Uiraa a te feia taio

I muri aˈe i te diluvi, ua tuu Noa i rapaeau i te araka i te hoê uuairao o tei hoˈi atu e te “rau olive.” Ihea to te uuairao iteraa i te rau?

Te parau maira te Bibilia e “e rahi roa maira . . . te pape i nia iho i te fenua nei; e nina-atoa-hia te mau mouˈa teitei atoa i raro aˈe i te raˈi nei.” (Genese 7:19) A iti ai te pape diluvi, ua tuu Noa i te hoê uuairao e toru taime i te area hoê hebedoma. I te piti o te taime, ua hoˈi atu te uuairao e e “rau olive pofai-apî-hia tei te vaha: ite aˈera Noa e ua iti te pape i nia i te fenua ra.”—Genese 8:8-11.

Parau mau, eita e tia i teie mahana ia parau eaha te maoro i ninahia ˈi te hoê tuhaa taa maitai o te fenua, no te mea ua taui mau â te diluvi i te hohoˈa o te fenua. Peneiaˈe râ e mea huru maoro te ninaraahia te rahiraa o te mau tuhaa fenua, a pohe atu ai e rave rahi tumu raau. E au ra râ e ua ora mai te tahi pueraa, i nehenehe ai te mau ohi apî e tupu mai a iti ai te pape.

Teie ta te hoê titionare (The New Bible Dictionary) e parau ra no nia i te tumu olive: “Ia tâpûhia te tumu, e fa mai te mau ohi apî i nia i te aˈa, e nehenehe ïa e tupu mai e pae aˈe tumu apî. Mai tera atoa no te mau tumu olive o te fatata i te pohe.” E “mai te huru ra e e ore roa to ˈna ora e mou,” ia au ïa i te hoê buka ite rahi (The New Schaff-Herzog Encyclopedia of Religious Knowledge). I teie mahana, aita e taata i ite i te mau mea rii atoa, mai te avaava aore ra te anuvera o te pape diluvi. No reira, eita e tia ia ite papu i te faahopearaa o te pape i nia i te mau tumu olive e te tahi atu mau tumu raau.

Eita râ te tumu olive oviri e nehenehe e ora ˈtu i te toetoe, mai tei itehia i nia i te mau mouˈa teitei. E pinepine, e tupu te reira i te mau vahi i raro mai i te 1 000 metera i te teitei, e hau atu i te 10 teteri te anuvera au noa i reira. “No reira,” ia au i te hoê buka (The Flood Reconsidered), “ua nehenehe Noa e faaoti, maoti te rau pofai-apî-hia, e te mǎrô ra te mau peho i raro atu.” I to Noa tuu-faahou-raa i te uuairao hoê hebedoma i muri aˈe, aita te manu i hoˈi atu, e tapao faaite ïa e ua rahi atu â te tumu raau e te vai ra te mau vahi e tau ai te uuairao.—Genese 8:12.