Uiraa a te feia taio

I te mea e aita e tufaa ta te mau ati Levi i Iseraela i tahito ra, mea nafea te ati Levi ra o Hanameela i nehenehe ai e hoo atu i te hoê aua i to ˈna taeae fetii ati Levi ra o Ieremia, mai tei faahitihia i roto i te Ieremia 32:7?

No nia i te mau ati Levi, ua parau Iehova ia Aarona e: “Eiaha to oe ei aiˈa . . . , eiaha to oe ei tufaa i roto ia ratou [Iseraela] ra.” (Numera 18:20) Noa ˈtu râ, ua faataahia no te mau ati Levi e 48 oire e to ratou mau aua e ati aˈe te Fenua tǎpǔhia. O Anatota te oire tumu o Ieremia, hoê o te mau oire i faataahia no “te tamarii a Aarona tahuˈa.”—Iosua 21:13-19; Numera 35:1-8; Paraleipomeno 1, 6:54, 60.

I roto i te Levitiko 25:32-34, e ite tatou e ua horoa Iehova i te mau faaueraa taa maitai no nia i ‘te tiaraa o te hoo-faahou-raa’ mai i te faufaa a te mau ati Levi. E au ra e e tiaraa tufaa to te utuafare ati Levi taitahi no nia i te faturaa, te faaohiparaa, e te hooraa ˈtu i te mau tâpû fenua taa maitai. E ô atoa mai ïa te hooraa ˈtu e te hoo-faahou-raa mai i te faufaa. * I roto e rave rahi tuhaa, ua fatu e ua faaohipa te mau ati Levi i te faufaa mai te mau Iseraela atoa o te tahi atu mau opu.

Peneiaˈe, ua tutuuhia mai te faturaa o tera fenua ati Levi na roto i te tufaa fetii. No nia râ i ‘te tiaraa o te hoo-faahou-raa’ mai, e fariihia te mau hooraa i rotopu noa i te mau ati Levi. E au atoa ra e o te fenua i roto i te mau oire noa te hoohia ˈtu e te hoo-faahou-hia mai, no te mea eita e hoohia “te mau aua i te hiti i rapae au mai i to ratou mau oire ra,” “o ta ratou hoi taoˈa mau roa ˈtu te reira.”—Levitiko 25:32, 34.

No reira, e au ra e o taua huru aua ra ta Ieremia i hoo faahou mai ia Hanameela. Tei roto te reira i te mau otia o te oire. Ua haapapu o Iehova iho e na Hanameela “te aua” e tei ia Ieremia ra ‘te ture o te hoo-faahou-raa’ mai. (Ieremia 32:6, 7) Ua faaohipa taipe o Iehova i taua hooraa ra no te haapapu i ta ˈna parau fafau e e hoˈi faahou te mau Iseraela e ani i ta ratou tufaa fenua i muri aˈe i te tau o te hopoi-tîtî-raa i Babulonia.—Ieremia 32:13-15.

Aita e haapapuraa e ua fatu o Hanameela ma te tano ore i te fenua i Anatota. Aita roa ˈtu e haapapuraa e ua ofati o ˈna i te ture a Iehova i to ˈna aniraa ia Ieremia ia hoo i tera aua i Anatota aore ra ua faaohipa o Ieremia i to ˈna tiaraa o te hoo-faahou-raa mai ma te tano ore no te hoo mai i tera aua.—Ieremia 32:8-15.

[Nota i raro i te api]