈo niu ore, e vai ara noa râ ratou i te pae varua, ma te ite maite i te mau ohipa poritita e te faaroo e tupu ra ia au i te mau parau tohu bibilia.

12, 13. Mea nafea to te peropheta Daniela tohuraa i te hoê aroraa hopea i te nunaa o te Atua?

¹² Te haamaramarama maira te peropheta Daniela i te aroraa hopea i te nunaa o te Atua, ma te papai e: ‘E haere oia [te arii no apatoerau] ma te riri rahi ia pau, e ia faahope roa te taata e rave rahi no te pohe roa. Na ˈna e haamau i to ˈna iho tiahapa, to ˈna iho fare i ropu i te miti [rahi] ra e  te mouˈa moˈa hanahana ra.’—Daniela 11:44, 45; MN.

¹³ I te tau bibilia, o te miti Mediteranea te “miti rahi” e o Ziona “te mouˈa moˈa,” ta Iehova i parau e: “Ua faatahinu vau i tau arii i nia i tau mouˈa moˈa ra, ia Ziona.” (Salamo 2:6; Iosua 1:4) No reira, i te auraa pae varua, te faahohoˈa ra te fenua ‘i ropu i te miti rahi e te mouˈa moˈa’ i te tiaraa ruperupe pae varua o te mau Kerisetiano faatavaihia. Ua taa ê mai ratou i te miti o te huitaata tei atea ê i te Atua, e te tiai ru nei ratou i te faatere e te Mesia ra o Iesu i roto i te Basileia i te raˈi. Papu maitai, o te mau tavini faatavaihia a te Atua, e to ratou mau hoa taiva ore o te feia rahi roa, te fa a te arii no apatoerau ia haamata oia i ta ˈna aroraa uˈana ia au i te parau tohu a Daniela.—Isaia 57:20; Hebera 12:22; Apokalupo 14:1.

E nafea te mau tavini a te Atua?

14. Eaha na mea e toru ta te nunaa o te Atua e rave ia arohia ratou?

¹⁴ Eaha ta te mau tavini a te Atua e rave ia arohia ratou? A hiˈo faahou na ïa i te huru o te nunaa iho o te Atua i te tau o Iehosaphata. Ua poroihia i to ˈna mau tino huiraatira ia rave e toru mea: (1) e haamau ratou, (2) e tia noa mai, e (3) e hiˈo i te ora a Iehova. Ia au i teie mau parau, e nafea ïa te nunaa o te Atua i teie tau?—Paraleipomeno 2, 20:17.

15. Eaha te auraa no te nunaa o Iehova e haamau?

¹⁵ E haamau ratou: Ma te aueue ore, e tapea maite â te nunaa o te Atua i to ratou tiaraa paturu i te Basileia o te Atua ma te itoito rahi. E tapea maite â ratou i to ratou tiaraa amui ore Kerisetiano. E ‘faaitoito ratou e eita e aueue’ i roto i ta ratou taviniraa taiva ore ia Iehova e e arue â ratou ia Iehova i mua i te taata no to ˈna aau aroha. (Korinetia 1, 15:58; Salamo 118:28, 29) Eita ratou e faarue i teie tiaraa fariihia e te Atua noa ˈtu te faaheporaa i teie nei aore ra a muri aˈe.

16. E nafea te mau tavini a Iehova e tia noa mai ai?

¹⁶ E tia noa mai: Eita te mau tavini a Iehova e tamata i te faaora ia ratou iho, e tiaturi roa râ ratou ia Iehova. O ˈna anaˈe te nehenehe e faaora i ta ˈna mau tavini i te huanane o te ao, e te fafau ra oia i te reira. (Isaia 43:10, 11; 54:15; Oto o Ieremia 3:26) Te tiaturiraa ia Iehova, o te tiaturiraa atoa ïa i te tia itea no teie tau ta ˈna e faaohipa maitai ra tau ahuru matahiti i teie nei ia tupu ta  ˈna mau opuaraa. E mea faufaa ïa, mai tei ore i itehia aˈenei, ia tiaturi te mau Kerisetiano mau i te mau hoa haamoriraa ta Iehova e ta ˈna Arii faatere i faatoroa no te aratai ia ratou. Na teie mau tane haapao maitai e aratai i te nunaa o te Atua. Te oreraa e tâuˈa i ta ratou aratairaa, e ati ïa te hopea.—Mataio 24:45-47; Hebera 13:7, 17.

17. No te aha te mau tavini haapao maitai a te Atua e hiˈo ai i te ora a Iehova?

¹⁷ E hiˈo i te ora a Iehova: O te ora te utua maitai na te feia atoa e tapea maite i to ratou tiaraa hapa ore Kerisetiano e e tiaturi ia Iehova no te ora ˈtu. E faaite haere ratou i te taeraa mai o te mahana haavaraa a Iehova e tae noa ˈtu i te hopea e i te faito hope. E mea tia ia ite te mau mea ora atoa i poietehia e o Iehova te Atua mau e e mau tavini haapao maitai ta ˈna i te fenua nei. Eita roa ˈtu to Iehova mana arii tia e mârô-maoro-faahou-hia.—Ezekiela 33:33; 36:23.

18, 19. (a) E nafea te himene upootiaraa o te Exodo pene 15 e faaite ai i te mau huru aau o te feia e ora ˈtu i te aroraa a Goga? (b) Eaha te tano ia rave te nunaa o te Atua i teie nei?

¹⁸ Ma te ito apî e ô atu ai te nunaa o te Atua i roto i te ao apî, e e hinaaro ai e himene i te hoê himene upootiaraa, mai te mau Iseraela i tahito ra i muri aˈe i to ratou faaoraraahia i te miti Uteute. No to ratou mauruuru mure ore ia Iehova no ta ˈna parururaa i te melo taitahi e i te pǔpǔ, e faahiti ratou i teie mau parau no tahito ra: “E himene au ia Iehova, ua teitei hanahana roa hoi oia . . . E puai rahi to Iehova i te tamaˈi. O Iehova to ˈna iˈoa mau. . . . Ua hanahana, e Iehova, to rima atau i te puai; na to rima atau, e Iehova, i paruparu ai te enemi. Ua taihi-tumu-hia e oe tei mârô mai ia oe ra, i te rahi o to mana na. Ua tuu atura oe i to riri, pau ihora ratou mai te aihere mǎrô e pau i te ahi ra. . . . E aratai â oe i te mau taata nei ma to oe ra hamani maitai, i tei faaorahia e oe ra; e aratai â oe ia ratou i to parahiraa moˈa i to puai na. . . . O ratou ta oe e hopoi i reira, e na oe ratou e haamau i te mouˈa e parahihia e oe ra; i te vahi i haapaohia e oe, e Iehova, ei parahiraa no oe ra; te vahi moˈa, e te Fatu, ta to rima i haapapu ra. Ei ia Iehova te hau e a muri noa ˈtu.”—Exodo 15:1-19.

¹⁹ I teie nei e ua maramarama ˈtu â te tiaturiraa o te ora mure ore, teie ïa te taime tano e faaite ai te mau tavini a te Atua i to ratou paieti ia Iehova e e faaoti papu faahou ai e tavini ia ˈna ei Arii mure ore no ratou!—Paraleipomeno 1, 29:11-13.

E nehenehe anei outou e faataa?

• No te aha Goga e aro ai i te feia faatavaihia e te mau mamoe ê atu?

• E nafea te nunaa o te Atua e haamau ai?

• Eaha te auraa e tia noa mai?

• E nafea te nunaa o te Atua e hiˈo ai i te ora a Iehova?

[Uiraa haapiiraa]

[Hohoˈa i te api 28]

Ua faaupootia o Iehova ia Iehosaphata e to ˈna nunaa, ma te ore ratou e aro

[Hohoˈa i te api 30]

Te paturu amui nei te feia faatavaihia e te mau mamoe ê atu i to Iehova mana arii

[Hohoˈa i te api 31]

Mai te mau Iseraela i tahito ra, ua fatata te nunaa o te Atua i te himene i te hoê himene upootiaraa