Hoê anaˈe haapaoraa Kerisetiano mau—e tupuraa mau

UA HAAMAU Iesu Mesia hoê anaˈe ekalesia, aore ra amuiraa. E tino pae varua, e fetii pae varua taua amuiraa ra. Te auraa, e haaputuputuraa i te feia maitihia e te varua moˈa o te Atua—ua fariihia te taatoaraa e te Atua ei “tamarii” na ˈna.—Roma 8:16, 17; Galatia 3:26.

Ua haapii Iesu e hoê anaˈe aratia tei faaohipahia e te Atua no te aratai i te taata i te parau mau e te ora. No te faahohoˈa i taua parau mau faufaa ra, ua faaau Iesu i te aratia o te ora mure ore i te hoê eˈa. Ua na ô oia e: “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora, e te iti hoi o te feia i ite atu i te reira!”—Mataio 7:13, 14; Ioane 14:6; Ohipa 4:11, 12.

Te hoê amuiraa tahoê

Eiaha tatou e manaˈo i tera amuiraa o te senekele matamua ei “totaiete faanahohia na te ao nei mai ta tatou e ite ra i teie mahana ia paraparau tatou no nia i te ekalesia Katolika,” ta The New Dictionary of Theology ïa e parau ra. No te aha hoi? “No te mea,” ta ˈna ïa e na ô ra, “aita taua huru totaiete faanahohia ra na te ao nei i vai mau na.”

Eita te hoê e nehenehe e patoi ma te tia roa i te mea e aita roa ˈtu te amuiraa Kerisetiano matamua i tuea i te mau faanahoraa ekalesia haamauhia ta tatou e ite ra i teie mahana. Mea nahonaho râ te reira. Aita roa ˈtu te amuiraa taitahi i haa ma te faataa ê te tahi i te tahi. Ua farii ratou paatoa i te mana o te hoê tino aratai i Ierusalema. Ua tauturu taua tino ra—te mau aposetolo e te mau matahiapo o te amuiraa no Ierusalema—i te paruru i te auhoêraa o te amuiraa ei “hoê â tino” o te Mesia.—Ephesia 4:4, 11-16; Ohipa 15:22-31; 16:4, 5.

Eaha tei tupu i nia i taua anaˈe amuiraa mau ra? Ua riro mai anei ei Ekalesia Katolika iti rahi? Ua rahi mai anei ei ekalesia Porotetani amahamaha ta tatou e ite ra i teie mahana? Aore ra e ohipa ê atu â anei tei tupu?

“Te sitona” e “te zizania”

No te ite i te mau pahonoraa, e hiˈo maitai anaˈe na eaha ta Iesu Mesia iho i faaite. E maere paha outou i te iteraa e ua ite Iesu e e mou ta ˈna amuiraa e ua vaiiho oia i taua tupuraa peapea ra ia tupu â tau senekele i te maoro.

Ma te faatuati i ta ˈna amuiraa i “te basileia o te ao,” ua na ô oia e: “E au te basileia o te ao i te hoê taata i ueue i te huero maitai i roto i ta ˈna ra aua. Ia taoto râ te taata ra, ua haere maira to ˈna enemi, ua ueue ihora i te zizania i roto i te sitona, e haere ê atura. E tupu aˈera te raau rii, e hotu ihora, itea ihora te zizania. Ua haere maira te mau tavini, ua parau maira i to ratou fatu, E to matou fatu, e huero maitai hoi ta oe i ueue i roto i te aua na oe nei, nohea iho nei hoi te zizania? Ua parau atura oia ia ratou, Na te enemi te reira i rave. Ua parau maira te mau tavini ia ˈna, E tii anei matou e vaere? Ua parau atura oia, Eiaha; oi pee atoa te sitona ia vaere outou i te zizania. E vaiiho noa ia tupu apipiti noa na e ia auhune; e ia tae i te tau auhune ra, na ˈu e parau atu i te feia ooti, E mata na i te rave i te zizania e ruuruu no te auahi, e hopoi râ i te sitona i roto i tau fare vairaa ra.”—Mataio 13:24-30.

Ua faataa o Iesu e o ˈna te ‘taata ueue huero.’ Te faahohoˈa ra “te huero maitai” i ta ˈna mau pǐpǐ mau. O te Diabolo ra o Satani to ˈna “enemi.” “Te zizania,” o te mau Kerisetiano haavare ïa o tei faaô mǎrû noa mai i roto i te amuiraa Kerisetiano matamua. Ua parau oia e e vaiiho o ˈna i “te sitona” e “te zizania” ia tupu apipiti noa na e ia  “auhune,” o te tupu hoi i ‘te hopea o teie nei ao.’ (Mataio 13:37-43) Eaha te auraa o te taatoaraa o teie mau mea nei?

Ua haaviiviihia te amuiraa Kerisetiano

Aita i maoro i muri aˈe i te poheraa o te mau aposetolo, ua haamata ihora te mau orometua haapii apotata no roto mai i te amuiraa i te faatere. Ua parau ratou i “te parau piˈo, ia peehia ratou e te pǐpǐ.” (Ohipa 20:29, 30) Ei faahopearaa, e rave rahi Kerisetiano tei “faarue . . . i te faaroo.” Ua ‘opai tia ˈtu ratou i te fabula.’—Timoteo 1, 4:1-3; Timoteo 2, 4:3, 4.

I te maharaa o te senekele T.T., ta The New Dictionary of Theology ïa e parau ra, “ua riro mai te faaroo Kerisetiano Katolika . . . ei haapaoraa haamanahia a te Hau emepera Roma.” Ua “amui te totaiete faaroo e te tivira”—ua amui te Ekalesia e te Hau o tei patoi roa i te mau tiaturiraa a te mau Kerisetiano matamua. (Ioane 17:16; Iakobo 4:4) Te na ô ra taua noa buka ra e i muri aˈe, ua taui roa te faanahoraa taatoa e te huru mau o te ekalesia, e tae noa ˈtu i ta ˈna mau tiaturiraa tumu e rave rahi, “i raro aˈe i te mana o te amuiraa maere e te ino roa o te Faufaa Tahito e te mau hiˈoraa o te néoplatonisme.” Mai tei tohuhia e Iesu Mesia, ua hunahia ta ˈna mau pǐpǐ mau a parare noa ˈi te mau Kerisetiano haavare.

Ua ite te feia e faaroo ra ia Iesu e mea fifi roa ia faataa ê te sitona mau i te zizania, mai te hoê aihere taero, o te hohoˈa i te tau tupuraa i te sitona. No reira, te faataa ra o Iesu e no te hoê noa taime, e mea fifi roa ia faataa ê i te mau Kerisetiano mau i te mau Kerisetiano haavare e rave rau. E ere te auraa e ua mou te amuiraa Kerisetiano, no te mea ua fafau Iesu e tamau i te aratai i to ˈna mau taeae pae varua “e tae noa ˈtu i te hopea o teie nei ao.” (Mataio 28:20) Ua parau Iesu e e tamau te sitona i te tupu. Noa ˈtu râ, i te roaraa o te tau, aita e feaaraa e ua tutava maite te mau Kerisetiano mau—taitahi aore ra ei pǔpǔ—i te pee i te mau haapiiraa a te Mesia. E ere faahou râ ratou i te hoê tino, aore ra faanahonahoraa, ite-mata-hia o te nehenehe e faataa-maitai-hia. Aita roa ˈtu ratou i tuati i te mau faanahoraa faaroo apotata ite-mata-hia o tei faaino i te iˈoa o Iesu Mesia i te roaraa o te tuatapaparaa.—Petero 2, 2:1, 2.

‘E faaitehia mai taua taata hara ra’

Ua tohu te aposetolo Paulo i te tahi atu ohipa o te tapao i teie faanahoraa faaroo hape. Ua papai oia e: ‘Eiaha roa outou e vare i te taata atoa; o te taiva te tupu na na mua e tae ai taua mahana [o Iehova] ra, e e faaitehia mai hoi taua taata hara ra.’ (Tesalonia 2, 2:2-4) O te pǔpǔ ekalesiatiko ïa taua “taata hara ra” o tei faateitei ia ˈna iho i te hoê tiaraa mana i nia i te amuiraa “Kerisetiano.” *

 Ua haamata te ohipa apotata i te tau o te aposetolo Paulo. Ua uˈana roa ˈtu â te reira i te poheraa o te mau aposetolo e te mouraa to ratou mana paruru. E ite-maitai-hia te reira, ta Paulo ïa i parau, na roto i “te ravea puai a Satani ra, ma te mana, e te tapao, e te semeio haavare ra, e ma te mau parau-tia ore haavare atoa ra.” (Tesalonia 2, 2:6-12) Auê ïa faataaraa tano o te mau ohipa a te aratai haapaoraa e rave rahi roa i te roaraa o te tuatapaparaa e!

Ma te turu i ta ratou parau e o te haapaoraa Katolika no Roma anaˈe te ekalesia mau, te parau nei te mau aratai Katolika e no roto mai ta ratou mau epikopo “i te mau aposetolo matamua maoti te monoraa mai te haamataraa mai iho â.” Te parau mau, aita roa ˈtu to teie parau o te monoraa aposetolo e niu i roto i te Bibilia aore ra te tuatapaparaa. Aita e haapapuraa mau e ua aratai te varua moˈa o te Atua i te faanahoraa ekalesia tei fa mai i muri aˈe i te poheraa o te mau aposetolo a Iesu.—Roma 8:9; Galatia 5:19-21.

E eaha ïa no te mau ekalesia ê atu â tei haamauhia i muri aˈe i tei parau-noa-hia te Reforomatio? Ua pee anei ratou i te hiˈoraa o te amuiraa  Kerisetiano matamua? Ua haamau faahou anei ratou i te viivii ore o te amuiraa Kerisetiano matamua? E parau mau e i muri aˈe i te Reforomatio, ua fanaˈo e rave rahi feia au noa i te Bibilia na roto i to ratou iho reo. Tera râ, te faaite ra te tuatapaparaa e ua tamau noa teie mau ekalesia i te haapii i te mau haapiiraa hape. *—Mataio 15:7-9.

A tapao na râ i teie manaˈo. Ua tohu maitai o Iesu Mesia e e haamau-faahou-hia ta ˈna anaˈe amuiraa mau i te roaraa o ta ˈna i parau e te hopea o te faanahoraa o te mau mea. (Mataio 13:30, 39) Te faaite ra te tupuraa o te mau parau tohu bibilia e te ora nei tatou i taua anotau ra. (Mataio 24:3-35) I te mea e mea mau, e hinaaro ïa tatou taitahi i te ui, ‘Teihea roa taua anaˈe ekalesia mau ra?’ E hau roa ˈtu â te reira i te ite-maitai-hia e tia ˈi.

Peneiaˈe te manaˈo ra outou e ua ite-aˈena-hia ia outou tera ekalesia, aore ra amuiraa. E mea faufaa ia papu ia outou. No te aha? No te mea, mai i te senekele matamua, hoê anaˈe ekalesia mau. Ua rave anei outou i te taime ia papu ia outou e mea tuea roa ta outou ekalesia i te hiˈoraa vaiihohia mai e te amuiraa Kerisetiano no te senekele matamua e te pee maite ra te reira i te mau haapiiraa a Iesu Mesia? No te aha e ore ai e hiˈopoa i te reira i teie nei? E oaoa te mau Ite no Iehova i te tauturu atu ia outou.—Ohipa 17:11.

[Nota i raro i te api]

[Hohoˈa i te api 4]

Eaha ta te faahohoˈaraa a Iesu no nia i te sitona e te zizania e haapii maira no nia i te amuiraa mau?

[Hohoˈa i te api 5]

Te faaite ra anei ta outou ekalesia i te hiˈoraa vaiihohia mai e te mau Kerisetiano no te senekele matamua no nia i te pororaa e te haapiiraa?