E peu matauhia noa anei aore ra e petaraa?

TE tahi mau fare haapiiraa tuatoru no Poronia, e peu matauhia e te mau piahi e ohi i te moni no te hoo i te ô na ta ratou mau orometua haapii, ma te tiaturi e e maitai aˈe te mau nota o ta ratou mau hiˈopoaraa. E ere i te mea maere ia û te hoê Kerisetiano apî o Katarzyna te iˈoa i te hoê tupuraa fifi. “E horoa anei au i te moni aore ra eita?” o ta ˈna ïa i uiui. Ua haaferuri to ˈna mau hoa ia ˈna: “E peu matauhia teie. Eita oe e ere i te tahi mea, e mea rahi râ te noaa ia oe, no reira, no te aha oe e feaa ˈi?”

“Ua ite au e i te matahiti matamua o ta ˈu tau haapiiraa, ua apiti au i roto i te ohiraa moni,” o ta Katarzyna ïa e faˈi ra. “Ua taa ia ˈu i muri aˈe noa e ia na reira vau te turu ra ïa vau i te petaraa, tei faautuahia hoi e te Bibilia.” Ua haamanaˈo o ˈna i te mau irava o te faataa ra i to Iehova farii ore etaeta i te petaraa. (Deuteronomi 10:17; 16:19; Paraleipomeno 2, 19:7) Te na ô ra o Katarzyna e: “Ua taa ia ˈu e mea ohie ia hema i te faaheporaa a te mau hoa. Ua feruri maite au i te reira e mai reira mai aita vau i apiti faahou i roto i teie peu matauhia.” I te roaraa o na matahiti e toru i mahemo, a faaooo noa ˈi te tahi atu mau piahi, ua nehenehe o ˈna e faataa i te tahi e eita oia e apiti i roto i tera mau ohiraa “ô” no ta ˈna mau tiaturiraa niuhia i nia i te Bibilia.

Ua pari te tahi ia Katarzyna i te miimii e te au ore i te taata. “Aitâ vau i afaro e te tahi o ratou,” o ta ˈna ïa e parau ra. “I te tahi aˈe pae, e mea rahi o te faatura nei i to ˈu manaˈo, o te faaoaoa ia ˈu.” Ua matauhia o Katarzyna ei Ite no Iehova, o te haapao i te mau faaueraa tumu o te Bibilia i roto i te oraraa o te mau mahana atoa.