Te atuatu ra anei oe i te faahiahiaraa?

UA TAPAO anei oe e e pinepine te feia papai i te Bibilia i te faaara i te faahiahiaraa i te mau ohipa e te mau ateriputi o te Atua? “Ua taa ê . . . to ˈu hamaniraahia,” o ta te papai salamo ïa i parau. (Salamo 139:14) “E Iehova,” o ta te peropheta Isaia ïa i papai, “o tau Atua hoi oe, e faateitei au ia oe; e haamaitai au i to oe iˈoa: e mau mea taa ê anaˈe ta oe i rave.” (Isaia 25:1) Aore ra a feruri na i te faahiahiaraa e te umereraa i faahitihia i roto i te mau parau a te aposetolo Paulo: “Auê te rahi hau ê atu o te paari e te ite o te Atua e!”—Roma 11:33.

Te faataa ra The Oxford Encyclopedic English Dictionary i te “faahiahiaraa” mai “te hoê huru aau faatupuhia e te tahi mea manaˈo-ore-hia, matau-ore-hia, aore ra aita e faataaraa, te hoê maereraa iho â râ e te umereraa aore ra te ui-maere-raa, e te vai ra ˈtu â.”

E ere anei i te mea oaoa ia ite i te faahiahiaraa o te mau tamarii rii o te faaaraara i te mata ia ite, ia manaˈo aore ra ia faaroo ratou i te mau mea apî? Te mea peapea, e pinepine e iti mai taua faahiahiaraa ra niuhia i nia i te ui-maere-raa aore ra te huru apî a mairi ai te matahiti.

Teie râ, no te feia papai i te Bibilia tei faahitihia aˈenei, e huru atoa no ratou te umereraa. Ua vai maoro te reira. No te aha? Ua atuatu ratou i te reira ma te feruriruri ma te aau mehara i te mau ohipa a te Atua. Ua pure te fatu salamo e: “Te manaˈo nei tau aau i te anotau tahito ra; te imi nei au i te mau ravea hanahana na oe ra; te feruri noa nei au i te mau ohipa [taa ê] a to rima ra.”—Salamo 143:5; The New English Bible.

Auê ïa i te popou e e nehenehe teie faahiahiaraa e itehia i rotopu i te feia haamori i te Atua no teie tau! Te vai ra anei te reira ia oe ra? Te atuatu ra anei oe i te reira?