Mea faufaa roa te tiaturi no te hoê oraraa oaoa

E MEA au ore roa te taeroraa i te maa. E mea tia ia haapao maitai atu â te hoê taata tei ite tamau i te reira i ta ˈna maa. E ere râ i te maitiraa tano te haapae-roa-raa i te maa no te ape i te taeroraa i te maa. E faarahi atu â te reira i te fifi. Aita anaˈe e maa aore roa e taata e nehenehe e ora maoro.

Hoê â huru, e mea mauiui ia haavarehia te tiaturi. E turai paha te haavare-tamau-raa i te tiaturi ia tatou ia feruri maitai ia maiti tatou i ta tatou mau amuimuiraa. Tera râ, e ere i te ravea te faaatea-roa-raa mai i te taata ia ore tatou ia faaruehia. No te aha hoi? No te mea e faaere te feaaraa tatou ia vetahi ê i to tatou iho oaoa. No te fanaˈo i te hoê oraraa mauruuru, e hinaaro tatou i te mau taairaa niuhia i nia i te tiaturi te tahi i te tahi.

“Te tiaturi, hoê tera o te mau tumu o te mau taairaa fifi ore e o vetahi ê i te mau mahana atoa,” ta te buka Jugend 2002 ïa e tatara ra. “E hinaaro te taata atoa i te tiaturi,” o ta te vea Neue Zürcher Zeitung ïa e faatia ra. “E haamaitai te tiaturi i te oraraa” i nia i te hoê faito e “e mea faufaa roa no te ora mai.” Oia mau, te na ô faahou ra te vea e, aita anaˈe e tiaturi, “eita te hoê taata e nehenehe e faaruru i te oraraa.”

I te mea e e hinaaro rahi tatou e tiaturi i te hoê taata, o vai ta tatou e nehenehe e tiaturi ma te ore e inoino?

E tiaturi ia Iehova ma to aau atoa ra

“E tiaturi ia Iehova ma to aau atoa ra,” ta te Bibilia ïa e parau maira. (Maseli 3:5) Oia mau, te faaitoito tamau maira te Parau a te Atua ia tiaturi i to tatou Atua Poiete ra o Iehova.

No te aha tatou e nehenehe ai e tiaturi i te Atua? Te tumu matamua, e Atua moˈa o Iehova. Ua papai te peropheta Isaia e: “E moˈa, e moˈa, e moˈa, o Iehova.” (Isaia 6:3) E haaparuparu anei teie manaˈo o te moˈaraa ia outou? I te tanoraa, e huti te reira ia outou no te mea te auraa o te moˈaraa o Iehova, e mea viivii ore oia, tei atea ê roa i te mea ino atoa, e e nehenehe e tiaturi-roa-hia. Aita roa ˈtu e ino aore ra e faaino i roto ia ˈna, e eita roa ˈtu e tia ia ˈna ia haavare i to tatou tiaturi.

Hau atu â, e nehenehe tatou e tiaturi i te Atua no to ˈna aravihi e hinaaro e turu  i te feia e tavini ra ia ˈna. Ei hiˈoraa, maoti to ˈna puai mana hope e ohipa ˈi oia. E aratai ta ˈna parau-tia e to ˈna paari tia roa i te huru e ohipa ˈi oia. Na to ˈna aroha faito ore e turai ia ˈna ia ohipa. “E aroha . . . te Atua,” ta te aposetolo Ioane ïa i papai. (Ioane 1, 4:8) E ohipa te aroha o te Atua i nia i te mau mea atoa ta ˈna e rave. E faariro te moˈaraa o Iehova e te tahi atu o to ˈna mau huru maitatai roa ia ˈna ei Metua maitai roa, ta tatou e nehenehe e tiaturi roa. Aita ˈtu mea aore ra taata e nehenehe e tiaturi-roa ˈˈe-hia maori râ o Iehova anaˈe.

A tiaturi ia Iehova e a oaoa

Te tahi atu tumu papu e tiaturi ai ia Iehova oia hoi e taa maitai aˈe oia i to tatou huru i te tahi atu taata. Ua ite oia e e hinaaro rahi to te taata taitahi i te hoê taairaa panaˈonaˈo ore, te maoro e te papu e te Atua Poiete. E oraraa panaˈonaˈo ore aˈe to te feia e fanaˈo ra i taua taairaa ra. “E ao to te taata e tiaturi ia Iehova,” o ta te arii Davida ïa i parau. (Salamo 40:4) Te faahiti atoa nei e mau mirioni taata i teie mahana ma to ratou aau atoa i te mau manaˈo o Davida.

E rave anaˈe na i te tahi mau hiˈoraa. Ua ora na o Doris i Repupirita Dominicaine, i Heremani, i Heleni, e i Marite. Te na ô ra oia e: “Te oaoa roa nei au i to ˈu tiaturiraa ia Iehova. Ua ite oia e nafea ia aupuru ia ˈu i te pae tino, te pae varua e i te pae o te aau. Ua riro oia ei hoa maitai roa ˈˈe ta te hoê taata e nehenehe e fanaˈo.” Te faataa ra o Wolfgang te hoê taata haapao ture e: “E mea faahiahia mau ia tiaturi i te hoê taata o te anaanatae mau ra ia outou, te hoê taata o te nehenehe e rave i te mea maitai roa ˈˈe no outou e o te na reira mau â!” Te na ô ra o Ham, o tei fanauhia i Asia e o te faaea ra râ i teie nei i Europa, e: “Te tiaturi nei au e e mana to Iehova i nia i te mau mea atoa, e eita oia e hape, no reira vau e oaoa ˈi i te tiaturi ia ˈna.”

Parau mau, e hinaaro tatou taitahi e tiaturi eiaha noa i to tatou Atua Poiete i te taata atoa râ. No reira, Iehova, mai te hoê hoa paari e te ite, e horoa ˈi i te aˈoraa na tatou no nia i te mau huru taata e mea maitai ia tiaturi tatou. Ma te taio maitai i te Bibilia, e nehenehe tatou e tapao mai i ta ˈna aˈoraa no nia i taua tuhaa ra.

Te feia ta tatou e nehenehe e tiaturi

“Eiaha e tiaturi i te hui arii, e te taata atoa, aita hoi o ˈna e ora,” ta te fatu salamo ïa i papai. (Salamo 146:3) E tauturu teie parau faauruahia ia tatou ia taa e e rave rahi taata eiaha tatou e tiaturi atu. Tae noa ˈtu te feia faatura-rahi-hia mai te “hui arii” o teie nei ao, mai te mau taata îite aravihi i roto i te mau tuhaa taa ê o te ite aore ra o te ohipa, eiaha tatou e tiaturi atu. E hape pinepine ta ratou aratairaa, e oioi roa tatou i te tatarahapa i te tiaturiraa i teie “hui arii.”

Parau mau, eiaha te reira e turai ia tatou ia ore e tiaturi i te taata atoa. Tera râ, e mea titauhia ia maiti tatou i te feia ta tatou e tiaturi. Eaha te titauraa ta tatou e faaî? E nehenehe te hoê hiˈoraa no nia i te nunaa Iseraela i tahito ra e tauturu ia tatou. I te taime a titauhia ˈi e maiti i te feia no te amo i te hopoia teimaha i Iseraela, ua aˈohia Mose ia “imi . . . i te taata itoito i roto i te taata  atoa nei, i tei mǎtaˈu i te Atua ra; ei taata haapao maitai anaˈe, e te nounou ore i te taoˈa [tia ore].” (Exodo 18:21; MN) Eaha ta tatou e nehenehe e haapii mai?

E mau taata teie o tei faaite i te tahi mau huru maitatai o te Atua na mua ˈˈe ratou a nominohia ˈi i nia i te mau tiaraa tiaturihia. Ua haapapu aˈena ratou e te mǎtaˈu ra ratou i te Atua; e faatura hohonu to ratou i te Atua Poiete e e mǎtaˈu to ratou i te faariri ia ˈna. Ua papu atura ïa i te taata atoa e ua paturu faahope roa teie mau taata i te mau ture aveia a te Atua. Aita ratou i nounou i te taoˈa tia ore, o te faaite ra i te puai morare o te paruru ia ratou ia ore e haapiˈohia e te mana. Eita ratou e faaohipa hape i te tiaturi no to ratou iho maitai aore ra to te fetii aore ra to te mau hoa.

E ere anei i te mea paari no tatou ia faaohipa i te hoê â titauraa i teie mahana ia maiti tatou i te feia ta tatou e tiaturi? Ua matau anei tatou i te feia e te faaite ra to ratou haerea i te mǎtaˈu i te Atua? Te pee maite ra anei ratou i ta ˈna mau ture aveia no nia i te haerea? E haerea piˈo ore anei to ratou no te ape i te mau ohipa tano ore? E haerea tia anei to ratou eiaha e taviri i te hoê tupuraa no to ratou iho maitai aore ra ia noaa mai ta ratou e hinaaro ra? Papu maitai e e nehenehe tatou e tiaturi i te mau tane e te mau vahine o te faaite ra i taua mau huru maitatai ra.

Eiaha tatou ia haaparuparuhia e te inoino i te tahi taime

No te faaoti o vai ta tatou e nehenehe e tiaturi, e mea tia ia faaoromai tatou, i te mea e e noaa mai te tiaturi i te roaraa o te hoê tau. Te haerea paari o te faaite-riirii-raa ïa i to tatou tiaturi i te hoê taata. E nafea? Oia, e nehenehe tatou e hiˈo i te haerea o te hoê taata i te roaraa o te hoê tau, a tapao ai e nafea o ˈna e ohipa ˈi i roto i te tahi mau tupuraa. E nehenehe anei e tiaturi i taua taata ra i roto i te mau ohipa haihai? Ei hiˈoraa, e faahoˈi anei oia i te mau tauihaa ta ˈna i rave mai ta ˈna i fafau e e faatura anei oia i te mau farereiraa i te hora tia? Mai te peu e e, e manaˈo paha ïa tatou e e nehenehe tatou e tiaturi ia ˈna i roto i te mau tuhaa faufaa ˈtu â. E tano te reira e te faaueraa tumu: “O tei haapao maitai i te mea iti ra, ua haapao maitai atoa i te mea rahi.” (Luka 16:10) E nehenehe te maiti-maitai-raa e te faaoromai e tauturu ia tatou ia ape i te inoino rahi.

E nafea râ mai te peu e e faainoino te hoê taata ia tatou? E haamanaˈo te mau piahi Bibilia e i te po o to ˈna haruraahia, ua faaruehia o Iesu Mesia e ta ˈna mau aposetolo. Ua haavare o Iuda Isakariota ia ˈna, e ua horo ê te toea no te taiâ. Ua huna atoa Petero ia Iesu e toru taime. Ua ite râ Iesu e o Iuda anaˈe tei ohipa ma te opua. Aita to ˈna faarueraahia i taua taime faufaa roa ra i tapea ia Iesu eiaha ia haapapu â i to ˈna tiaturi i na aposetolo 11 e toe ra tau hebedoma noa i muri aˈe. (Mataio 26:45-47, 56, 69-75; 28:16-20) Oia atoa, ia haavarehia tatou e te hoê taata ta tatou e tiaturi, e mea maitai ia hiˈo tatou e e feruriraa tiaturi-ore-hia anei ta taua ohipa haavare ra e haapapu ra aore ra e paruparu o te tino taime poto noa.

E taata tiaturihia anei au?

E mea tia ia vai tano te hoê taata o te faaoti e maiti o vai ta ˈna e tiaturi e ia ui oia ia ˈna iho e: ‘E taata tiaturihia anei au? Eaha te mau ture aveia tano noa o te tiaturiraa ta ˈu e titau nei ia ˈu iho e ia vetahi ê?’

Papu maitai, e faahiti noa te hoê taata tiaturihia i te parau mau. (Ephesia 4:25) Eita oia e faatano i ta ˈna mau parau i te feia e faaroo ra ia ˈna ia maitai o ˈna iho. E mai te peu e e fafau oia, e haa te taata tiaturihia ma to ˈna puai atoa no te tapea i ta ˈna parau. (Mataio 5:37) Ia tiaturi te hoê taata ia ˈna, e tapea te taata tiaturihia i te parau e eita oia e haaparare. E taata taiva ore i to ˈna hoa faaipoipo te hoê taata tiaturihia. Eita o ˈna e hiˈo i te mau hohoˈa faufau, eita oia e manaˈonaˈo  i te mau hinaaro morare ore, e eita oia e faahinaaro. (Mataio 5:27, 28) E haa rahi te taata ta tatou e tiaturi no te imi i te ora no ˈna iho e no to ˈna utuafare e eita oia e imi ohie i te moni i nia i te tua o vetahi ê. (Timoteo 1, 5:8) E nehenehe te haamanaˈoraa i tera mau ture aveia tano noa o te mau Papai e tauturu ia tatou ia taa i te feia ta tatou e nehenehe e tiaturi. Hau atu â, e tauturu te peeraa i te reira ia tatou taitahi ia tiaturihia e vetahi ê.

E mea faahiahia mau ia ora i roto i te hoê ao e nehenehe te taata atoa e tiaturihia e aita faahou te inoino no te taviriraa i te tiaturi! E moemoeâ noa anei te reira? E ere no te feia o te haafaufaa ra i te mau parau fafau bibilia, te tohu ra hoi te Parau a te Atua i te fatataraa mai o te hoê “fenua apî” nehenehe aita faahou e inoino, e haavare, e taviriraa atoa e aita e oto, e maˈi, e tae noa ˈtu te pohe! (Petero 2, 3:13; Salamo 37:11, 29; Apokalupo 21:3-5) Eita anei e hoona ia ite hau atu â i taua tiaturiraa ra? E oaoa roa ïa te mau Ite no Iehova i te haafanaˈo ia outou i te tahi atu â mau haamaramaramaraa no nia i te reira e te tahi atu â mau tumu parau faufaa roa.

[Hohoˈa i te api 8]

E faaere te feaaraa ia tatou i te oaoa

[Hohoˈa i te api 9]

E nehenehe tatou e tiaturi roa ia Iehova

[Hohoˈa i te api 11]

E hinaaro tatou paatoa i te mau taairaa niuhia i nia i te tiaturiraa te tahi i te tahi