E faaitoito mai ia Ieremia
E faaitoito mai ia Ieremia
“Tiai ia Iehova; e faaitoito; e na ˈna e faaitoito mai i to aau ra: e tena na, e tiai â oe ia Iehova.”—SALAMO 27:14.
1. Eaha te haamaitairaa rahi ta te mau Ite no Iehova e fanaˈo ra?
TEI roto te mau Ite no Iehova i te hoê paradaiso pae varua. (Isaia 11:6-9) I roto i teie ao arepurepu roa, te fanaˈo ra ratou i te hoê vahi pae varua otahi e te mau hoa Kerisetiano, o te vai hau ra e te Atua ra o Iehova e te tahi i te tahi. (Salamo 29:11; Isaia 54:13) E te rahi noa ˈtura to ratou paradaiso pae varua. Te turu ra te taata atoa o ‘te ohipa ra i te hinaaro o te Atua ma te tae mau o te aau’ i te faaaanoraa i te reira. (Ephesia 6:6) E nafea? Ma te ora ia au i te mau faaueraa tumu bibilia e te haapii ia vetahi ê ia na reira atoa, a titau manihini atu ai ïa ia ratou ia fanaˈo i te mau haamaitairaa rahi o tera paradaiso.—Mataio 28:19, 20; Ioane 15:8.
2, 3. Eaha ta te mau Kerisetiano mau e faaoromai ra?
2 E ere râ no te mea te ora ra tatou i roto i te hoê paradaiso pae varua, eita ïa tatou e û i te mau tamataraa. E taata tia ore noâ tatou e e faaruru tatou i te mau mauiui o te maˈi, te matahiti rahi, e te pohe ei faahopearaa. Hau atu â, te ite nei tatou i te tupuraa o te mau parau tohu no nia i te “anotau hopea.” (Timoteo 2, 3:1) Te tairi nei te tamaˈi, te ohipa ino, te maˈi, te oˈe, e te tahi atu mau ati ino mau i te huitaata atoa, e aita te mau Ite no Iehova i paruruhia.—Mareko 13:3-10; Luka 21:10, 11.
3 Hau atu â i tera mau mea atoa, ua ite maitai tatou e i rapaeau i te vahi mahanahana o to tatou paradaiso pae varua, te farara ra te mataˈi toetoe o te patoiraa. Ua faaara Iesu i ta ˈna mau pǐpǐ e: “No te mea . . . e ere outou i to teie nei ao, o vau i maiti ia outou no roto i teie nei ao, e riri mai ai teie nei ao ia outou. E haamanaˈo i ta ˈu i parau atu ia outou na, Aore te tavini i hau i to ˈna ra fatu. I hamani ino na ratou ia ˈu ra, e hamani ino atoa ïa ratou ia outou.” (Ioane 15:18-21) Aita te mau mea i taa ê atu i teie tau. Aitâ te rahiraa o te taata e taa ra aore ra e haafaufaa ra i ta tatou huru haamoriraa. E faahapa mai te tahi pae, e faaooo mai, aore ra e riri atoa mai, mai ta Iesu i faaara na. (Mataio 10:22) O tatou te faaino-pinepine-hia ra ma te mau haaparareraa parau hape e te tia ore na roto i te vea. (Salamo 109:1-3) Oia, e faaû tatou paatoa i te mau tupuraa fifi, e e toaruaru paha te tahi pae o tatou. E nafea tatou e faaoromai ai?
4. Ihea tatou e imi ai i te tauturu no te faaoromai?
4 E tauturu mai Iehova. Ua papai te fatu salamo ma te faauruahia e: “E ati rahi to te taata parau-tia ra; e faaorahia râ oia e Iehova i taua mau ati atoa ra.” (Salamo 34:19; Korinetia 1, 10:13) E nehenehe e rave rahi o tatou e haapapu e ia tiaturi roa tatou ia Iehova, e horoa mai oia i te puai no te faaoromai i te mau fifi atoa. E tauturu mai to tatou here ia ˈna e te oaoa i mua ia tatou nei ia aro i te toaruaruraa e te mǎtaˈu. (Hebera 12:2) No reira, noa ˈtu te mau fifi, e tamau maite noa tatou.
Ua haapuai te Parau a te Atua ia Ieremia
5, 6. (a) Eaha te mau hiˈoraa o te feia haamori mau i faaoromai na ta tatou e fanaˈo nei? (b) Ua nafea Ieremia i te titauraahia ia ˈna ia riro ei peropheta?
5 I te roaraa o te tuatapaparaa, ua oaoa te mau tavini haapao maitai a Iehova noa ˈtu te mau tupuraa fifi. I ora na te tahi pae i te mau tau haavaraa i to Iehova faataeraa i to ˈna riri i nia i te feia taiva. I rotopu i tera feia haamori haapao maitai, te vai ra o Ieremia e te tahi feia o to ˈna ra tau, oia atoa te mau Kerisetiano no te senekele matamua. Ua papaihia tera mau hiˈoraa o te tuatapaparaa i roto i te Bibilia no to tatou faaitoitoraa, e e haapii rahi tatou na roto ia ratou. (Roma 15:4) A hiˈo na ia Ieremia.
6 I to ˈna apîraa, ua titauhia ia Ieremia ia tavini ei peropheta i Iuda. E ere i te hoê hopoia ohie. Te haamori ra e rave rahi i te mau atua hape. Noa ˈtu e e mea haapao maitai o Iosia, a arii ai oia i to Ieremia haamataraa i ta ˈna taviniraa, ua taiva te mau arii atoa no muri mai, e aita te rahiraa o te feia na ratou te hopoia e haapii i te nunaa—te mau peropheta e tahuˈa—i paturu i te parau mau. (Ieremia 1:1, 2; 6:13; 23:11) Eaha ïa to Ieremia huru a titau ai Iehova ia ˈna ia riro ei peropheta? Ua mǎtaˈu oia! (Ieremia 1:8, 17) Ua haamanaˈo Ieremia i to ˈna huru na mua ˈtu: “Ua parau atura vau, Auê! e tau Fatu, e Iehova e! aore hoi au i ite i te parau; e tamaiti iti hoi au.”—Ieremia 1:6.
7. Eaha te huru o te taata ta Ieremia i faaû na i roto i ta ˈna tuhaa fenua, e ua aha oia?
7 Aita te taata o te tuhaa fenua a Ieremia i tâuˈa rahi roa, e ua faaû pinepine oia i te patoiraa puai. I te hoê taime, ua tairi e ua tuu atura Pasura, te hoê tahuˈa, ia ˈna i roto i te tapearaa. Ua papai Ieremia eaha to ˈna huru i tera taime e: “Ia parau . . . vau ra, E ore au e parau i te reira [no nia ia Iehova]; e ore au e parau faahou i to ˈna ra iˈoa.” Peneiaˈe mai tera atoa outou i te tahi mau taime, e hinaaro outou e faarue. A tapao na eaha tei tauturu ia Ieremia ia tamau maite. Ua na ô oia e: “Riro atura taua parau ra [aore ra poroi, a te Atua] mai te auahi ama i roto i tau aau ra, ua opanihia i roto i to ˈu ra mau ivi; rohirohi aˈera vau i te faaoromai-noa-raa, e aita ˈtura e tia ia mamû.” (Ieremia 20:9) Mai tera atoa anei te mau parau a te Atua i nia ia outou?
To Ieremia mau hoa
8, 9. (a) Eaha te paruparu ta te peropheta Uria i faaite, e eaha te faahopearaa? (b) No te aha Baruka i toaruaru ai, e mea nafea to ˈna tautururaahia?
8 E ere o Ieremia anaˈe tei tohu. E mau hoa to ˈna, e o tei faaitoito paha ia ˈna. I te tahi râ mau taime, aita to ˈna mau hoa i ohipa ma te paari. Ei hiˈoraa, te faaite haere ra te hoê hoa peropheta o Uria te iˈoa i te mau faaararaa no nia ia Ierusalema e ia Iuda “mai te mau parau atoa a Ieremia.” Teie râ, i to te arii Iehoiakima faaueraa e haapohe ia Uria, ua horo ê te peropheta ma te mǎtaˈu i Aiphiti. Aita te reira i faaora ia ˈna. Ua aˈuaˈu te mau taata o te arii ia ˈna, ua haru ia ˈna e ua faahoˈi ia ˈna i Ierusalema i reira to ˈna haapoheraahia. Eaha râ paha Ieremia i te hitimahuta!—Ieremia 26:20-23.
9 Te tahi atu hoa o Ieremia, o ta ˈna ïa papai parau o Baruka. Ua riro Baruka ei tauturu maitai no Ieremia, i te hoê râ taime, ua ere atoa oia i te hiˈoraa pae varua. Ua haamata ˈtura oia i te amuamu ma te parau e: “Atae hoi au nei e! ua apiti atoa mai Iehova i te mihi i taua oto no ˈu nei; ua rohirohi au i to ˈu autâ-noa-raa, e aita o ˈu e faaearaa.” Ua ere Baruka, o tei toaruaru, i te mauruuru no te mau mea pae varua. Ua horoa râ Iehova ma te mǎrû i te aˈoraa paari na Baruka, e ua faatitiaifarohia oia. Ua papu ihora ia ˈna e e ora oia i te haamouraa o Ierusalema. (Ieremia 45:1-5) Eaha râ paha Ieremia i te faaitoitohia i te noaa-faahou-raa ia Baruka to ˈna vai-faito-raa pae varua!
Ua paturu Iehova i ta ˈna peropheta
10. Eaha te mau parau fafau paturu ta Iehova i parau ia Ieremia?
10 Te mea faufaa roa ˈˈe, aita Iehova i faarue ia Ieremia. Ua taa ia ˈna te huru o ta ˈna peropheta e ua haapuai ia ˈna e ua horoa i te tauturu ta ˈna i hinaaro. Ei hiˈoraa, i te omuaraa o ta Ieremia taviniraa a feaa ˈi oia no nia i to ˈna mau aravihi, ua parau Iehova ia ˈna e: “Eiaha oe e mǎtaˈu i to ratou mata; ei pihai atoa iho hoi au ia oe ei faaora ia oe, te parau maira Iehova.” I muri aˈe i to ˈna faataaraa i ta ˈna peropheta eaha ta ˈna hopoia, ua na ô Iehova e: “E tamaˈi mai hoi ratou ia oe, e ore râ e tupu; ei pihai atoa iho vau ia oe ei faaora ia oe, te parau maira Iehova.” (Ieremia 1:8, 19) Auê ïa parau fafau mahanahana! E ua faatupu iho â Iehova i ta ˈna parau.
11. Mea nafea to tatou iteraa e ua faatupu Iehova i ta ˈna parau fafau e paturu ia Ieremia?
11 No reira, i muri aˈe i to ˈna tuuraahia i roto i te tapearaa e to ˈna faaoooraahia e te taata, ua parau Ieremia ma te tiaturi e: “Tei ia ˈu . . . Iehova, ei aito riariahia ïa; e riro te mau hamani ino ia ˈu ra i te turori, e ore roa hoi ta ratou e tupu; ua haama roa ratou.” (Ieremia 20:11) I te mau matahiti i muri aˈe, a tutavahia ˈi i te haapohe ia Ieremia, tei pihai iho noa Iehova ia ˈna, e mai ia Baruka, ua ora mai Ieremia i te haamouraa o Ierusalema ei taata tiamâ, area to ˈna mau taata hamani ino e te feia i tâuˈa ore i ta ˈna mau faaararaa ra, ua pohe ïa aore ra ua hopoi-ê-hia i Babulonia.
12. Noa ˈtu te mau tumu o te toaruaruraa, eaha ta tatou e haamanaˈo?
12 Mai ia Ieremia, i teie tau e mea rahi te Ite no Iehova e faaoromai ra i te mau mauiui. Mai tei faahitihia aˈenei, na to tatou iho huru tia ore e faatupu i te tahi o te reira, na te tupuraa arepurepu o teie ao, e na te feia e patoi ra i ta tatou ohipa e faatupu i te tahi atu. E nehenehe tera mau mauiui e faatoaruaru. Mai ia Ieremia, e haamata paha tatou i te ui e e tamau anei tatou i ta tatou taviniraa. Oia mau, ua ite tatou e e toaruaru tatou i te tahi taime. E tamata te toaruaruraa i te hohonu o to tatou here ia Iehova. E faaoti papu anaˈe ïa eiaha e vaiiho i te toaruaruraa ia faarue i ta Iehova taviniraa mai ia Uria. E pee anaˈe râ ia Ieremia e e tiaturi anaˈe i ta Iehova paturu.
E nafea ia aro i te toaruaruraa
13. E nafea tatou e pee ai i na hiˈoraa o Ieremia e o Davida?
13 Ua aparau tamau Ieremia i te Atua ra o Iehova, ma te faaite atu i to ˈna mau manaˈo hohonu roa ˈˈe e ma te taparuparu i te puai. E hiˈoraa maitai tera ia pee. Ua papai Davida i tahito ra, o tei tiaturi i teie noa Tumu o te puai, e: “E faaroo mai, e Iehova, i tau parau; e haapao mai oe i to ˈu uururaa: e faaroo mai i tau tiaororaa, e tau arii, e tau Atua; te pure atu nei hoi au ia oe.” (Salamo 5:1, 2) Te faaite ra te aamu faauruahia o te oraraa o Davida e ua pahono pinepine Iehova i ta Davida mau pure no te ani i te tauturu. (Salamo 18:1, 2; 21:1-5) Oia atoa, ia teimaha te mau faaheporaa aore ra e au ra eita to tatou mau fifi e matara, mea mahanahana roa ia fariu ia Iehova i roto i te pure e ia haamahorahora i to tatou aau ia ˈna. (Philipi 4:6, 7; Tesalonia 1, 5:16-18) E faaroo mai Iehova. Te haapapu maira hoi oia e ‘e tiai mai oia ia tatou.’ (Petero 1, 5:6, 7) E ere râ i te mea tano ia pure ia Iehova a ore atu ai e faaroo i ta ˈna e parau ra, e ere anei?
14. Eaha te faahopearaa o ta Iehova mau parau i nia ia Ieremia?
14 E nafea Iehova e paraparau mai ai? A hiˈo faahou na ia Ieremia. No te mea e peropheta Ieremia, ua paraparau roa ˈtu Iehova ia ˈna. Te faataa ra Ieremia i te faahopearaa o ta te Atua mau parau i nia i to ˈna aau: “Ua itea ta oe parau e ua amu atura vau; e ta oe i faaue maira, o to ˈu ïa oaoa, o te oaoaraa ïa na tau aau: ua mairihia hoi au i to oe ra iˈoa, e te Atua sabaota ra, e Iehova.” (Ieremia 15:16) Oia, ua oaoa Ieremia i te mea e ua mairihia oia i to te Atua iˈoa e e mea faufaa roa ta ˈNa parau no te peropheta. No reira, mai te aposetolo Paulo, ua hinaaro Ieremia e faaite haere i te poroi i horoahia ia ˈna.—Roma 1:15, 16.
15. E nafea tatou e faaô ai i ta Iehova mau parau i roto i to tatou aau, e eaha te mau manaˈo o te turai ia tatou ia faaoti papu eiaha e mamû noa?
15 Eita Iehova e paraparau roa ˈtu i te hoê taata i teie tau. Teie râ, te fanaˈo ra tatou i ta te Atua mau parau i roto i te Bibilia. No reira, mai te peu e e rave maite tatou i ta tatou haapiiraa bibilia e e feruriruri hohonu tatou i ta tatou e haapii, e riro te mau parau a te Atua ei ‘oaoa e ei oaoaraa’ na to tatou aau atoa. E e oaoa roa tatou e te amo ra tatou i to Iehova iˈoa ia tufa tatou i taua mau parau ra na vetahi ê. Eiaha roa ˈtu tatou e haamoe i te mea e aita ˈtu e nunaa i te ao i teie tau e faaite haere ra i to Iehova iˈoa. O to ˈna mau Ite anaˈe te faaite ra i te parau apî maitai o te Basileia o te Atua i haamauhia e o te haapii ra i te feia mǎrû ia riro ei pǐpǐ a Iesu Mesia. (Mataio 28:19, 20) Auê tatou i te fanaˈo! Ia hiˈohia te fanaˈoraa taa ê ta Iehova i horoa mai ma te here, e nafea tatou e mamû noa ˈi?
E haapao maitai anaˈe i ta tatou mau amuimuiraa
16, 17. Eaha to Ieremia manaˈo i te mau amuimuiraa, e e nafea tatou e pee ai ia ˈna?
16 Te faahiti ra Ieremia i te tahi atu mea o tei tauturu ia ˈna ia faaitoito. Ua na ô oia e: “Aita vau i parahi i te amuiraa no te taiata ra, aore hoi au i oaoa; no to rima ra i parahi noa vau anaˈe ra, ua faaî roa hoi oe ia ˈu i te riri.” (Ieremia 15:17) E mea au aˈe na Ieremia ia faaea oia anaˈe i te haaviiviihia e te mau hoa iino. I teie tau, e hiˈo atoa tatou i te mau mea mai tera. Eiaha roa ˈtu tatou e haamoe i ta te aposetolo Paulo faaararaa e “e ino te [peu faufaa] i te amuiraa iino ra,” ta tatou atoa mau peu faufaa e rave rahi matahiti i te maoro.—Korinetia 1, 15:33; MN.
17 E nehenehe te mau amuimuiraa iino e faatia i te varua o te ao ia haaviivii i to tatou feruriraa. (Korinetia 1, 2:12; Ephesia 2:2; Iakobo 4:4) E haamataro anaˈe ïa i to tatou puai haroaroaraa ia faataa eaha te mau amuimuiraa iino e e ape roa anaˈe ia ratou. (Hebera 5:14) Ahiri Paulo e ora ra i te fenua nei i teie tau, ia manaˈo outou eaha ta ˈna e parau i te hoê Kerisetiano e mataitai ra i te mau hohoˈa morare ore aore ra haavî uˈana aore ra te mau haa tuaro uˈana? E nafea oia e aˈo ai i te hoê taeae e tapi nei i te mau auhoaraa e te feia ê roa i nia i te Internet? Eaha to ˈna manaˈo i te hoê Kerisetiano e hauti nei e rave rahi hora i te maoro i te mau pere roro uira aore ra e mataitai nei i te afata teata aita râ ta ˈna e peu maitatai i te pae haapiiraa ia ˈna iho?—Korinetia 2, 6:14b; Ephesia 5:3-5, 15, 16.
A faaea noa i roto i te paradaiso pae varua
18. Na te aha e tauturu ia tatou ia puai noa i te pae varua?
18 E poihere tatou i to tatou paradaiso pae varua. Aita ˈtu e mea e au i te reira i roto i te ao i teie tau. E paraparau maitai atoa te feia tiaturi ore no nia i te here, te haapao maitai e te aau maitai ta te mau Kerisetiano e faaite ra te tahi i te tahi. (Ephesia 4:31, 32) E mea faufaa roa ˈtu â râ i teie nei ia aro tatou i te toaruaruraa. E tauturu te amuimuiraa maitai, te pure, e te mau peu maitatai i te pae haapiiraa ia tatou ia puai noa i te pae varua. E faaitoito te reira ia tatou ia faaû i te tamataraa atoa ma te tiaturi hope ia Iehova.—Korinetia 2, 4:7, 8.
19, 20. (a) Na te aha e tauturu ia tatou ia faaoromai? (b) Ua faataahia te tumu parau i muri nei no vai, e o vai te anaanatae atoa?
19 Eiaha roa ˈtu tatou e vaiiho i te feia e riri ra i ta tatou poroi bibilia ia haamǎtaˈu ia tatou e ia haaparuparu i to tatou faaroo. Mai te mau enemi i hamani ino na ia Ieremia, te feia o te aro ra ia tatou, te aro ra ïa ratou i te Atua. Eita ratou e upootia. Te na ô maira Iehova o te puai roa ˈtu â i to tatou mau enemi e: “Tiai ia Iehova; e faaitoito; e na ˈna e faaitoito mai i to aau ra: e tena na, e tiai â oe ia Iehova.” (Salamo 27:14) Maoti te tiairaa ia Iehova i aˈa-roa-hia i roto i to tatou aau, ia faaoti papu tatou eiaha roa ˈtu e faaea i te rave i te mea maitai. Ia tiaturi tatou e, mai ia Ieremia e ia Baruka, e ooti tatou ia ore tatou ia toaruaru.—Galatia 6:9.
20 E aroraa tamau te aroraa i te toaruaruraa no e rave rahi Kerisetiano. E faaû râ te mau taurearea i te mau fifi taa ê. E mau ravea maitatai atoa râ ta ratou. Ua faataa-roa-hia te tumu parau i muri nei no te feia apî i rotopu ia tatou. E mea anaanatae atoa te reira no te mau metua e no te feia paari pûpûhia atoa i roto i te amuiraa o te nehenehe e tauturu i te feia apî aˈe i roto i te amuiraa na roto i te parau, te hiˈoraa, e te turu-roa-raa ˈtu.
E nafea outou e pahono ai?
• No te aha tatou i ite ai e te vai ra te mau tupuraa faatoaruaru, e e imi tatou i ta vai tauturu?
• Mea nafea to Ieremia upootiaraa i nia i te toaruaruraa noa ˈtu e e hopoia fifi ta ˈna?
• Eaha te mea e ‘oaoa ˈi’ to tatou aau i roto atoa i te mau fifi?
[Uiraa haapiiraa]
[Hohoˈa i te api 18]
Ua manaˈo Ieremia e mea apî e mea ite ore roa oia no te riro ei peropheta
[Hohoˈa i te api 19]
A hamani-ino-atoa-hia ˈi oia, ua ite Ieremia e tei pihai iho Iehova ia ˈna “ei aito riariahia”