“Ei atiraa aroha mau to outou ia outou iho”
“Ei atiraa aroha mau to outou ia outou iho”
“Ei atiraa aroha mau to outou ia outou iho, i te aroha taeae ra.”—ROMA 12:10.
1, 2. Eaha te taairaa ta te hoê mitionare no teie tau e ta te aposetolo Paulo i fanaˈo e to raua mau taeae?
I TE roaraa o ta ˈna taviniraa mitionare e 43 matahiti i te pae Hitia o te râ, ua matauhia Don no to ˈna huru mahanahana i nia i te feia ta ˈna i tavini. A faaoromai noa ˈi oia i to ˈna maˈi i te pae hopea, ua tere atu te tahi o tei haapii e oia i te Bibilia e mau tausani kilometera i te atea no te parau i pihai iho i to ˈna roˈi e,“Kamsahamnida, kamsahamnida!”—“Mauruuru, mauruuru!” na roto i te reo Korea. Ua haaputapû te atiraa aroha mau o Don i to ratou aau.
2 E ere i te mea otahi teie hiˈoraa o Don. I te senekele matamua, ua faaite te aposetolo Paulo i te aroha hohonu i te feia ta ˈna i tavini. Ua haapae Paulo ia ˈna iho. Noa ˈtu e e taata tiaturi papu oia, mea mǎrû atoa oia e te haapao, ‘mai te metua vahine e poihere ra i ta ˈna ra tamarii.’ Ua papai oia i te amuiraa i Tesalonia e: “No te rahi o to matou aroha ia outou, ua tia roa ia matou te horoa ˈtu i te evanelia a te Atua ia outou na, e eiaha hoi te reira anaˈe ra, o matou atoa iho ïa, no te mea ua riro outou ei here na matou.” (Tesalonia 1, 2:7, 8) I muri aˈe, i to Paulo faaiteraa ˈtu i te mau taeae no Ephesia e eita ratou e ite faahou ia ˈna, “oto anaˈe ihora ratou atoa, tauahi maira i nia i te aˈî o Paulo ua hôˈi maira ia ˈna.” (Ohipa 20:25, 37) Papu maitai, e ere noa te taairaa i rotopu ia Paulo e to ˈna mau taeae i te fanaˈoraa i te hoê â faaroo. Ei atiraa aroha mau to ratou ia ratou iho.
Te atiraa aroha mau e te aroha
3. Mea nafea te mau taˈo bibilia no atiraa aroha mau e aroha i taaihia ˈi?
3 I roto i te mau Papai, ua taai-piri-roa-hia te atiraa aroha mau, te aumauiui, e te aumihi i te huru maitai Kerisetiano teitei roa ˈˈe—te aroha. (Tesalonia 1, 2:8; Petero 2, 1:7) Mai te mau tuhaa o te hoê taiamani nehenehe, e ohipa amui teie mau huru maitatai o te Atua no te faatupu i te mau faahopearaa maitai. E haafatata ˈtu â te reira i te mau Kerisetiano eiaha noa ia ratou ratou iho i to ratou atoa râ Metua i te raˈi. No reira Paulo i faaitoito ai i to ˈna mau hoa faaroo: “Ei aroha haavare ore â. . . . Ei atiraa aroha mau to outou ia outou iho, i te aroha taeae ra.”—Roma 12:9, 10.
4. Eaha te auraa o te parau ra “atiraa aroha mau”?
4 E piti tuhaa to te taˈo Heleni ta Paulo i faaohipa no “atiraa aroha mau,” te hoê, o te auhoaraa ïa, e te tahi atu, o te here ïa. Mai ta te hoê aivanaa Bibilia e faataa ra, te auraa ïa, e “e tapaohia [te mau Kerisetiano] e te paieti, te hoê huru o te hoê utuafare î i te here, te tahoê roa, e te turu te tahi i te tahi.” Tera anei to outou manaˈo i to outou mau taeae e tuahine Kerisetiano? Ia parare te hoê huru mahanahana—te hoê taairaa piri—i roto i te amuiraa Kerisetiano e tia ˈi. (Galatia 6:10) No reira, te huri ra te hoê Bibilia a J. Phillips (The New Testament in Modern English) i te Roma 12:10 mai teie: “E aroha mahanahana mau to tatou ia tatou iho mai te mau taeae.” E te na ô ra te tahi atu Bibilia (Bible de Jérusalem) e: “A here te tahi i te tahi mai te mau taeae e tia ˈi.” Oia, e ere noa te here i rotopu i te mau Kerisetiano i te hopoia. Ma “te aroha taeae haavare ore ra,” e mea tia “ia aroha uˈana maite” tatou ia tatou iho “ma te aau porao ore.”—Petero 1, 1:22.
‘Haapiihia e te Atua i te aroha ia outou iho’
5, 6. (a) Mea nafea to Iehova faaohiparaa i te mau tairururaa nunaa rau no te haapii i to ˈna nunaa i te aroha Kerisetiano? (b) E nafea te taairaa i rotopu i te mau taeae e piri roa ˈtu â ˈi i te roaraa o te tau?
5 Noa ˈtu e i roto i teie ao, te ‘iti nei te hinaaro o te rahiraa o te taata,’ te haapii nei Iehova i to ˈna nunaa no teie tau ‘ia aroha ia ratou iho.’ (Mataio 24:12; Tesalonia 1, 4:9) Te horoa ra te mau tairururaa nunaa rau a te mau Ite no Iehova i te mau taime faahiahia no teie haamataroraa. I roto i teie mau tairururaa, e farerei te mau Ite o te fenua iho i te mau taeae no te mau fenua atea mai, e ua farii manihini e rave rahi i te mau tia no te mau fenua ê. I te hoê tairururaa i tupu aita i maoro aˈenei, ua haere mai vetahi no te mau fenua aita te taata i matau i te faaite roa ˈtu i to ratou huru aau. “I to teie mau tia tae-matamua-raa ˈtu, e mea taiâ roa ratou e te mamahu,” ta te hoê ïa Kerisetiano o tei tauturu i te pae o te nohoraa e faatia ra. “E ono noa râ mahana i muri aˈe i to ratou aroharaa ˈtu, ua tauahi e ua taˈi ratou e te mau taata farii te tahi i te tahi. Ua haaatihia ratou e te aroha Kerisetiano o te ore roa e moe ia ratou.” E nehenehe te faaiteraa i te aau farii maitai i to tatou mau taeae, noa ˈtu eaha to ratou oraraa, e faatupu i te mea maitai roa ˈˈe i roto i te manihini e te taata farii atoa.—Roma 12:13.
6 Mea faahiahia teie mau tupuraa i te mau tairururaa, e tupu atoa râ te taairaa piri roa ˈtu â ia tavini amui te mau Kerisetiano ia Iehova i te roaraa o te tau. Ia matau maitai tatou i to tatou mau taeae, e nehenehe tatou e au atu â i to ratou mau huru maitatai au mau—ta ratou parau mau, to ratou huru taata tiaturihia, to ratou taiva ore, hamani maitai, horoa maitai, faatura, aumihi, e to ratou pipiri ore. (Salamo 15:3-5; Maseli 19:22) Ua parau Mark o tei tavini ei mitionare i Afirika Hitia o te râ e, “E faatupu te haa-amui-raa e to tatou mau taeae i te hoê taairaa e ore e mutu.”
7. Eaha te titauhia maira no te fanaˈo i te aroha Kerisetiano i roto i te amuiraa?
7 No te titau e no te tapea i tera taairaa i roto i te hoê amuiraa, e mea tia ia haafatata ˈtu te mau melo te tahi i te tahi. Na roto i te haere-tamau-raa i te mau putuputuraa Kerisetiano, e haapuai tatou i te taairaa ta tatou e fanaˈo ra e to tatou mau taeae e tuahine. Na roto i te taeraa i te mau putuputuraa, te paraparauraa na mua ˈˈe e i muri aˈe e te apitiraa i te mau putuputuraa, e faaitoito e e faaaraara tatou te tahi i te tahi ‘ia rahi te aroha e te mau ohipa maitatai.’ (Hebera 10:24, 25) “Te haamanaˈo ra vau ma te au,” ta te hoê ïa matahiapo i te Hau Amui e faatia ra, “e i to ˈu tamarii-rii-raa, o to ˈu utuafare noa i rotopu i te mau utuafare hopea te faarue i te Piha a te Basileia, ma te fanaˈo maoro i te aparauraa auhoa e te faufaa.”
E hinaaro anei outou “ia mahora”?
8. (a) Eaha ta Paulo i hinaaro e parau i to ˈna faaitoitoraa i to Korinetia “ia mahora”? (b) Eaha ta tatou e nehenehe e rave no te paturu i te aroha i roto i te amuiraa?
8 No te faaite hope roa i tera aroha, e hinaaro paha tatou “ia mahora” to tatou aau. Ua papai te aposetolo Paulo i te amuiraa i Korinetia e: “Ua mahora noa to matou aau. Aore outou i apǐapǐ ia matou.” Ua faaitoito Paulo ia ratou “ia mahora” atoa ratou. (Korinetia 2, 6:11-13) E nehenehe atoa anei outou e “mahora” i to outou aroha? Eiaha outou e tiai e na vetahi ê e na reira. I roto i ta ˈna rata i to Roma, ua taai Paulo i te faufaaraa ia faahotu i te atiraa aroha mau i teie aˈoraa: “I te faaturaraa ˈtu [outou na mua] te tahi i te tahi.” (Roma 12:10; MN) No te faatura ia vetahi ê, e nehenehe outou e haere atu e farerei ia ratou i te mau putuputuraa. E nehenehe atoa outou e titau manihini ia ratou ia apiti ia outou i roto i te taviniraa aore ra i te faaineineraa o te hoê putuputuraa. E tauturu te na reiraraa ia rahi te atiraa aroha mau.
9. Eaha te mau taahiraa ta vetahi i rave no te riro ei hoa piri roa e te mau Kerisetiano? (A faaô mai i te tahi mau hiˈoraa o te fenua iho.)
9 E nehenehe te mau utuafare e te mau taata i roto i te amuiraa e “mahora” na roto i te haereraa e hiˈo te tahi i te tahi, peneiaˈe ma te tamaa amui, e ma te apiti amui i te mau ohipa maitatai. (Luka 10:42; 14:12-14) E faanaho Hakop i te tahi taime i te mau tamaaraa i rapaeau no te mau pǔpǔ iti. “To reira te feia apî e te feia paari, oia atoa te mau metua taa noa,” ta ˈna ïa e faatia ra. “E hoˈi te taata atoa i to ratou fare ma te mau haamanaˈoraa oaoa, e e piri roa ratou te tahi i te tahi.” Ei Kerisetiano, ia tutava tatou i te riro eiaha noa ei hoa faaroo ei hoa mau atoa râ.—Ioane 3, 14.
10. Eaha ta tatou e nehenehe e rave ia fifi tatou e to tatou mau taeae e tuahine?
10 I te tahi mau taime râ, e nehenehe te huru tia ore e haafifi i te atuaturaa i te auhoaraa e te aroha. Eaha ta tatou e nehenehe e rave? Na mua, e nehenehe tatou e pure no te mau taairaa maitai e to tatou mau taeae. E hinaaro te Atua ia faahoa ta ˈna mau tavini te tahi i te tahi, e e pahono oia i tera mau pure haavare ore. (Ioane 1, 4:20, 21; 5:14, 15) Ia ohipa atoa tatou ia au i ta tatou mau pure e tia ˈi. Te haamanaˈo ra Ric, te hoê tavini ratere i Afirika Hitia o te râ, i te hoê taeae etaeta e te fifi roa ia tapiri atu. “Aita vau i ape i te taeae, ua opua râ vau e haamatau maitai aˈe ia ˈna,” ta Ric ïa e faataa ra. “E taata etaeta te metua tane o te taeae. I muri aˈe i to ˈu taaraa i te mau tutavaraa puai ta te taeae i rave no te faaruru i teie tupuraa e to ˈna haere-rahi-raa i mua, ua faahiahia vau ia ˈna. Ua riro mâua ei hoa maitatai.”—Petero 1, 4:8.
A haamahorahora i to outou aau!
11. (a) Eaha te hinaarohia ia tupu te aroha i roto i te amuiraa? (b) No te aha te tapeapearaa i te faaite i te huru aau ia vetahi ê e tuino ai i te pae varua?
11 I teie tau, e rave rahi taata e ora ra ma te ore roa e faahoa i te hoê taata. Auê te peapea e! E ere mai te reira—e eiaha—i roto i te amuiraa Kerisetiano. E ere te aroha taeae mau i te aparauraa mǎrû noa e te peu maitai; e ere atoa i te faaite-hua-raa i te huru aau ia vetahi ê. Ia haamahorahora tatou i to tatou aau, mai ia Paulo i nia i to Korinetia, e ia faaite i to tatou mau hoa faaroo e te tapitapi mau ra tatou i to ratou maitai e tia ˈi. Noa ˈtu e eita iho â te taata atoa e imi i te taata aore ra e ere i te mea paraparau, e nehenehe te riroraa ei taata moemoe roa e tuino. Te faaara ra te Bibilia e: “O tei faataa ê ia ˈna ihora, te imi ra ïa i to ˈna ihora hinaaro; e mârô oia i te imi i te mau paari atoa ra.”—Maseli 18:1.
12. No te aha e mea faufaa roa ˈi te aparauraa maitai no te mau taairaa piri i roto i te amuiraa?
12 E mea faufaa roa te aparauraa haavare ore no te auhoaraa mau. (Ioane 15:15) E hinaaro pauroa tatou i te mau hoa ta tatou e nehenehe e faaite i to tatou mau manaˈo hohonu e huru aau. Hau atu â, e rahi noa ˈtu tatou i te matau te tahi i te tahi, e ohie noa ˈtu i te haamâha i te mau hinaaro o te tahi e te tahi. Ia tapitapi tatou i te maitai o te tahi e te tahi, te tauturu ra tatou ia rahi te atiraa aroha mau i roto i te amuiraa, e e ite tatou e e parau mau ta Iesu: “E mea maitai i te horoa ˈtu i te rave mai.”—Ohipa 20:35; Philipi 2:1-4.
13. Eaha ta tatou e nehenehe e rave no te faaite e e aroha mau to tatou i to tatou mau taeae?
13 Ia maitai roa ˈˈe to tatou aroha, e titauhia ia faaite tatou i te reira. (Maseli 27:5) Mai te peu e e mea mau to tatou aroha, e faaite iho â to tatou hohoˈa mata, e nehenehe atu ai e turai i te aau o vetahi ê ia pahono mai. Ua papai te taata paari e: “Te oaoa nei te aau ia maramarama te mata.” (Maseli 15:30) E paturu atoa te mau ohipa ferurihia i te atiraa aroha mau. Noa ˈtu e aita hoê aˈe taata e nehenehe e hoo mai i te aroha mau, e nehenehe te hoê ô horoahia ma te haavare ore e riro ei mea faufaa roa. E nehenehe teie mau mea atoa—te hoê tareta, te hoê rata, e ‘te parau parauhia i te taime mau ra’ e faaite i te aroha hohonu. (Maseli 25:11; 27:9) Ua oti anaˈe tatou i te faahoa ˈtu ia vetahi ê, e mea tia ia tapea tatou i te reira ma te faaite tamau i te aroha pipiri ore. I te mau taime hinaarohia iho â râ, e hinaaro tatou e tauturu i to tatou mau hoa. Te na ô ra te Bibilia e: “E aroha mai â te taua i te mau mahana atoa ra, i fanau mai râ te taeae no te anotau e ati ai ra.”—Maseli 17:17.
14. Eaha ta tatou e nehenehe e rave mai te peu e e au ra e eita te tahi taata e pahono mai i to tatou aroha?
14 Ma te manaˈo tano, eita tatou e nehenehe e tiai ia haafatata ˈtu tatou i te taata atoa i roto i te amuiraa. Te vai ra iho â vetahi ta tatou e haafatata aˈe i te tahi atu. No reira mai te peu e e au ra eita te tahi taata e faahoa ˈtu ia outou mai ta outou e hinaaro, eiaha e faaoti oioi e e fifi to outou aore ra to tera taata. E eiaha e tamata i te faahepo i te taata ia faahoa ˈtu ia outou. Mai te peu e e faaite noa outou i te auhoaraa mai ta te taata e faatia, e tauturu outou ia vai matara noa te uputa no te mau taairaa piri roa no a muri aˈe.
“Ua mauruuru roa vau ia oe”
15. Eaha te faahopearaa o te haapopouraa, aore ra te ereraa i te reira, i nia ia vetahi ê?
15 Eaha râ paha Iesu i te oaoa i te faarooraa i to ˈna bapetizoraa i te mau parau mai te raˈi mai: “Ua mauruuru roa vau ia oe”! (Mareko 1:11) Ua faarahi atu â paha teie faaiteraa i te farii maitai i to Iesu tiaturi e te here ra to ˈna Metua ia ˈna. (Ioane 5:20) Ma te peapea, eita roa ˈtu vetahi e faaroo i tera haapopouraa no ǒ mai i te feia ta ratou e faatura ra e e here ra. Te faahiti ra Ann e: “Mea rahi te feia apî mai ia ˈu aita to ratou fetii e farii ra i ta ratou mau tiaturiraa Kerisetiano.” Te na ô atoa ra oia e: “I te fare, e faaroo noa matou i te faahaparaa. E peapea roa matou.” Mai te peu râ e e riro ratou ei melo o te amuiraa, e ite ratou i te mahanahana o te hoê fetii paturu e te hamani maitai i te pae varua—te mau metua tane e metua vahine, e te mau taeae e tuahine i roto i te faaroo.—Mareko 10:29, 30; Galatia 6:10.
16. No te aha e ere ai i te mea maitai ia faaite i te haerea faahapa i nia ia vetahi ê?
16 I roto i te tahi mau taˈere, e mea varavara te mau metua, taata paari, e orometua haapii i te faaite i to ratou farii maitai i te feia apî ma to ratou aau atoa, no te mea te manaˈo ra ratou e e faariro paha tera umereraa i te feia apî ei mau taata mauruuru noa aore ra teoteo. E nehenehe atoa tera feruriraa e ohipa i nia i te mau utuafare Kerisetiano e te amuiraa. No nia i te hoê oreroraa aore ra te tahi atu tutavaraa, e nehenehe te feia paari e parau e: “Mea au roa, e nehenehe râ ta oe e haamaitai atu â!” Aore ra na roto i te tahi atu ravea, e nehenehe atoa ratou e parau i to ratou mauruuru ore i nia i te hoê taurearea. I to ratou na reiraraa, te tiaturi ra e rave rahi e te turai nei ratou i te feia apî ia haamaitai roa ˈtu â i to ratou ite. E pinepine râ e faahopearaa ê to teie raveraa, i te mea e e nehenehe te feia apî e faarue aore ra e manaˈo e eita e maraa ia ratou.
17. No te aha tatou e imi ai i te mau ravea no te haapopou ia vetahi ê?
17 Eiaha râ e haapopou hou te aˈoraa noa. E paturu te haapopouraa haavare ore i te atiraa aroha mau i roto i te utuafare e te amuiraa, a faaitoito atu ai i te feia apî ia imi i te aˈoraa a te mau taeae e tuahine aravihi. No reira eiaha e vaiiho i te taˈere ia haapii e nafea tatou e haa ˈi i nia ia vetahi ê, e “ahu” anaˈe râ “i te huru taata apî o tei poietehia ia au i te hinaaro o te Atua i roto i te parau-tia e te taiva ore mau.” A haapopou mai ia Iehova.—Ephesia 4:24, MN.
18. (a) E te feia apî, e nafea outou e hiˈo ai i te aˈoraa a te feia paari e tia ˈi? (b) No te aha te feia paari e pure ai e e feruri ai e nafea ratou e aˈo ai?
18 Area te feia apî ra, eiaha e faaoti e ia aˈo te feia paari ia outou, aita ïa ratou e au ra ia outou. (Koheleta 7:9) E ere roa ˈtu! Te turai-mau-hia ra ratou e to ratou tapitapi e to ratou here hohonu ia outou. Aita anaˈe, no te aha ratou e tutava ˈi i te paraparau atu ia outou? No te mea ua ite ratou i te faahopearaa o te mau parau, e pinepine e horoa rahi te feia paari—te mau matahiapo o te amuiraa iho â râ—i te taime no te feruri e no te pure hou a aˈo ai, i te mea e te hinaaro noa ra ratou e rave i te mea maitai.—Petero 1, 5:5.
‘Ua î Iehova i te aroha’
19. No te aha te feia o tei inoino e nehenehe ai e fariu ia Iehova ra no te turu?
19 Ua horoa paha te mau tupuraa au ore i te tahi mau taata i te manaˈo e e aratai noa te faaiteraa i te atiraa aroha mau i te tahi atu inoino. E titauhia te itoito e te faaroo puai ia haamahorahora faahou ratou i to ratou aau ia vetahi ê. Eiaha roa ˈtu râ ratou e haamoe e ‘aita Iehova i atea ê atu ia tatou atoa nei.’ Te titau manihini maira oia ia haafatata ˈtu ia ˈna. (Ohipa 17:27; Iakobo 4:8) Te taa atoa ra ia ˈna to tatou mǎtaˈu ia mauiui tatou, e te fafau ra oia e turu mai e e tauturu mai oia ia tatou. Te haapapu maira te fatu salamo ra o Davida e: “Te fatata nei Iehova i te feia aau paruparu ra; e te faaora nei oia i te taata aau taiâ.”—Salamo 34:18.
20, 21. (a) E nafea tatou e ite ai e e nehenehe tatou e fanaˈo i te hoê taairaa piri roa e o Iehova? (b) Eaha te titauhia ra no te fanaˈo i te hoê taairaa piri roa e o Iehova?
20 O te auhoaraa piri roa e o Iehova te taairaa faufaa roa ˈˈe ta tatou e nehenehe e atuatu. E nehenehe mau anei râ? E. Te faaite ra te Bibilia e e mea piri roa te mau tane e vahine parau-tia i to tatou Metua i te raˈi. Ua faahereherehia ta ratou mau parau mahanahana ia tiaturi tatou e e nehenehe atoa tatou e haafatata ˈtu ia Iehova.—Salamo 23, 34, 139; Ioane 16:27; Roma 15:4.
21 E maraa i te taata taitahi ta Iehova mau titauraa no te taairaa piri roa e o oia. “O vai, e Iehova, te tiahapa i to oe ra sekene?” ta Davida ïa i ui. “O te taata haerea piˈo ore, o tei haapao i te parau-tia ra; o tei parau i te parau mau i roto i to ˈna ra aau.” (Salamo 15:1, 2; 25:14) A ite noa ˈi tatou e te faahotu ra te taviniraa i te Atua i te faahopearaa maitai e te fanaˈo ra tatou i ta ˈna aratairaa e ta ˈna paruru, e ite tatou e ‘ua î Iehova i te aroha.’—Iakobo 5:11.
22. Teihea huru taairaa ta Iehova e hinaaro ra ia fanaˈo to ˈna nunaa?
22 Auê tatou i te haamaitaihia e te hinaaro ra Iehova e faatupu i te hoê taairaa e te mau taata tia ore! Eiaha anei ïa tatou e faaite i te atiraa aroha mau te tahi i te tahi? Maoti te tauturu a Iehova e nehenehe ai tatou taitahi e faaite e e fanaˈo i te atiraa aroha mau, te huru o to tatou huitaeae Kerisetiano. I raro aˈe i te Basileia o te Atua, e fanaˈo te taata atoa i te fenua nei i teie aroha e a muri noa ˈtu.
E nehenehe anei outou e faataa?
• Teihea huru tupuraa e vai ra i roto i te amuiraa Kerisetiano?
• E nafea tatou taitahi e nehenehe ai e paturu i te atiraa aroha mau i roto i te amuiraa?
• E nafea te haapopouraa haavare ore e paturu ai i te aroha Kerisetiano?
• E nafea to Iehova aroha e tauturu ai e e turu ai ia tatou?
[Uiraa haapiiraa]
[Hohoˈa i te api 23]
E ere noa te here i rotopu i te mau Kerisetiano i te hopoia
[Hohoˈa i te mau api 24, 25]
E nehenehe anei outou e “mahora” i to outou aroha?
[Hohoˈa i te api 26]
E taata faahapa anei outou aore ra faaitoito?