“Eiaha outou ia amui-au-ore-hia”
“Eiaha outou ia amui-au-ore-hia”
MAI ta outou e ite ra i ǒ nei, e mea au ore roa ia arote apipiti te kamela e te puaatoro. I raro aˈe i te zugo—hamanihia no e piti animara hoê â rahi e puai—o na animara e piti te mauiui. No to ˈna tapitapi i te maitai o te mau animara, ua parau te Atua i te mau Iseraela e: “Eiaha oe e apiti i te puaatoro e te asini ia arote ra.” (Deuteronomi 22:10) E tano teie noâ faaueraa tumu no te puaatoro e te kamela.
Eita iho â te hoê taata faaapu e haafifi i ta ˈna mau animara. Teie râ, mai te peu e aita ta ˈna e piti puaatoro, e tuu paha ïa o ˈna i raro aˈe i te zugo e piti animara vata ta ˈna. E au ra e o ta te taata faaapu no te senekele 19 i nia i te hohoˈa i faaoti e rave. No te taa-ê-raa o to raua rahi e te teiaha, e tutava te animara paruparu aˈe i te tapea i te hoê â tere, e mea teiaha aˈe ta te animara puai aˈe e amo.
Ua faaohipa te aposetolo Paulo i te faahohoˈaraa o te amui-au-ore-raa no te horoa mai i te hoê haapiiraa faufaa. Ua papai o ˈna e: “Eiaha outou ia amui-au-ore-hia i te feia faaroo ore ra: eaha to te parau-tia auraa i te parau-tia ore? e eaha to te maramarama auraa i te pouri?” (Korinetia 2, 6:14) E nafea te hoê Kerisetiano e amui-au-ore-hia ˈi?
O te maitiraa ïa te hoê Kerisetiano i te hoê apiti e ere hoê â tiaturiraa ta raua. E faatupu teie taairaa i te au ore no na pae e piti, e mârô na hoa faaipoipo i nia i te mau tumu parau faufaa roa.
I to Iehova haamauraa i te faaipoiporaa, ua horoa oia i te tuhaa e “tauturu” na te vahine. (Genese 2:18) Ua faahiti atoa te Atua na roto i te peropheta Malaki i te vahine mai te hoê “taua.” (Malaki 2:14) E hinaaro to tatou Atua Poiete ia ohipa amui te mau hoa faaipoipo i roto i te hoê â aratairaa pae varua, a opere ai i te mau hopoia e a ooti ai i te mau maitai ma te aifaito.
Na roto i te faaipoiporaa “i roto noa i te Fatu,” e faatura te hoê Kerisetiano i te aˈoraa a to tatou Metua i te raˈi. (Korinetia 1, 7:39, MN) E faaineine te reira i te niu no te hoê faaipoiporaa tahoê, o te arue e o te faahanahana i te Atua a tavini ai na apiti ia ˈna ei “hoa mau” i roto i te hoê auraa taa ê.—Philipi 4:3.
[Faaiteraa i te fatu o te hohoˈa i te api 32]
Kamela e puaatoro: No roto mai i te buka La Tierra Santa, buka 1, 1830