“Ua mahâ te hinaaro o to ˈu aau”

“MAURUURU roa no te ô au mau E haafatata ˈtu ia Iehova. Ua mâha te hinaaro o to ˈu aau i te here e te aupuru a Iehova. E mea piri roa ˈtu â vau ia Iehova e ta ˈna Tamaiti here i teie nei. E hinaaro vau e faaite i teie buka i te taata atoa e e horoa ˈtu na tei herehia atoa.” Tera te manaˈo o te hoê Ite no Iehova no nia i te buka apî e 320 api, i mahiti i te mau tairururaa mataeinaa “Feia poro itoito rahi i te Basileia” i tupu i te mau matahiti 2002/2003. E hiˈopoa mai tatou i te tahi mau tuhaa o teie buka apî e no te aha i neneihia ˈi.

Te tahi mau tuhaa o te buka apî

Eaha to roto i teie buka apî? Te mau haamaramaramaraa atoa ïa i vauvauhia i roto i na tumu parau haapiiraa e piti o teie vea—e mea rahi atu â! E 31 pene to te buka, hoê â roa e te hoê tumu parau haapiiraa o Te Pare Tiairaa. I muri aˈe i te parau faaara e na pene matamua e toru, ua vahihia te buka i roto e maha tuhaa, hoê tuhaa no te ateriputi rahi taitahi o Iehova. E haamata te tuhaa taitahi e te hoê haapotoraa o te huru maitai. E faataa nau pene i muri mai e nafea o Iehova e faaite ai i te ateriputi. I roto i na tuhaa taitahi, te vai ra hoê pene no nia ia Iesu. No te aha? Ua parau o Iesu e: “O tei hiˈo mai ia ˈu ra, ua hiˈo ïa i te Metua.” (Ioane 14:9) Ei hohoˈa tia roa o Iehova, e horoa mai o Iesu i te tahi mau hiˈoraa oraora e nafea te Atua e faaohipa ˈi i to ˈna mau huru maitatai. E faaoti te tuhaa taitahi ma te hoê pene o te haapii mai e nafea ia pee ia Iehova i roto i te faaiteraa i te huru maitai e hiˈopoahia ra. I roto i te faahohonuraa i to Iehova mau huru maitatai, e faahiti teie buka apî i te mau buka atoa o te Bibilia.

E mau tuhaa taa ê atoa to roto i te buka E haafatata ˈtu ia Iehova. Mai te pene 2 atu, te vai ra i roto i te pene taitahi te tumu parau tarenihia “Uiraa ei feruriruriraa.” Aita i horoahia ˈtu te mau irava e te mau uiraa no te haamanaˈo i te pene. No te tauturu râ ia outou ia faaohipa i te Bibilia no te feruri maite i te tumu parau. Te anihia ˈtu nei ia taio maite outou i te mau irava atoa. E ia feruriruri i te uiraa e ia tutava outou iho i te faaohipa ˈtu. E nehenehe to outou aau e puta i tera feruriruriraa, e tia ˈtu ai ia outou ia haafatata ˈtu â ia Iehova.—Salamo 19:14.

Ua maimi-maitai-hia e ua faaineine-maitai-hia te mau hohoˈa i roto i te buka E haafatata ˈtu ia Iehova no te haapii atu e no te turai ia ohipa. I roto 17 pene, te vai ra te mau hohoˈa bibilia nehenehe i nia i te api taatoa.

No te aha i neneihia ˈi?

No te aha te buka E haafatata ˈtu ia Iehova i neneihia ˈi? Te tumu matamua o teie buka apî, o te tautururaa ïa ia tatou ia ite maitai atu â ia Iehova, e nehenehe atu ai tatou e faatupu i te hoê taairaa piri e te puai atu â e to tatou Atua.

Te manaˈo ra anei outou i te tahi taata o te faufaahia i te buka E haafatata ˈtu ia Iehova, peneiaˈe te hoê piahi Bibilia aore ra te hoê taeae aore ra tuahine Kerisetiano aita e poro faahou ra? E o outou—ua haamata anei outou i te taio i teie buka apî? Mai te peu e aita, no te aha e ore ai e faataa i te taime no te haamata oioi? A rave i te taime no te feruriruri i ta outou e taio. Ia tauturu ïa teie buka apî ia outou ia haafatata ˈtu â i te Atua ra o Iehova, e nehenehe atu ai outou e poro i te parau apî maitai o to ˈna Basileia ma te oaoa e te itoito rahi atu â.