E nehenehe anei te faaroo e faaora i te feia maˈi?

E IMI tatou i te tamǎrûraa e te ora ia maˈihia tatou. Ua ite paha outou i roto i te Bibilia e ua faaora pinepine o Iesu Mesia i te mau huru maˈi atoa, a tamǎrû ai e rave rahi feia maˈi. Mea nafea tera mau faaoraraa i te tupuraa? Te parau nei te Bibilia e mea na roto i te ‘mana o te Atua.’ (Luka 9:42, 43; Ohipa 19:11, 12) No reira, maoti te varua moˈa o te Atua i tupu ai te faaoraraa, eiaha noa te faaroo o te taata. (Ohipa 28:7-9) No reira o Iesu i ore ai i titau ia faahiti te feia maˈi i to ratou faaroo ia ˈna ia ora ratou.

E ui paha outou: ‘E ohipa tahito anei te mau faaoraraa semeio aore ra e tupu faahou anei te mau faaoraraa ta Iesu i rave? Eaha te tiaturiraa no te mau taata e maˈi mauiui aore ra ora ore to ratou?’

Te faataa nei te Bibilia e i roto i te ao apî parau-tia a te Atua, e faatupu faahou te puai o te Atua i te mau faaoraraa semeio ta Iesu i rave a vai ai oia i te fenua nei. E oaoa te mau Ite no Iehova no to outou vahi i te faaite ia outou e nafea e afea te Atua e faatupu ai i ta te taata faaora maˈi faaroo e ore roa e tia ia rave—te faaoreraa i te mau maˈi atoa e te pohe. Oia, na te Atua “e haamou roa i te pohe e a muri noa ˈtu.”—Isaia 25:8.