“Eiaha e mǎtaˈu, eiaha e taiâ”

“Eiaha e mǎtaˈu, eiaha e taiâ . . . tei ia outou hoi Iehova.”—PARALEIPOMENO 2, 20:17.

1. Eaha te faahopearaa o te totoaraa i nia i te taata, e no te aha tatou e taa ˈi i to ratou taiâ?

 TOTOARAA! Ia faaroohia teie taˈo, e tupu mai te riaria, te manaˈo peapea e te ravea ore. E tupu mai te au ore, te oto, e te riri atoa. E te faataa ra teie taˈo i ta te taata e rave rahi e taiâ ra ia faaruru te huitaata ehia matahiti i te maoro a muri aˈe. Te taiâ ra ratou no te mea e rave rahi matahiti i te maoro, aita i noaa i te tahi mau fenua ia tinai roa i te totoaraa huru rau.

2. Eaha te huru o te mau Ite no Iehova i mua i te fifi o te totoaraa, e eaha na uiraa e hiti mai?

² Te vai nei râ te hoê tiaturiraa mau. E manaˈo maitai roa to te mau Ite no Iehova, o te poro nei ma te itoito rahi i roto e 234 fenua e tuhaa fenua i te ao nei. Aita ratou e taiâ ra i te ore-roa-raa te totoaraa e mou, ua papu râ ia ratou e ua fatata roa te reira. E tano anei ia paturu i taua manaˈo maitai ra? O vai te tia ia faaore roa i teie ati ia tae i te hoê mahana, e e nafea te reira e tupu ai? I te mea e te û nei tatou paatoa i te tahi huru haavîraa uˈana, e mea maitai ia hiˈopoa i te niu o taua manaˈo maitai ra.

3. No te aha te taata e mǎtaˈu ai, e eaha tei tohuhia no nia i to tatou anotau?

³ I teie mahana, ua rau te tumu e mǎtaˈu ai e e taiâ ˈi te taata. A manaˈo na i te feia e rave rahi aita e maraa faahou ra ia aupuru ia ratou iho no te matahiti rahi, i te feia paruparu no te maˈi ora ore, e i te mau utuafare e aro ra i te pae faaravairaa faufaa ia noaa mai te mau mea e hinaarohia i roto i te oraraa. Oia mau, a manaˈo na i te papu ore o te oraraa iho! E nehenehe te mau mea poiherehia  atoa e mou taue i roto i te hoê ati. No tera mǎtaˈu e tera ahoaho, e to te taata atoa peapea e te inoino e rave rahi, ua riro mau â to tatou tau mai ta te aposetolo Paulo i faataa e: “E tupu te ati rahi i taua anotau hopea nei, ia ite mai oe. E riro te taata nei ei miimii, . . . e aroha ore, e tahemo parau au, e pari haavare noa, e haapao ore, e iria, e te au ore i te taata maitatai ra.”—Timoteo 2, 3:1-3.

4. Eaha te tuhaa anaanatae o te faataaraa peapea i roto i te Timoteo 2, 3:1-3?

⁴ Te faataa ra teie irava i te hoê huru tupuraa peapea, te faaite atoa ra râ i te hoê tiaturiraa. A tapao na e e tupu te tau ati rahi ‘i te anotau hopea’ o teie nei faanahoraa ino o te mau mea a Satani. Te auraa e te piri maira te tamǎrûraa e ua fatata te ao ino i te monohia e te faatereraa a te Basileia tia roa o te Atua, ta Iesu i haapii i ta ˈna mau pǐpǐ ia pure. (Mataio 6:9, 10) Taua Basileia ra, o te faatereraa ïa a te Atua i nia i te raˈi, o ‘te ore roa e mou,’ ta te peropheta Daniela ïa e parau ra, ‘e hope roa râ taua mau basileia a te taata ra i te parari e e pau, e vai tera e a muri noa ˈtu.’—Daniela 2:44.

Te tiaraa amui ore Kerisetiano e te totoaraa

5. Ua aha aˈenei te tahi mau nunaa i mua i te haamǎtaˈuraa a te totoaraa?

⁵ Tau ahuru matahiti i te maoro to te totoaraa haapoheraa i te taata e rave rahi roa. Ua ite maite atu â te ao atoa i tera fifi atâta i muri aˈe i te mau ohipa totoaraa i tupu i na oire o New York e o Washington i te 11 no Tetepa 2001. No te rahi o te totoaraa i nia i te fenua, ua tahoê oioi te mau nunaa e ati aˈe te fenua no te aro atu. Ia au i te tahi mau parau faataa a te vea, ei hiˈoraa, i te 4 no Titema 2001, “ua farii tahi te mau faatere hau ěê no na fenua e 55 i Europa, i Marite Apatoerau e i Asia no Ropu, i te hoê opuaraa” o te faanaho i ta ratou mau tutavaraa. Ua haapopou te hoê taata toroa a te hau no Marite i teie ohipa o te horoa i “te ito apî” no te patoi i te totoaraa. Ua apiti taue roa ˈtura tau hanere mirioni taata i roto i ta te hoê vea (The New York Times Magazine) e parau ra “te haamataraa o te hoê aroraa rahi o te tuatapaparaa.” Aita râ i papu e e manuïa anei tera mau tutavaraa. E mea rahi tei mǎtaˈu e tei taiâ i te mau faahopearaa o tera aroraa i te ohipa riaria, aita râ te feia e tiaturi ra ia Iehova.

6. (a) No te aha i te tahi taime, e mea fifi ai no te tahi pae ia farii i te tiaraa amui ore Kerisetiano o te mau Ite no Iehova? (b) No nia i te ohipa poritita, eaha te hiˈoraa ta Iesu i horoa i ta ˈna mau pǐpǐ?

⁶ E mea matau-maitai-hia te mau Ite no Iehova no to ratou tiaraa amui ore i roto i te poritita. E farii paha te rahiraa o te taata i teie tiaraa i te mau taime hau, eiaha râ i roto i te tahi mau tupuraa taa ê roa. E pinepine, e horoa mai te mǎtaˈu e te papu ore faatupuhia e te tamaˈi i te mau huru aau here aiˈa puai. E nehenehe te reira e haafifi i te tahi pae ia taa no te aha te taata e ore ai e turu i te mau ohipa aiˈa farii-rahi-hia. Ua ite râ te mau Kerisetiano mau e mea tia ia auraro ratou i ta Iesu poroi e “e ere ratou i to teie nei ao.” (Ioane 15:19; 17:14-16; 18:36; Iakobo 4:4) Te auraa e eita ratou e amui i roto i te mau ohipa totiare aore ra poritita. Ua horoa mai o Iesu i te hiˈoraa maitai. Ia hiˈohia to ˈna paari tia roa e to ˈna aravihi taa ê, e nehenehe ta ˈna e haamaitai i te mau ohipa a te taata i to ˈna ra tau. Aita râ oia i faaô i roto i te poritita. I te haamataraa o ta ˈna taviniraa, ua patoi papu oia i ta Satani pûpûraa e faatere i nia i te mau basileia atoa o te ao. I muri aˈe, ua ape maite oia i te hoê tihepuraa no te hoê tiaraa poritita.—Mataio 4:8-10; Ioane 6:14, 15.

7, 8. (a) Eaha ta te tiaraa amui ore i roto i te poritita o te mau Ite no Iehova e ore e haapapu ra, e no te aha? (b) E nafea te Roma 13:1, 2 e opani ai i te rave i te mau ohipa haavî uˈana i nia i te mau faatereraa?

 ⁷ Eiaha e manaˈo e te auraa o te tiaraa amui ore o te mau Ite no Iehova, te turu ra ïa aore ra te faatia ra ratou i te mau ohipa haavî uˈana. Ahani te reira iho â, eita ïa e tuati i ta ratou parau e e tavini ratou na “te Atua no ˈna te aroha e te hau.” (Korinetia 2, 13:11) Ua ite ratou eaha to Iehova manaˈo no nia i te haavîraa uˈana. Ua papai te fatu salamo e: “Te tamata maira Iehova i te feia parau-tia, area te taiata e te rave parau ino ra, ua riri roa tana aau ia ˈna.” (Salamo 11:5) Ua ite atoa ratou i ta Iesu i parau i te aposetolo Petero: “A oomo i to ˈoˈe i roto i te vehî; o te rave hoi i te ˈoˈe ra, e pohe ïa i te ˈoˈe.”—Mataio 26:52.

⁸ Te faaite maitai ra te tuatapaparaa e ua faaohipa pinepine te mau Kerisetiano haavare i te “ˈoˈe,” aita râ te mau Ite no Iehova. Eita ratou e rave i tera mau ohipa atoa. Te auraro maite ra te mau Ite i te poroi i roto i te Roma 13:1, 2: “Ia auraro maite te taata atoa i te feia mana toroa ra [te feia faatere]. Aore roa hoi e mana maori râ no ǒ mai i te Atua ra; te feia mana e vai nei, ua haapaohia ïa e te Atua. E teie nei, o tei mârô atu i te toroa ra, ua mârô ïa i tei haapaohia e te Atua ra: e te feia e mârô ra, e noaa ïa te faahapa ia ratou iho.”

9. Eaha na ravea e piti e patoi ai te mau Ite no Iehova i te totoaraa?

⁹ I te mea hoi e mea ino roa te totoaraa, eita anei e titauhia ia rave te mau Ite no Iehova i te tahi mea no te patoi roa ˈtu i te reira? E mea titauhia mau â, e te na reira nei ratou. A tahi, aita ratou e rave nei i tera ohipa. A piti, te haapii nei ratou i te taata e ia faaohipa ratou i te mau faaueraa tumu Kerisetiano, e haapae ïa ratou i te mau huru haavîraa uˈana atoa. * I te matahiti i mahemo, ua rave te mau Ite 1 202 381 302 hora no te tauturu i te taata ia haapii i teie huru oraraa Kerisetiano. Aita i mâuˈa taua taime ra, no te mea maoti teie ohipa e 265 469 taata tei bapetizohia ei Ite no Iehova, a faaite atu ai i te taatoaraa e te patoi papu ra ratou i te haavîraa uˈana.

10. Eaha te ravea e ore ai te haavîraa uˈana i roto i te ao i teie mahana?

¹⁰ Hau atu â, ua ite te mau Ite no Iehova e eita e tia ia ratou anaˈe ia faaore i te ino i roto i te ao. No reira ratou e tiaturi roa ˈi i te Atua ra o Iehova, o ˈna anaˈe te tia. (Salamo 83:18) Noa ˈtu ta ratou mau tutavaraa haavare ore, eita e noaa i te taata ia faaore i te haavîraa uˈana. Te faaara maira te taata papai bibilia faauruahia no nia i to tatou tau, te “anotau hopea,” e te na ô ra e: “Te mau taata iino e te feia haavare ra, e tupu â to ratou ino e e rahi atu, i te haavare-noa-raa ˈtu, e te haavareraahia mai.” (Timoteo 2, 3:1, 13) Ia au i teie manaˈo, e ere i te mea papu e e manuïa te taata i te aro i te ino. I te tahi aˈe pae, e nehenehe tatou e tiaturi ia Iehova o te faaore roa i te haavîraa uˈana e a muri noa ˈtu.—Salamo 37:1, 2, 9-11; Maseli 24:19, 20; Isaia 60:18.

Mǎtaˈu ore noa ˈtu te aroraa e piri roa maira

11. Eaha te mau taahiraa ta Iehova i rave ê na no te faaore i te haavîraa uˈana?

¹¹ I te mea e mea riri roa na te Atua o te hau te haavîraa uˈana, te taa ra ia tatou no te aha oia i rave ai i te mau taahiraa no te faaore i te tumu mau o te reira, te Diabolo ra o Satani. Oia mau, ua haapau ê na Oia ia Satani ma te haama na roto i te raatira melahi ra o Mihaela—te arii ta ˈNa i faaterono apî, te Mesia ra o Iesu. Te faataa ra te Bibilia e: ‘E tamaˈi tei nia i te raˈi: O Mihaela e ta ˈna mau melahi tamaˈi atura i te teni; e ua tamaˈi maira te teni e ta ˈna mau melahi. Aore râ i riro te re ia ratou; e aore roa ˈtura o ratou e parahiraa i nia i te raˈi. Hurihia ˈtura hoi te teni rahi i rapae, te ophi tahito ra, tei parauhia te Diabolo ra, e o Satani hoi, o tei haavare i to te ao atoa nei; i hurihia oia i rapae i nia iho i te fenua nei, e ta ˈna mau melahi ua huri-atoa-hia i rapae.’—Apokalupo 12:7-9.

12, 13. (a) Eaha te faufaaraa o te matahiti 1914? (b) Ia au i te parau tohu a Ezekiela, eaha te tupu i nia i te feia e turu i te Basileia o te Atua?

¹² Te tu ra te tuatapaparaa tau bibilia e te mau tupuraa i te ao nei no te faataa e ua tupu tera  tamaˈi i nia i te raˈi i te matahiti 1914. Mai reira mai, ua ino riirii noa ˈtu â te mau tupuraa na te ao nei. Te faataa ra te Apokalupo 12:12 no te aha, ma te na ô e: ‘E teie nei, a oaoa, e te mau raˈi ra e, e o outou atoa hoi o tei parahi i reira ra. E ati hoi to te fenua e to te tai, tei raro atu na hoi te Diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei.’

¹³ Parau mau, te riri na mua ra te Diabolo i te feia faatavaihia e haamori ra i te Atua e to ratou mau hoa o te mau “mamoe ê atu.” (Ioane 10:16; Apokalupo 12:17) Ua fatata teie riri i te hope roa ia aro uˈana te Diabolo i te feia atoa e turu e e tiaturi i te Basileia ta te Atua i haamau. Te parau ra te Ezekiela pene 38 e na “Goga i te fenua o Magoga” teie aroraa rahi.

14. Eaha te tahi mau parururaa ta te mau Ite no Iehova i fanaˈo na, e e tupu noa anei te reira?

¹⁴ I muri aˈe i to Satani tiavaruraahia mai nia mai i te raˈi, ua paruruhia te nunaa o te Atua i te tahi taime i ta Satani mau aroraa maoti te mau tutavaraa a te tahi mau tia poritita, tei faataa-taipe-hia i roto i te Apokalupo 12:15, 16. I te tahi roa ˈˈe pae, te faaite ra te Bibilia e i roto i te aroraa hopea a Satani, eita hoê aˈe faanahoraa taata e paruru i te feia e tiaturi ia Iehova. E mǎtaˈu aore ra e taiâ anei ïa te mau Kerisetiano? Eiaha roa ˈtu!

15, 16. (a) Ia au i ta Iehova parau tamahanahana i to ˈna nunaa i te tau o Iehosaphata, eaha te tumu e tapea ˈi te mau Kerisetiano i teie tau i te manaˈo maitai? (b) Eaha te hiˈoraa ta Iehosaphata e ta te nunaa i vaiiho mai no te mau tavini a te Atua i teie tau?

¹⁵ E paturu iho â te Atua i to ˈna nunaa mai ta ˈna i paturu i to ˈna nunaa matauhia i te tau o te arii Iehosaphata. Te taio nei tatou e: “A faaroo mai na, e Iuda atoa ra, e outou atoa to Ierusalema, e o oe hoi, e te arii, e Iehosaphata, te na ô maira Iehova ia outou, Eiaha outou e mǎtaˈu, eiaha e hitimaue i teie nei feia rahi; e ere i ta outou teie nei aroraa, na te Atua râ. . . . E ore outou e aro i tena na, e haamau outou, e tia noa mai, e hiˈo i te ora na Iehova e horoa mai na outou. E Iuda e Ierusalema atoa, eiaha e mǎtaˈu, eiaha e taiâ; ananahi a tii a rave ia ratou: tei ia outou hoi Iehova.”—Paraleipomeno 2, 20:15-17.

¹⁶ Ua papu i te nunaa o Iuda e eita ratou e aro. Oia atoa, ia aro o Goga no Magoga i te nunaa o te Atua, eita ratou e rave i te mau mauhaa tamaˈi no te paruru ia ratou. E ‘tia noa mai râ ratou, e e hiˈo i te ora ta Iehova’ e horoa na ratou. Parau mau, e ere no te mea e tia noa mai ratou eita ïa ratou e ohipa, aita roa ˈtu hoi te nunaa o te Atua i te tau o Iehosaphata i faaea noa ma te ohipa ore. Te taio nei tatou e: “Ua piˈo ihora te upoo o Iehosaphata i raro te mata i te repo; ua tipapa maira to Iuda e to Ierusalema atoa i raro i te repo i te aro o Iehova, e ma te haamori atoa ia ˈna. . . . E oti aˈera ta [Iehosaphata] paraparauraa i te mau taata, ua faataa ˈtura i te feia himene ia Iehova, ei haamaitai ia ˈna ma te moˈa e te maitai, a na mua ˈi ratou i taua nuu ra i te haere, a na ô ai e, E haamaitai ia Iehova, e tia hoi to ˈna aroha i te vai-maite-raa.” (Paraleipomeno 2, 20:18-21) Oia mau, i mua atoa i te aroraa a te enemi, ua haamaitai â te nunaa ia Iehova ma te itoito rahi. E hiˈoraa tera no te mau Ite no Iehova ia aro o Goga ia ratou.

17, 18. (a) Eaha te haerea itoito o te mau Ite no Iehova i teie tau no nia i te aroraa a Goga? (b) Eaha tei haamanaˈohia aˈenei i te mau Kerisetiano apî?

¹⁷ A tiai noa ˈi i te aroraa a Goga—e ia tupu atoa  te reira—e turu â te mau Ite no Iehova i te Basileia o te Atua. E ite â ratou i te puai e te parururaa i roto i te apitiraa ˈtu i na amuiraa e 94 600 tiahapa i te ao nei. (Isaia 26:20) Auê ïa taime tano no te haamaitai ia Iehova ma te itoito! Papu maitai, eita ratou e orai tia i muri no te mǎtaˈu a tiai noa ˈi i te aroraa fatata roa a Goga. E turaihia râ ratou ia faarahi i ta ratou tusia haamaitairaa i nia i te faito e maraa ia ratou.—Salamo 146:2.

¹⁸ Te ite-maitai-hia ra teie haerea itoito i nia i te mau tausani taata apî i te ao nei o tei rave i te taviniraa taime taatoa. No te faataa i te faufaaraa hau ê e maiti i tera huru oraraa, ua mahiti mai te hoê api parau (Jeunes gens—Quˈallez-vous faire de votre vie?) i te mau tairururaa mataeinaa 2002. Te mauruuru ra te mau Kerisetiano apî e te paari i tera mau haamanaˈoraa i te taime au.—Salamo 119:14, 24, 99, 119, 129, 146.

19, 20. (a) No te aha te mau Kerisetiano e ore ai e mǎtaˈu aore ra e taiâ? (b) Eaha ta te tumu parau haapiiraa i muri nei e rave?

¹⁹ Noa ˈtu te mau tupuraa i te ao nei, eita te mau Kerisetiano e mǎtaˈu aore ra e taiâ. Ua ite ratou e ua fatata te Basileia o Iehova i te faaore roa i te mau huru haavîraa uˈana atoa. Te tamahanahana-atoa-hia ra ratou i te iteraa e maoti te tia-faahou-raa, e hoˈi mai e rave rahi taata tei pohe no te haavîraa uˈana, i te ora. Maoti te tia-faahou-raa, a tahi ra ïa te tahi pae e haapii ai no nia ia Iehova, area te tahi atu, e tavini noa ïa ia ˈna.—Ohipa 24:15.

²⁰ Ei Kerisetiano mau, te taa ra ia tatou te faufaaraa ia tapea i te tiaraa amui ore Kerisetiano e ia faaoti maite i te na reira. E hinaaro tatou e tapea maite i te tiaturiraa faahiahia e ‘tia noa mai, e e hiˈo i te ora a Iehova.’ E haapuai te tumu parau i muri nei i to tatou faaroo ma te faaite mai i te mau tupuraa no teie nei tau, e haroaroa riirii atu â ˈi tatou i te tupuraa o te parau tohu bibilia.

[Nota i raro i te api]

E nehenehe anei outou e faataa?

• No te aha te taata e rave rahi i teie mahana e taiâ roa ˈi?

• No te aha te mau Ite no Iehova e tapea ˈi i te manaˈo maitai no nia i te tau no a muri aˈe?

• Eaha ta Iehova i rave ê na no nia i te tumu o te haavîraa uˈana atoa?

• No te aha tatou e ore ai e mǎtaˈu i te aroraa a Goga?

[Uiraa haapiiraa]

[Hohoˈa i te api 23]

Ua horoa mai o Iesu i te hiˈoraa maitai o te tiaraa amui ore Kerisetiano

[Hohoˈa i te api 26]

Tau tausani Ite apî tei rave i te taviniraa taime taatoa ma te oaoa

[Faaiteraa i te fatu o te hohoˈa i te api 22]

UN PHOTO 186226/M. Grafman