Hau atu i te hoê noa hautiraa

MEA au na te tamarii ia hauti. Teie râ “e ere te reira i te hoê ohipa faufaa ore aore ra aita e auraa,” ta te buka Te tamarii e paari ra (Beretane) ïa e faataa ra. “O te niu paha i reira te rahiraa o te tupuraa o te ite o te hoê tamarii i te paturaahia.” Na roto i te hautiraa, e haapii te tamarii i te faaohipa i to ratou feruriraa maitai, i te taa i te mau mea e haaati ra ia ratou, e i te au ia vetahi ê.

I te maharaa aore ra i te paeraa o te matahiti, e haamata te tamarii i te rave i te tiaraa o te taata paari i roto i ta ratou mau hautiraa. I te hoê taime, ua faahiti na Iesu i te parau no te mau tamarii e hauti ra. Ua hinaaro vetahi e hauti te “faaipoiporaa,” ua hinaaro te tahi atu e hauti te “hunaraa,” e mai ta te mau tamarii e pinepine i te rave, e tatamaˈi ratou ratou iho no te mea eita vetahi e hinaaro e apiti atu no te hauti. (Mataio 11:16, 17) E nehenehe tera mau huru hautiraa o tera mau tiaraa faufaa roa e mau i roto i te feruriraa o te tamarii e tupu ra i te rahi.

Te hauti ra te mau tamarii o te mau hohoˈa i nia i teie api i te tiaraa o te hoê orometua haapii bibilia e o te hoê piahi. Aita raua e faatere ra i te hoê haapiiraa bibilia mau, te manaˈo râ o te tufaraa i te poroi bibilia, e mea papu ïa i roto i to raua feruriraa. E e haapiiraa faufaa roa teie, i te mea e ua faaue Iesu i ta ˈna mau pǐpǐ atoa ia faariro i te taata ei pǐpǐ e ia haapii ia ratou ia haapao i te mau mea atoa ta ˈna i haapii atu.—Mataio 28:19, 20.

E nehenehe te mau metua o te mau tamarii e faahua ra i te faatere i te mau haapiiraa bibilia, i te orero i te parau, aore ra i te poro i tera fare, i tera fare e oaoa rahi. Parau mau, e pee te mau tamarii ia ite ratou i ta te taata paari e haaati ra ia ratou e rave ra. Te faaite ra te mau hautiraa bibilia a te mau tamarii e te arataihia ra ratou i roto i ‘te haapiiraa e te aˈo a te Fatu.’—Ephesia 6:4.

Te hinaaro ra Iehova ia apiti te mau tamarii i roto i te haamoriraa mau. Ua parau oia ia Mose ia haaputuputu atoa mai i “te tamarii” ia taiohia te Ture. (Deuteronomi 31:12) Mai te peu e e pee roa te mau tamarii apî, e itehia ïa te reira i roto i ta ratou mau hautiraa. E te tamarii e hauti mai e e tavini oia na te Atua, te rave ra ïa oia i te taahiraa matamua no te riro mai ei tavini.