E nafea ia faahotu i te here mau

“E raau no te ora te here; e ora te here.”—Living to Purpose, a Joseph Johnson, 1871.

E NAFEA te hoê taata e haapii ai i te here? Ma te haapii i te ihi feruriraa? Ma te taio i te mau buka aratai? Ma te mataitai i te mau hohoˈa herehere? Eita ïa. E haapii te taata i te here na mua maoti te hiˈoraa e te haamataroraa a to ratou mau metua. E haapii te mau tamarii i te auraa o te here mai te peu e, i roto i te hoê tupuraa o te here mahanahana, e ite ratou e te faatamaa ra e te paruru ra to ratou mau metua ia ratou, te paraparau ra ia ratou, e te tâuˈa mau ra ia ratou. E haapii atoa ratou i te here ia haapii to ratou mau metua ia ratou ia haapao i te mau faaueraa tumu papu o te maitai e te ino.

E hau atu te here mau i te hoê noa huru aau. E ohipa tamau oia ia maitai roa vetahi ê, noa ˈtu e eita ratou e haafaufaa roa ˈtu i taua taime ra, e pinepine tera te tupuraa o te mau tamarii ia aˈohia ratou ma te here. Te hoê hiˈoraa tia roa ˈˈe o te faaite i te here pipiri ore, o te Atua Poiete iho ïa. Ua papai te aposetolo Paulo e: “E tau tamaiti, eiaha oe e faafaufaa ore i te aˈo a te Fatu nei, eiaha hoi ia pau te aho ia faahapahia mai oe e ana ra: o ta te Fatu e here ra, o ta ˈna ïa e aˈo mai.”—Hebera 12:5, 6.

E te mau metua e, e nafea outou e pee ai ia Iehova ia faaite outou i te here i to outou utuafare? E mai te aha te faufaa te hiˈoraa ta outou e horoa ra i roto i to outou taairaa te tahi i te tahi ei tane e ei vahine faaipoipo?

A haapii i te here maoti te hiˈoraa

Mai te peu e e tane outou, te haafaufaa ra anei outou i ta outou vahine e te faatura ra anei outou ia ˈna? Mai te peu e e vahine outou, te here ra e te turu ra anei outou i ta outou tane? Te parau ra te Bibilia e ia here e ia faatura te tane e te vahine te tahi i te tahi e tia ˈi. (Ephesia 5:28; Tito 2:4) Ia na reira ratou, e ite roa ˈtu ta ratou mau tamarii i te here Kerisetiano o te ohipa ra. E riro mau te reira ei haapiiraa puai e te faufaa!

E paturu atoa te mau metua i te here i te fare ia pee ratou i te mau ture aveia teitei no te utuafare no nia i te mau mea mai te faaanaanataeraa, te morare, e te mau fa e te mau mea faufaa roa ˈˈe. I te ao atoa nei, te ite ra te taata e e tauturu rahi te Bibilia na roto i te horoaraa i te mau ture aveia no te utuafare, a haapapu ai e “e mea faaurua” iho â te Bibilia “e te Atua e e mea faufaa ei haapiiraa, ei faahaparaa, ei faatitiaifaroraa i te mau mea, ei aˈoraa ma te parau-tia ra.” (Timoteo 2, 3:16, MN) Ua hiˈo-mau-hia te mau haapiiraa e te aratairaa i te pae morare no te oraraa i roto noa i te Aˈoraa i nia i te mouˈa ei mea faaauraa ore.—Mataio, te mau pene 5 e tae atu i te 7.

Ia imi te utuafare taatoa i te aratairaa a te Atua e ia pee i ta ˈna mau ture aveia, e ite te taata taitahi i te panaˈonaˈo ore rahi aˈe e e rahi atu â ta ratou mau tamarii i te here e te faatura i to ratou mau  metua. I te tahi aˈe pae, i roto i te hoê utuafare ma te ture aveia e piti huru, e mea tano ore, aore ra e mea paruparu, e inoino, e riri e e patoi paha te mau tamarii.—Roma 2:21; Kolosa 3:21.

E te mau metua taa noa ïa? E mea fifi mau anei no ratou ia haapii i te here i ta ratou mau tamarii? Eita. Noa ˈtu e aita hoê aˈe mea e mono i te hoê metua vahine e te hoê metua tane maitai o te haa amui, te faaite ra te tupuraa e e nehenehe te huru maitai o te mau taairaa o te utuafare e mono i nia i te tahi faito i te hoê metua e ere ra. Mai te peu e e metua taa noa outou, a tutava i te faaohipa i te mau faaueraa tumu bibilia i to outou utuafare. Oia, te na ô maira te hoê maseli e: “E tiaturi ia Iehova ma to aau atoa ra; eiaha râ e tiaturi i to oe ihora haapao. Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea”—tae noa ˈtu te haerea o te metua.—Maseli 3:5, 6; Iakobo 1:5.

Ua paari e rave rahi feia apî maitatai i roto i te hoê utuafare hoê anaˈe metua e te tavini ra ratou i teie nei i te Atua ma te haapao maitai i roto i te mau tausani amuiraa Kerisetiano a te mau Ite no Iehova i te ao nei. E haapapuraa te reira e e nehenehe atoa te mau metua taa noa e haapii ma te manuïa i ta ratou mau tamarii no nia i te here.

E nafea te taatoaraa e nehenehe ai e faahotu i te here

Ua tohu te Bibilia e e tapaohia ‘te anotau hopea’ e te hoê ereraa i te “aroha,” oia hoi, te hoê ereraa i te auhoaraa piri roa natura ta te mau melo utuafare e faaite iho â te tahi i te tahi. (Timoteo 2, 3:1, 3) Tera râ, e nehenehe te feia atoa o tei paari i roto i te hoê tupuraa aita e aroha e haapii i te faahotu i te here. E nafea? Maoti te haapiiraa a Iehova, te Tumu mau o te here e o te faaite i te here e te aroha i te taata atoa o te fariu ia ˈna ra ma te aau atoa. (Ioane 1, 4:7, 8) “Faarue noâ tau metua tane e tau metua vahine ia ˈu, ei reira Iehova e rave mai ai ia ˈu,” ta te hoê fatu salamo ïa i parau.—Salamo 27:10.

Te faaite ra Iehova i to ˈna here ia tatou na roto i te mau ravea rau. I roto i te reira, te vai ra te aratairaa e au i ta te metua tane maoti te Bibilia, te tauturu a te varua moˈa, e te turu mahanahana a te fetii taeae Kerisetiano. (Salamo 119:97-105; Luka 11:13; Hebera 10:24, 25) E hiˈopoa anaˈe e nafea teie na ravea e toru e nehenehe ai e tauturu ia outou ia tupu i roto i te here i te Atua e i te taata-tupu.

Te aratairaa faauruahia e au i ta te metua tane

No te faahotu i te hoê taairaa mahanahana e te tahi taata, e mea titauhia ia ite maitai tatou i taua taata ra. Ma te faaite o vai oia na roto i te mau api o te Bibilia, te titau manihini maira Iehova ia haafatata ˈtu ia ˈna. Eita râ te taioraa i te Bibilia e navai. E mea titauhia ia faaohipa tatou i to ˈna mau haapiiraa e ia fanaˈo i te mau maitai e noaa mai. (Salamo 19:7-10) “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra,” ta te Isaia 48:17 ïa e parau ra. Oia, te haapii maira Iehova, te hohoˈa iho o te here, no to tatou maitai—eiaha râ no te mea te hinaaro ra oia e taotia i to tatou tiamâraa ma te mau ture e faatureraa faufaa ore.

E tauturu atoa te hoê ite mau i te Bibilia ia tatou ia tupu i roto i te here i to tatou taata-tupu. No te mea ïa te haapii maira te Bibilia i ta te Atua huru hiˈoraa i te taata e te faaite maira i te mau faaueraa tumu o te aratai i ta tatou mau haaraa i nia te tahi i te tahi. Ma teie haamaramaramaraa, e niu papu ta tatou no te faahotu i te here i te taata-tupu. Ua parau te aposetolo Paulo e: “E te pure nei au ia tupu maite â to outou hinaaro e ia rahi atu â ma te ite [mau] e te haroaroa o te aau ra.”—Philipi 1:9; MN.

No te faataa e nafea te here e arataihia ˈi ma te  tano e “te ite mau,” e hiˈopoa anaˈe i te parau mau faufaa roa i faahitihia i roto i te Ohipa 10:34, 35: “E ore te Atua e haapao i te huru o te taata. O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.” Mai te peu e e hiˈo te Atua i te taata na roto i ta ratou mau ohipa parau-tia e te mǎtaˈu paieti, eiaha to ratou tiaraa basileia aore ra to ratou iri, eiaha anei tatou e hiˈo i to tatou taata-tupu ma te hoê â huru pae tahi ore?—Ohipa 17:26, 27; Ioane 1, 4:7-11, 20, 21.

Te here—te hoê hotu a te varua o te Atua

Mai te ûa o te mairi mai i te taime tano i nia i te hoê faaapu e faahotu maitai atu ai i te maa, e faahotu te varua o te Atua i roto i te mau taata aau farii i te mau huru maitatai ta te Bibilia e faataa ra mai ‘ta te varua e faatupu.’ (Galatia 5:22, 23) Te mea matamua roa i roto i teie mau hotu, o te here ïa. (Korinetia 1, 13:13) E nafea râ tatou e fanaˈo ai i te varua o te Atua? Te hoê ravea faufaa roa, e mea na roto ïa i te pure. Mai te peu e e pure tatou no te ani i te varua o te Atua, e horoa mai oia i te reira. (Luka 11:9-13) Te tamau ra anei outou i te pure no te ani i te varua moˈa? Mai te peu e e, ia ite-maitai-roa-hia ˈtu ïa ta ˈna mau hotu faufaa roa, tae noa ˈtu te here, i roto i to outou oraraa e tia ˈi.

Te vai ra râ te tahi atu huru varua e patoi ra i te varua o te Atua. Te parau ra te Bibilia i te reira ‘te varua o teie nei ao.’ (Korinetia 1, 2:12; Ephesia 2:2) E mana ino te reira, e to ˈna tumu aita ˈtu ïa maori râ o Satani te Diabolo, “te arii o teie nei ao” o te huitaata i atea ê i te Atua. (Ioane 12:31) Mai te mataˈi e haapee ra i te repo e te pehu, e faatupu ‘te varua o teie nei ao’ i te mau hinaaro tia ore o te faaore i te here e o te haamâha i te mau paruparu o te tino.—Galatia 5:19-21.

E pee te taata i taua varua ino ra ia tuu ratou ia ratou iho i mua i te nounou taoˈa, te feruriraa o vau na mua, te mau haerea haavî, i te manaˈo hape e tei haapiˈo-pinepine-hia o te here o tei matau-roa-hia i roto i teie nei ao. Mai te peu e e hinaaro outou e tupu i roto i te here mau, e mea titauhia ia patoi etaeta outou i te varua o teie nei ao. (Iakobo 4:7) Eiaha râ e tiaturi i to outou iho puai; a tiaoro atu ia Iehova no te ani i te tauturu. E haapuai to ˈna varua—te mana puai roa ˈˈe i te ao taatoa—ia outou e e haamanuïa ia outou.—Salamo 121:2.

A haapii i te here na roto i te fetii taeae Kerisetiano

Mai te mau tamarii e haapii i te faaite i te here ma te fanaˈo i te reira i roto i te utuafare, e tupu tatou paatoa—te feia apî e te feia paari—i roto i te here ma te amui i te tahi atu mau Kerisetiano. (Ioane 13:34, 35) Oia mau, hoê o te mau ohipa faufaa roa a te amuiraa Kerisetiano, o te horoaraa ïa i te hoê huru tupuraa i reira te taata e nehenehe ai ‘e faaaraara ˈtu te tahi i te tahi ia rahi te aroha e te mau ohipa maitatai ra.’—Hebera 10:24.

E mea au-taa-ê-hia teie here e te feia o tei ‘purara e tei faarue-taue-hia’ i roto i te ao aita e here o te haaati ra ia tatou. (Mataio 9:36) Ua faaite te tupuraa e e tauturu te mau taairaa î i te here i te paariiraa ia tinai i te mau faahopearaa iino e rave rahi o te tamarii-rii-raa tei ere i te here. Mea faufaa mau â ïa ia farii te mau Kerisetiano atoa i pûpûhia ma te aau tae mau i te feia i anaanatae apî mai o te haamata ra i te amuimui ia ratou!

 “E ore roa te aroha e mou”

Te parau ra te Bibilia e “e ore roa te aroha e mou.” (Korinetia 1, 13:8) E nafea te reira? Te na ô maira te aposetolo Paulo e: “E faaoromairaa roa to te aroha, e te hamani maitai; e ore te aroha e feii: e ore te aroha e faarahi, e ore hoi e faaahaaha. Eita e rave i te mea au ore, eita e imi i te maitai no ˈna iho, eita e riri vave, eita e manaˈo ino ia vetahi ê.” (Korinetia 1, 13:4, 5) Mea maramarama maitai, e ere teie aroha i te moemoeâ aore ra huru aau papaˈu. Area râ—ua ite maite e e farii te feia e faaite ra i te reira i te mau inoino e te mau mauiui o te oraraa, eita râ ratou e faatia i teie mau mea ia faaore i to ratou aroha i te taata-tupu. ‘E tatua nehenehe roa’ mau â teie aroha.—Kolosa 3:12-14.

E rave anaˈe i te hiˈoraa o te hoê potii Kerisetiano 17 matahiti i Korea. I to ˈna haamataraa i te tavini i te Atua ra o Iehova, aita to ˈna utuafare i farii e faarue aˈera oia i te fare. Ma te ore râ e riri, ua pure oia no te reira, ma te vaiiho i te Parau a te Atua e te varua ia ohipa i nia i to ˈna feruriraa. I muri aˈe, ua papai pinepine oia i to ˈna utuafare, a faaî ai i ta ˈna mau rata i to ˈna here mahanahana mau ia ratou. Ei pahonoraa, haamata aˈera to ˈna na taeae paari aˈe e piti i te haapii i te Bibilia e e mau Kerisetiano pûpûhia raua i teie nei. Ua farii atoa to ˈna mama e to ˈna taeae apî aˈe i te parau mau bibilia. I te pae hopea, ua taui to to ˈna papa, o tei patoi roa na hoi, manaˈo. Te papai ra te potii Ite e: “Ua faaipoipo matou paatoa i te mau hoa Kerisetiano, e i teie nei e 23 feia haamori tahoêhia i roto i to matou utuafare.” Auê ïa upootiaraa no te here e!

Te hinaaro ra anei outou e faahotu i te here mau e e tauturu ia vetahi ê ia na reira atoa? A fariu ïa ia Iehova ra, te Tumu o tera huru maitai faufaa roa. Oia, a haafaufaa i ta ˈna Parau, a pure no te ani i te varua moˈa, e a amuimui tamau i te fetii taeae Kerisetiano. (Isaia 11:9; Mataio 5:5) Mea mahanahana mau â ia ite e e fatata te feia iino atoa i te mou, o te feia anaˈe o te faaohipa i te here Kerisetiano mau te ora mai! Oia mau, o te here te ravea e oaoa ˈi e e ora ˈi.—Salamo 37:10, 11; Ioane 1, 3:14.

[Hohoˈa i te api 6]

E tauturu te pure e te haapiiraa i te Parau a te Atua ia tatou ia faahotu i te here mau