Ia arataihia outou e te Atua ora

“Ia fariu . . . outou . . . i te Atua ora ra, o tei hamani i te raˈi, e te fenua, e te tai, e te mau mea atoa i roto ra.”—OHIPA 14:15.

1, 2. No te aha e tano ai ia farii ia Iehova mai “te Atua ora”?

 I MURI aˈe i to te aposetolo Paulo e Baranaba faaoraraa i te hoê taata, ua haapapu Paulo i te feia mataitai i Lusetera e: “E taata mau â . . . mâua, mai ia outou atoa na te huru, e te parau atu nei hoi i te evanelia ia outou, ia fariu ê atu outou i taua mau mea maamaa nei i te Atua ora ra, o tei hamani i te raˈi, e te fenua, e te tai, e te mau mea atoa i roto ra.”—Ohipa 14:15.

² E ere mau â Iehova i te hoê idolo ora ore, o “te Atua ora” râ! (Ieremia 10:10; Tesalonia 1, 1:9, 10) Hau atu â, o Iehova te Tumu o to tatou ora. “Oia iho . . . tei horoa mai i te ora, e te aho, e te mau mea atoa, i te mau mea atoa nei.” (Ohipa 17:25) Te anaanatae ra oia i te fanaˈoraa tatou i te ora i teie nei e a muri aˈe. Ua parau â Paulo e aita te Atua “i ere i te faaite ia ˈna iho, oia i hamani maitai mai, e te horoaraa mai i te ûa no nia i te raˈi ra, e te anotau auhune, e te faaîraa mai i to tatou aau i te maa e te oaoa.”—Ohipa 14:17.

3. No te aha tatou e nehenehe ai e tiaturi i te aratairaa a te Atua?

³ Te anaanataeraa te Atua i to tatou ora, e tumu ïa e tiaturi ai tatou i ta ˈna aratairaa. (Salamo 147:8; Mataio 5:45) Eita paha vetahi e farii i te na reira ia ite ratou i te hoê faaueraa bibilia aita ratou e taa maitai ra aore ra mea taotia ia hiˈohia. Ua itehia râ e e haerea paari ia tiaturi i ta Iehova aratairaa. Ei hiˈoraa: Noa ˈtu e aita te hoê Iseraela i taa i te ture e opani ra ia tapea i te hoê tino pohe, ua maitaihia oia i te faarooraa. A tahi, ua haafatata ˈtu â to ˈna auraro ia ˈna i te Atua ora ra; a piti, ua tauturu te reira ia ˈna ia ape i te mau maˈi.—Levitiko 5:2; 11:24.

4, 5. (a) Hou te tau Kerisetiano, eaha ta Iehova aratairaa no nia i te toto? (b) Mea nafea to tatou iteraa e no te mau Kerisetiano atoa te aratairaa a te Atua no nia i te toto?

⁴ Oia atoa no te aratairaa a te Atua no nia i te toto. Ua parau oia ia Noa eiaha te taata e amu aore ra e inu i te toto. E i roto i te Ture, ua faaite te Atua e i nia noa i te fata—no te faaoreraa hara—e tano ai ia faaohipa i te toto. Na roto i tera mau faatureraa i faaineine ai te Atua i te faaohiparaa hau ê i te toto—te faaoraraa i te taata maoti te hoo o Iesu. (Hebera 9:14) Oia, te faaite ra te aratairaa a te Atua i to ˈna tapitapi i to tatou ora e maitai. No nia i te Genese 9:4, ua papai te aivanaa Bibilia no te senekele 19 ra o Adam Clarke: “Te haapao-maitai-noa-hia ra teie faaueraa [ia Noa] e te mau Kerisetiano no te pae hitia o te râ . . . Aita e toto i amuhia na i raro aˈe i te ture, te faaite ra hoi te reira i te toto i manii na no te hara a to te ao; e i raro aˈe i te Evanelia eiaha te reira e amuhia, te faahohoˈa ra hoi te reira i te toto i manii no te faaoreraa hara.”

⁵ Te faahiti ra paha teie aivanaa i te evanelia, aore ra parau apî maitai, no nia ia Iesu, mai te tonoraa mai te Atua i ta ˈna Tamaiti e pohe no tatou, e ninii i to ˈna toto ia fanaˈo tatou i te ora mure ore. (Mataio 20:28; Ioane 3:16; Roma 5:8, 9) Te faahiti atoa ra te tatararaa i to muri aˈe faaueraa eiaha te mau pǐpǐ a te Mesia e amu i te toto.

6. Eaha tei faauehia i te mau Kerisetiano no nia i te toto, e no te aha?

⁶ Ua ite outou e ua horoa te Atua e mau hanere faatureraa na Iseraela. I muri aˈe i to Iesu poheraa, aita ta ˈna mau pǐpǐ i faahepohia ia haapao i tera mau ture atoa. (Roma 7:4, 6; Kolosa 2:13, 14, 17; Hebera 8:6, 13) I muri aˈe râ, ua hiti mai te hoê uiraa no nia i te hoê faaheporaa faufaa roa—te peritomeraa. E titauhia anei ia peritomehia te feia e ere i te ati Iuda o tei hinaaro e faufaahia i te toto o te Mesia, a faaite atu ai e tei raro aˈe noa ratou i te Ture? I te matahiti 49 T.T., ua haapao te tino aratai Kerisetiano i taua parau ra. (Ohipa pene 15) Tauturuhia e te varua o te Atua, ua faaoti atura te mau aposetolo e matahiapo e ua hope te peritomeraa faahepo e te Ture. Te vai noa ra râ te tahi mau titauraa a te Atua no te mau Kerisetiano. I roto i te  hoê rata na te mau amuiraa, ua papai te tino aratai: “E mea maitai i te [varua moˈa] e ia matou atoa nei . . . eiaha roa ei teimaha ê i tuuhia ˈtu i nia iho ia outou maori râ o teie nei mau mea tia. Eiaha outou e amu i te maa i afaihia i te idolo ra, e te toto, e te mea uumi-noa-hia ra, e eiaha hoi e faaturi: i faarue outou i te reira, e maitai ïa outou.”—Ohipa 15:28, 29; MN.

7. Eaha te faufaaraa no te mau Kerisetiano ‘eiaha e amu i te toto’?

⁷ Papu maitai e no te tino aratai, e mea faufaa roa i te pae morare ‘eiaha e amu i te toto’ mai eiaha atoa e faaturi aore ra e haamori i te idolo. E haapapuraa ïa e e ere te opaniraa i te toto i te ohipa hauti. Eita e tia i te mau Kerisetiano e haamori ra i te idolo aore ra e faaturi ra ma te ore e tatarahapa, ia “parahi i te basileia o te Atua”; ‘ta ratou tufaa, o te piti ïa o te pohe.’ (Korinetia 1, 6:9, 10; Apokalupo 21:8; 22:15) A tapao na i te taa-ê-raa: E nehenehe te tâuˈa ore i te aratairaa a te Atua no nia i te moˈaraa o te toto e hopoi mai i te pohe mure ore, area te faatura i te tusia o Iesu, i te ora mure ore ïa.

8. Eaha te faaite ra e ua haapao maite te mau Kerisetiano matamua i te aratairaa a te Atua no nia i te toto?

⁸ Mea nafea to te mau Kerisetiano matamua taaraa e peeraa i te aratairaa a te Atua no nia i te toto? A haamanaˈo na i ta Clarke i parau: “I raro aˈe i te Evanelia eiaha te reira e amuhia, te faahohoˈa ra hoi te reira i te toto i manii no te faaoreraa hara.” Te haapapu ra te Tuatapaparaa e ua haapao maite te mau Kerisetiano matamua i te reira. Ua papai Tertullien e: “A hiˈo na i te feia o tei ote ma te poihâ mâha ore, i roto i te hoê aroraa a te feia taputô, i te toto mahanahana â o te feia taparahi taata . . . no te rapaau i to ratou maˈi hopii.” Taa ê roa i te mau etene i amu na i te toto, ua parau Tertullien e “eita roa ˈtu [te mau Kerisetiano] e rave i te toto animara ei maa [na ratou] . . . No te tamata i te mau Kerisetiano, te tuu nei outou i te toti î roa i te toto i mua ia ratou. Ua ite maitai hoi outou e ua opanihia ratou ia amu i teie maa.” Oia, noa ˈtu te mau haamǎtaˈuraa haapohe, aita te mau Kerisetiano i amu i te toto. Mea faufaa roa no ratou te aratairaa a te Atua.

9. Hau atu i te oreraa e amu roa ˈtu i te toto, eaha atoa te haapaeraa i te reira?

⁹ E manaˈo paha vetahi e ua hinaaro noa te tino aratai e parau eiaha te mau Kerisetiano e amu aore ra e inu roa ˈtu i te toto e eiaha e amu i te iˈo aita te toto i faatahehia aore ra i te maa anoihia i te toto. Parau mau, tera te auraa matamua o ta te Atua faaueraa ia Noa. E ua faaue iho â te mau aposetolo i te mau Kerisetiano ‘eiaha e haapao i te mea uumi-noa-hia,’ mai te iˈo e toto to roto. (Genese 9:3, 4; Ohipa 21:25) Ua ite râ te mau Kerisetiano matamua e e ere te reira anaˈe. I te tahi taime, ua amuhia te toto no te rapaau i te maˈi. Ua parau Tertullien e no te rapaau i te maˈi hopii, ua ote te tahi mau etene i te toto mahanahana â. E faaohiparaa ê atu â paha to te toto no te rapaau i te maˈi aore ra no te haamaitai i te ea i te parauraa. No reira no te mau Kerisetiano, te haapaeraa i te toto, o te ore-atoa-raa ïa e faaohipa i te reira ei ravea “rapaauraa.” Ua tapea ratou i to ratou tiaraa noa ˈtu e e nehenehe ratou e pohe.

Te toto ei ravea rapaauraa

10. Eaha te tahi mau faaohiparaa i te toto i te pae rapaauraa, e eaha te uiraa e hiti mai?

¹⁰ I teie nei, mea matauhia te faaohiparaa i te toto ei ravea rapaauraa. I te omuaraa, e pâmuhia na te toto taatoa o tei iritihia mai roto mai i te hoê taata, tei faahereherehia, e tei horoahia na te hoê taata maˈi tei pepe paha i te tamaˈi. I muri aˈe, ua haapii te feia maimi i te vahi i te toto i roto i te mau tuhaa rahi. Maoti te pâmuraa i te tuhaa rahi, e nehenehe te mau taote e opere i te toto na te  taata maˈi e rave rahi, peneiaˈe te pape toto na te hoê taata pepe e te toropuru ura na te tahi atu. Ua faaite mai te mau maimiraa tamau e e nehenehe e iriti mai i roto i te hoê tuhaa rahi, te pape toto anei, e rave rahi tuhaa nainai aˈe o te horoahia na te taata maˈi e rave rahi atu â. Te rave-noa-hia ra teie mau faanahoraa, e te tapaohia ra te mau faaohiparaa apî i te mau tuhaa nainai aˈe. E nafea ïa te Kerisetiano? Ua faaoti papu oia eiaha roa ˈtu e farii i te pâmuraa toto, e aˈo râ to ˈna taote ia ˈna ia farii i te hoê tuhaa rahi o te toto, peneiaˈe te mau toropuru ura anoi ore. Aore ra ei ravea rapaauraa, e faaohipahia paha hoê noa tuhaa nainai aˈe o te hoê tuhaa rahi o te toto. Eaha ta te hoê tavini a te Atua e faaoti, a haamanaˈo ai oia e mea moˈa te toto e e faaora te toto o te Mesia i te taata i roto i to ˈna auraa rahi roa ˈˈe?

11. I te pae rapaauraa, eaha te tiaraa tano roa i nia i te toto ta te mau Ite i tapea maoro?

¹¹ E rave rahi matahiti aˈenei, ua faataa maitai te mau Ite no Iehova i to ratou tiaraa. Ei hiˈoraa, ua papai ratou i te hoê tumu parau tei piahia i roto i te hoê vea (The Journal of the American Medical Association o te 27 no Novema 1981; tei nenei-faahou-hia i roto i te buka rairai Nafea te toto ia faaora i to outou ora? api 27-9). * Ua faahiti tera tumu parau i te Genese, te Levitiko, e te Ohipa. Te na ôhia ra: “Noa ˈtu e aita teie mau irava i papaihia ia au i te huru parau a te toroa rapaauraa, te manaˈo nei te mau Ite e te opani nei teie mau irava i te pâmuraa i te toto taatoa, te mau toropuru ura anoi ore e te pape toto, e oia atoa te mau toropuru tea e te mau taoˈa tahi haaputua i te toto.” Ua parau te hoê buka 2001 (Emergency Care), i raro aˈe i te upoo parau “Te mau tuhaa o te toto,” e: “Tau tuhaa to roto i te toto: te pape toto, te mau toropuru ura e te tea, e te mau taoˈa tahi haaputua toto.” No reira, ia au i te mau tupuraa i te pae rapaauraa, e patoi te mau Ite i te mau pâmuraa i te toto taatoa aore ra hoê o to ˈna na tuhaa rahi e maha.

12. (a) Eaha te tiaraa i faaitehia no nia i te mau tuhaa nainai aˈe no roto mai i te mau tuhaa rahi o te toto? (b) Ihea e itehia ˈi te mau haamaramaramaraa hau no nia i te reira?

¹² Ua parau â te tumu parau rapaauraa e: “Aita te maramaramaraa faaroo o te mau Ite e opani roa ra ia faaohipa i [te mau tuhaa nainai aˈe] mai te albumine, te immunoglobuline, e te mau faaineineraa no te aro i te maˈi taheraa toto maoro; e mea tia e na te Ite taitahi e faaoti no ˈna iho e e nehenehe anei ta ˈna e farii.” Mai te matahiti 1981 mai â, ua faataa-ê-hia e rave rahi tuhaa rii (e mau tuhaa nainai aˈe taa ê no roto mai hoê o na tuhaa rahi e maha) ei ravea rapaauraa. No reira, te horoa ra Te Pare Tiairaa o te 15 no Tiunu 2000 i te mau haamaramaramaraa faufaa i roto i te tumu parau “Uiraa a te feia taio.” No te maitai o te mau mirioni feia taio no teie mahana, ua nenei-faahou-hia te pahonoraa i na api 29-31 o teie vea. Te vai ra te mau haamaramaramaraa e tatararaa tano o te tuea e te mau manaˈo faufaa roa i vauvauhia i te matahiti 1981 ra.

Te tuhaa a to outou manaˈo haava

13, 14. (a) Eaha te manaˈo haava, e eaha to ˈna taairaa e te toto? (b) Eaha te aratairaa no nia i te amuraa i te iˈo ta te Atua i horoa ia Iseraela, eaha râ paha te tahi mau uiraa i hiti mai?

¹³ Te titau ra tera mau haamaramaramaraa ia faaohipa tatou i to tatou aau, aore ra manaˈo haava. No te aha? E farii te mau Kerisetiano i te faufaaraa ia pee i te aratairaa a te Atua, i roto râ i te tahi mau tupuraa, e mea tia e na te taata taitahi e faaoti ia au i to ˈna manaˈo haava. Te manaˈo haava, o te ravea ïa i roto ia tatou no te feruri e no te faaoti i te mau mea, e pinepine te mau mea morare. (Roma 2:14, 15) Ua ite râ outou e mea taa ê te mau manaˈo haava. * Te parau ra te Bibilia e e “aau [aore ra manaˈo haava] paruparu” to vetahi, te auraa ïa e e manaˈo haava puai to vetahi ê. (Korinetia 1, 8:12) E ere hoê â haereraa i mua ta te mau Kerisetiano i roto i to ratou ite i te hinaaro e te manaˈo o te Atua, e i to ratou peeraa i te reira ia rave ratou i ta ratou mau faaotiraa. E nehenehe tatou e rave i te hiˈoraa o te mau ati Iuda e te amuraa i te iˈo.

 ¹⁴ Mea maramarama maitai te Bibilia, eita te hoê taata o te faaroo i te Atua e amu i te iˈo aita te toto i faatahehia. Mea faufaa roa te reira e i roto atoa i te hoê tupuraa ru i to te mau faehau Iseraela amuraa i te iˈo aita te toto i faatahehia, ua hape aore ra ua hara rahi ratou. (Deuteronomi 12:15, 16; Samuela 1, 14:31-35) E mau uiraa râ paha tei hiti mai. Ia taparahi te hoê Iseraela i te hoê mamoe, eaha te vitiviti e faatahe ai oia i te toto? E titauhia anei ia tâpû oia i te afii o te animara no te faatahe i te toto? E mea tia anei ia faatautau i te mamoe ma te tapea i na avae muri? Eaha te maoro? E nafea oia mai te peu e e puaatoro rahi? Ia oti atoa te toto i te faatahehia, e toe mai maa toto i roto i te iˈo. E nehenehe anei oia e amu i te iˈo? Na vai e faaoti?

15. Eaha te manaˈo o te tahi mau ati Iuda i te amuraa i te iˈo, eaha râ te aratairaa a te Atua?

¹⁵ A manaˈo na i te hoê ati Iuda itoito rahi e ui ra i tera mau uiraa. Ua manaˈo paha oia e mea paari aˈe ia haapae i te iˈo hoohia i te matete, mai te tahi atu ati Iuda o te haapae i te iˈo mai te peu e ua pûpûhia i te idolo. Ua amu paha te tahi atu mau ati Iuda i te iˈo i muri aˈe noa i te raveraa i te tahi mau peu no te tatara i te toto. * (Mataio 23:23, 24) Eaha to outou manaˈo i tera mau tupuraa rau? Hau atu â, i te mea e aita te Atua i titau i tera mau ohipa, ua tano anei ia papai te mau ati Iuda e rave rahi uiraa i te hoê apooraa rabi no te ite e nafea i roto i te tupuraa taitahi? I ravehia na teie peu i roto i te haapaoraa ati Iuda, te oaoa nei râ tatou e aita Iehova i faaue i te feia haamori mau ia imi eaha te faaoti no nia i te toto ma tera raveraa. Ua horoa te Atua i te aratairaa faufaa roa no nia i te taparahiraa i te animara viivii ore e te faataheraa i to ratou toto, tirara ˈtu ai.—Ioane 8:32.

16. No te aha te manaˈo o te mau Kerisetiano e taa ê ai i te fariiraa i te patia i te hoê tuhaa nainai aˈe o te hoê tuhaa rahi o te toto?

¹⁶ Mai tei faahitihia i na paratarafa 11 e 12, eita te mau Ite no Iehova e farii i te mau pâmuraa i te toto taatoa aore ra i na tuhaa rahi e maha—te pape toto, te toropuru ura, te toropuru tea, e te taoˈa tahi haaputua toto. E te mau tuhaa nainai aˈe ïa no roto mai i te hoê tuhaa rahi, mai te mau terumu e taoˈa paruru tino to roto o te aro i te hoê maˈi aore ra o te haapohe i te taero ophi? (A hiˈo i te api 30, paratarafa 6.) Ua manaˈo vetahi e e ere faahou iho â tera mau tuhaa nainai aˈe i te toto, eita ïa te reira e ô i roto i te faaueraa ‘eiaha e amu i te toto.’ (Ohipa 15:29; 21:25; api 31, paratarafa 2) Na ratou e amo i ta ratou hopoia. E turai te manaˈo haava o vetahi ê ia ratou ia patoi i te mau mea atoa no roto mai i te toto (animara aore ra taata), tae noa ˈtu i te hoê tuhaa nainai roa o te  hoê noa tuhaa rahi o te toto. * Te vai ra o te farii paha i te patia poroteina pape toto no te aro i te hoê maˈi aore ra no te haapohe i te taero ophi, e patoi râ paha ratou i te tahi atu mau tuhaa nainai aˈe. Hau atu â, hoê â paha ohiparaa ta te tahi mau raau no roto mai i te hoê o na tuhaa rahi e maha e ta te tuhaa toto taatoa, a faaoraora ˈtu ai i te tino, eita ïa e tano i te rahiraa o te mau Kerisetiano.

17. (a) E nafea to tatou manaˈo haava e tauturu mai ai no nia i te parau o te mau tuhaa nainai aˈe o te toto? (b) No te aha e ere ai i te ohipa hauti ia faaoti i roto i teie tuhaa?

¹⁷ Mea faufaa ta te Bibilia e parau ra no nia i te manaˈo haava ia rave tatou i tera mau faaotiraa. Te taahiraa matamua, ia ite ïa eaha ta te Parau a te Atua e aˈo ra e ia tutava i te haapii i to outou manaˈo haava i te reira. E nehenehe ïa outou e faaoti ia au i te aratairaa a te Atua, eiaha râ e ani i te tahi atu taata ia faaoti no outou. (Salamo 25:4, 5) No nia i te fariiraa i te mau tuhaa nainai aˈe o te toto, ua na ô vetahi e, ‘Tei to ˈu manaˈo haava noa, e ere ïa i te ohipa faufaa.’ E manaˈo tano ore teie. E ere no te mea e tei to tatou manaˈo haava noa, e ohipa faufaa ore ïa. E ere i te ohipa hauti. Inaha e nehenehe te taata e huru ê, e ere hoi hoê â manaˈo haava to tatou. O ta tatou ïa e taa ra i roto i te aˈoraa a Paulo no nia i te iˈo tei pûpûhia paha i te hoê idolo e tei hoohia i muri iho i te matete. E titauhia ia tapitapi te hoê Kerisetiano ia ore ‘e putaputa te aau [aore ra manaˈo haava] paruparu.’ Ia faaturori oia ia vetahi ê, e nehenehe oia e ‘haapohe i to ˈna taeae i pohe ai te Mesia’ no ˈna, e hara ˈtu ai i te Mesia. No reira, noa ˈtu e na te taata taitahi e faaoti i te parau o te mau tuhaa nainai roa o te toto, e mea maitai ia feruri maitai oia.—Korinetia 1, 8:8, 11-13; 10:25-31.

18. E nafea te hoê Kerisetiano e ape ai i te haamamû i to ˈna manaˈo haava ia faaoti oia no nia i te toto?

¹⁸ Te haapapu ra te tahi atu â manaˈo i te faufaaraa o te mau faaotiraa no nia i te toto, te faahopearaa ïa o te reira i nia ia outou. Mai te peu e e haapeapea to outou manaˈo haava haapiihia i te Bibilia ia rave outou i te hoê tuhaa nainai aˈe o te toto, eiaha e tâuˈa ore i te reira, eiaha atoa e haamamû atu no te mea noa e taata tei parau ia outou, “Ua tano oe; mea rahi tei na reira atoa.” A haamanaˈo, mea rahi roa te taata i teie mahana aita e tâuˈa ra i to ratou manaˈo haava, e aita te reira e hauti faahou ra, a tia ˈtu ai ia ratou ia haavare aore ra ia rave i te tahi atu mau ohipa iino ma te tatarahapa ore. E hinaaro roa te mau Kerisetiano e ape i tera huru.—Samuela 2, 24:10; Timoteo 1, 4:1, 2.

19. No te faaoti i te parau o te rapaauraa taaihia i te toto, eaha ta tatou e haamanaˈo na mua roa e tia ˈi?

¹⁹ I te pae hopea, te na ô ra te pahonoraa i nenei-faahou-hia i na api 29-31, e: “Mai te peu e e nehenehe te mau manaˈo e te mau faaotiraa ia au i te manaˈo haava e taa ê, o te auraa anei ïa e e ere i te ohipa faufaa? Eita. E ohipa faufaa teie.” Oia iho â, ua taaihia te reira i to tatou taairaa e “te Atua ora.” Tera anaˈe te taairaa o te aratai atu i te ora mure ore ra, niuhia i nia i te mana faaora o to Iesu toto i manii. A faahotu i te faatura rahi i te toto no te ohipa ta te Atua e rave nei maoti te reira—te faaoraraa i te taata. Ua papai Paulo ma te tano e: “Te tiaturiraa ore, e aore hoi e Atua i te ao nei. I teie nei râ, i te Mesia nei ia Iesu, o outou o te feia i te atea ê i mutaa ihora, ua faafatatahia mai ïa i te toto o te Mesia nei.”—Ephesia 2:12, 13.

[Nota i raro i te api]

Te haamanaˈo ra anei outou?

• Eaha te aratairaa no nia i te toto ta te Atua i horoa ia Noa, ia Iseraela, e i te mau Kerisetiano?

• No nia i te toto, eaha ta te mau Ite no Iehova e patoi roa?

• I roto i teihea auraa e tei te manaˈo haava o te taata e farii anei i te mau tuhaa nainai aˈe o te hoê tuhaa rahi o te toto, e ere râ i te auraa o te aha?

• No te rave i te mau faaotiraa, no te aha e mea maitai ai ia haamanaˈo na mua roa i to tatou taairaa e te Atua?

[Uiraa haapiiraa]

[Tapura i te api 17]

(Hiˈo i te papai)

TIARAA FAUFAA ROA I NIA I TE TOTO

TOTO TAATOA

▾ ▾ ▾ ▾

EITA E FARIIHIA Toropuru Toropuru Taoˈa tahi Pape toto

ura tea haaputua toto

NA TE ▾ ▾ ▾ ▾

KERISETIANO Tuhaa Tuhaa Tuhaa Tuhaa

E FAAOTI o te o te o te o te

toropuru toropuru taoˈa tahi pape toto

ura tea haaputua toto

[Hohoˈa i te api 15]

Ua faaoti te tino aratai “eiaha” te mau Kerisetiano ‘e amu i te toto’