‘E aroha te Atua’
‘E aroha te Atua’
“O tei ore i aroha ra, aore ïa i ite i te Atua; e aroha hoi te Atua.”—IOANE 1, 4:8.
1-3. (a) Eaha ta te Bibilia e parau ra no nia i te aroha o Iehova, e no te aha e parau otahi tera? (b) No te aha te Bibilia e parau ai e ‘E aroha te Atua’?
E MEA maitai roa, e mea tia roa, e mea anaanatae te mau ateriputi atoa o Iehova. O te aroha râ te mea au roa ˈˈe. Aita ˈtu mea o te faatae ia tatou ia Iehova ra ma te puai mai tera, maori râ to ˈna aroha. Auaa, o te aroha atoa to ˈna huru maitai rahi roa ˈˈe. Mea nafea to tatou iteraa?
2 Te parau ra te Bibilia i te hoê mea no nia i te aroha aita e parauhia nei no nia i te tahi atu mau ateriputi rarahi o Iehova. Eita te mau Papai e parau e e puai aore ra e parau-tia aore ra e paari te Atua. Te vai ra to ˈna tera mau huru maitatai e o ˈna te tumu rahi o te reira. No nia râ i te aroha, e parau hohonu aˈe tei faahitihia i roto i te Ioane 1, 4:8: ‘E aroha te Atua.’ Oia, e mea hohonu roa te aroha o Iehova. Tera to ˈna huru mau aore ra natura mau. I te rahiraa o te taime, ia na ô tatou i te feruri: maoti te puai o Iehova e ohipa ˈi oia. E aratai ta ˈna parau-tia e to ˈna paari i te huru e ohipa ˈi oia. Na te aroha râ e turai ia ˈna ia ohipa. E te vai noa ra to ˈna aroha ia faaohipa oia i te tahi atu mau ateriputi to ˈna.
3 E parau-pinepine-hia e o Iehova iho te aroha. No reira, ia hinaaro tatou e haapii no nia i te aroha, e mea titauhia ia haapii tatou no nia ia Iehova. E hiˈopoa mai tatou i te tahi o te mau tuhaa o te aroha faaau ore o Iehova.
Te ohipa aroha rahi roa ˈˈe
4, 5. (a) Eaha te ohipa aroha rahi roa ˈˈe i roto i te tuatapaparaa atoa? (b) No te aha tatou e parau ai e ua tahoêhia te Atua ra o Iehova e ta ˈna Tamaiti e te taairaa here puai roa ˈˈe i haamauhia aˈenei?
4 Ua rau ta Iehova faaiteraa i te aroha, hoê râ o te hau ê i te taatoaraa. Eaha ïa? To ˈna ïa tonoraa mai i ta ˈna Tamaiti ia mauiui e ia pohe no tatou. E tano ia parau e teie te ohipa aroha rahi roa ˈˈe i roto i te tuatapaparaa atoa. No te aha?
5 Te parau ra te Bibilia ia Iesu “[te matahiapo o] te mau mea atoa i hamanihia.” (Kolosa 1:15; MN) A feruri noa na—te vai ê na ra te Tamaiti a Iehova hou te ao materia. Mai te aha ïa te maoro to te Metua e te Tamaiti atiraa? Te manaˈo ra te tahi mau aivanaa e 13 miria matahiti to te ao nui. Noa ˈtu râ e mea tano teie manaˈo, eita tera roaraa e navai no te faahohoˈa i te oraraa o te Tamaiti fanau tahi a Iehova! Eaha ta ˈna ohipa i tera roaraa? Ma te oaoa, ua tavini te Tamaiti ei “rave ohipa aravihi” na to ˈna Metua. (Maseli 8:30, MN; Ioane 1:3) Ua ohipa amui o Iehova e ta ˈna Tamaiti no te hamani i te tahi atu mau mea atoa. Auê ïa taime reˈareˈa e te oaoa ta raua i fanaˈo e! O vai ïa i roto ia tatou o te nehenehe e haroaroa i te mana o te hoê taairaa i vai na i te roaraa o te hoê tau roa mau? Papu maitai, ua tahoêhia te Atua ra o Iehova e ta ˈna Tamaiti e te taairaa here puai roa ˈˈe i haamauhia aˈenei.
6. I to Iesu bapetizoraahia, mea nafea to Iehova faaiteraa i to ˈna manaˈo no nia i ta ˈNa Tamaiti?
6 Noa ˈtu râ, ua tono o Iehova i ta ˈna Tamaiti i te fenua nei ia fanauhia ei tamarii a te taata. I te na reiraraa, ua ere ïa Iehova i te taairaa piri e ta ˈna Tamaiti here i nia i te raˈi tau ahuru matahiti i te maoro. Ma te anaanatae rahi, ua hiˈo mai Oia mai te raˈi mai a paari mai ai Iesu e a riro mai ai ei taata tia roa. I te 30raa o to ˈna matahiti, ua bapetizohia Iesu. I taua taime ra, ua parau roa mai te Metua iho mai te raˈi mai e: “Tau Tamaiti here teie, ua mauruuru roa vau ia ˈna.” (Mataio 3:17) Eaha râ to ˈna Metua i te oaoa e ua haapao maite o Iesu i te mau mea atoa i tohuhia, i te mau mea atoa i anihia ˈtu ia ˈna!—Ioane 5:36; 17:4.
7, 8. (a) Eaha ta Iesu i faaruru i te 14 no Nisana 33 T.T., e eaha te huru o to ˈna Metua i te raˈi? (b) No te aha o Iehova i vaiiho ai ia mauiui e ia pohe ta ˈna Tamaiti?
7 Eaha râ to Iehova huru i te 14 no Nisana 33 T.T., i to Iesu haavareraahia e tapearaahia e te hoê nahoa taata? I to Iesu faaoooraahia, tufaraahia i te huare, e motoraahia? I to ˈna pǎpǎiraahia, i te hitoretoreraa to ˈna tua? I to ˈna patǐtǐraahia i te naero, i nia i te rima e te avae, i nia i te hoê pou raau e to ˈna rîraahia i reira a tuhi ai te taata ia ˈna? Eaha te huru o te Metua i to ta ˈna Tamaiti here tuôraa ˈtu ia ˈna i roto i te mau mauiui o te pohe? Eaha to Iehova huru i to Iesu hutiraa i to ˈna aho hopea, e a tahi ra hoi mai te haamataraa o te poieteraa atoa, ta ˈNa Tamaiti here a ore ai e vai faahou?—Mataio 26:14-16, 46, 47, 56, 59, 67; 27:26, 38-44, 46; Ioane 19:1.
8 I te mea e e huru aau to Iehova, eita e navai te puai o te mau parau no te faataa i te mauiui ta ˈna i faaoromai i te poheraa ta ˈna Tamaiti. Te mea e nehenehe e faataahia, o tei turai ïa ia Iehova ia faatia i te reira. No te aha te Metua i vaiiho ai ia roohia oia i taua mauiui ra? Te faaite maira o Iehova i te hoê mea faahiahia i roto i te Ioane 3:16—te hoê irava bibilia faufaa roa i parauhia ˈi te Evanelia i haapotohia. Te na ô ra e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” Tera ïa tei turai ia Iehova: te aroha. Tera te aroha rahi roa ˈˈe i faaitehia aˈenei.
E nafea o Iehova e haapapu mai ai i to ˈna aroha
9. Eaha ta Satani e hinaaro ia tiaturi tatou no nia i to Iehova manaˈo ia tatou, eaha râ ta Iehova e haapapu maira?
9 Te hiti maira râ te hoê uiraa faufaa: E aroha anei te Atua ia tatou iho? Te farii ra te tahi pae e e aroha te Atua i te huitaata ei taatoaraa, mai ta te Ioane 3:16 e parau ra. Te manaˈo mau ra râ ratou e, ‘Eita roa ˈtu te Atua e aroha mai ia ˈu iho.’ Te hinaaro roa ra te Diabolo ra o Satani ia tiaturi tatou e eita o Iehova e aroha ia tatou, eita atoa e haafaufaa ia tatou. I te tahi aˈe pae, noa ˈtu e e manaˈo tatou e eita tatou e herehia aore ra e mea faufaa ore tatou, te haapapu maira o Iehova e e haafaufaa oia i ta ˈna tavini haapao maitai taitahi.
10, 11. E nafea ta Iesu faahohoˈaraa o te mau manu iti e faaite ai e mea faufaa tatou i ta Iehova hiˈoraa?
10 A hiˈo na i ta Iesu i parau i roto i te Mataio 10:29-31. Ma te faahohoˈa i te faufaaraa o ta ˈna mau pǐpǐ, ua parau o Iesu e: “E ere anei taipiti manu rii ia hoo i te moni veo hoê nei? e ore râ te hoê o taua na manu rii ra e moe i to outou Metua ia mairi i raro i te repo. Eiaha ˈtu â ïa, ua hope atoa ra te rouru o to outou upoo na i te taiohia. Eiaha maori outou e mǎtaˈu, e maitai rahi hoi to outou i to te manu e ia rahi noa ˈtu.” E hiˈo anaˈe eaha te auraa o taua mau parau ra no te feia e faaroo ra ia Iesu i te senekele matamua.
11 I te tau o Iesu, o te manu iti te mea mâmâ roa ˈˈe e hoohia ei maa. E noaa mai e piti manu rii i te moni veo hoê aita rea e faufaa. I muri aˈe râ, ia au i te Luka 12:6, 7, ua parau Iesu e ia horoa te hoê taata e piti moni veo, e noaa ta ˈna, eiaha e maha manu rii, e pae râ. E tahinuhia te manu iti mai te huru ra e aita roa ˈtu to ˈna e faufaa. Peneiaˈe aita e faufaa to taua mau manu ra i te hiˈoraa a te taata, eaha râ te manaˈo o te Atua Poiete? Ua parau Iesu e: “Aita te hoê i taua na manu ra [tae noa ˈtu tei tahinuhia] i moe i te Atua.” I teie nei, te taa ra paha ia tatou te manaˈo o Iesu. Mai te peu e e haafaufaa Iehova i te hoê noa manu iti mai tera, eaha ˈtu â ïa te taata i te faufaa! Mai ta Iesu i parau, ua ite Iehova i te mau mea atoa no nia ia tatou. Inaha hoi, ua taio-roa-hia e ana te rouru iho o to tatou upoo!
12. No te aha tatou e papu ai e aita o Iesu e faarahi ra i to ˈna parauraa e ua taiohia te rouru o to tatou upoo?
12 E manaˈo paha te tahi pae e te faarahi ra o Iesu i ǒ nei. A feruri noa na râ i te tia-faahou-raa. Eaha râ o Iehova i te matau maitai ia tatou no te poiete faahou ia tatou! No te mea e haafaufaa rahi oia ia tatou, e haamanaˈo roa oia i te mau tuhaa atoa, tae noa ˈtu to tatou tapura tapao tupuna e te mau mehararaa e te mau ite ta tatou i haapue i te roaraa o te mau matahiti. E ohipa ohie roa ïa te taioraa i to tatou rouru—fatata 100 000 te tupu i nia i te hoê upoo au noa—ia faaauhia ˈtu. Te haapapu roa maira ta Iesu mau parau e e aupuru o Iehova ia tatou iho!
13. E nafea te hiˈoraa o te arii Iehosaphata e faaite ai e e imi o Iehova i te maitai i roto ia tatou noa ˈtu e mea tia ore tatou?
13 Te faaite maira te Bibilia i te tahi atu mea o te haapapu ra i to Iehova aroha. E imi e e haafaufaa o Iehova i te maitai i roto ia tatou. A hiˈo na i te arii maitai ra o Iehosaphata. I to te arii raveraa i te hoê ohipa maamaa, ua parau te peropheta a Iehova ia ˈna e: “I au ai te riri o Iehova ia oe i te reira.” Auê ïa manaˈo haaferuri e! Aita râ te poroi a Iehova i faaea i reira. Ua na ô â e: “Te vai ra râ te parau maitai i roto ia oe.” (Paraleipomeno 2, 19:1-3) Aita ïa te riri tia o Iehova i haapo i to ˈna mata i “te parau maitai” i roto ia Iehosaphata. E ere anei i te mea mahanahana ia ite e e imi te Atua i te maitai i roto ia tatou noa ˈtu e mea tia ore tatou?
Te hoê Atua i “ineine i te faaore i te hara”
14. Ia hara tatou, eaha te mau huru aau teimaha e tupu i roto ia tatou, e nafea râ tatou e fanaˈo ai i ta Iehova faaoreraa hara?
14 Ia hara tatou, e turai paha te inoino, te haama, e te aau hapa ia tatou ia manaˈo e eita roa ˈtu e au ia tatou ia tavini ia Iehova. E haamanaˈo râ tatou e ua ‘ineine o Iehova i te faaore i te hara.’ (Salamo 86:5, MN) Oia, ia tatarahapa tatou i ta tatou mau hara e ia tutava puai i te ore e tapiti faahou, e fanaˈo ïa tatou i ta Iehova faaoreraa hara. E hiˈo mai tatou e nafea te Bibilia e faataa ˈi i teie tuhaa faahiahia o to Iehova aroha.
15. Mai te aha te atea ia tatou e tuu ai o Iehova i ta tatou mau hara?
15 Ua faaohipa te papai salamo ra o Davida i te hoê hohoˈa oraora no te faataa i ta Iehova faaoreraa hara: “Mai te hitia o te râ e taa ê i te tooa o te râ ra, o ta ˈna ia faataa-ê-raa i ta tatou mau hara ia tatou nei.” (Na matou e haapapu nei; Salamo 103:12) Mai te aha te atea te hitia o te râ i te tooa o te râ? E nehenehe e parau e tei te vahi atea roa ˈˈe ïa e nehenehe e ferurihia; eita roa ˈtu na vahi toopiti e farerei. Ia au i te hoê aivanaa, teie te auraa o tera parau, “i te vahi atea roa ˈˈe ta tatou e nehenehe e feruri.” Te faaite maira te mau parau faauruahia a Davida e ia faaore Iehova i ta tatou mau hara, e tuu oia i te reira i te vahi atea roa ˈˈe ia tatou o te nehenehe e ferurihia.
16. Ia faaore o Iehova i ta tatou mau hara, no te aha tatou e papu ai e e hiˈo oia ia tatou ei mea mâ i muri iho?
16 Ua tamata ê na anei outou i te faaore i te hoê tafetafeta i nia i te hoê ahu mea maramarama te û? Peneiaˈe e noa ˈtu ta outou mau tutavaraa maitai roa ˈˈe, te ite-noa-hia râ te tafetafeta. A tapao na e nafea Iehova e faataa ˈi i to ˈna tiaraa i te faaore i te hara: “Ia uteute roa ta outou mau hara [mai te écarlate] ra, e riro ïa mai te hiona; e ia uraura noa ˈtu mai te faaio ra, e riro ïa mai te vavai ra i te teatea.” (Isaia 1:18; MN) Te faataa ra te taˈo ra “écarlate” i te hoê uteute pura maitai. * Te “faaio,” o te hoê ïa o te mau û paˈo o te mau ahu penihia. Eita roa ˈtu e matara ia tatou iho te tafetafeta o te hara. E nehenehe râ ta Iehova e rave i te mau hara e au i te écarlate e te faaio e e faauouo atu mai te hiona aore ra te vavai aita i ûhia. No reira, ia faaore Iehova i ta tatou mau hara, eiaha tatou e manaˈo e te vai noa ra te tafetafeta o taua mau hara ra i nia ia tatou no te toea o to tatou oraraa.
17. Eaha te auraa e e faarue o Iehova i ta tatou mau hara i muri mai i to ˈna tua?
17 I roto i te hoê himene haamauruururaa putapû ta Hezekia i fatu i muri aˈe i to ˈna faaoraraahia i te hoê maˈi pohe, ua parau oia ia Iehova e: “Ua faarue oe i tau mau hara atoa nei i muri mai i to tua ra.” (Isaia 38:17) Te faataahia ra Iehova i ǒ nei e te rave ra i te mau hara a te hoê taata rave hara e tatarahapa ra e te faarue atura i muri mai ia ˈNa i te vahi eita Oia e ite atu, eita atoa e haapao faahou atu. Ia au i te hoê buka, e nehenehe e na ôhia taua manaˈo ra e: “Ua faariro oe i [ta ˈu mau hara] mai te huru ra e aita i tupu.” E ere anei tera i te mea tamahanahana?
18. E nafea te peropheta Mika e faaite ai e ia faaore o Iehova i te hara, e tatara ê roa Oia i te reira?
18 I roto i te hoê parau fafau no nia i te faaapîraa, ua faaite te peropheta Mika i to ˈna tiaturi papu e e faaore o Iehova i te hara a to ˈna nunaa e tatarahapa ra: “O vai ïa Atua e au ia oe ra, i te . . . faarueraa ˈtu i te hapa a te toea o to ˈna kelero? . . . E faarue paatoa oe i ta ratou hara i raro roa i te moana ra.” (Mika 7:18, 19) A feruri na i te auraa o taua mau parau ra no te feia e ora ra i te tau bibilia. Te vai ra anei te hoê noa ˈˈe ravea e noaa faahou mai ai te hoê mea i tauehia “i raro roa i te moana”? Te faaite ra ïa te mau parau a Mika e ia faaore Iehova i te hara, e tatara ê roa oia i te reira.
“Te aumihi î i te here o to tatou Atua”
19, 20. (a) Eaha te auraa o te ihoparau Hebera tei hurihia ei “faaite i te aroha hamani maitai” aore ra ei “aroha”? (b) E nafea te Bibilia e faaohipa ˈi i te mau huru aau o te hoê mama no to ˈna aiû no te haapii mai i to Iehova aumihi?
19 O te aumihi te tahi atu tuhaa o to Iehova aroha. Eaha te aumihi? I roto i te Bibilia, te vai ra te hoê taairaa piri i rotopu i te aumihi e te aroha hamani maitai. Te vai ra te manaˈo o te aumihi i roto i te tahi mau taˈo Hebera e Heleni. Ei hiˈoraa, e huri-pinepine-hia te ihoparau Hebera ra ra·chamʹ ei “faaite i te aroha hamani maitai” aore ra ei “aroha.” Ua taaihia teie taˈo Hebera, ta Iehova hoi e faaau ia ˈna iho, i te taˈo i hurihia ei “aau” e e nehenehe e faataahia mai “te aumihi o te metua vahine.”
20 Te faaohipa ra te Bibilia i te mau huru aau o te hoê metua vahine no to ˈna aiû no te haapii mai i to Iehova aumihi. Te na ô ra te Isaia 49:15 e: “E moe anei i te hoê vahine to ˈna aiû, e aita ˈtura e ite i te aumihi [ra·chamʹ] i te tamaiti no to ˈna opu? Oia, e moe â ia ratou, eita râ oe e moe ia ˈu.” (The Amplified Bible) E mea fifi ia feruri e e haamoe te hoê metua vahine i te faatamaa e te aupuru i to ˈna aiû. Inaha hoi, e mea paruru ore te hoê tamarii rii; i te po e te ao, e hinaaro oia ia haapao mai e ia here mai to ˈna mama ia ˈna. Ma te peapea râ hoi, te faaroohia ra te parau o te tahi mau metua vahine haapao ore, i teie iho â râ ‘anotau ati rahi.’ (Timoteo 2, 3:1, 3) “Eita râ oe e moe ia ˈu,” o ta Iehova ïa e parau ra. E mea puai roa ˈˈe te aumihi î i te here o Iehova i ta ˈna mau tavini i te huru aau natura î roa ˈˈe i te here ta tatou e nehenehe e feruri—te aumihi iho â o te hoê mama i to ˈna tamarii rii.
21, 22. Eaha ta te mau Iseraela i faaruru i Aiphiti i tahito ra, e ua aha o Iehova i to ratou mau auê?
21 E nafea o Iehova, mai te hoê metua î i te here, e faaite ai i te aumihi? E ite-maitai-hia teie huru maitai i to ˈna haaraa i nia i te nunaa Iseraela. I te pae hopea o te senekele 16 H.T.T., te faatîtîhia ra te mau mirioni Iseraela i Aiphiti i tahito ra, e te hamani-ino-roa-hia ra ratou. (Exodo 1:11, 14) I roto i to ratou ahoaho, ua tiaoro te mau Iseraela ia Iehova. Ua nafea te Atua aumihi?
22 Ua putapû te aau o Iehova. Ua na ô oia e: “Ua hiˈo papu vau i te pohe o to ˈu ra mau taata i Aiphiti, e ua faaroo vau i to ratou auê . . . Ua ite hoi au i to ratou oto.” (Exodo 3:7) Aita i tia ia Iehova ia hiˈo i te mau mauiui o to ˈna nunaa aore ra ia faaroo i to ratou mau auê ma te ore e aroha ˈtu. E Atua aumauiui o Iehova. E te aumauiui—te mauiuiraa e o vetahi ê atoa—ua taai-piri-hia ïa i te aumihi. Aita râ Iehova i aroha noa i to ˈna nunaa; ua turaihia oia ia haa no ratou. Te na ô ra te Isaia 63:9 e: “No to ˈna aroha e to ˈna hamani maitai i faaora ˈi oia ia ratou.” Ma “te rima puai,” ua faaora oia i te mau Iseraela mai Aiphiti mai. (Deuteronomi 4:34) I muri iho, ua horoa semeio atu oia i te maa e ua aratai atu i te hoê fenua hotu maitai no ratou iho.
23. (a) E nafea te mau parau a te papai salamo e haapapu mai ai e te tapitapi roa ra o Iehova ia tatou taitahi? (b) E nafea o Iehova e tauturu ai ia tatou?
23 Eita o Iehova e faaite i te aumihi i nia i to ˈna nunaa ei pǔpǔ noa. Te tapitapi roa ra to tatou Atua î i te here ia tatou taitahi. E nehenehe e papu ia tatou e te ite maite ra oia i te mauiui atoa ta tatou e faaoromai ra. Ua na ô te papai salamo e: “Tei te feia parau-tia ra to Iehova mata; e tei ta ratou pure to ˈna tariˈa. Te fatata nei Iehova i te feia aau paruparu ra; e te faaora nei oia i te taata aau taiâ.” (Salamo 34:15, 18) E nafea Iehova e tauturu mai ai ia tatou taitahi? Eita paha oia e faaore i te tumu o to tatou mauiui. E mea rahi râ te mau faanahoraa ta ˈna i rave no te feia e tiaoro ra ia ˈna ia tauturu mai. Te pûpû maira ta ˈna Parau i te aˈoraa maitai roa e au ia faaohipahia. I roto i te amuiraa, ua horoa Iehova i te mau tiaau aravihi i te pae varua, o te tutava i te pee i to ˈna aumihi ia tauturu ratou ia vetahi ê. (Iakobo 5:14, 15) O oia hoi “tei faaroo i te pure,” e horoa ïa o Iehova i ‘te [varua moˈa] i te feia e ani atura ia ˈna.’ (Salamo 65:2; Luka 11:13; MN) E faaiteraa tera mau faanahoraa atoa i “te aumihi î i te here o to tatou Atua.”—Luka 1:78, MN.
24. E nafea tatou i mua i to Iehova aroha?
24 E ere anei i te mea reˈareˈa ia feruriruri i te aroha o to tatou Metua i te raˈi? I roto i to na mua ˈtu tumu parau, ua haamanaˈohia tatou e ua faaite o Iehova i to ˈna mana, ta ˈna parau-tia, to ˈna paari ma te here no to tatou maitai. E i roto i teie tumu parau, ua ite mai tatou e ua faaite roa o Iehova i to ˈna aroha i te huitaata—e ia tatou taitahi—ma te faahiahia mau. I teie nei, e mea maitai ia ui tatou taitahi, ‘E nafea vau i mua i to Iehova aroha?’ Ia here ïa tatou ia ˈna ma to tatou aau atoa, to tatou feruriraa atoa, to tatou nephe atoa, e to tatou puai atoa. (Mareko 12:29, 30) Ia faaite to tatou oraraa i te mau mahana atoa i to tatou hinaaro haavare ore e haafatata ˈtu â ia Iehova. E ia haafatata ˈtu â o Iehova, te Atua aroha, ia outou—e a muri noa ˈtu!—Iakobo 4:8.
[Nota i raro i te api]
^ par. 16 Te na ô ra te hoê aivanaa e “e û taraire, aore ra mau roa” te écarlate. “Eita te reira e ore i te hupe, te ûa, te puˈaraa, te faaohipa-maoro-raa.”
Te haamanaˈo ra anei outou?
• Mea nafea to tatou iteraa e o te aroha to Iehova huru maitai rahi roa ˈˈe?
• No te aha e parauhia ˈi e o to Iehova tonoraa mai i ta ˈna Tamaiti ia mauiui e ia pohe no tatou te ohipa aroha rahi roa ˈˈe?
• E nafea o Iehova e haapapu mai ai e e aroha oia ia tatou taitahi?
• E nafea te Bibilia e faataa oraora ˈi i ta Iehova faaoreraa hara?
[Uiraa haapiiraa]
[Hohoˈa i te api 23]
‘Ua horoa mai te Atua i ta ˈna Tamaiti fanau tahi’
[Hohoˈa i te api 24]
“E maitai rahi hoi to outou i to te manu e ia rahi noa ˈtu”
[Faaiteraa i te tumu]
© J. Heidecker/VIREO
[Hohoˈa i te api 26]
E haapii mai te mau huru aau o te hoê mama no to ˈna aiû i to Iehova aumihi