Mea ora te parau a Iehova

Manaˈo faufaa o te Genese—II

MAI te poieteraa o te taata matamua o Adamu e tae atu i te poheraa o Iosepha te tamaiti a Iakoba, e puohu te Genese e 2 369 matahiti o te tuatapaparaa o te taata. I roto i to mua ˈtu vea, ua tatarahia na pene matamua 10 e na irava e 9 o te pene 11, o te faatia ra i te poieteraa e tae roa i te patu Babela. * E vauvau teie tumu parau i te mau manaˈo faufaa o te toea o te Genese, no nia i ta te Atua haaraa i nia ia Aberahama, Isaaka, Iakoba, e Iosepha.

E HOA O ABERAHAMA NO TE ATUA

(Genese 11:10–23:20)

E 350 tiahapa matahiti i muri aˈe i te diluvi, i roto i te opu o Sema te tamaiti a Noa, ua fanauhia mai te hoê taata ta te Atua i au roa. O Aberama to ˈna iˈoa, o Aberahama i muri aˈe. Ia au i te faaueraa a te Atua, ua faarue o Aberama i te oire Kaladaio o Ura e ua tiahapa i te hoê fenua ta Iehova i fafau e horoa no ˈna e to ˈna huaai. No to ˈna faaroo e auraro, ua parauhia o Aberahama ‘e taua no te Atua.’—Iakobo 2:23.

Ua haava o Iehova i to Sodoma e to te mau oire tapiri mau taata iino, e ua faaora ia Lota e ta ˈna na tamahine. Ua tupu te hoê parau fafau a te Atua i te fanauraahia mai Isaaka te tamaiti a Aberahama. Tau matahiti i muri aˈe, ua tamatahia to Aberahama faaroo i to Iehova faaueraa ia ˈna e pûpû i teie tamaiti ei tusia. Ua faaroo o Aberahama, ua tapeahia râ e te hoê melahi. E taata faaroo mau o Aberahama, e ua haapapuhia ia ˈna e maoti to ˈna huero e maitai ai te mau nunaa atoa. Ua oto roa o Aberahama i te poheraa ta ˈna vahine here o Sara.

Uiraa bibilia pahonohia:

12:1-3—Afea te faufaa a Aberahama i te manaraa, e eaha te maororaa? E au ra e ua mana te faufaa ta Iehova i faaau ia Aberahama, oia hoi “ei ia [Aberama] e maitai ai te mau  fetii atoa o te ao nei,” i to Aberama haereraa na Eupharate atu i Kanaana. Tei te 14 no Nisana paha 1943 H.T.T., e 430 matahiti hou Iseraela a faaorahia ˈi mai Aiphiti mai. (Exodo 12:2, 6, 7, 40, 41) E “faufaa mauraa roa” ta Aberahama. E mana noa te reira e tae roa i te maitairaa te mau fetii o te fenua e te mouraa te mau enemi atoa o te Atua.—Genese 17:7; Korinetia 1, 15:23-26.

15:13—Afea to Aberama huaai hamani-ino-raahia e 400 matahiti i te maoro? Ua haamata teie tau hamani-ino-raa i te matahiti 1913 H.T.T., i te faaoreraahia te û a Isaaka te tamaiti a Aberahama i te 5raa o to ˈna matahiti e i te tâhitohitoraa to ˈna taeae o Isemaela, 19 matahiti, ia ˈna. (Genese 21:8-14; Galatia 4:29) Ua hope te reira i te oraraa mai te mau Iseraela mai te faatîtîraa Aiphiti i te matahiti 1513 H.T.T.

16:2—Ua tano anei Sara i te horoaraa i ta ˈna tavini o Hagara ei vahine na Aberama? E peu matauhia i taua tau ra e e faahepohia te hoê vahine fanau ore ia horoa na ta ˈna tane i te hoê vahine tavini ia fanauhia mai te hoê tamarii aiˈa. I roto i te fetii o Kaina te faraa mai te peu e faaipoipo i te vahine rau. Ua riro atura te reira ei peu matauhia tei fariihia e te tahi feia haamori ia Iehova. (Genese 4:17-19; 16:1-3; 29:21-28) Aita râ Iehova i haamoe i ta ˈna ture aveia matamua e faaipoipo i te hoê noa apiti. (Genese 2:21, 22) Hoê noa apiti to Noa e to ta ˈna nau tamaiti, tei faaue-atoa-hia ‘ia fanau i te tamarii e ia faaî i te fenua.’ (Genese 7:7; 9:1; Petero 2, 2:5) E na Iesu Mesia i haapapu faahou i teie ture aveia.—Mataio 19:4-8; Timoteo 1, 3:2, 12.

19:8—Ua hape anei Lota i te pûpûraa i ta ˈna na tamahine i to Sodoma? Ia au i te ture no te pae Hitia o te râ, e hopoia na te hoê fatu fare e paruru i te mau manihini i ǒ na, noa ˈtu e e nehenehe oia e pohe. Ua ineine o Lota no te reira. Ua faaitoito oia i te haere i rapaeau i te nahoa ra, ua opani i te uputa, e ua paraparau ia ratou. I to ˈna pûpûraa i ta ˈna na tamahine, ua taa paha ia Lota e e vea na te Atua ta ˈna nau manihini, e ua manaˈo paha oia e e nehenehe te Atua e paruru i ta ˈna na tamahine mai ta ˈNa i paruru i to ˈna mama fetii o Sara i Aiphiti. (Genese 12:17-20) Ua paruruhia mau â Lota e ta ˈna na tamahine.

19:30-38—Ua faahapa anei Iehova i to Lota taeroraa e te fanauraa mai ta ˈna mau tamarii a ta ˈna na tamahine? Aita Iehova i faahapa i tera taotoraa i te fetii piri e i tera taeroraa ava. (Levitiko 18:6, 7, 29; Korinetia 1, 6:9, 10) Ua mauiui mau â Lota i te “parau-tia ore” a to Sodoma. (Petero 2, 2:6-8) Te faaite ra to na tamahine a Lota faataeroraa ia ˈna, e ua ite raua e eita oia e farii i te taoto ia raua mai te peu e aita oia i taero. Ei feia ěê râ, ua manaˈo ta ˈna na tamahine e tera anaˈe te ravea e ore ai to Lota fetii e moe. Te faatia ra te Bibilia i teie aamu no te faaite i te auraa o to Moabi (na roto ia Moabi) e to Amona (na roto ia Beneami) e te mau Iseraela, to Aberahama huaai.

Haapiiraa no tatou:

13:8, 9. E hiˈoraa maitai mau â ta Aberahama i vaiiho mai e nafea ia faaafaro i te peapea! Eiaha roa ˈtu tatou e haapae i te mau taairaa hau no te tahi apî i te pae moni, no to tatou iho hinaaro, aore ra no te teoteo.

15:5, 6. A ruhiruhia ˈi Aberahama e aitâ ta ˈna e tamaiti, ua paraparau atu oia i to ˈna Atua. Ua tamǎrû Iehova ia ˈna. Ei faahopearaa, ‘ua faaroo Aberahama ia Iehova.’ Ia haamahora tatou i to tatou aau ia Iehova na roto i te pure, ia farii i ta ˈna mau tamǎrûraa bibilia, e ia auraro ia ˈna, e puaihia to tatou faaroo.

15:16. Ua tapea Iehova i ta ˈna haavaraa i to Amori (aore ra, to Kanaana) e maha ui i te maoro, no te mea e Atua faaoromai oia. Ua tiai oia e aitâ faahou e apî. Mai ia Iehova, mea hinaarohia ia faaoromai tatou.

18:23-33. Eita Iehova e haamou i te taata mai tera noa. E paruru oia i te feia parau-tia.

19:16. Te “faatautau noa ra” Lota e ua aratai na melahi ia ˈna e to ˈna fetii i rapaeau i te oire o Sodoma. E haerea paari eiaha e faatautau a tiai ai tatou i te hopea o te ao ino.

 19:26. E mea maamaa mau â ia nevaneva aore ra ia mihi i ta tatou i vaiiho i muri i roto i te ao!

NA TAMAITI 12 A IAKOBA

(Genese 24:1–36:43)

Ua faanaho Aberahama ia faaipoipo Isaaka ia Rebeka, o te faaroo ra ia Iehova. Ua fanau mai oia i na maehaa o Esau e o Iakoba. Ua haafaufaa ore Esau i to ˈna tufaa matahiapo e ua hoo atu ia Iakoba, o tei haamaitaihia i muri aˈe e to ˈna papa. Ua horo Iakoba i Padana-arama, a faaipoipo atu ai ia Lea e ia Rahela e a haapao ai i te mau nǎnǎ a to raua papa fatata e 20 matahiti i te maoro, hou a reva ˈi e to ˈna utuafare. Ia Lea, Rahela, e ta raua na tavini e piti, 12 tamaiti e e tamahine atoa ta Iakoba. Ua taputô Iakoba e te hoê melahi e ua haamaitaihia, e ua tauihia to ˈna iˈoa ei Iseraela.

Uiraa bibilia pahonohia:

28:12, 13—Eaha te auraa o te “eˈa” ta Iakoba i moemoeâ? E au teie “eˈa” i te hoê eˈa ofai, o te faaite ra e e taairaa to rotopu i te fenua e te raˈi. Te faaite ra te paiumaraa te mau melahi a te Atua i nia e te pouraa mai i raro i taua eˈa ra, e te ohipa ra te mau melahi ma te faahiahia i rotopu ia Iehova e te taata ta ˈna i farii.

30:14, 15—No te aha Rahela i ore ai i taoto i ta ˈna tane no to ˈna hinaaro i te tahi dudaima? I tahito ra, e faaohipahia te hotu o te dudaima ei raau rapaauraa no te arai aore ra no te tamǎrû i te ira iriti. Ua parau-atoa-hia e e faaara atoa te reira i te hinaaro e taati e e faarahi i te puai fanauraa aore ra e tauturu i te tôraa. (Sire a Solomona 7:13) Aita te Bibilia e faaite ra eaha tei turai ia Rahela ia rave i tera faaotiraa, ua manaˈo râ paha oia e e tauturu te dudaima ia ˈna ia tô, a ore atu ai to ˈna haama ei vahine fanau ore. Tau matahiti râ i muri aˈe, “ua horoa maira [Iehova] i te tamarii na ˈna.”—Genese 30:22-24.

Haapiiraa no tatou:

25:23. E mana to Iehova e ite i te hamaniraa ihi tapao tupuna o te hoê pêpe i roto i te opu, e faaohipa i to ˈna ite atea e e faataa oioi o vai ta ˈna e maiti no ta ˈna mau opuaraa. Eita râ oia e faataa ê na i te oraraa o te taata.—Hosea 12:3; Roma 9:10-12.

25:32, 33; 32:24-29. Te faaite ra to Iakoba hinaaro i te tufaa matahiapo e to ˈna aroraa e te hoê melahi i te po taatoa ia haamaitaihia oia, e ua haafaufaa mau â oia i te mau mea moˈa. Mea rahi te mea moˈa ta Iehova i horoa mai, mai to tatou taairaa e o ˈna e ta ˈna faanahonahoraa, te hoo, te Bibilia, e to tatou tiaturiraa i te Basileia. Ia riro ïa tatou mai ia Iakoba ma te haafaufaa i te reira.

34:1, 30. Ua tupu te ati i ‘hauriria ˈi’ Iakoba no te mea ua faahoa Dina i te feia aita e here ra ia Iehova. Ia maiti maitai tatou i to tatou mau hoa e tia ˈi.

UA HAAMAITAI IEHOVA IA IOSEPHA I AIPHITI

(Genese 37:1–50:26)

No to ratou pohehae i hoo ai te mau tamaiti a Iakoba i to ratou taeae o Iosepha ei tîtî. I Aiphiti, ua mau Iosepha i te fare tapearaa no to ˈna pee-maite-raa ma te itoito i te mau ture aveia morare a te Atua. I muri aˈe, ua tuuhia oia no te tatara i to Pharao moemoeâ, o te faaite atea ra e hitu matahiti auhune e e hitu matahiti oˈe i muri noa iho. Ua riro Iosepha ei haapao maa i Aiphiti. No te oˈe, ua haere atu to ˈna mau taeae i Aiphiti e tii i te maa. Ua tahoê faahou te fetii e ua parahi i te fenua ruperupe o Gosena. Hou a pohe ai, ua haamaitai Iakoba i ta ˈna mau tamaiti e ua faahiti i te hoê parau tohu o te horoa i te tiaturiraa papu o te mau haamaitairaa rahi i muri roa ˈˈe. Ua hopoihia to Iakoba pera e huna i Kanaana. I to Iosepha poheraa i te 110raa o to ˈna matahiti, ua mirihia to ˈna tino e ua hopoihia i te Fenua tǎpǔhia.—Exodo 13:19.

Uiraa bibilia pahonohia:

43:32—No te aha to Aiphiti e ore ai e au e tamaa e te mau Hebera? No te manaˈo oti faaroo paha aore ra no te teoteo o te nunaa. Mea riri atoa na to Aiphiti te mau tiai mamoe. (Genese  46:34) No te aha? E tiaraa haihai roa to te mau tiai mamoe i Aiphiti. Aore ra no te iti paha o te fenua no te faaapu i vahavaha ˈi to Aiphiti i te feia e imi ra i te vahi aihere no te mau nǎnǎ.

44:5—Ua faaohipa iho â anei Iosepha i te auˈa no te imi i te tapao? E ravea paari te auˈa ario e tei parauhia no nia i te reira. E taata haamori haapao maitai o Iosepha ia Iehova. Aita iho â ïa oia i faaohipa i te auˈa no te imi i te tapao, mai ia Beniamina atoa tei ore hoi i eiâ ˈtu.

49:10; MN—Eaha te auraa o “te sepeta” e “te raau faatere”? E raau te sepeta na te hoê arii ei taipe o te mana arii. E raau iti roa ta te hoê taata faatere ei taipe o to ˈna mana faatere. Te faaite ra to Iakoba faahitiraa i te reira e e vai te mana e te puai rahi i roto i te opu o Iuda e tae noa mai te Silo. Teie huaai o Iuda, o Iesu Mesia ïa ta Iehova i horoa ˈtu i te faatereraa i te raˈi. E mana arii e e puai faatere to te Mesia.—Salamo 2:8, 9; Isaia 55:4; Daniela 7:13, 14.

Haapiiraa no tatou:

38:26. Ua hape Iuda i to ˈna taotoraa i ta ˈna hunoa vahine ivi o Tamara. I to ˈna râ iteraa e ua hapû Tamara ia ˈna, ua faˈi o Iuda i ta ˈna hape ma te haehaa. Ia faˈi oioi atoa ïa tatou i ta tatou mau hape.

39:9. Te faaite ra to Iosepha huru i nia i te vahine a Potiphara, e hoê â to ˈna manaˈo e to te Atua no nia i te mau faufaa morare e na te mau faaueraa tumu a te Atua e aratai ra i to ˈna manaˈo haava. Eiaha anei ïa tatou e na reira atoa a ite atu â ˈi tatou i te parau mau?

41:14-16, 39, 40. E nehenehe ta Iehova e taui i te huru tupuraa o te feia e mǎtaˈu ra ia ˈna. Ia tupu te fifi, e haerea paari ia tiaturi tatou ia Iehova e ia tapea i te haapao maitai ia ˈna.

Ua faaroo tamau ratou

E feia faaroo mau â e te mǎtaˈu i te Atua o Aberahama, Isaaka, Iakoba, e Iosepha. E haapuai mau â to ratou aamu papaihia i roto i te Genese, i te faaroo e e horoa mai e rave rahi haapiiraa faufaa.

E nehenehe outou e faufaahia i teie aamu a rave ai outou i ta outou taioraa bibilia tahebedoma no te Haapiiraa o te taviniraa teotaratia. E tauturu te feruriruriraa i tei vauvauhia mai i te faaoraora i te aamu.

[Nota i raro i te api]

[Hohoˈa i te api 14]

E taata faaroo o Aberahama

[Hohoˈa i te api 14]

Ua haamaitai Iehova ia Iosepha

[Hohoˈa i te api 14]

Ua paruruhia te taata parau-tia o Lota e ta ˈna na tamahine