E tiaturiraa mau to te mau tavini a Iehova
E tiaturiraa mau to te mau tavini a Iehova
“E vai â te toea o Iakoba i roto i te taata atoa ra e rave rahi, mai te hau no ǒ ia Iehova ra . . . tei ore ïa e tiai i te taata nei.”—MIKA 5:7.
1.E nafea te Iseraela pae varua e riro ai ei haumǎrû?
O IEHOVA te Atua Poiete rahi i te ûa e te hau. Aita e faufaa ia tiaturi i te taata no te horoa mai i te hau aore ra te ûa. Ua papai te peropheta Mika e: “E vai â te toea o Iakoba i roto i te taata atoa ra e rave rahi, mai te hau no ǒ ia Iehova ra, mai te tuâ ûa i nia i te aihere ra, tei ore ïa e tiai i te taata nei, e ore hoi e haapǎpǎ i to te taata nei tamarii.” (Mika 5:7) O vai “te toea o Iakoba” no teie tau? O te mau Iseraela pae varua ïa, te toea o ‘te Iseraela o te Atua.’ (Galatia 6:16) No ‘te taata e rave rahi,’ e au ratou i “te hau” haumǎrû “no ǒ ia Iehova ra” e i “te tuâ ûa i nia i te aihere.” Oia mau i teie mahana, e haamaitairaa te mau Kerisetiano faatavaihia no ǒ mai ia Iehova ra no te taata. Ei feia poro i te Basileia, te faaohipahia ra ratou e Iehova no te faaite i te taata i ta ˈna poroi o te tiaturiraa mau.
2.No te aha e tiaturiraa mau to tatou noa ˈtu e te ora nei tatou i roto i teie nei ao arepurepu?
2 E ere i te mea maere ia ere teie nei ao i te tiaturiraa mau. Te papu-ore-raa i te pae poritita, te toparaa morare, te ohipa ino, te mau fifi i te pae faaravairaa faufaa, te totoaraa, te tamaˈi—tera te tahi mau mea e tupu ra i roto i te hoê ao faaterehia e te Diabolo ra o Satani. (Ioane 1, 5:19) Mea rahi o te taiâ ra i te mea e tupu a muri aˈe. Aita râ tatou, te feia haamori ia Iehova, e taiâ ra, no te mea e tiaturiraa papu to tatou no te tau no a muri aˈe. E tiaturiraa mau to tatou no te mea ua niuhia i nia i te Parau a te Atua. E tiaturi tatou ia Iehova e i ta ˈna Parau no te mea e tupu noa iho â te mau mea atoa ta ˈna e parau.
3.(a) No te aha o Iehova i faautua ˈi ia Iseraela e ia Iuda? (b) No te aha ta Mika parau e au ai i to tatou nei tau?
3 E faaitoito ta Mika parau tohu faauruahia e te Atua, ia tatou ia haere ma te iˈoa o Iehova e e horoa mai i te niu no te tiaturiraa mau. I te senekele 8 H.T.T., a tohu ai o Mika, ua amaha te nunaa o te faufaa a te Atua na roto e piti tuhaa—o Iseraela e o Iuda—e te tâuˈa ore ra i te faufaa a te Atua. Te faahopearaa, o te toparaa morare ïa, te taivaraa i te pae faaroo, e te nounou taoˈa rahi roa. No reira Iehova i faaara ˈi e e faautua oia ia ratou. Parau mau, ua faataehia ta ˈna mau faaararaa i te feia no te tau o Mika. No te mea râ e hoê â roa te huru tupuraa no teie tau e to te tau o Mika, e au atoa ta ˈna mau parau i teie mahana. E ite-maitai-hia te reira ia hiˈopoa tatou i te tahi mau manaˈo faufaa o na pene e hitu o te buka a Mika.
Ta te hoê hiˈopoaraa poto o te buka a Mika e faaite mai
4.Eaha ta te Mika pene 1 e tae atu i te pene 3 e faaite maira?
4 E hiˈo poto anaˈe na i te buka a Mika. I roto i te pene 1, te faataa ra Iehova i te orureraa hau a Iseraela e a Iuda. Ei faahopearaa o to ratou ino, e haamouhia o Iseraela e e tae roa te faautuaraa ia Iuda i te uputa o Ierusalema. Te faaite ra te pene 2 e te haavî ra te feia ona e te mana i te feia paruparu e te ravea ore. Te vai atoa ra râ te hoê parau fafau a te Atua. E amuihia te nunaa o te Atua. Te faataa ra te pene 3 i ta Iehova parau no nia i te mau aratai o te nunaa e te mau peropheta iino. Te ruri ê ra te mau aratai i te parau-tia, e te haavare ra te mau peropheta. Noa ˈtu te reira, ua faaitoitohia Mika e te varua moˈa no te poro i te haavaraa a Iehova e fatata maira.
5.Eaha te manaˈo tumu o te Mika pene 4 e te 5?
5 Te tohu ra te pene 4 e ia tae i te mau mahana hopea, e tairuru mai to te mau fenua atoa i nia i te mouˈa teitei o te fare o Iehova ia haapiihia ratou e ana. Hou te reira, e hopoi-ê-hia to Iuda i Babulonia, e faaora râ Iehova ia ratou. Te faaite ra te pene 5 e e fanauhia te Mesia i Betelehema i Iuda. E tiai oia i to ˈna mau taata e e faaora ia ratou i te mau fenua haavî.
6, 7. Eaha te tahi mau manaˈo i tatarahia i roto i te pene 6 e te 7 o te parau tohu a Mika?
6 Te faatia ra te Mika pene 6 i te mau pariraa a Iehova i to ˈna nunaa mai te hoê haavaraa i te tiripuna. Eaha ta ˈna i rave i orure hau ai to ˈna nunaa? Aita hoê mea. I te tanoraa, mea faito noa ta ˈna mau titauraa. Te hinaaro ra oia ia faahotu to ˈna feia haamori i te parau-tia, te maitai, e te aau faahaihai a haere ai ratou e o ˈna. Aita o Iseraela e o Iuda i na reira, ua orure hau râ, e roohia ïa ratou i te mau faahopearaa.
7 I roto i te pene hopea o ta ˈna parau tohu, te faahapa ra o Mika i te ino o te feia no to ˈna tau. Eita râ oia e toaruaru, no te mea ua faaoti maite oia e “tiai” ia Iehova. (Mika 7:7) E hope te buka e te faahitiraa papu e e aroha Iehova i to ˈna nunaa. Te haapapu ra te tuatapaparaa e ua tupu tera tiaturiraa. I te matahiti 537 H.T.T., i te hoperaa te tau faatitiaifaroraa a Iehova i to ˈna nunaa, ua faahoˈi oia ma te aroha i te hoê toea i to ratou iho fenua.
8.E nafea outou e haapoto ai i tei papaihia i roto i te buka a Mika?
8 E parau maitai roa ta Iehova e faaite ra na roto ia Mika! Te horoa maira teie buka faauruahia i te mau hiˈoraa o te faaara mai e nafea Iehova i te feia e parau ra e tavini ia ˈna e o te taiva râ. Te tohu ra i te mau mea e tupu ra i teie tau. E te horoa maira i te aˈoraa a te Atua eaha to tatou haerea e tia ˈi i teie nei anotau fifi ia papu to tatou tiaturiraa.
E paraparau te Fatu e Arii ra o Iehova
9.Ia au i te Mika 1:2, ua fatata Iehova i te aha?
9 E hiˈopoa maite anaˈe i teie nei i te buka a Mika. I te Mika 1:2, te taio nei tatou e: “E faaroo mai, e te mau taata e, outou atoa na: e fariu mai i te tariˈa, e te fenua e, e te mau mea atoa i nia iho: ei ite hoi te Fatu ra o Iehova ia outou; te Fatu nei â i to ˈna ihora hiero moˈa.” Ahiri e te ora ra outou i te tau o Mika, e huti iho â ïa taua mau parau ra i to outou ara-maite-raa, no te mea te parau maira Iehova mai to ˈna hiero moˈa mai eiaha noa ia Iseraela e ia Iuda, i te taata râ i te mau vahi atoa. I te tau o Mika, ua maoro roa to te nunaa tâuˈa-ore-raa i te Fatu e Arii ra o Iehova. Ua fatata te reira i te taui. Ua faaoti maite Iehova e ohipa mai.
10. No te aha e mea faufaa ˈi te mau parau o te Mika 1:2 no tatou?
10 Oia atoa i to tatou nei tau. Te faaite ra te Apokalupo 14:18-20 e te parau faahou maira Iehova mai to ˈna hiero moˈa mai. Ua fatata oia i te ohipa mai, e e aueue â te huitaata i te mau tupuraa faufaa roa. I teie haereraa, e hurihia ‘te vine ino o te fenua nei’ i roto i te neneiraa uaina rahi o te riri o Iehova, e ia mou roa te faanahoraa o te mau mea a Satani.
11. Eaha te auraa o te Mika 1:3, 4?
11 A faaroo na eaha ta Iehova e fatata i te rave. Te na ô ra te Mika 1:3, 4 e: “Inaha hoi, te haere nei Iehova i rapae i to ˈna ra vahi; e haere mai hoi oia i raro, e taataahi i te mau vahi teitei i te fenua nei. E tarapape te mau mouˈa i raro aˈe ia ˈna, e tahe hoi te mau peho mai te tapau i te pae auahi, e mai te pape i niniihia i te vahi teitei ra.” E faarue anei Iehova i to ˈna nohoraa i nia i te raˈi e taataahi tino mai ai i te mau mouˈa e te mau peho o te Fenua tǎpǔhia? Eita. Aita e faufaa ia na reira oia. E fariu noa mai oia i to ˈna mata i nia i te fenua e tupu ai to ˈna hinaaro. Hau atu â, e ere o te fenua mau, o te taata râ i nia iho te roohia i te mau mea i faataahia aˈenei. Ia ohipa mai Iehova, mea ino roa te faahopearaa no te feia taiva—mai te huru ra e ua tahe te mau mouˈa mai te tapau e ua amaha te peho i te aueueraa fenua.
12, 13. Ia au i te Petero 2, 3:10-12, e nafea to tatou tiaturiraa e papu roa ˈi?
12 Te haamanaˈo ra paha te parau tohu o te Mika 1:3, 4 i te tahi atu parau tohu faauruahia no nia i te mau ati i te fenua nei. Ia au i te Petero 2, 3:10, ua papai te aposetolo Petero e: “E tae mai râ te mahana o te Fatu mai te eiâ i te rui ra; e pee ê atu ai teie nei raˈi ma te haruru rahi, e mou hoi te mau mea rii tumu i te veavea rahi, e te fenua hoi e te mau ohipa i nia iho, e pau ïa i te auahi.” Mai te parau tohu a Mika, aita o Petero e faahiti ra i te raˈi e te fenua mau. Te faahiti ra oia i te hoê ati rahi e tae maira i nia i teie ao paieti ore.
13 Noa ˈtu taua ati e tae mai ra, e nehenehe te mau Kerisetiano e tiaturi i te tau no a muri aˈe, mai ia Mika atoa ra. E nafea? Na roto i te peeraa i te aˈoraa e vai ra i roto i to muri mai irava o te rata a Petero. Te na ô ra te aposetolo e: “Mai te aha to outou huru e tia ˈi i te haapao maitai e te paieti; i te tiairaa e te ruraa ˈtu ia tae mai taua mahana o te Atua ra.” (Petero 2, 3:11, 12) E papu roa to tatou tiaturiraa i te tau no a muri aˈe mai te peu e e faahotu tatou i te aau faaroo e e haapapu tatou e mea haapao maitai to tatou huru e ua î to tatou oraraa i te mau ohipa paieti. Ia papu roa to tatou tiaturiraa, e mea tia atoa ia haamanaˈo e e tae mai iho â te mahana o Iehova.
14. No te aha i tano ai ia faautuahia o Iseraela e o Iuda?
14 Te faataa ra Iehova no te aha e tano ai ia faautuahia to ˈna nunaa i tahito ra. Te na ô ra te Mika 1:5 e: “No te hara a Iakoba taua mea nei, e no te ino o te utuafare o Iseraela. Eaha taua hara a Iakoba ra? e ere anei i ta Samaria ra? eaha te mau vahi teitei o Iuda ra? e ere anei i ta Ierusalema ra?” Maoti Iehova i vai mai ai o Iseraela e o Iuda. Ua orure râ ratou ia ˈna, e ua tae roa atoa ta ratou orureraa i Samaria, te oire pu o Iseraela e i Ierusalema, te oire pu o Iuda.
Ua rahi roa te mau peu iino
15, 16. No teihea mau ohipa iino i hara ˈi te taata no te tau o Mika?
15 Ma te oraora, te faataahia ra te hoê hiˈoraa o te ino o te taata no te tau o Mika i roto i te Mika 2:1, 2: “E pohe to te feia i imi i te hara, e tei rave i te ino i nia i to ratou mau roi! e ua ao anaˈe ra ua maramarama ua rave, no te mea e tia i to ratou rima te rave. E ua nounou ratou i te fenua, e riro atura ïa i te haru, e te mau fare, e ua rave ihora, ere ihora te feia fatu: na reira ratou i te hamani ino i te taata e to ˈna fetii, e te taata . . . e to ˈna aiˈa tupuna.”
16 E ara noa te feia nounou taoˈa i nia i to ratou roi i te po a opua ˈi e nafea ia haru i te mau fenua e te mau fare o to ratou feia tapiri. Ua ao anaˈe, e haapeepee ratou i te faatupu i ta ratou opuaraa. Ahiri ratou i haamanaˈo i te faufaa a Iehova, eita ratou e rave i taua mau ohipa iino ra. Te vai ra te mau faanahoraa o te paruru i te feia veve i roto i te Ture a Mose. Maoti te reira, aita e utuafare o te ere roa i to ˈna aiˈa tupuna. Eita râ taua feia nounou taoˈa ra e tâuˈa i te reira. Eita ratou e tâuˈa i te mau parau o te Levitiko 19:18, e na ô ra e: “E aroha . . . oe i te taata-tupu mai to aroha ia oe iho na.”
17. Eaha te tupu mai ia imi na mua te taata e parau ra e tavini i te Atua i te mau mea materia?
17 Te faaite maira te reira eaha te tupu mai ia haamoe te taata e parau ra e tavini i te Atua i te mau fa pae varua e ia imi na mua i te mau mea materia. Ua faaara Paulo i te mau Kerisetiano no to ˈna tau e: “Te feia e mârô e ia rahi te taoˈa, e roohia ïa i te ati, e te marei, e te nounou maamaa e rave rahi, e ino ai te taata ra, e topa taue ai te taata i roto i te ino rahi faarue roa ra, e te pohe mure ore.” (Timoteo 1, 6:9) Ia faariro te hoê taata i te imiraa moni ei fa matamua na ˈna i roto i te oraraa, te haamori ra ïa oia ia Mamona, aore ra te mau taoˈa—te hoê atua haavare. Eita taua atua haavare ra e pûpû i te tiaturiraa papu no a muri aˈe.—Mataio 6:24.
18. Eaha tei tupu i nia i te feia nounou taoˈa i te tau o Mika?
18 Mea rahi i te tau o Mika tei mauiui i te iteraa e mea faufaa ore ia tiaturi i te mau mea materia. Ia au i te Mika 2:4, te na ô ra Iehova e: “Ia tae i taua mahana ra e parauhia ˈi te tahi parabole ia outou, e e rahi roa ïa te oto i reira, i te na ôraa e, Ua pau roa tatou; ua hopoi-ê-hia te tufaa o to ˈu ra mau taata; e eaha ra hoi oia i te hopoi-ê-raa i te reira ia ˈu nei! e i te fariu-ê-raa oia ua tufa-haere-hia to tatou mau aua e ana ra.” Oia, e ere taua feia eiâ fare e fenua ra i to ratou iho aiˈa tupuna. E hopoi-ê-hia ratou i te fenua ê, e e riro ta ratou mau faufaa ei taoˈa haru na ‘tei fariu ê,’ aore ra to te nunaa etene. Aita faahou e tiaturiraa no te hoê tau ruperupe no a muri aˈe.
19, 20. Eaha tei tupu i nia i te mau ati Iuda tei tiaturi ia Iehova?
19 Eita râ te feia e tiaturi ia Iehova e ere i ta ratou mau tiairaa. E haapao iho â Iehova i ta ˈna mau faufaa e o Aberahama e o Davida, e e aroha hamani maitai to ˈna i te feia mai ia Mika o te here ia ˈna e o te oto no te feia no to ratou fenua tei fariu ê i te Atua. No te feia aau tia, e tupu te hoê hoˈi-faahou-raa i te tau i faataahia e te Atua.
20 Ua tupu te reira i te matahiti 537 H.T.T., i muri aˈe i to Babulonia toparaa e to te hoê toea ati Iuda hoˈiraa i ǒ ratou. I taua tau ra i tupu ai te mau parau o te Mika 2:12 no te taime matamua. Te na ô ra Iehova e: “E haaputu mau â vau, e Iakoba, ia oe atoa ra; e haaputu mau hoi au i te toea o Iseraela; e amui au ia ratou mai te mamoe i Bozara ra, e mai te nǎnǎ i roto i to ratou ra fare: e atutu atoa ratou i te rahi o te taata ra.” Auê ïa Atua î i te here o Iehova e! Ua oti anaˈe ia ˈna i te faatitiaifaro i to ˈna nunaa, e faatia oia ia hoˈi te hoê toea e tavini ia ˈna i te fenua ta ˈna i horoa no to ratou mau tupuna.
Tuearaa faahiahia e to tatou tau
21. E nafea te mau huru tupuraa no teie tau e tuea ˈi e to te tau o Mika?
21 A hiˈopoa ˈi tatou i na pene matamua e piti o te Mika, aita anei outou i maere i te mau tuearaa e to tatou tau? Mai i te tau o Mika, mea rahi teie e parau nei e tavini i te Atua. Mai ia Iuda e ia Iseraela râ, ua amaha ratou e ua tamaˈi atoa ratou ia ratou iho. Mea rahi te feia ona o te Amuiraa faaroo Kerisetiano tei haavî i te feia veve. Te farii rahi noa ˈtura te mau aratai haapaoraa i te mau peu ta te Bibilia e opani ra ma te taa maitai. E ere i te mea maere ia fatata te Amuiraa faaroo Kerisetiano i te haamouhia e te toea o “Babulonia Rahi,” te hau emepera o te ao atoa o te haapaoraa hape! (Apokalupo 18:1-5) Ia au râ i tei tupu i te tau o Mika, te vai ra ta Iehova mau tavini haapao maitai i nia i te fenua.
22. Eaha na pǔpǔ e piti e tiaturi ra i te Basileia o te Atua?
22 I te matahiti 1919, ua faataa ê roa mai te mau Kerisetiano haapao maitai tei faatavaihia i te Amuiraa faaroo Kerisetiano e ua haamata aˈera i te poro i te parau apî maitai o te Basileia i te mau fenua atoa. (Mataio 24:14) Na mua roa, ua imi ratou i te toea o te Iseraela o te Atua. I muri iho, ua haaputuhia te mau “mamoe ê atu,” e ua riro mai na pǔpǔ e piti ei “hoê aˈe nǎnǎ, e hoê hoi tiai.” (Ioane 10:16) Noa ˈtu e te tavini nei ratou i na fenua e 234, ua ‘amui-mau-hia’ teie feia haamori haapao maitai atoa ia Iehova. E i teie nei, ua “atutu” te aua mamoe “i te rahi o te taata,” e oia atoa i te mau vahine e te mau tamarii. Aita ratou e tiaturi ra i teie faanahoraa o te mau mea, i te Basileia o te Atua râ, o te fatata i te faariro i te fenua nei ei Paradaiso.
23. No te aha outou i ite ai e mea papu to outou tiaturiraa?
23 No nia i te feia haamori haapao maitai o Iehova, te na ô ra te irava hopea o te Mika pene 2 e: “Ua na mua to ratou arii ia ratou ra, e o Iehova te aratai ia ratou.” Te ite ra anei outou ia outou iho i roto i taua haereraa o te upootiaraa ra, na muri i to outou Arii ra o Iesu Mesia, e o Iehova iho te aratai? Mai te peu e e, ia ite maite ïa outou e mea papu te upootiaraa e to outou tiaturiraa. E papu noa ˈtu â te reira ia hiˈopoa tatou i te tahi atu â manaˈo faufaa o te parau tohu a Mika.
E nafea outou e pahono ai?
• I te tau o Mika, no te aha o Iehova i faaoti ai e faautua ia Iuda e ia Iseraela?
• Eaha te tupu mai ia imi na mua te feia e parau ra e tavini i te Atua i te mau faufaa materia i roto i te oraraa?
• I muri aˈe i te hiˈopoaraa i te Mika pene 1 e te 2, no te aha outou i ite maite ai e mea papu to outou tiaturiraa?
[Uiraa haapiiraa]
[Hohoˈa i te api 7]
E faaitoito te parau tohu a Mika ia tatou i te pae varua
[Hohoˈa i te api 8]
Mai te toea ati Iuda i te matahiti 537 H.T.T., te paturu ra te mau Iseraela pae varua e to ratou mau hoa i te haamoriraa mau