Te mau farii e ore e mau te pape i roto

I TE tau bibilia, e mau apoo heruhia i raro i te fenua te mau farii pape, faaohipahia na mua no te haaputu i te pape. I te tahi mau anotau, i te Fenua tǎpǔhia, tera anaˈe te ravea no te haaputu i te pape faufaa roa no te ora.

Ei faataaraa i te hoê parau a te Atua, ua faahiti te peropheta Ieremia i te mau farii pape ei auraa taipe, ma te parau e: “A piti atura a tau mau taata nei parau ino i rave; o vau ta ratou i faarue, te tumu o te pape ora nei; e ua pao ratou i te farii pape na ratou iho, e farii amaha ïa, e ore e mau te pape i roto.”—Ieremia 2:13.

Ma te faarue i to ratou Atua ra o Iehova—“te tumu o te pape ora”—ua fariu atu to Iseraela i nia i te mau faufaa nuu papu ore e te mau nunaa etene e te haamoriraa i te mau atua hape mana ore. Ia au i te faaauraa a Ieremia, e mau farii puta aita e puai paruru aore ra faaora tera mau vahi haapuraa.—Deuteronomi 28:20.

E haapiiraa anei no tatou i teie mahana teie hiˈoraa no mutaa iho? Ia au i tei tupu i te tau o Ieremia, te tamau noa ra te Atua mure ore ra o Iehova i te riro ei Tumu otahi o te pape ora. (Salamo 36:9; Apokalupo 4:11) Ia ˈna noa ra, na roto i ta ˈna Tamaiti, o Iesu Mesia, e noaa ˈi i te taata te ora mure ore. (Ioane 4:14; 17:3) Mai te feia o te tau o Ieremia râ, e maiti te nahoa taata i teie mahana i te patoi e te faaino atoa i te parau a te Atua papaihia i roto i te Bibilia. E tiaturi râ ratou i te mau ravea poritita, i te mau manaˈo taata faufaa ore, e te mau tiaturiraa e te mau philosophia faufaa ore o te faaino i te Atua. (Korinetia 1, 3:18-20; Kolosa 2:8) E mea papu te maitiraa. O vai ta outou e tiaturi? O Iehova anei “te tumu o te pape ora,” aore ra te mau ‘farii pape amaha e ore e mau te pape i roto?’

[Hohoˈa i te api 32]

Hohoˈa hamanihia i te repo tunuhia o te hoê metua ruahine itehia i roto i te hoê menema Iseraela

[Faaiteraa i te tumu]

Hohoˈa patahia ma te parau faatia a te British Museum