Tamahanahanaraa no te feia ati

I MUTAA iho, ia faaruru te mau tane e te mau vahine haapao maitai i te ati, e pure ratou i te Atua ma te aau tae no te aratairaa. E rave atoa râ ratou i te mau taahiraa e titauhia no te faaiti mai i te ati, mai te faaohiparaa i te mau ravea no te ape i te feia haavî. Ei hiˈoraa, ua tauturu te tiaturiraa ia Iehova e ta ˈna iho tutavaraa ia Davida ia faaruru i to ˈna ati. E o tatou i teie mahana?

Ia faaruru outou i te ati, e rave atoa outou i te mau taahiraa e titauhia no te faaafaro i to outou fifi. Ei hiˈoraa, ia ere outou i te ohipa, eita anei outou e tutava i te imi i te tahi ohipa e tano o te turu ia outou e to outou utuafare? (Timoteo 1, 5:8) Aore ra ia maˈihia outou, eita anei outou e imi i te tauturu tano i te pae rapaauraa? Te mea anaanatae, ua ite Iesu e, e mana hoi to ˈna no ǒ mai i te Atua ra no te faaora i te mau huru maˈi atoa, e ‘no te feia maˈi te [taote].’ (Mataio 9:12; MN) Eita râ paha to outou mau ati e ore noa; e titauhia paha ia tamau outou i te faaoromai atu i nia i te tahi faito.

No te aha e ore ai e tuu i tera fifi i te Atua ra o Iehova na roto i te pure? Ei hiˈoraa, ia imi tatou i te ohipa, e tauturu mai te tiaturiraa i te Atua na roto i te pure ia patoi i te mau faahemaraa atoa e farii i te hoê ohipa e ofati ra i te mau faaueraa tumu bibilia. E ape atoa tatou i te ‘taa ê roa i te [faaroo]’ na roto i te nounouraa aore ra te nounou moni. (Timoteo 1, 6:10; MN) Oia mau, ia rave tatou i te mau faaotiraa faufaa no nia anei i te ohipa aore ra te utuafare aore ra te ea, e nehenehe tatou e pee i te aˈoraa a Davida: “E tuu oe i ta oe hopoia ia Iehova ra, e na ˈna oe e tauturu mai; e ore roa oia e vaiiho noa ˈtu i te taata parau-tia ia faaaueuehia.”—Salamo 55:22.

E tauturu atoa mai te pure haavare ore ia vai faito to tatou feruriraa, ia ore to tatou ati ia faateimaha roa ia tatou. Ei Kerisetiano mau, ua papai te aposetolo Paulo e: “E faaite hua . . . i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai.” E nafea te pure haavare ore e nehenehe ai e tamahanahana ia tatou? “Na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.” (Philipi 4:6, 7) E “hau ê atu” te hau a te Atua “i te ite taata  nei.” No reira, eita tatou e aueue ia teimaha tatou i te mau huru aau peapea. E ‘faaitoito te reira i to tatou aau, e to tatou manaˈo,’ o te tauturu ïa ia tatou ia ape i te tahi huru feruri ore e te maamaa, o te nehenehe e faarahi i to tatou ati.

E nehenehe atoa te pure e taui i te tereraa o te hoê tupuraa. I to te aposetolo Paulo riroraa mai ei mau auri i Roma, ua ani haehaa o ˈna i te mau hoa Kerisetiano ia pure no ˈna. No te aha Paulo i na reira ˈi? “Ia faahoˈi-vave-hia . . . vau ia outou na i rahi hua ˈi ta ˈu parau ia outou, e e na reira,” ta ˈna ïa i papai ia ratou. (Hebera 13:19) Te auraa, ua ite o Paulo e e nehenehe te mau pure tuutuu ore a to ˈna mau hoa faaroo ta Iehova e faaroo e ohipa i nia i te taime o ˈna e tuuhia ˈi.—Philemona 22.

E taui anei te pure i te faahopearaa o to outou ati? Peneiaˈe. E mea tia râ ia ite tatou e eita paha te Atua ra o Iehova e pahono i ta tatou mau pure mai ta tatou e hinaaro ra. Ua pure o Paulo tau taime no nia i te hoê ‘tara i roto i to ˈna tino,’ peneiaˈe te hoê fifi i te pae tino. Aita te Atua i faaore i tera ati, ua parau râ ia Paulo e: “To ˈu nei maitai atire ïa ta oe: ei te paruparu e taa maitai roa ˈi to ˈu puai.”—Korinetia 2, 12:7-9.

No reira, eita paha to tatou ati e ore taue. E nehenehe râ tatou e haapapu i to tatou tiaturiraa i to tatou Metua i te raˈi. (Iakobo 1:2-4) Ia papu ia tatou e noa ˈtu e eita te Atua ra o Iehova e faaore i te ati, e nehenehe o ˈna ‘e faatupu i te haapuraa i taua ati ra, ia tia ia tatou ia faaoromai.’ (Korinetia 1, 10:13) Mea faahiahia ia tapao e e parauhia Iehova “te Atua no ˈna anaˈe te mahanahana; o tei haamahanahana mai ia matou i to matou mau pohe atoa nei.” (Korinetia 2, 1:3, 4) E nehenehe te Atua e horoa mai i ta tatou e hinaaro no te faaoromai, e e tiaturiraa o te ora mure ore to tatou.

Te fafau ra te Parau a te Atua, te Bibilia e “e horoi [Iehova] i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa.” (Apokalupo 21:3, 4) E mea fifi roa anei ia tiaturi i te hoê ao aita e ati? Peneiaˈe e mea fifi mai te peu e ua matau outou i te ora i roto i te ati. Tera râ, o te oraraa ma te mǎtaˈu ore e te ati ore ta te Atua i fafau, e e tupu iho â ta ˈna opuaraa.—Isaia 55:10, 11.

[Hohoˈa i te api 7]

Mai roto mai i te hepohepo e i te tamahanahanaraa